Read Tobelo O YOHANIS 8 Bible Online

O YOHANIS 8 - Tobelo bible

O YOHANIS 8

¹Mä o Yesus woiki o Zaitun ma Doporonoka.

²Yarehino mawange o ngoru-ngorumino Unanga woikoli ma Jou ai Tauika, deʼ o nyawa manga ngöe yoböa Unangika. O Yesus wogogeruku, daha womuläenge wadotoko önanga.

³Oraha gënanga, o agamaka yodo doto-dotoko deʼ o Farisioka manyawa imiao Unangika o ngoheka momatëngo imihidatagoko mohowono. Onanga imihuloko momaokoil̄e manga hidogoronaka,

⁴daha yotemo o Yesusika, ”Bapa Guru, o ngoheka nënanga imihidatagoko maöraha magogiriaka mohowono.

⁵ O Musa ai Tita magoronaka naga madatoro, nako o ngoheka hokonënanga kiani imikaweli de o helewo hiädono mohonenge. Orahanënanga sarakia anidamäke Bapa?”

⁶Onanga yoleha hokogënanga yomau iwitaili Unanga, hupaya önanga yakunu iwihihowono. Mä o Yesus womarukuku dika, deʼ watuli-tulihi de aihagarara o tonakuku.

⁷Maöraha hokogenangika iwiributu, Unanga wagoraka Ai häeke deʼ watemo onangika, ”O nyawa nagona koiwa manga baradoha niahidogoronaka, ika, önanga madodihiraka imikaweli de o helewo o ngohekaika gënanga.”

⁸I böto de gënanga o Yesus womarukuokali deʼ watuliholi o tonakuku.

⁹Kade yoihene iböto o Yesus wotemo hokogënanga, yoiki önanga yamal̄a o ngï gënanga, imatëngo-tëngo muläenge yobalu-baluhoka de yakauku. Mabaha o Yesus wogogogere womatëngokahi genangoka de o ngohekaokahi momaokoino ami ngïoka.

¹⁰Daha o Yesus wagoraka Ai häeke deʼ wotemo o ngohekaika gënanga, ”Kiaka önanga mata-mata? Moiua inihukumu ngona?”

¹¹”Kowali, Bapa,” mohaluhu. ”Yaoa,” o Yesus wato, ”Ngohiö tonihukumua ngona. Orahanënanga noiki, uha nobaradohali.”]

¹² O Yesus wotemoli o nyawa yowöe-wöeika, wato, ”Ngohi o dunia madararono. O nyawa ihinïki Ngohi aha yotagiua o huhutu magoronaka, mä yamäke o dararono mangango.”

¹³ ”Orahanënanga ngona mahirete nohidöaka o hakihi mangale Ani diri mahirete,” o Farisioka manyawa yotemo gënanga Unangika, ”Ani hakihi itiaiua.”

¹⁴O Yesus wohaluhu, ”Ngaro Ngohi tohidöaka o hakihi mangale Ahi diri mahirete, Ngohi ahihakihi gënanga itiai; hababu Ngohi tohiöriki kiaino Ngohi toböa deʼ okiaika Ngohi toiki. Ngini nihiorikua kiaino Ngohi toböa deʼ kiaika Ngohi toiki.

¹⁵Ngini niahihakimi o nyawa de madatoro o nyawa; Ngohi tahihakimua o nyawa moiö ma.

¹⁶Mä nako Ngohi tahihakimi o nyawa, Ngohi ahiputuhu gënanga iadili, hababu Ngohi katoma tëngoua; Ahi Ama wohi hulo-huloko Ngohi naga dede Ngohi.

¹⁷O Musa ai Tita mahidogoronaka itulihi hoko nënanga: O hakihi madiai nako o hakihi naga o nyawa yahinoto.

¹⁸O hakihi ihidöaka mangale Ngohi ahidiri naga hinoto — Ngohi deʼ Ahi Ama wohihulo-huloko Ngohi.”

¹⁹Onanga yato, ”Ani Ama gënanga kiaka?” O Yesus wohaluhu, ”Ngini nihinäkoua Ngohi kayaoa Ahi Ama. O demo hohiade ngini nihinäko Ngohi, marai ngini niwinäko Tongohi ahi Ama ö.”

²⁰Mata-mata gënanga o Yesus wotemo maöraha Unanga wadotoko ma Jou ai Tauoka o hadaka mangï madatekoka. Mä o nyawa moiuaö iwi tagoko Unanga, hababu maöraha yadonuahi.

