Read Tobelo O KISAH RASUL-RASUL 13 Bible Online

O KISAH RASUL-RASUL 13 - Tobelo bible

O KISAH RASUL-RASUL 13

¹O jemaat Antiokhia mahidogoronaka naga o nabi-nabi deʼ o guru-guru, enagënanga o Barnabas, o Simeon iwihiaho-ahoko o Taromo, o Lukius o Kireneino, o Menahem yohero yolamoko imakinïki de ma Koano Herodes, deʼ o Saulus.

²Maöraha önanga magogiriaka yopuji ma Jouika deʼ yopuaha, ma Jou Madutu ai Womaha itemo onangika, ”Niairiki o Barnabas deʼ o Saulus niatingaka mangale Ngohi, hupaya önanga yomanarama o manarama Ngohi tohitatapuoka mangale önanga.”

³Yopuaha deʼ imaniata iböto, önanga yakelenga manga giama o Barnabas deʼ o Saulus mangal̄okuoka, daha yähuloko önanga yahinoto.

⁴Karana ma Jou Madutu ai Womaha yähuloko, o Barnabas deʼ o Saulus imagoraka o Seleukiaika. Dokengino önanga yohidete o Siprus manuhika.

⁵Maöraha imahiädono o Salamisika, önanga ihingahu ma Jou Madutu aidemo o Yahudioka mangapuji matau-tauoka. O Yohanis Markus wariwo önanga toönanga mangadodagi magoronaka.

⁶O nühu gënanga önanga yodagi yakiloliti hiädono o Pafosika. Dokengoka önanga imakamäke de womatëngo o Yahudioka manyawa, airomanga o Bar Yesus. Unanga wogogumatere womangaku aidiri o nabi.

⁷O Sergius Paulus, ma gubernur o nühoka gënanga nagala aidodiawo itigi de wogogumatere gënanga. Ma gubernur gënanga nagala o nyawa moi wobarija deʼ wosawaro. Unanga wa ahoko o Barnabas deʼ o Saulus hababu ünanga woigo woihene ma Jou Madutu aidemo.

⁸Mä o Barnabas deʼ o Saulus walawani o Elimas o gumatere masiho gënanga, karana o Elimas (gënanga airomanga de o Yunanioka manga demo) wohidailako hupaya magubernur gënanga uha hiädono wingaku o Yesusika.

⁹Mä o Saulus — iwihiromangö o Paulus — iwikuahaka ma Jou Madutu ai Womaha, hiädono ünanga wipulono o gumatere masiho gënanga,

¹⁰daha witemo, ”Hei o tipu mal̄okuoka, o dorou mangohaka! Ngona hagala ma oa-oa mahaturu. Yadodoa ngona nöluku nomatogumu nakilianga ma Jou Madutu aidätoro mangale wohihalamati o nyawa?

¹¹Orahanënanga namäke, ma Jou aha wonihukumu ngona! Ngona aha nodadi nopiloko, hiädono ngona öraha utu nakunokauaoli namäke o wange madararono.” Oraha gënanga dika o Elimas wamäo naga o lobi itaro-taromo yatamunu ailako, hiädono ünanga woma dagi kawomahihöhabal̄anga wälingiri o nyawa la iwituda.

¹²Maöraha magubernur gënanga wamäke okia idadioka, ünanga wingaku o Yesusika; hababu ünanga duru wohëranga o dodötoko mangale o Jou.

¹³O Pafos de yaino, o Paulus deʼ aidodiawo yohidete o Pergaika o Pamfiliaka. Genangoka o Yohanis Markus wamal̄a önanga, daha womaidulu o Yerusalemika.

¹⁴O Pergaoka, de önanga ihigila-gila mangadodagi o Antiokhiaika o Pisidiaka, o Yahudioka manga Puji mawangeoka ahao önanga yoiki o puji matauika de magöronaka yogögeruku.

¹⁵O Musa ai Buku deʼ o Nabi-nabi manga Buku yabasa iböto, o tutuda-tutuda o puji matauoka gënanga yähuloko o nyawa yäleha o Paulusika deʼ aidodiawo, ”Roriadodoto nako Riadodotoka okianaga moi o hitiari mangale o nyawa nënanga, ika kania hingahu okia niahitiari gënanga.”

¹⁶O Paulusö kawoma oko, daha wohidöaka o nonako de aigiama, ahao wotemo, ”Ahi Roriadodoto o Israeloka manyawa, deʼ mata-mata roriadodoto de mahomoahi nenangoka nitotomoteke ma Jou Madutuika! Beika niihenohi ngohino:

¹⁷ O Israeloka manyawa manga Jou Madutu wairikoka nangaete de nangatohora, deʼ wahidadi o hoana nënanga o hoana ma amo-amoko maöraha önanga yogogere o Mesiroka, hokä o nyawa maporetino. Maduruino de ma Jou Madutu aikuaha iamo-amoko, önanga waao wahihupu o Mesirino.

