Read Tobelo O YOHANIS 9 Bible Online

O YOHANIS 9 - Tobelo bible

O YOHANIS 9

¹Maöraha o Yesus wotagi Unanga wimäke o nyawa wopilo-piloko, kawomakil̄aunohi.

²O Yesus iwinöninïki iwileha o Yesusika, ”Bapa Guru, yadodoa o nyawa nënanga iwihingohaka wopiloko? Bote karana ünanga mahirete wobaradoha ekola idadi karana ngoiayo de aiama yobaradoha?”

³O Yesus wohaluhu, ”Unanga wopiloko tounangua aibaradoha ekola aidimonua manga baradoha, mä hupaya o nyawa yakunu yamäke ma Jou Madutu aikuaha imanarama aidiri magoronaka.

⁴Kao wangeohi, ngone kiani homanarama Toünanga aimanarama wohihulo-huloko Ngohi. O huhutu aha iböa, deʼ o nyawa moiua aha yakunu yomanarama.

⁵ Hokokia madekana Ngohi o duniaka nënanga, Ngohi o dunia madararono.”

⁶Ipaha wotemo hokogënanga, o Yesus waobiri o tonakuku, deʼ wohiwaro o tonaka de Ai kibiri gënanga. Ahao Unanga wohinauhu o nyawa gënanga ailakoino,

⁷daha wotemo unangika, ”Noiki namahau anibiono o Siloam ma Lupangika.” (Siloam mamangarati ’Iwihuloko’.) O nyawa gënanga woiki wamahau aibiono. Maöraha ünanga wolio, ünanga womahi orikoka.

⁸Ima kokadateke deʼ hagala o nyawa iwimäke-mäkeoka ünanga wogaho-gahoko, mata-mata yotemo, ”Neünanga bote manyawa biaha wogogeruku wogaho-gahoko?”

⁹Naga yotemo, ”Igoungu ünanga.” Mä nagali yato, ”Kowali, ünanga duga-duga ngadeke imatero de o nyawa gënanga.” Mä o nyawa gënanga mahirete wotemo, ”Ngohi nënanga iböto.”

¹⁰Onanga iwileha unangika, ”Sarakia idadi hiädono ngona yakunu nomahi öriki?”

¹¹Unanga wohaluhu, ”O nyawa airomanga o Yesus gënanga wadiai mahuhutulu o peseke, daha wohinauhu tongohi ahi lakoika, deʼ wato, ’Noiki nomamahau anibiono o Siloam ma Lupangika.’ Daha ngohi toiki. Deʼ maöraha ngohi tamahau tongohi ahibiono, ngohi takunu tomahi öriki.”

¹²Onanga iwileha, ”Kiaka o nyawa gënanga?” Unanga wohaluhu, ”Tihiörikua.”

¹³Maöraha o Yesus o tonaka wohiwaro de aikibiri mangale wadiai o nyawa wopilo-piloko gënanga yakunu womahiöriki, o wange gënanga o Yahudioka manga Puji mawange. Ma o nyawa wopopilo-piloko gënanga iwiao o Farisi manyawaika.

¹⁵Onangö iwileha unangika gënanga sarakia ünanga wakunu womahiöriki. Unanga wohaluhu, ”Unanga wogelenga o peseke ngohi ahi lakoka, daha ngohitamahau deʼ ngohi yakunu tomahiöriki.”

¹⁶Yamuruono naga o Farisioka manyawa manga hidogoronaka gënanga yotemo, ”Kohamäkeua o nyawa wododiai nënanga Ai ahali ma Jou Madutuino, hababu Unanga wohi baragunaua o Yahudioka manga Puji mawange.” Mä o nyawa mahomoa yato, ”Kiaka hamäke o nyawa baradoha yodiai ihëra-hëranga hokä nënanga?” Daha ipuda o ributu o gamäke önanga manga hidogoronaka.

¹⁷O Farisioka manyawa gënanga iwilehali o nyawaika gënanga, ”Okia anidamäke mangale Unanga wadiai ngona nomahiöriki?” ”Unanga o nabi,” wohaluhu o nyawa gënanga.

¹⁸Mä Yahudioka manyawa manga tutuda gënanga yoluku yongaku o nyawa gënanga kamahirahi wopiloko deʼ orahanënanga wakunu womahiöriki. Karana gënanga önanga ya ahoko aidimono,

¹⁹deʼ yaleha, ”Itiai nënanga niangohaka, ngini niato kawomahi adoninohi de wopiloko? Sarakia ünanga yakunu womahiöriki öraha nënanga?”

