Read Tobelo O YOHANIS 6 Bible Online

O YOHANIS 6 - Tobelo bible

O YOHANIS 6

¹Iböto de gënanga o Yesus womaidulu o Galilea ma Taaga mahonongaika, yahetongo Tiberias ma Taaga.

²De womahi ädono dokengoka, o nyawa manga ngöe iwininïki Unanga, hababu önanga yamäkeoka ihëra-hëranga wadiai, de wahitogumu o nyawa manga ngöe yopopanyake.

³O Yesus wodoa o doporonil̄e, daha Unanga wogogeruku genangoka de iwinöninïki.

⁴Oraha gënanga, o Yahudioka manga Wange ma Amoko o Paskah itigioka.

⁵Maöraha o Yesus womalega iwikilolitino, Unanga wamäke o nyawa de kamanga doduduono yoböa Unangika. De Unanga witemo o Filipusika, ”Kiaika ngone hakunu hoija o inomo, hupaya mata-mata o nyawa nënanga yakunu yol̄omo?” (

⁶O Yesus wotemo hokogënanga hababu Unanga womau wiuji o Filipus; hababu Unanga mahirete wohiorikoka okia aha wodiai.)

⁷O Filipus wohaluhu, ”O roti maija o tiwi o haäka o ratuhu hinoto aha imakadonua, o nyawa manga ngöe nënanga, ngaroka o nyawa moi duga-duga yamäke mahuhutulu dika.”

⁸Womatëngo iwinöninïki o Yesus mahomoa enagënanga o Andreas, o riadodoto de o Simon Petrus wato,

⁹”Nenangoka naga o ngohaka o nauru womatëngo airoti motoa de o nawoko o ngai hinoto. Mä okia mamangarati gënanga mangale o nyawa manga ngöe nënanga?”

¹⁰O Yesus wato, ”Niahuloko o nyawa mata-mata gënanga yogogeruku.” O ngï gënanga naga o momo koharubu, hö hagala o nyawa gënanga yogogeruku o momoka — mata-mata naga mudukua yaribuhu motoa o nyawa o nau-nauru dika.

¹¹Dahao o Yesus wal̄ë o roti gënanga, wosukur ma Jou Madutuika. Iböto de gënanga Unanga wahikodoku o roti gënanga o nyawa yowöe-wöeika. Ipaha Unanga wahikodoku o nawoko gënanga, de önanga yaol̄omo koyamatakua.

¹²Ipaha mata-mata yol̄omo hiädono yapunuhu, o Yesus watemo iwinöninïkika, ”Niatoomu maboloi o inomo gënanga; uha hiädono naga iumo.”

¹³Daha önanga yatoomu o karaja ngimoi de hinoto iomanga, maboloi o inomo, o roti motoa yaol̄omo o nyawa yowöe-wöe gënanga.

¹⁴Maöraha o nyawa yowöe-wöe yamäke ihëra-hëranga o Yesus wadiai, önanga yato, ”Igoungu, ne Unanga o Nabi hingano-nganono woböa o duniaino!”

¹⁵O Yesus wohiöriki önanga yomau yaino iwiributu Unanga wodadi toönanga manga koano. Mangale gënanga woiki Unanga womahiditoko madaera dema dodoporonokaika.

¹⁶Muläenge yohutu, o Yesus iwinöninïki youti o taagauku.

¹⁷De yoharene o ngotiri yatoaka o taaga gënanga yoiki mahonongaika yameta o Kapernaum mabereraika. O wange yohutuoka, mä o Yesus ma kowoböauahi onangika.

¹⁸Oraha gënanga o taaga imuläenge ilolopaka hababu o rato.

¹⁹Yohidete done hokilo motoa ekola butanga magurutika, önanga iwimäke o Yesus woböa manga ngotirika womadagi o akere mal̄okuika. Onanga duru yohawana.

²⁰O Yesus watemo onangika, ”Uha nihawana, nënanga Ngohi!”

²¹Deʼ manga hininga imore-morene önanga iwibuhuku Unanga woharene o ngotiruku magoronail̄e, deʼ oraha gënanga dika manga ngotiri önanga gënanga imahi adonoka o ngï manga metaika.

²²Yarehino mawange o nyawa manga ngöe kayogogogerohi o taaga mahonongaka, yamäke hokokangano duga-duga naga ngotiri moi dokengoka. Onanga ihiöriki o Yesus iwinöninïki yopahaka de o ngotiri gënanga, enahioko o Yesus wonïkua.

²³Daha ino o ngotiri muruono naga o Tiberiasino imaleotino imahi tigi-tigiha de o ngï kiaka o nyawa yowöe-wöe gënanga yol̄omo o roti ma Jou wosukur de i böto.

²⁴Maöraha o nyawa yowöe-wöe gënanga iwimäke o Yesus de iwinöninïki genangoka koyaiwa, onangö yoharene o ngotiroko deʼ yoiki o Kapernaumika iwilingiri o Yesus.