¹⁸ Unanga wohisabari toönanga manga kalakuanga o tonaka makokakahaka o taongo moruatino madekana.

¹⁹ O hoana tumidi Unanga wahohihangoka o Kanaan matonakoka mangale wahi kodoku o tonaka gënanga o Israel manyawaika hupaya o tonaka gënanga idadi katoönanga madutu.

²⁰ Mata-mata gënanga itagi gila-gila hiädono o taongo o ratuhu iata de moritoa madekana. Wahikodoku iböto o Kanaan matonaka gënanga, ma Jou Madutu wahidöaka onangika o haki-hakimi. O hakimi mabobahaka ünanga ganga ma Nabi Samuel.

²¹ Maduruino önanga yogahoko o koano womatëngo. Ma Jou Madutu wahidöaka onangika o Saul o Kis aingohaka o Benyamin aiahaluku, mangale wodadi toönanga manga koano, o taongo moruatino madekana.

²² Ma Jou Madutu wihirehenoka ünanga aikoano makuruhioka, ma Jou Madutu wigorakoli o Daud, wodadi toönanga manga koano. Deʼ nenanga ma Jou Madutu wotemoka mangale o Daud, ’Ngohi timäkeoka o Daud o Isai aingohaka gënanga o nyawa moi Ahihininga yadäene. Manyawa ünanga aha wadiai Ahi mau.’

²³De o Daud aidifauku gënanga ma Jou Madutu wasadiaka o Israel manyawaika womatëngo o Koano Wohihohalamati, hokä iwihijajioka. Deʼ o Yesus ganga o Koano Wohihohalamati gënanga.

²⁴ O Yesus womulaenguahi wohidagi Ai manarama, o Yohanis wohiboakoka o Israel manyawaika, hupaya önanga imatoba de manga baradoha deʼ yaohiki.

²⁵ Deʼ ngade ipaha aimanarama, o Yohanis watemo o nyawaika, ’Imoteke ngini niadamäke, ngohi nënanga o nagona? Ngohiua manyawa ngini niwidodamä. Niohininga, manyawa gënanga aha woböa ipaha de ngohi; tahuputu dika aihapato mangohi topatutua.’

²⁶Roriadodoto o Abraham aidifauku, deʼ mata-mata Roriadodoto mahomoahi nenangokadau nitotomoteke ma Jou Madutuika! Ma Jou Madutu wonahidingotoka ngoneino o abari inahihohalamati gënanga;

²⁷hababu o nyawa yogogogere o Yerusalemoka, deʼ toönanga manga tutuda-tutuda iwinakoua ge Unanga wonahihohalamati. Onanga imamangaratiua o nabi-nabi manga dodötoko ngaro yabasa o Puji mawange ihigetongo, hiädono önanga iwihukumu o Yesus. Mä imadaenika de manga manarama hokogënanga idadi higanapu okia o nabi-nabi ihingahuoka ngaro idadiuahi.

²⁸ Ngaroka önanga yamäkeua aihowono moiö Unangoka kiani iwihukumu de hukumanga wohonenge, mä onanga yogahoko o Pilatusika hupaya Unanga iwitoma.

²⁹ Deʼ onanga yabötoka yadiai mata-mata Ma Jou Ai Demo ma Buku magoronaka ituli-tulihoka mangale Unanga, önanga ihiguti Ai mayeti o salib magotaka, daha yakelenga o lungunu magoronaka.

³⁰Mä ma Jou Madutu wihiwangokali o honengino.

³¹ Maduruino kadema wange-wange madekana Unanga waino womahimatoka Ai diri o nyawa yoböa-böainoika, dede Unanga o Galilea de yaino o Yerusalemika. Onanga gënanga örahanënanga yodadi o hakihi-hakihi mangale Unanga o Israel manyawaika.

³²Hoʼ, örahanënanga ngomi mihingahu o Abari ma Oa gënanga nginika: Okia ma Jou Madutu wohijajioka tongone nangaete de nangatohoraika,

³³ gënanga Unanga wadiaioka ngoneino, de wihiwangokali o Yesus o honengino. Hababu o Mazmur mahidoku hinoto magoronaka naga itulihi, ’Ngonala Ahi Ngohaka, o wange nënanga Ngohi todadioka Ani Ama.’

³⁴ Ma Jou Madutu wihiwangokali Unanga o honengino. Orahanënanga Unanga aha iwidaenokaua o honenge o lungunu magoronaka. Mangale o hali gënanga ma Jou Madutu wotemo, ’Ngohi aha tonihidöaka Ngonaika o jaji madebi-debini i goungu aha Tohiganapu, Tohi jäjajioka o Daudika.’

