Read Tobelo O YOHANIS 7 Bible Online

O YOHANIS 7 - Tobelo bible

O YOHANIS 7

¹Ipaha de gënanga o Yesus woiki okiaika honanga o Galilea matonakoka. Unanga wöluku o Yudea madaeraika hababu o Yahudi manyawa yokokuaha yomau iwitoma Unanga.

² Oraha gënanga itigioka o Wange ma Amoko o Tau-tau ihikatu o Hoka-hoka.

³O Yesus airoriadodoto iwitemo o Yesusika, ”Namal̄a, o ngï nënanga deʼ noiki o Yudeaika, hupaya ininöninïki yakunu yamäkeö Ani manarama.

⁴Koiwa naga o nyawa aha yaiunu okia Unanga wadiai, nako Unanga woigo wodadi duru iwinäko. Nako Ngona nadiai hagala parakara hokogënanga, o dunia ingodumu kiani ihiöriki!” (

⁵Hababu Ai roriadodoto mahireteö iwingakua Unangika.)

⁶O Yesus wato onangika, ”Maörahauahi mangale Ngohi,” ”mä mangale ngini, öraha mahigetongo iyakunu.

⁷O dunia nënanga yakunua inidohata ngini. Mä Ngohi igoungu ihidohata o dunia, hababu Ngohi hokogenangika tohidaaere o duniaika mangale mamanarama itotorou.

⁸Nioiki ngini mahirete o rameangika gënanga. Ngohi toikua hababu maöraha yadonuahi mangale Ngohi.”

⁹Hoko gënanga o Yesus wätemo Ai roriadodotika, deʼ Unanga kawogogogere o Galileaka.

¹⁰Ai roriadodoto yopahaka yoiki o rameangika gënanga, o Yesus womatëngo woiki kawomahihanga o nyawa ma iwihiorikua.

¹¹O rameanga madekana gënanga, o Yahudioka manyawa yokokuaha iwilingiri Unanga deʼ yoleha-leha, ”Kiaka Unanga?”

¹²O nyawa manga ngöe muläenge imakokuhudu mangale Unanga. Naga utu yotemo, ”Unanga o nyawa maoa.” Nagaö yotemo, ”Kowali! Unanga wahirehene o nyawa manga ngöe.”

¹³Mä o nyawa moiua yobarani yoade-ade ihitotararonika mangale Unanga hababu önanga yämodongo o Yahudi manyawa yokokuahaika.

¹⁴O rameanga magogiriaka, o Yesus wowohama ma Jou ai Tau magoronaika, daha muläenge wädotoko.

¹⁵O Yahudioka manyawa yokokuaha yohëranga duru deʼ yato, ”Sarakia o nyawa nënanga yakunu wohiöriki hokogënanga mangöe, enahioko Unanga komaiwa wohakola?”

¹⁶O Yesus wohaluhu, ”Ngohi todotoko nënanga igoungua Ahi dodötoko, mä aidodötoko Unanga wohihulo-huloko Ngohi.

¹⁷O nyawa yoigo yamoteke ma Jou Madutu aimau aha ihiöriki okia ino Ahi dodötoko iböa ma Jou Madutuino ekola Ngohino mahirete.

¹⁸O nyawa ihidöaka manga dodötoko mahirete yolingiri o horomati mangale manga diri mahirete. Mä o nyawa yolingiri o horomati mangale Unanga wähulo-huloko, o nyawa gënanga yorikoto, de o tipu koiwa onangoka.

¹⁹Mode koigoungua o Musa wohi döaka ma Jou Madutu hagala aipareta-pareta nginika? Mä niahidogoronaka ngini koiwa yamoteke o pareta-pareta gënanga. Yadodoa ho ngini niato nihitoma Ngohi?”

²⁰O nyawa yowöe-wöe gënanga yohaluhu, ”Ngona initogohanga! O nagona yomau initoma Ngona?”

²¹O Yesus wohaluhu, ”Duga-duga o manarama moi Ngohi tadiai o Puji mawangeoka, deʼ ngini nihëranga.

²² O Musa wohidöakoka nginika o datoro mangale o huna — ngaro o huna gënanga imoteke madiai ma ahali o Musainoua, mania dimo-dimono yohira-hiraino kiaka o Musa ma koiwiwahi. Karana gënanga, o Puji mawangeö ma ngini kaniahuna o nyawa.

²³ Nako ngini niadiai gënanga hupaya uha niatilakuru o Musa aidatoro mangale o huna, yadodoa ho ngini nihingamo Ngohino hababu Ngohi tahitogumu o nyawa manga röehe mata-mata o Puji mawangeoka?

²⁴Uha niahihakimi o nyawa imoteke okia niamäke, mä i moteke de ma adili.”

²⁵Ma duruino naga yamuruono naga o Yerusalem manyawa yotemo, ”Mode koigoungua ne Unanga manyawa magogiria iwilingiri yato iwitoma?

²⁶Niwi lega Unanga wotemo-temo o nyawa yowöe-wöe manga himangoka, deʼ madagahanga koiwa deʼ okia-kiaua naga yotemo Unangika! Boteka nanga balu-baluhu ngone ihi örikoka Unanga nënanga o Koano Wohi hohalamati?

²⁷Mä nako o Koano Wohi hohalamati gënanga woböa, o nyawa moiuaö ihiöriki kiaino Ai ahali! Enahioko ngone hohiöriki o nyawa nënanga Ai ahali okiaino.”

