Read Tobelo O YOHANIS 3 Bible Online

O YOHANIS 3 - Tobelo bible

O YOHANIS 3

¹Naga womatëngo o agama mabaluhu o Farisioka manyawa, ai romanga o Nikodemus.

²O hutu moiuku ünanga waika o Yesusika deʼ wotemo, ”Bapa Guru, ngomi mihiöriki Bapa wonihuloko ma Jou Madutu. Hababu moiua yakunu yodiai ihëra-hëranga hokä Bapa nodiai, nako ma Jou Madutu witomotekua ünanga.”

³O Yesus wibaluhu, ”Nongaku, o nyawa moiua yakunu yodadi ma Jou Madutu aiumati, nako ünanga womakil̄au wohigalioli.”

⁴”Sarakia o nyawa yobaluhoka yakunu imakil̄au ihigalioli,” o Nikodemus wato o Yesusika, ”Kaiyakunu ünanga wowohamoli ngoiayo amimämata magoronaika deʼ mihingohakoli?”

⁵O Yesus wibaluhu, ”Igoungu itiai ahidemo nënanga: nako o nyawa imakil̄aua o akerino deʼ ma Jou Madutu ai Womahino, o nyawa gënanga yakunua yodadi ma Jou Madutu aiumati.

⁶Nanga röehe o nyawa inahikil̄au enagënanga nanga dimono, mä de madodagi nanga rohani inahikil̄au de ma Jou Madutu ai Womaha.

⁷Uha nohëranga nako Ngohi totemo: ngini mata-mata kiani nimakil̄au nihigalioli.

⁸O hidal̄oko iwuwu kiaika ënanga yakaika; ngone hoihene toënanga maruruhu, mä hanäkoua kiaino iböa deʼ kiaika yakaika. Hoko genangö o nyawa yakil̄au ma Jou Madutu ai Womaha.”

⁹O Nikodemus woleha, ”Sarakia gënanga yakunu idadi?”

¹⁰O Yesus wohaluhu, ”Ngona o Israeloka manga guru; de sarakia ngona nohiorikua?

¹¹Nongaku: ngomi mihi ade-ade okia ngomi mianäko, deʼ ngomi mihidöaka o hakihi okia ngomi miamäkeoka; mä ngini nioluku niatarima tongomi miahakihi.

¹²Ngini ningakua nako Ngohi tohiade-ade nginika mangale o duniaino mahali; sarakia ngini yakunu ningaku, nako Ngohi tohiade-ade nginika mangale o horoga mahali?

¹³Koiwahi o nyawa moiö yodoa o horogail̄e, mahomoa de ge Unanga woutioka o duniauku, enagënanga o Nyawa manga Ngohaka.

¹⁴ Hokä imatero o Musa wohidöaka o dodiha tabaga de o gota mabooto o tonaka makokakahaka, hokogenangoli o Nyawa manga Ngohaka kiani iwihidoa,

¹⁵hupaya mata-mata iwingaku Unangika yamäke o wowango madutu deʼ ikakali.”

¹⁶Karana ma Jou Madutu hokogënanga wadora o nyawa o duniaka nënanga, hiädono Unanga wohidöaka Ai Ngohaka woma tëngo-tëngoka, hupaya moi-moi o nyawa iwingaku Unangika yobinahaua, mä yamäke o wowango madutu deʼ ikakali.

¹⁷Hababu ma Jou Madutu wihidingoto Ai Ngohaka wahukumua o dunia nënanga, mä wohihalamati ënanga.

¹⁸O nyawa iwingaku Unangika yahukumua. Mä o nyawa iwingakua ma Jou Madutu wahukumoka, hababu Unanga iwingakua ma Jou Madutu ai Ngohaka womatëngo-tëngoka.

¹⁹Unanga iwihiributu de mahohol̄e nënanga: O dararono gënanga iböaka o duniaka, mä o nyawa iholoi yoigo o huhutu ngaro de o dararono, hababu manga manarama önanga itorou.

²⁰O nyawa yododiai o dorou, yodohata o dararonika; de yoluku yaika o dararonika, hupaya manga manarama itotorou uha yamäke.

²¹Mä o nyawa yamote-moteke ma Jou Madutu aimau, yaika o dararonika hupaya idadi itararono okia yodiaioka gënanga naga imamoteke de ma Jou Madutu aimau.

²²Ipaha de gënanga o Yesus deʼ iwinöninïki yoiki o Yudeaika. Unanga wogogere dokengoka öraha muruono naga madekana dede önanga deʼ waohiki.

²³ Oraha gënanga o Yohanis iwihingohamuahi o buika. Unanga waohiki o Ainonoka, ikurutikaua de o Salim, hababu dokengoka naga o akere iwöe. O nyawa yowöe yoböa unangika, deʼ unanga waohiki önanga.

²⁵Yamuruono naga o Yohanis iwinöninïki yomuläenge imateke ributu de o Yahudioka manyawa mangale o debi-debini madatoro.

²⁶Onanga yoiki o Yohanisika, de yato, ”Bapa Guru, bote Bapa kanohiningahi, o nyawa de ngona Bapa o Yordan ma Ngairi mahonongaka gënanga, Bapa nomihimatokoka ngomino kahuruono? Orahanënanga Unangö waohiki, deʼ mata-mata o nyawa yoiki Unangika!”

²⁷O Yohanis wohaluhu, ”O nyawa yamäkeua okianaga, nako ma Jou Madutu wahidöakua onangika.

²⁸ Ngini mahirete ni ihenoka Ngohi totemo, ’Ngohi o Koano Wohihohalamatiua. Ngohi ihi huloko tihihiraino Unanga.’

²⁹O ngoheka mokawi-kawingi naga tomünanga aminauru wokawi-kawingi. O nauru wokawi-kawingi aidodiawo gënanga duga-duga womaoko witiniail̄e deʼ woihene, deʼ unanga womörene nako woihene o nauru wokawi-kawingi ai ilingi. Hokogenangö de ngohi. Orahanënanga ahihininga duru i sanangi.

³⁰Unanga duru kiani iholoi, wihiamo-amoko, deʼ ngohi kai dogo tokuranga.”

³¹Iböa-böa dakuku iholoi yatilakuru mata-mata. Iböa-böa o duniaino yaetongo o dunia manyawa, deʼ ihidemo mangale o dunia mahali. Iböa-böa dakuku iholoi yatilakuru mata-mata.

³²Unanga wotemo mangale okia wamäkeoka deʼ woihenoka, mä o nyawa moiua yangaku Ai hakihi.

³³O nyawa yangaku Ai hakihiika gënanga, yongaku ma Jou Madutu wotiai.

³⁴Hababu o nyawa ma Jou Madutu wahuloko ihingahu ma Jou Madutu aidemo, karana ma Jou Madutu ai Womaha mata-mata iwihidöakoka unangika.

³⁵ O Ama wihininga ai Ngohaka, deʼ wihilapahioka hagala o kuaha Unangika.

³⁶O nyawa iwingaku-ngaku o Ngohakika gënanga, aha yamäke o ngango madutu de ikakali. Mä o nyawa iwihingounua ma Ngohakika gënanga yamäkeua o ngango. Onanga wahukumu ma Jou Madutu kahiado-adonika.