Read Tobelo O YOHANIS 21 Bible Online

O YOHANIS 21 - Tobelo bible

O YOHANIS 21

¹Ipaha gënanga o Yesus womahimatoko Ai diri wohigalioli o Tiberias ma Taagaka iwinöninïkika. Hoko nënanga idadi:

²O wange moiuku, o Simon Petrus, o Tomas iwiahoko o Hago, o Natanel o Kanaino o Galilea matonakoka, o Zebedeus aingoha-ngohaka, deʼ yahinoto iwinöninïki o Yesus mahomoa ima toomuino.

³ Watemo o Simon Petrus mahomoaika, ”Ngohi tomau toiki totagoko o nawoko.” ”Ngomi minïki,” önanga yotemo unangika. De önanga yoharene o ngotiroko de ima jobo. Mä hutu moi yahaiwatikuku gënanga önanga okia-kiaua yadäene.

⁴Maöraha o wange muläenge ipotoka, o Yesus womaokoino o dowongioka, mä onanga iwihiorikua o Yesus gënanga.

⁵O Yesus watemo onangika, ”Ngoha-ngohaka, naga de nianawokoka?” ”Koiwa,” önanga yohaluhu.

⁶ O Yesus watemo onangika, ”Niodotumo niahoma niangotiri manirakuku, aha ngini niamäke o nawoko.” Daha o homa gënanga önanga yodotumo, mä yakunua yatauroli hababu hoko gënanga mangöe o nawoko o homa magoronaka.

⁷Winöninïki o Yesus wihohininga witemo o Petrusika, ”Gënanga ma Jou!” Maöraha o Simon Petrus woihene gënanga ma Jou, ünanga womahinoa aibaju (hababu ünanga woma bajua) daha womangumo o akereuku.

⁸Iwinöninïki mahomoa yongotiri iwinïki o dudungiha, de yatauru manga homa iomanga de o nawoko. Onanga yokurutikaua de o dudungu, done hometere o ratuhu moi dika.

⁹Maöraha önanga o ngotiroka de youti, önanga yamäke naga o uku mangaboho de dokengoka o nawoko iharongika deʼ o roti.

¹⁰O Yesus watemo onangika, ”Abeika niaoino o nawoko o ngai muruo naga daha nia tago-tagokino.”

¹¹O Simon Petrus kawoharene o ngotiroko, daha yaliliara mangahoma o dudungiha. O homa gënanga iomanga de o nawoko ma ago-agomo; mata-mata naga o ngai o ratuhu moi de moritoa de hange. De ngaro hoko gënanga mangöe, manga homa ikakihua.

¹²O Yesus wätemo onangika, ”Niaino niol̄omo.” Ka o nyawa moiö de koiwa iwinöninïki yobaraniua iwileha, ”Bapa o nagona?” Hababu önanga ihiöriki Unanga ma Jou.

¹³Ahao o Yesus woma hitigi onangika, wal̄ë o roti gënanga, deʼ wahidöaka onangika. Unanga wadiai hoko genangoli de o nawoko gënanga.

¹⁴Nenangala hara mahangeoka o Yesus womahimatoko Ai diri iwinöninïkika ipahaino Unanga iwihi wango o honengino.

¹⁵Iböto önanga yol̄omo, o Yesus witemo o Simon Petrusika, ”Simon, o Yona aingohaka, boteka ngonahi iholoi nohi hininga Ngohi ngaro de önanga nënanga ihi hininga Ngohi?” ”Itiai, Jou,” o Petrus wohaluhu, ”Jou nohihiöriki Ngohi toni hininga Jou.” O Yesus wotemo unangika, ”Napaliara Ahi duba mangoha-ngohaka.”

¹⁶Mahinotoka o Yesus wileha unangika, ”Simon, o Yona aingohaka, boteka ngona nohi hininga Ngohi?” ”Itiai, Jou,” o Petrus wohaluhu, ”Jou nohihiöriki ngohi toni hininga Jou.” O Yesus witemo unangika, ”Napaliara Tongohi ahi duba-duba.”

¹⁷Ma hangeoka o Yesus wileha unangika, ”Simon o Yona ai ngohaka, boteka ngona nohi hininga Ngohi?” O Petrus aihininga ihuha hababu o Yesus wileha hi ädono hara mahange. De o Petrus wohaluhokali, ”Jou, Jou nohiöriki hagala mata-mata. Jou nohihiöriki ngohi toni hiningi Jou!” Daha o Yesus witemo unangika, ”Napaliara Ahi duba-duba.

¹⁸Igoungu itiai ahi demo nënanga: Maöraha ngona nomagöikahi, ngona mahirete noma bulu anigoronaino, deʼ noiki okiaika dika ngona animau. Mä nako ngona aha initimonoka ngona nohi töakika anigiama, deʼ o nyawa mahomoa iniliko ngona deʼ iniao ngona okiaika ngona noluku noiki.”

¹⁹(De o demo gënanga o Yesus wohimatoko sarakia o Petrus aha wohonenge mangale wihimulia ma Jou Madutu.) I böto de gënanga o Yesus witemo o Petrusika, ”Nohi nïki Ngohi!”

²⁰ Maöraha o Petrus womaiduli, ünanga wimäke aiporetoka winöninïki wihohininga o Yesus. (Unanga wogogere imadatekuku de o Yesus maöraha yol̄omo deʼ wileha Unangika, ”Jou, o nagona aha i ni hininga dorou?”)

²¹Wimäke ünanga, o Petrus wileha o Yesusika, ”Jou, sarakia de ünanga nënanga?”

²²O Yesus wohaluhu, ”Demo ma ade Ngohi tomau ünanga wogogogere wowango hiädono Ngohi toböa, gënanga tongonaua ani datoro. Mä ngona, nohi nïki Ngohi!”

²³Yodogerewoto o abari nënanga iwinöninïki o Yesus manga boluoka, winöninïki gënanga aha wohonengua. Enahioko o Yesus wotemoua winöninïki gënanga aha wohonengua, duga-duga: ”Demo maade Ngohi tomau ünanga wogogogere wowango hiädono Ngohi toböa, gënanga tongonaua ani datoro.”

²⁴Unanga wohidöaka o hakihi mangale idodadadi-idodadadi gënanga. Unangö mawatulihoka. Deʼ ngone hohiöriki okia wohi demoka gënanga itiai.

²⁵Ma ngöeohi o hali mahomoa wadiai o Yesus. Demo maade mata-mata gënanga hatulihi hatëngo-tëngo, ngohi tamäo o dunia nënanga yodimoaka honoa buku mata-mata aha yato tuli-tulihi gënanga.