²⁰Ngoi ayo de ai ama o nyawa gënanga yohaluhu, ”Igoungu nënanga tongomi miangohaka; deʼ unanga igoungu wopiloko kawomahi adoninohi.

²¹Mä sarakia ünanga yakunu womahiöriki öraha nënanga, ngomi mihi orikua. Deʼ o nagona yadiai ünanga yakunu womahiöriki, genangö ngomi mihiorikua. Niwileha dika unangika, ünanga wobaluhoka; ünanga wakunu wohaluhu mahirete.”

²²Ngoi ayo de ai ama o nyawa gënanga yotemo hokogënanga, hababu önanga yamodongo o Yahudioka manyawa manga tutudaika hababu önanga imaketemoka, o nyawa iwingaku o Yesus hokä ma Koano Wohihohalamati, yakunokaua yowohama o pupuji matauika.

²³Hababu gënanga ngoi ayo de ai ama o nyawa gënanga yotemo, ”Unanga wobaluhoka; niwi leha dika unangika.”

²⁴Daha önanga iwiahokoli o nyawa kangano wopilo-piloko gënanga, deʼ iwitemo unangika, ”Nokoboto ngona aha notemo madiai. Ngomi mihiöriki o nyawa gënanga o baradoha manyawa.”

²⁵O nyawa gënanga wohaluhu, ”Unanga wobaradoha ekola kowali,” ”ngohi tohiörikua. Mä o hali moi ngohi tohiöriki; mahira ngohi topiloko, öraha nënanga ngohi tomahiöriki.”

²⁶Daha önanga yotemoli unangika, ”Unanga wodiai okia ngonaika? Sarakia ünanga wadiai ngona nomahiöriki?”

²⁷O nyawa gënanga wohaluhu, ”Tini ade-adeoka nginika, mä ngini nioluku ni ihene. Yadodoa ngini nimau nihigihenoli? Mudukua nginiö nimau nidadi iwinöninïki?”

²⁸Onanga iwidöana ünanga deʼ iwitemo, ”Ngona ninöninïki; ngomi kowali! Ngomi o Musa miwinïki.

²⁹Ngomi mihiöriki ma Jou Madutu wotemoka o Musaika. Mä mangale o nyawa gënanga, ngomi mihiörikua kiaino Ai ahali.”

³⁰O nyawa gënanga wohaluhu, ”Ihëranga duru ngini nihiörikua okiaino Ai ahali, mä Unanga wadiaioka ngohi yakunu tomahiöriki.

³¹Ngone hohiöriki ma Jou Madutu wahigihenua o nyawa baradoha, duga-duga o nyawa iwihohoromati ma Jou Madutu, deʼ yamoteke Ai mau.

³²Kadunia mamulaengohi hogihenuahi naga o nyawa yodiai kaimahi adoninohi yopiloko yakunu imahiöriki.

³³Nako o nyawa gënanga ma Jou Madutuinoua, Unanga aha okia-kiaua wakunu wadiai.”

³⁴Yohaluhu önanga, ”Okia? Ngona ini omanga de o baradoha kanomahi adoninohi, ngona nomau nomidotoko ngomi?” De öraha gënanga ünanga iwiduhunoka wowohama o pupuji matauika.

³⁵O Yesus woihene önanga iwiduhunoka o nyawa gënanga o puji matauino. Unanga wilingiri o nyawa gënanga daha witemo unangika, ”Naga ngona ningaku o Nyawa manga Ngohakika?”

³⁶O nyawa gënanga wohaluhu, ”O nagona Unanga, Tuanga? Tanu nohihingahu hupaya ngohi tingaku Unangika.”

³⁷”Ngona nimäkeoka Unanga,” o Yesus wohaluhu. ”Unanga öraha nënanga nima ade-ade de ngona.”

³⁸”Ngohi tongaku, Jou,” wotemo o nyawa gënanga, daha watilabukuku o Yesus aihimangoka.

³⁹O Yesus watemo, ”Ngohi toböa o duniaka nënanga mangale todadi o hakimi; hupaya o nyawa yopilo-piloko yakunu imahiöriki, deʼ o nyawa imahiori-oriki, yodadi yopiloko.”

⁴⁰Yamuruono naga o Farisioka manyawa naga genangoka yoihene o Yesus wotemo hokogënanga, daha önanga iwileha Unangika, ”Ani dumutu ngomiö nënanga mipiloko?”

⁴¹O Yesus wohaluhu, ”Hokä nako ngini nipiloko, ngini nibaradohaua. Mä hababu ngini nitemo, ’Ngomi mimahiöriki,’ gënanga mamangarati ngini kani baradohahi.”