Read Tobelo O KISAH RASUL-RASUL 10 Bible Online

O KISAH RASUL-RASUL 10 - Tobelo bible

O KISAH RASUL-RASUL 10

¹O Kaisariaka naga o nauru womatëngo airomanga o Kornelius. Unanga o nyawa moi wokaputeni ”O Italia matentara ma Duonoka”.

²Manyawa ünanga wimodongo ma Jou Madutuika deʼ aitau manyawa yongodumu iwipuji ma Jou Madutuika. Unanga mangangöe wariwo o Yahudioka manyawa yomomihikini, deʼ unanga womatogu-togumua womaniata ma Jou Madutuika.

³O wange moiuku done hotakoro hange o wangeoka, ünanga wamäke de madodiai o lolega moi magoronaka, wo ma tëngo ma Jou Madutu ai malaekat wo böa deʼ wi ahoko ünanga, ”Kornelius!”

⁴O Kornelius wamäke o malaekat gënanga de wöhawana daha wötemo, ”Naga okia Tuanga?” O malaekat gënanga ihaluhu, ”Aniniata deʼ anihininga mangongike ma Jou Madutu watarimaka deʼ ma Jou Madutu wonihininga ngonaika.

⁵Orahanënanga nähuloko o nyawa o Yopeika iwiahoko o Simon airomanga madutu o Simon Petrus.

⁶Unanga womahidodogumikahi o nyawa womatëngo o hapi makai wahohakai aitauoka airomanga o Simon, wogogere o dowongi madatekoka.”

⁷O malaekat imatemo-temo iböto de o Kornelius gënanga i oikoka, o Kornelius wä ahoko o nyawa yahinoto yolöleleani aitauoka deʼ womatëngo o nyawa o tentara aigogöana wongaku-ngaku.

⁸O Kornelius wa ade-ade onangika okia idadioka, daha ünanga wähuloko önanga o Yopeika.

⁹Yarehino mawange, önanga ka o dodagi mahidogoronakahi deʼ ngade imahiädono o Yopeika, o Petrus wodoa o tau mal̄okuil̄e mangale womaniata.

¹⁰Daha ünanga iwihahini duru wo mau wol̄omo. O inomo de ihidiai, ünanga wamäke o lolega moi.

¹¹Unanga wamäke o dihanga ihelenga deʼ hokä ngöeroka moi ma ngoa-ngoata yawora o duniauku, de madidideoka malibuku iata.

¹²Magoronaka wamäke hagala irupa o aiwani mal̄ou iata, hagala o aiwani imatahe-tahe deʼ o totaleo ihuhuhuku.

¹³Daha naga o ilingi itemo unangika, ”Petrus nomomiki! Natoaka deʼ nol̄omo!”

¹⁴O Petrus wohaluhu, ”Kowali, Jou! Komaiwahi ngohi taol̄omo okia naga ahibohono ekola ipeseke.”

¹⁵Mä o ilingi gënanga itemo ihigalioli unangika, ”Okia ma Jou Madutu wohimatokoka anibohonua, uha ngona nato anibohono.”

¹⁶O lolega gënanga yogilio hiädono mahangeino, dahaö o ngöere gënanga igoraka o horogail̄e.

¹⁷O Petrus womahiorikokaua watibanga okia mamangarati o lolega gënanga. Kawa tiba-tibangohi o Petrus, o nyawa wähulo-huloko o Kornelius yamäkeoka o Simon aitau deʼ onanga nagaka o ngorana mahimangoka.

¹⁸Daha önanga yäahoko o nyawa deʼ yaleha, ”Bote nenangoka naga o nyawa iniado-adonino womahidodogumu, airomanga o Simon Petrus?”

¹⁹O Petrus kahokogenangikahi wohidibanga wohiöriki mamangarati o lolega gënanga, ma Jou Madutu ai Womaha iwitemo unangika, ”Hei Petrus, naga o nyawa yaruange mangagogiria inilingiri ngona.

²⁰Ika itaiti nouti daukuku deʼ uha nodododato nanïki önanga, hababu Ngohi tahuloko önanga.”

²¹O Petrus wouti daukuku deʼ wätemo o nyawaika gënanga, ”Ngohi nanga roriadodoto nihilolingi-lingiri. Roriadodoto niböa mangale okia?”

²²Onanga yohaluhu, ”Ma Kaputeni Kornelius womihüloko ngomi miaino. Unanga o nyawa moi maoa deʼ aimodongo ma Jou Madutuika, de duru iwihoromati o Yahudioka manyawa mata-mata. Ma Jou Madutu aimalaekat womatëngo wihuloko ünanga wogahoko Tuanga noböa aitauika, karana hokä mabobaluhu ainiata, ünanga iwihuloko wohigihene okia aha Tuanga notemo unangika.”

²³O Petrus wä ahoko önanga yowohama mangale imatogumu genangoka. Yarehino o Petrus womomiki deʼ yoiki dede önanga. Yamuruono naga o nyawa yongaku-ngaku o Yopeino onangö yonïki.

²⁴O wange moi ipaha gënanga önanga imahiädono o Kaisariaika. Dokengoka önanga yädodamäka o Kornelius de airoriadodoto de aidodiawo-dodiawo irorahai waahokinoka.

²⁵Maöraha o Petrus womahiädono, o Kornelius woiki wibuhuku ünanga deʼ watilabukuku aihimangoka.

²⁶Mä o Petrus wihimoteke ünanga womaoko, daha witemo, ”Nomomiki! Ngohi mahireteö kao nyawa dika.”

²⁷Kaima temo-temohi de o Kornelius, o Petrus wowohama o tau magoronaika. Genangoka ünanga wamäke o nyawa manga ngöe imatöomuinoka.