²⁸Ipaha o Yesus wädotoko magogiriaka ma Jou ai Tau magoronaka, Unanga wotemo de Ai ilingi ma ago-agomo, ”Hoʼ ngini nihiöriki o nagona Ngohi nënanga, deʼ okiaino Ahi ahali? Ngohi toböaua imoteke Ahi hininga mahuka mahirete. Ngohi wohihuloko mangale Unanga Ai haku wohihuloko Ngohi, deʼ Unanga iyakunu iwingaku. Mä ngini niwinäkoua Unanga.

²⁹Ngohi tinäko Unanga, hababu Ngohi ahi ahali Unangino, deʼ Unanga wohihuloko Ngohi.”

³⁰Oraha gënanga önanga yomau iwitagoko o Yesus, mä moiua yobarani iwisö Unanga, hababu maöraha yadonuahi.

³¹O nyawa yowöe-wöe manga hidogoronaka gënanga, manga ngöe yomuläenge iwingaku Unangika, deʼ yotemo, ”Nako o Koano Wohihohalamati gënanga woböa, Unanga wakunu wodiai iholoi iwöe ihëra-hëranga ngaro de o nyawa ne Unanga?”

³²O Farisioka manyawa yoihene sarakia o nyawa yowöe-wöe gënanga imakokuhudu mangale o Yesus. Karana gënanga, imakinïki de o imam-imam manga häeke, önanga yähuloko yamuruono naga ma Jou ai Tau magogöana yoiki iwitagoko o Yesus.

³³O Yesus watemo o nyawa yowöe-wöeika ma Jou ai Tau magoronaka, ”Duga-duga öraha mahuhutulokahi dika Ngohi dede ngini. Ipaha de gënanga Ngohi aha tolio wohihulo-hulokika Ngohi.

³⁴Ngini aha nihilingiri Ngohi, mä nihimäkeua Ngohi; hababu ngini niyakunua niädono o ngï kiaka Ngohi naga.”

³⁵Daha o Yahudioka manyawa yokokuaha imaketemo moi de moika, ”O nyawa nënanga womau okiaika woiki hiädono ngone hakunua himäke Unanga? Bote Unanga womau woiki o Yahudi manyawaika yogogogere o berera maporetoka o Yunani manyawa manga hidogoronaka, deʼ wadotoko o Yunanioka manyawa?

³⁶Okia Ai dungutu gënanga howotemo ngone aha hilingiri Unanga mä hakunua himäke de ngone hakunua haika o ngï kiaka Unanga naga?”

³⁷ Owange mabobaha marameanga gënanga, enagënanga ma wange duru ilamoko, o Yesus womaokoino ma Jou ai Tau magoronaka daha wopöaka, ”O nyawa manga kiriti madudungu kokiani yaino Ngohino la yokere.

³⁸ Mangale o nyawa ihingaku Ngohino, itulihoka Ma Jou Ai Demo ma Buku, ’Manga hininga magoronaino iuihi ihahahuru o akere ihidöa-döaka o ngango.’ ” (

³⁹O Yesus wohiade-ade mangale ma Jou Madutu ai Womaha, aha yatarimao nyawa iwingaku-ngaku Unangika. Hababu o öraha gënanga ma Jou Madutu ai Womaha wohidöakuahi; hababu o Yesus iwihimulia uahi de Ai honenge.)

⁴⁰O nyawa manga ngöe yoihene okia wotemo o Yesus, deʼ manga hidogoronaka naga yotemo, ”O nyawa nënanga maraioka o Nabi gënanga!”

⁴¹Mahomoa yotemo, ”Nënanga o Koano Wohihohalamati!” Mä nagaö yotemo, ”Se, yakunu o Koano Wohihohalamati woböa o Galileaino?

⁴² Ma Jou Ai Demo ma Buku magoronaka i tulihoka o Koano Wohihohalamati ganga o Daud aidifauku, deʼ aha woböa o Betlehemino, enagënanga o Daud aikapongo de ailöa.”

⁴³Mabobahaka o nyawa yomuläenge imatekeributu mangale o Yesus.

⁴⁴Naga yomau iwitagoko Unanga, mä moiua o nyawa iwisö.

⁴⁵Maöraha ma Jou ai Tau yogöa-göana yähuloko yoiki iwitagoko o Yesus yolioinoka, o imam-imam manga häeke deʼ o Farisioka manyawa gënanga yäleha onangika, ”Yadodoa ngini niwi aoua Unanga nenangino?”

⁴⁶Yogogöa-göana gënanga yohaluhu, ”Uwee, koiwahi naga o nyawa yotemo-temo hokä Unanga!”

⁴⁷”Bote nginiö winihirehenoka Unanga?” o Farisioka manyawa yotemo gënanga.

⁴⁸”Naga inakokuaha ngone o Farisioka manyawa iwingaku Unangika?

⁴⁹Mä o nyawa manga ngöe nënanga, önanga yanäkoua o Musa aitita, deʼ sarakia dika önanga yahilolaioka.”

⁵⁰ Womatëngo manga hidogoronaka o Farisioka manyawa gënanga ganga o Nikodemus, naga mahira woikoka o Yesusika. O Nikodemus watemo o Farisi manyawa mahomoaika,

⁵¹”Imoteke o Tita, o nyawa womatëngo yakunua iwihukumu nako yoihenuahi aiparakara deʼ aimanarama yatailakouahi.”

⁵²Yohaluhu önanga, ”Ngonaö o Galileaino?” ”Natailako dika Ma Jou Ai Demo ma Buku! Ngona aha namäke koiwa naga o nabi ai ahali o Galileaino!” [

⁵³Iböto de gënanga, o nyawa mata-mata yolioka manga tauika.