²¹O Yesus watemoli onangika, ”Ngohi aha toiki, deʼ ngini aha nihilingiri Ngohi, mä ngini aha nihonenge niabaradoha magoronaka. O ngï kiaka Ngohi toiki, ngini niyakunua niädono.”

²²O Yahudioka manyawa yokokuaha yato, ”Mudukua Unanga womau womahohonenge, hababu Unanga wotemo, ’O ngï toiki, ngini niyakunua niädono.’ ”

²³Daha o Yesus watemo onangika, ”Ngini niböa dau de niail̄e; mä Ngohi toböa daku de tauku. Ngini o duniaino; Ngohi o duniainoua.

²⁴Mangale gënanga totemo nginika, ngini aha nihonenge niabaradoha magoronaka. Deʼ igoungu ngini aha nihonenge niabaradoha magoronaka, nako ningakua ’Ngohi nënanga iböto i hi hetongo NGOHI NAGA’.”

²⁵Onanga yoleha, ”Imoteke madiai Ngona o nagona?” O Yesus wohaluhu, ”Kaokiahi hotemo dede ngini!

²⁶Duru mangöeohi o hali mangale ngini nimau Ngohi tohi ade-ade deʼ tohihakimi. Mä Unanga wohihulo-huloko Ngohi, yakunu iwingaku. Deʼ Ngohi tohingahu o duniaika okia Ngohi toihene Unangino.”

²⁷Onanga imangaratiua okia Unanga wotemo-temo onangika mangale o Ama.

²⁸Hababu gënanga o Yesus watemo onangika, ”Damä nako ngini niwituboil̄eoka o Nyawa manga Ngohaka, ngini aha nihiöriki ’Ngohi nenangala iböto ihihetongo NGOHI NAGA’, deʼ ngini aha nihiöriki koiwa moiö Ngohi tadiai Ahi diriino mahirete. Ngohi duga-duga Tohi demo okia wohidotokoka Ahi Ama Ngohino.

²⁹Deʼ Unanga wohihulo-huloko Ngohi naga dede Ngohi. Unanga komaiwahi wohi mal̄aika Toma tëngoka, hababu Ngohi hoko genangika tadiai okia yadäene Ai hininga.”

³⁰O Yesus wotemoka mata-mata gënanga iböto, manga ngöe o nyawa yongaku Unangika.

³¹Ipahaika o Yesus watemo o Yahudioka manyawaika iwingaku-ngakuoka Unangika, ”Nako ngini niwango niamoteke Tongohi ahi dodötoko, igou-goungu ngini nihinöninïki Ngohi,

³²ngini aha niwinako ma Jou Madutu wototiai de karana gënanga ngini aha inihilapahi.”

³³ Onanga yato, ”Ngomi nënanga o Abraham aidifauku.” ”Komaiwahi ngomi midadi o gilaongo o nagonaika dika! Okia Ani dumutu honotemo, ’Ngini aha inilapahi’?”

³⁴O Yesus watemo onangika, ”Igoungu itiai Ahidemo nënanga.” ”O nyawa yododiai o baradoha, önanga gënanga o baradoha magilaongo.

³⁵Deʼ o gilaongo womatëngo koiwa aingï worïdi o tau magoronaka, ma o ngohaka kahiado-adonika aingï o tau magoronaka.

³⁶Hababu gënanga, nako o ngohaka winihilapahioka ngini, ngini igou-goungu nilapahi.

³⁷Igoungu Ngohi tohiöriki ngini nënanga o Abraham aidifauku. Mä ngini nimau nihitoma Ngohi, hababu ngini nioluku niatarima Tongohi ahi dodötoko.

³⁸Okia Ngohi tamäke Ahi Amaka, gënanga Ngohi tohingahu. Enahioko ngini niadiai okia nia ama winidotokoka nginika.”

³⁹Onanga yohaluhu, ”Tongomi mia ama o Abraham.” O Yesus wato, ”Ho nako ngini igou-goungu o Abraham aingohaka,” ”marai ngini niadiai okia o Abraham wadiai.

⁴⁰Ngohi tohiädono nginika o diai Ngohi toihene ma Jou Madutuino, mä ngini nimau nihitoma Ngohi. O Abraham wodiaiua hokogënanga!

