Read Tobelo O YOHANIS 5 Bible Online

O YOHANIS 5 - Tobelo bible

O YOHANIS 5

¹Iböto de gënanga, naga o Yahudioka manga wange ma ago-agomo, o Yesus woiki o Yerusalemika.

²O Yerusalem ”O Duba ma Ngorana” madatekoka naga o akere malupanga moi, de o Ibranioka manga demo ihiromanga Betesda. Genangoka naga o kamari motoa.

³De o kamari-kamari gënanga manga ngöe o nyawa yopopanyake imaiduoka; naga yopiloko, yosuga deʼ naga yolugu. [Onanga mata-mata yödamä o akere malupangoka iluluaka.

⁴Hababu naga mamoi-mamoi ma Jou aimalaekat iuti o akere malupanguku gënanga deʼ yaluluaka ma akere. Deʼ o nyawa yopopanyake madodihiraka yowohama o lupanguku gënanga maöraha o akere iluluaka aha yotogumu o panyake okia dika önanga yadäene.]

⁵O ngïoka gënanga naga o nauru womatëngo wopopanyake o taongo moruange de tufange madekana.

⁶O Yesus wimäke ünanga woma iduoka dokengoka, deʼ wohiöriki ünanga duru kaidekana wopanyake; o Yesus wileha unangika, ”Noigo ngona notogumu?”

⁷O nyawa wopopanyake gënanga wohaluhu, ”Bapa, moiua o nyawa nenangoka ihinoa ngohi o akere malupanguku maöraha ma akere iluluaka. Deʼ maöraha ngohitameta o akere malupangika, o nyawa mahomoa yohiraka imanoa.”

⁸O Yesus witemo unangika, ”Nomomiki, nagoraka anitikara deʼ noma dagi.”

⁹De öraha gënanga dika o nyawa gënanga wotogumoka. Unanga wagoraka aitikara deʼ womadagi. O hali gënanga idadi o Yahudioka manga Puji mawangeoka.

¹⁰ Hababu gënanga o Yahudioka manyawa yokokuaha, iwitemo o nyawa ahao wotogumino gënanga, ”O wange nënanga o Puji ma wange. Ngona iyakunua nao anitikara.”

¹¹Mä o nyawa gënanga wohaluhu, ”O nyawa wohihitogu-togumu ngohi kangano wohihuloko ngohi tagoraka ahitikara deʼ toma dagi.”

¹²Yoleha önanga, ”O naguna gënanga wonihuloko ngona nagoraka ani tikara deʼ noma dagi?”

¹³Mä o nyawa wotogu-togumoka gënanga wohiorikua o nyawa nagona, hababu o Yesus womahihangoka o nyawa yowöe-wöe manga hidogoronaka gënanga.

¹⁴Maduruino o Yesus imamäke de o nyawa gënanga ma Jou ai Tau magoronaka, deʼ witemo unangika, ”Oraha nënanga ngona notogumoka. Uha nobaradohali, hupaya uha naohana o hali iholoi itorou.”

¹⁵De woiki o nyawa gënanga, daha wohingahu o Yahudioka manyawa yokokuahaika o Yesus wihitogumu.

¹⁶Deʼ mahababu gënanga, önanga ihidailako iwianiaya o Yesus, hababu Unanga wahitogumu o nyawa o Yahudioka manga Puji mawangeoka.

¹⁷Mä o Yesus watemo onangika, ”Ahi Ama hokogenangika womanarama hiädono öraha nënanga, deʼ Ngohiö tomanarama.”

¹⁸Ai demo-demo gënanga idadi o Yahudioka manyawa yokokuaha duru ihidailako la iwitoma. Onanga yodiai gënanga, igoungua hababu Unanga watilakuru o agama madatoro mangale o Yahudioka manga Puji mawange, mä hababu Unanga wotemo ma Jou Madutu gënanga ai Ama; mangarati Unanga womahitero Ai diri de ma Jou Madutu.

¹⁹O Yesus wohaluhu hagala o nyawaika gënanga hokonënanga, ”Ningaku, o Ngohaka gënanga okia-kiaua wakunu wodiai de Ai kuaha mahirete. Unanga duga-duga wodiai okia Unanga wamäke de wadiai ma Ama. Hababu okia ma Ama wadiai hokogenangö ma Ngohaka wadiai.

²⁰Hababu ma Ama wihininga ma Ngohaka deʼ wihi matoko Unangika mata-mata wadiaioka mahirete. De ma Ama aha wihimatoko Unangika o manarama-o manarama iholoi i lamokoli, hiädono mata-mata yohëranga.

²¹Ma Ama gënanga wahi momiki o nyawa yohonengoka, deʼ wahidöaka önanga o ngango madutu deʼ ikakali; hokogenangoli ma Ngohaka wahidöaka o ngango ikakali hagala o nyawaika yoigo yahidöaka o ngango.

²²Ma Ama mahirete wahihakimua o nagona dika. Hababu mata-mata kuaha mangale wahihakimi wihilapahioka Ai Ngohakika.