²⁵Maöraha o nyawa manga ngöe-ngöe gënanga imakamäke de o Yesus o taaga mahonongaka, önanga iwileha Unangika, ”Bapa Guru, hokokia Bapa nimahiädono nenangino?”

²⁶O Yesus wohaluhu, ”Igoungu, ngini nihilingiri Ngohi igoungua hababu ngini nimangaratioka madodagi ihëra-hëranga Ngohi tadiai, mä karana ngini niol̄omoka hiädono inipunuhu.

²⁷Uha nimanarama mangale niamäke o inomo iyakunu imata de imela. Nimanarama mangale niamäke o inomo iyakunua iamiri deʼ inihi döaka o ngango madutu deʼ ikakali. O inomo gënanga aha winihi döaka o Nyawa manga Ngohaka nginika, hababu Unanga witedeoka ma Jou Madutu o Ama.”

²⁸Daha önanga iwileha Unangika, ”Ngomi kiani midiai okia la mia moteke ma Jou Madutu aihininga mahuka?”

²⁹O Yesus wohaluhu, ”Nënanga ma Jou Madutu woigo nginino: niwingaku Unangika wihulo-huloko ma Jou Madutu.”

³⁰Onanga yato, ”Nako hokogënanga,” ”manyonyata okia iyakunu Bapa nomihidöaka hupaya ngomi miamäke deʼ miningaku Ngonaika Bapa? Okia Bapa aha nodiai?

³¹ Miaete de miatohora ngomi yol̄omo o manna o tonaka makokakahaka, hokä Ma Jou Ai Demo ma Buku magoronaka itulihoka, ’Unanga wahidöaka önanga yol̄omo o roti o horogauku.’ ”

³²Daha o Yesus watemo onangika, ”Igoungu, kiani ningaku; o Musaua, mä Tongohi ahi Ama winihidöaka nginika o roti ma gou-goungu o horogauku.

³³Hababu o roti winihidöa-döaka ma Jou Madutu ganga Unanga o horogaka de wouti deʼ wohidöaka o wowango o nyawaika o duniaka.”

³⁴Onanga yato, ”Bapa,” ”nomihidöaka ngomino hokogenangika o roti gënanga.”

³⁵”Ngohi o roti ihidöaka o ngango,” o Yesus wato onangika. ”O nyawa yoböa Ngohino aha yahahinokaua kahiado-adonika. Deʼ o nyawa ihingaku Ngohino aha manga kiriti madudungokaua kahi ado-adonika.”

³⁶”Mä hokä Ngohi totemoka nginika, ngaro ngini nihimäkeoka Ngohi, ma ngini ningakua.

³⁷O nyawa mata-mata o Ama wohidöaka Ngohino, aha yoböa Ngohino. Ngohi tatilaua o nagona honanga yoböa Ngohino.

³⁸Hababu Ngohi touti o horogaka de tauku, tamotekua Ahi hininga mahuka mä Ai hininga mahuka Unanga wohihulo-huloko Ngohi.

³⁹Deʼ nenangala Ai mau Unanga wohihulo-huloko Ngohi: hupaya o nyawa wohihidöa-döakoka Ngohino, kamoiö de yohihangua; mä hupaya Ngohi tahimomiki önanga o Kiamati ma Wangeoka.

⁴⁰Hokonenangala, Tongohi ahi Ama Ai mau: Hupaya mata-mata iwimäke o Ngohaka deʼ iwingaku Unangika, o ngango madutu deʼ ikakali katoönanga, deʼ Ngohi tahiwangokali o Kiamati ma Wangeoka.”

⁴¹O Yahudioka manyawa muläenge yokurubungu o Yesusika, hababu Unanga wato, ”Ngohi o roti o horogauku iuti”.

⁴²Onanga yato, ”Koigoungua o Yesus nënanga, o Yusuf aingohaka? Ngomi mianäko ngoi ayo de Ai ama! Sarakia Unanga yakunu wotemo Unanga wouti o horogaka de wauku?”

⁴³Daha o Yesus wätemo onangika, ”Uha nikurubungu.

⁴⁴O nyawa moiö de koiwa yakunu yoböa Ngohino, nako o Ama wohihulo-huloko Ngohi, wä aoua önanga Ngohino; deʼ o nagona yoböa, aha tahimomiki o Kiamati ma Wangeoka.

⁴⁵ O Nabi-nabi manga Buku magoronaka naga itulihi hokonënanga, ’Mata-mata o nyawa aha wädotoko ma Jou Madutu.’ Hoʼ mata-mata o nyawa iwihi gihene o Ama deʼ imadotoko Unangino, yoböa Ngohino.

⁴⁶Gënanga koiwa mamangarati naga o nyawa iwimäkeoka o Ama. Duga-duga Unanga woböa-böa ma Jou Madutuino, wimäkeoka o Ama.

⁴⁷Igoungu, nihiöriki: O nyawa yongaku-ngaku, o ngango madutu deʼ ikakali katoönanga.

⁴⁸Ngohi o roti inihidöaka o ngango.