³⁵ Hoko gënangoli o ayat mahomoa magoronaka itemo, ’Tongona anigilaongo wososetia gënanga aha Nimal̄aikaua womela o lungunu magoronaka.’

³⁶O Daud wohonengoka deʼ iwilungunokaö imakinïki de aiete de aitohora, ünanga wadiai iböto okia ma Jou Madutu wihuloko ünanga wadiai. O Daud aimayetiö makoiwaka iwedere mata-mataka.

³⁷Mä o Yesus, ma Jou Madutu wihiwangokali o honengino, o Yesus gënanga wowederua hiädono womata.

³⁸Hababu gënanga Roriadodoto, kokiani ngini nihiöriki de o Yesus nënanga o abari mangale o baradoha maapongo inihingahu nginika; ngini kiani nihiöriki moi-moi o nyawa iwingaku Unangika, yahilapahioka hagala o baradohaka yakunua yaehe de ma Jou Madutu ai pareta-pareta o Musa wohingahu-ngahuoka.

³⁹

⁴⁰Mangale gënanga ngini kiani niohininga nihidodiai, uha hiädono idadi nginika okia o nabi-nabi yotemoka,

⁴¹ ’Niohininga nihidodiai, hei ngini o nyawa nioigo niahi kokauku! Ngini aha nihëranga, de ahao nihonenge! Hababu örahanënanga Ngohi magogiria todiai okianaga moi ngini mahirete aha niangakua, ngaroka naga o nyawa inihitararono nginika.’ ”

⁴²Maöraha o Paulus deʼ o Barnabas yamal̄a o puji matau gënanga, o nyawa o puji matauoka gënanga yogahoko önanga yoboali, o Puji mawange yaino, mangale ihitararono iholoi ikurutika mangale o hali-hali gënanga.

⁴³O nyawa yokokihupuoka o puji matauoka gënanga, o Paulus deʼ o Barnabas yanïki o Yahudioka manyawa mangangöe deʼ o nyawa mahomoahi yowoha-wohamoka o Yahudi manga agamaika. O rasul-rasul gënanga yatemo-temo önanga hupaya önanga hokogenangika imahitangono ma Jou Madutu aihininga maoaika.

⁴⁴O Puji mawange yaino, ngadeke mata-mata o nyawa o kota gënanga yoböa yöihene ma Jou aidemo.

⁴⁵Maöraha o Yahudioka manyawa yamäke o nyawa mangangöe gënanga, to önanga manga hininga duruhe yohiri. Onanga iwihikauku o Paulus deʼ aidemo mata-mata yöngelo.

⁴⁶Mä iholoi yobaranioli o Paulus deʼ o Barnabas yotemo ihitotararonika. Onanga yato, ”Ma Jou Madutu aidemo kokiani ihira mihingahu nginika. Mä karana ngini nioluku niatarima, ngini mahirete nihigogeroka ngini ipatutua niatarima o ngango madutu deʼ ikakali. Deʼ orahanënanga ngomi minimal̄a ngini, deʼ mioiki o nyawa mahomoaika.

⁴⁷ Hababu nënanga ma Jou aipareta ngomino; ma Jou wotemo, ’Ngohi tohigogeroka ngini nidadi o dararono moi o nyawa mahomoaika ko o Yahudiokaua, hupaya ngini nihiädono o halamati o dunia ingodumu.’ ”

⁴⁸Maöraha o nyawa mahomoaino ko o Yahudiokaua yoihene gënanga, önanga imagarago duru, daha ihigiriri ma Jou aidemo. Deʼ o nyawa wahigogeroka ma Jou Madutu mangale yamäke o ngango madutu deʼ ikakali, o nyawa gënanga yöngaku.

⁴⁹Ma Jou aidemo yodogerewoto kiaika honanga yakiloliti o daera gënanga.

⁵⁰Mä o nyawa yolo ago-agomo o kotaka gënanga deʼ o ngongoheka o nyawa yokokurutil̄e manga doomuino iwimodo-modongo ma Jou Madutuika, o Yahudioka manyawa yahingohama o hininga madorou. Onanga yapuda o haturu o Paulus deʼ o Barnabasika, deʼ yaduhu önanga yahinoto o daeraka gënanga.

⁵¹ O rasul-rasul gënanga yaparihi o kafo manga l̄ouoka o nyawa manga himangoka gënanga, hokä o hohininga moi, daha yoiki o Ikoniumika.

⁵²Yononinïki o Antiokhiaoka duru yomörene deʼ yakuaha ma Jou Madutu ai Womaha.