²³Ma Ama wodiai gënanga, hupaya mata-mata o nyawa iwihoromati ma Ngohaka hokä önanga iwihoromati ma Ama. O nyawa iwihoromatiua ma Ngohaka, iwi horomatiuaö, o Ama wihulo-huloko ma Ngohaka.

²⁴Igoungu itiai Ahiade-ade nënanga: O nyawa yohininga hagala Ahidemo deʼ iwingaku Unangika wohihulo-huloko Ngohi, o wowango madutu deʼ ikakali kato önanga. Onanga aha yahukumua; önanga yolapahioka de o honenge deʼ yamäke o wowango.

²⁵Ningaku: Aha iböa maöraha — de yadonoka maöraha — o nyawa yohonengoka aha yoihene Ai ilingi ma Jou Madutu ai Ngohaka. Deʼ o nyawa yoihe-ihene aha yowango.

²⁶Hokä o Ama mahirete o ngango matiti, Unanga wihidadi Ai Ngohaka o ngango matitioli.

²⁷Unanga wihidöakoka Ai Ngohakika o haku mangale wahihakimi hababu Unanga o Nyawa manga Ngohaka.

²⁸Uha ngini nihëranga niihene o hali nënanga, hababu maöraha aha iböa o nyawa mata-mata yohone-honengoka yoihene Ai ilingi,

²⁹ daha yohupu o lungunino. O nyawa yododiaioka o oa aha yomomiki mangale o ngango. Mä o nyawa yododiaioka o dorou, aha yomomiki mangale yahukumu.”

³⁰”Ngohi takunua todiai okianaga imoteke Ahi hininga mahuka mahirete. Ngohi duga-duga tahihakimi imamoteke de ma Jou Madutu aipareta. Deʼ ahiputuhu Ngohi iadili, hababu Ngohi tamotekua Ahi hininga mahuka mahirete, mä Ai hininga mahuka o Ama wohihulo-huloko Ngohi.

³¹Demo hohiade Ngohi mahirete tohidöaka o hakihi mangale Ahi diri, o hakihi gënanga yakunua yangaku.

³²Mä naga o nyawa mahomoa ihidöaka o hakihi mangale Ngohi, deʼ Ngohi tohi öriki manga hakihi gënanga itiai.

³³ Ngini nia hidingoto nia huhuloko o Yohanisika, deʼ unanga wohi döakoka o hakihi madiai mangale Ngohi.

³⁴O hali nënanga Ngohi totemoka, Ngohi tolingirua o hakihi o nyawaino, mä hupaya ngini inihihalamati.

³⁵O Yohanis gënanga hokä o hilo iwango deʼ i tararono madararono. Oraha mahuhutulu ngini nimörene nio dahongo o dararono gënanga.

³⁶Mä ahi hakihi Ngohi i holoi ilamoko de o Yohanis ai hakihi. Okia öraha nënanga Ngohi todiai, enagënanga o manarama wohihi döakoka o Ama Ngohino, manyonyata o Ama wohi huloko Ngohi.

³⁷ Deʼ o Ama wohi huloko Ngohiö, wohi döaka o hakihi mangale Ngohi. Ngini ni ihenuahi Ai ilingi, ekola de niwi mäke uahi Ai rupa.

³⁸Ai demo niagogonua niahininga magoronaka, hababu ngini nihingakua Ngohino, Unanga wohihuloko.

³⁹Ngini nima dotoko Ma Jou Ai Demo ma Buku madol̄a, hababu niatobote de mangëkomo gënanga ngini niamäke o ngango madutu deʼ ikakali. Deʼ Ma Jou Ai Demo ma Buku mahirete gënanga ihidöaka o hakihi mangale Ngohi.

⁴⁰Mä ngini nioluku niaino Ngohino la niamäke o ngango ikokakali.

⁴¹Ngohi tolingirua o horomati o nyawaino.

⁴²Ngohi tininako ngini. Ngohi tinihiöriki ngini niwihiningaua ma Jou Madutu niahininga magoronaka.

⁴³Ngohi toböa de Tongohi Ahi Ama aikuaha, ngaro hokogënanga ngini nihitarimaua Ngohi. Mä nako o nyawa mahomoa yoböa de manga kuaha mahirete, ngini niaigo niatarima önanga.

⁴⁴Sarakia ngini iyakunu ningaku, nako ngini nilingiri o higiriri niadodiawo o nyawaino, deʼ nimahiahaua nialingiri o horomati ma Jou Madutu woma Tëngo-tëngokaino?

⁴⁵Uha niatobote Ngohi aha tinihihowono ngini Ahi Ama aihimangoka. Aha winihihowono ngini ganga o Musa, ünanga ngini niwingano-nganono.

⁴⁶Demo hiade ngini niwingaku o Musaika, ngini aha nihi ngaku Ngohino, hababu mangale Ngohi ünanga watulihi.

⁴⁷Mä nako ngini niangakua okia o Musa watulihoka, sarakia ngini iyakunu ningaku okia Ngohi totemoka?”