⁴⁹Niaete de niatohora yol̄omo o manna o tonaka makokakahaka deʼ onanga kayohonenge dika.

⁵⁰Mä hokogenangua o roti iuti-uti o horogauku; o nyawa yaol̄omo o roti gënanga aha yohonengua.

⁵¹Ngohi o roti iuti-uti o horogauku — o roti ihidöa-döaka o ngango. O nyawa yol̄omo o roti nënanga aha yowango kahiado-adonika. Roti Ngohi aha tahidöaka ganga Tongohi ahi akeme mangale o dunia mawowango.”

⁵²Yoihene gënanga, o Yahudioka manyawa imateke ributu moi de moi. ”Sarakia o nyawa nënanga wakunu wonahidöaka Ai akeme ngoneino la haol̄omo?” önanga yato.

⁵³Daha o Yesus watemo onangika, ”Igoungu, ningaku: Nako ngini niaol̄omua o Nyawa manga Ngohaka Ai akeme deʼ niaokerua Ai awunu, ngini aha igou-goungu niwangoua.

⁵⁴O nyawa yaol̄omo Tongohi Ahiakeme deʼ yaokere Tongohi ahiawunu o wowango madutu deʼ i kakali katoönanga, deʼ Ngohi aha tahimomiki o Kiamati ma Wangeoka.

⁵⁵Hababu Ahi akeme Tongohi o inomo magoungu, deʼ Ahi awunu Tongohi, o akere magoungu.

⁵⁶O nyawa yaol̄omo Tongohi Ahi akeme deʼ yaokere Ahi awunu, yotatapu kamoi dede Ngohi, deʼ Ngohi de önanga.

⁵⁷O Ama wowango-wango gënanga, wohihuloko Ngohi deʼ Ngohiö towango o Amaino. Hokogenangö o nyawa yaol̄omo Tongohi ahiakeme, aha yowango Ngohino.

⁵⁸Nënanga o roti iuti-uti o horogauku: o roti hokä yaol̄o-ol̄omua niaete de niatohora. Karana yaol̄omo iböto o roti gënanga, önanga kayohonenge dika. Mä o nyawa yaol̄omo o roti nënanga, aha yowango kahi ado-adonika.”

⁵⁹Mata-mata gënanga o Yesus wotemo maöraha Unanga wädotoko o pupuji matauoka o Kapernaum mabereraka.

⁶⁰Yoihene iböto Ai demo-demo o Yesus gënanga, manga ngöe iwinöninïki manga hidogoronaka yotemo, ”O dodötoko nënanga duru i tubuhoholi. O nagona yakunu yoihene!”

⁶¹O Yesus mahirete wahiöriki iwinöninïki yokurubungu o hali gënanga. Ma Unanga wätemo, ”Okia ngini niahininga yadäenua karana o demo-demo gënanga?

⁶²Sarakia idadi done, nako ngini niwimäke o Nyawa manga Ngohaka wodoa wolio Ai ngï i hira-hirail̄e?

⁶³Yadiai o nyawa yowango genangala ma Jou Madutu ai Womaha. O nyawa manga kuata koiwa mafaidä. O demo-demo Ngohi tohiadonoka nginika nënanga, ganga ma Jou Madutu ai Womaha mademo-demo de o demo ihidödöa-döaka o ngango.

⁶⁴Ngaro hokogënanga nagaö niahidogoronaka ngini yongakua.” (O Yesus wohiorikoka mahirahi o nagona honanga yoluku yongaku, deʼ o nagona aha iwihipongono.)

⁶⁵Daha o Yesus wätemo wohigalioli, ”Hababu gënanga, Ngohi tinihi ngahuoka nginika o nyawa kamoiua yakunu yoböa Ngohino, nako o Ama kowahigumal̄aua.”

⁶⁶Muläenge öraha gënanga manga ngöe iwinöninïki iwimal̄a Unanga, deʼ yolukoka iwinïki Unanga.

⁶⁷Daha o Yesus waleha iwinöninïki yangimoi de yahinotoika, ”Boteka nginiö nimau nihimal̄a Ngohi?”

⁶⁸ O Simon Petrus wato Unangika, ”Jou,” ö nagonaika ngomi aha mioiki? Anidemo Jou ihidöaka o ngango madutu deʼ ikakali.

⁶⁹Ngomi duru mingakuoka de mihigoungu Jou Ngona o huhuloko i tebi-tebini ma Jou Madutuino.”

⁷⁰O Yesus wohaluhu, ”Mode koigoungua tini iriki ngini o nyawa iningimoi de nihinoto nënanga? Ngaro hoko gënanga, womatëngo nia hidogoronaka ngini naga o womaha madorou!”

⁷¹O Yesus ai dumutu enagënanga o Yudas o Simon Iskariot ai ngohaka. Hababu ngaro o Yudas o nyawa womatëngo o Yesus iwinöninïki yangimoi de yahinoto manga hidogoronaka, ünanga aha wosetiaua o Yesusika.