⁴¹Ngini nidiai okia wadodiai nia ama mahirete.” Onanga yohaluhu, ”Ngomi o ngohaka maporetokaua. Mia Ama ngomi duga-duga womatëngo, enagënanga ma Jou Madutu mahirete.”

⁴²Daha o Yesus watemo onangika, ”Ho nako ma Jou Madutu gënanga nia Ama, ngini aha nihihininga Ngohi, hababu Ngohi toböa ma Jou Madutuino. Ngohi toböaua de Ahi hininga mahuka mahirete, mä Unanga wohihulo-huloko Ngohi.

⁴³Ma hababu okia ngini nimangaratiua okia Ngohi totemo? Hababu ngini niatänua ni ihene Tongohi Ahi dodötoko.

⁴⁴O Ibilihi idadi niaama, deʼ ngini nimau niamoteke nia ama aimau. Kamahirahi o Ibilihi gënanga wotoma-toma. Unanga komaiwahi woböa o diaino, hababu unangoka o diai koiwa. Nako ünanga woeluku, gënanga madiai, hababu hokogënanga iböto ünanga aibiaha. Unanga wototengeluku deʼ aiahali hagala o tengeluku.

⁴⁵Mä Ngohi tohidemo o diai, deʼ hababu gënanga ngini nihingakua Ngohino.

⁴⁶O nagona niahidogoronaka ngini iyakunu nihimatoko de madiai naga o baradoha Ngohioka? Nako Ngohi tohidemo o diai, yadodoa ngini nihingakua Ngohino?

⁴⁷O nyawa manga ahali ma Jou Madutuino, yoihene ma Jou Madutu aidemo. Mä ngini ma Jou Madutuinoua, hababu gënanga ngini nioluku ni ihene.”

⁴⁸O Yahudioka manyawa iwibaluhu o Yesus, ”Mode koigoungua ngomi mitemo, Ngona o Samaria manyawa inipootekika o tokata?”

⁴⁹O Yesus wohaluhu, ”Ngohi ihipootekua o tokata. Ngohi tihoromati Tongohi ahi Ama, mä ngini nihihikauku Ngohi.

⁵⁰Ngohi tolingirua o horomati mangale Ahi diri mahirete. Naga womatëngo wohidailakoka o horomati mangale Ngohi, deʼ Unanga aha waputuhu o nagona itiai.

⁵¹Igoungu itiai Ahi demo nënanga, o nyawa yamoteke Tongohi ahidemo, aha yohonengua kahiado-adonika.”

⁵²Daha o Yahudioka manyawa gënanga yotemo o Yesusika, ”O öraha nënanga ngomi mihiöriki Ngona nënanga igou-goungu inipootekika o tokata! O Abraham mahirete wohonengoka, hokogenangö o nabi-nabi mata-mata. Mä Ngona nato, ’O nyawa yamoteke Ahi demo tongohi aha yohonengua kahiado-adonika.’

⁵³Nako o Abraham mahirete wohonengoka, deʼ o nabi-nabi mata-mataö yohonengoka, Ngona nënanga o nagona? Bote Ngonahi iholoi nolamoko de tongomi mia ama o Abraham!”

⁵⁴O Yesus wohaluhu, ”Hokä nako Ngohi tolingiri o horomati mangale Ahi diri mahirete, o horomati gënanga koiwa mamangarati. Wohihoromati Ngohi enagënanga Tongohi ahi Ama ngini niato tingini nia Jou Madutu,

⁵⁵enahioko ngini niwinäkoua Unanga. Mä Ngohi tinäko. Hokänako Ngohi totemo Ngohi tinäkoua Unanga, Ngohi o nyawa moi toelu-eluku, imadäene hokä ngini. Ngohi tinäko Unanga, deʼ Tamoteke Ai demo.

⁵⁶Nia ama o Abraham womörene duru ünanga aha wamäke Tongohi ahi wange. Unanga wamäkeoka deʼ unanga womörene!”

⁵⁷Daha o Yahudioka manyawa yotemo o Yesusika, ”Ani umuru o taongo moritoauahi, deʼ ngona nimäkeoka o Abraham?”

⁵⁸O Yesus wohaluhu, ”Igoungu Ngohi tinitemo nginika: o Abraham womakil̄auahi, Ngohi nagaka.”

⁵⁹Daha o Yahudioka manyawa gënanga imal̄ë o helewo la iwikaweli, o Yesus womangiunu Ai diri, daha woiki wamal̄a ma Jou ai Tau.