²⁸Daha ünanga watemo onangika, ”Roriadodoto mahirete nihiöriki o Yahudioka manyawa manga agama yahigumal̄aua mangale yäädono ekola imakaganu de o nyawa mahomoaino. Mä ma Jou Madutu wohihimatokoka ngohino, ngohi iyakunua o nagona dika tato yopeseke ekola ahibohono.

²⁹Hababu gënanga maöraha Tuanga nogahoko hupaya ngohi taino, ngohi tokabaratangua taino. Hoʼ orahanënanga ngohi toigo tohiöriki yadodoa Tuanga nogahoko ngohi taino.”

³⁰O Kornelius wohaluhu, ”O wange hange ipahaika, done maöraha hokonenangoli, ngohi tomaniata magogiria tongohi ahitauoka o takoro hange o bimaoa. Itodokanino o nyawa womatëngo o nauru womaoko ahihimangoka. Ai pakeanga o nyawa gënanga kaimahi doleletonguku.

³¹Unanga wotemo, ’Kornelius! Ma Jou Madutu watarimaka aniniata deʼ aha wohininga anihininga maoa.

³²Hoʼ nähuloko o nyawa o Yopeika iwiahoko o nyawa airomanga o Simon Petrus. Unanga womahi dodogumika o nyawa womatëngo o hapi makai wohohakai aitauoka airomanga o Simon; o tau gënanga o gahimadatekoka.’

³³Hababu gënanga ngohi dema dataitoka tähuloko o nyawa yoiki iniahoko Tuanga. Deʼ Tuanga i goungu anihininga iyaoa mangale noböa nenangino. Oraha nënanga ngomi mata-mata mimatöomu nenangoka ma Jou Madutu aihimangoka, mangale mi ihene mata-mata ma Jou Madutu wonihulokoka Tuanga nomi temo ngomino.”

³⁴ Daha o Petrus wotemo, ”Orahanënanga igou-goungu ngohi tamäo ma Jou Madutu wodiai o nyawa mata-mataika kaima däene.

³⁵O nyawa de manga modongoka ma Jou Madutuika deʼ yomanarama o diai, o nyawa gënanga wätarima ma Jou Madutu, ünanga wohaduliua o hoana okiaino dika.

³⁶Roriadodoto nihiorikoka o abari madol̄a ma Jou Madutu wohiadonoka o Israel manyawaika. O abari gënanga naga imakorona o Abari ma Oa mangale o dame de o Yesus Kristus, enagënanga o nyawa mata-mata manga Jou.

³⁷Roriadodoto nihiöriki okia idadioka o Yudea ingodumu, enagënanga imuläenge o Galileaino ipaha o gohiki o Yohanis wohiö abari.

³⁸Ngini nihiöriki ma Jou Madutu wiirikoka o Yesus o Nazaret manyawa gënanga deʼ wihidöaka Unangika ma Jou Madutu ai Womaha deʼ Ai kuaha. Ngini nihiorikö o Yesus gënanga wodagioka kiaika honanga mangale wodiai o oa; Unanga wahitogumu mata-mata o nyawa yakokuaha o Ibilihi, hababu ma Jou Madutu witomoteke Unanga.

³⁹Ngomi nënanga manyawa miamäkeoka mahirete, hagala moi-moi Unanga wadiaioka o Yahudi manyawa manga bereraka deʼ o Yerusalemoka. Ngaroka hokogënanga, önanga iwisalib deʼ iwitoma Unanga.

⁴⁰Mä o wange hangeoka ma Jou Madutu wihiwangookali Unanga o honengino, deʼ Unanga womahimatoko o nyawaika;

⁴¹o nyawa mata-mata ikaua, mä duga-duga ngomino ma Jou Madutu womi irikoka iholoi ihira mangale midadi Ai hakihi-hakihi: Ngomi miol̄omo deʼ miokere dede Unanga, womomiki ipahaino.

⁴²Deʼ Unanga womihuloko ngomi mihingahu o Abari ma Oa gënanga hagala o nyawaika, deʼ mihidöaka o hakihi ma Jou Madutu wigoraka Unanga wodadi o Hakimi hagala o nyawa yowango-wangohi deʼ o nyawa yohone-honengoka.

⁴³Mata-mata o nabi yotemo mangale Unanga. Onanga yotemo mata-mata o nyawa yongaku o Yesusika, aha yahi apongo manga baradoha de o Yesusino Ai kuaha.”

⁴⁴O Petrus kawotemo-temohi magogiriaka, ma Jou Madutu ai Womaha iuti deʼ yakuaha mata-mata o nyawa yoihene o abari gënanga.

⁴⁵O Yahudioka manyawa iwingaku-ngakuoka o Yesusika deʼ o Petrus iwininïki o Yopeino, mata-mata yohëranga yamäke ma Jou Madutuö wahidöaka ai Womaha hagala o nyawa o hoana mahomoaika o Yahudiokaua.

⁴⁶Hababu önanga yoihene o nyawa gënanga yotemo-temo irupa-rupa o demo deʼ ihigiriri ma Jou Madutu aimulia. Daha o Petrus wotemo,

⁴⁷”Beika niälega, o nyawa nënanga yamäkeoka ma Jou Madutu ai Womaha hokä ngone. Hoʼ yakunu o nyawa yatätatoko önanga, mangale imaohiki de o akere?”

⁴⁸O Petrus wähuloko önanga imaohiki de o Yesus Kristus airömanga. I böto gënanga önanga yogahoko hupaya o Petrus wögogere dede önanga o wange muruono naga madekana.