Read Tobelo O KISAH RASUL-RASUL 12 Bible Online

O KISAH RASUL-RASUL 12 - Tobelo bible

O KISAH RASUL-RASUL 12

¹Maöraha genangö ma Koano Herodes womuläenge wätuku o jemaat manyawa.

²Imoteke aipareta, o Yakobus, o Yohanis airiaka iwitoma de o oworo.

³Maöraha o Herodes wamäke aimanarama gënanga o Yahudioka manyawa manga hininga yadäene, ünanga wodiaioli hokogënanga; ünanga wähuloko o nyawa iwitagoko o Petrusohi. O hali gënanga idadi maöraha o Wange ma Amoko o Roti i Ragi-ragi Ua.

⁴ Iwitagoko iböto, o Petrus iwihi ngohama o bui magoronaika. O tentara o rëgu iata yähuloko la iwi göana o Petrus genangoka — o rëgu moi-moi, o tentara manyawa yarua-ruata. Ipaha o Paskah marameanga ibötoka, dahao o Herodes witailako o Petrus o nyawa yowöe-wöe manga himangoka.

⁵Hoʼ o Petrus iwitumunguku o buioka; mä o jemaat imatogu-togumua imaniata de magoungu ma Jouika mangale o Petrus.

⁶Mahutu o Herodes aha wihihimanguahi o nyawa yowöe-wöe manga himangoka, o Petrus womaiduoka iwilikoika de o rante hinoto o tentara iwigöa-göana yahinoto manga hidogoronaka. O bui mangoranoka, yogögöa-göana mahomoaö yogöana o bui manga gogiria.

⁷Itodokanino ma Jou aimalaekat imaokoino genangoka deʼ maletongo yatararono o bui makamari magoronaka gënanga. O malaekat gënanga iwigiwi-giwi o Petrus hiädono ünanga womomiki. Daha o malaekat gënanga iwitemo, ”Hei, taiti nomomiki!” Oraha gënanga dika itiha o rante o behi o Petrus aigiamoka.

⁸I böto gënanga o malaekat gënanga iwitemo, ”Nomahinoa anipakeanga deʼ naliko anihapato de maliliko.” O Petrusö womahinoa aipakeanga deʼ womäliko aihapato de maliliko. Aha o malaekat gënanga itemoli, ”Nomahinoa anijuba de nohinïki ngohi.”

⁹O Petrus wanïki o malaekat gënanga wohupu o buioka. Mä o Petrus womamäoua okia o malaekat magogiriaka i diai gënanga naga okia naga moi igou-goungu idadi. O Petrus watobote gënanga duga-duga o lolega moi.

¹⁰Maöraha önanga yatioka o gogöana mangï madodihiraka deʼ mahinoto, önanga yadono o ngorana o behi, mahimanga o kotaika. O ngorana gënanga ënanga mahirete ihelenga, daha önanga yohupu deʼ imadagi yanïki o ngëkomo moi maiteteke. I todokanino o malaekat gënanga iwimal̄aika o Petrus.

¹¹I paha gënanga dahao o Petrus aha wamäo okia idadioka unangika, daha ünanga wotemo, ”Orahanënanga ngohi tohiöriki i gou-goungu ma Jou wohidingotoka Ai malaekat mangale ihihi lapahi ngohi o Herodes aikuahaino deʼ hagala moi-moi aha yodiai o Yahudi manyawa ngohino.”

¹²Wa mäoka okianaga idödädadioka gënanga, o Petrus woiki o ngo Maria amitauika, o Yohanis ngoi ayoika iwihetongö o Markus. Genangoka o nyawa manga ngöe imatöomuinoka deʼ magogiria imaniata.

¹³O Petrus watolo o ngorana maporetino, daha momatëngo o ngoheka molöleleani amiromanga o ngo Rode, maino mangale mahelenga o ngorana.

¹⁴Gila-gila münanga manako o Petrus ai ilingi. Karana amimörene, münanga momatai-taiti mowohamoli komahelengaua o ngorana, daha mohingahu hagala o nyawaika genangoka o Petrus naga maporetoka.

¹⁵”Ngona initogohanga!” önanga yotemo. Mä o ngo Rode momakuata gënanga igou-goungu o Petrus. Onanga yato, ”Gënanga ai malaekat!”

¹⁶Kahoko gënanga o Petrus womatogumua watolo o ngorana. Maöraha önanga yahelenga o ngorana, deʼ iwimäke o Petrus, önanga duru yohëranga.

¹⁷O Petrus wapoma de aigiama hupaya önanga imarïdi, ahao ünanga wä ade-ade sarakia ma Jou wiaoka ünanga wohupu o buino. Daha ünanga wotemo, ”Niwihi ngahu nënanga o Yakobusika deʼ ahiroriadodoto mahomoahi.” Iböto gënanga o Petrus wamal̄a o ngï gënanga, deʼ woiki o ngï mahomoaika.

¹⁸Yarehe mangorumino idadi o gigoro o tentara yogöa-göana manga hidogoronaka. Onanga imahiorikokaua duru mangale okia idadioka de o Petrus.

¹⁹Daha o Herodes wähuloko o nyawa iwi lingiri o Petrus, mä onanga iwimäkeua ünanga. Hoʼ o Herodes wapareta hupaya o tentara-tentara yogöa-göana gënanga yäleha daha yatoma. Ipaha gënanga o Herodes wamal̄a o Yudea deʼ wogogere öraha muruo naga madekana o Kaisariaka.

²⁰O Herodes duru wangamo o Tirus deʼ o Sidon manyawaika. Hababu gënanga önanga yoböa imakinïki iwihimanga ünanga. Madodihiraka önanga iwibaja o Blastus, wohihäeke o Herodes aikadato, hiädono ünanga wahiböa önanga. Maduruino önanga yoiki iwihimanga o Herodes, daha yogahoko imakadame, hababu önanga manga berera imahigagao o inomo o Herodes aibereraino.

²¹O wange moiuku ihitatapuoka, o Herodes womahidero o koano mapakeanga daha wogogeruku o pareta makuruhioka deʼ womuläenge wopidato o kawaha manga himangoka.

²²O kawaha magogiriaka yöihene gënanga yopöa-pöaka, ”Nënanga o gomanga mailingi, o nyawaua mailingi!”

²³Oraha gënanga dika ma Jou aimalaekat iwipoka o Herodes, hababu ünanga wihoromatiua ma Jou Madutu. O Herodes iwiol̄omo o kulubati daha wohonenge.

²⁴Ma Jou Madutu aidemo i holoi i kerewoto ilamokika deʼ iholoi ikuata.

²⁵O Barnabas deʼ o Saulus yabötoka toönanga manga manarama, önanga imaidulu o Yerusalemino de iwiao o Yohanis Markus imakinïki de önanga.