Read Tobelo O KISAH RASUL-RASUL 14 Bible Online

O KISAH RASUL-RASUL 14 - Tobelo bible

O KISAH RASUL-RASUL 14

¹O Paulus deʼ o Barnabas yaohana mahali kaimadäene de o Ikoniumoka. Onanga kayoiki dika o Yahudioka manga puji matauika deʼ yotemo-temo genangoka hokogënanga marupa hiädono o Yahudioka manyawa mangangöe deʼ o nyawa mahomoaino o Yahudiokaua idadi iwingaku o Yesus.

²Mä o Yahudioka manyawa yoolu-oluku yongaku, yahingohama o hininga madorou o nyawa mahomoaino o Yahudiokaua, hiädono idadi yadohata o nyawa iwingaku-ngaku o Yesusika.

³Karana gënanga o Paulus deʼ o Barnabas yogogere yotedekana genangoka. Deʼ manga barani önanga yotemo-temo mangale ma Jou. De ma Jouö wohimatoko toönanga manga abarioka mangale o dora gënanga itiai; Unanga wahi döaka onangika o kuaha mangale yodiai ihëra-hëranga deʼ o hali-o hali kabiahaua.

⁴Mä o kota manyawa gënanga moi-moi imateke ributu; naga yahiböa o Yahudi manyawaino, deʼ naga yahiböa o rasul-rasulino gënanga.

⁵Daha o Yahudioka manyawa de manga tutuda-tutuda de o nyawa mahomoaino imahikagaro mangale yähangihara deʼ yäkaweli o rasul-rasul de o helewo.

⁶Mä o rasul-rasul yanako manga manarama gënanga, ho imahirehene o Listraika deʼ o Derbeika, enagënanga o kota-kota o Likaoniaka, deʼ madaera magilolitino.

⁷Dokengoka önanga ihiabarioli o Abari ma Oa gënanga.

⁸O Listraoka naga o nyawa womatëngo o nauru ail̄ou italo kawomakil̄auinohi, hiädono ünanga wakunua womadagi, hababu ail̄ou duru koikuatua.

⁹O nyawa gënanga dokengoka wogogeruku wohigihene o Paulus wotemo-temo. O Paulus wimäke o nyawa gënanga wongaku deʼ karana gënanga ünanga wakunu wihitogumu. O Paulus wipulo-pulono ünanga

¹⁰deʼ de ai ilingi makuata o Paulus witemo, ”Nomaoko nomatotiaiil̄e!” O nyawa gënanga womaoko womatotuboil̄e gila-gila womadagi.

¹¹Maöraha o nyawa yowöe-wöe yamäke okia wadiaioka o Paulus, önanga yopöaka de o Likaonia manga demo, ”O gomanga iutioka o duniauku de maröehe o nyawa.”

¹²Daha önanga yahiromanga o Barnabas o Zeus, deʼ o Paulus önanga iwihiromanga o Hermes, hababu ünanga wotemo-temo.

¹³O gomanga matau naga o kota mahimangika, o Gomanga Zeus ma imam woböa woao o hapi manauru deʼ o bunga-bunga o kota mangorana iamo-amokika. Unanga womau imakinïki de o nyawa yowöe-wöe gënanga, ihi huba o huhuba o rasul-rasulika gënanga.

¹⁴Maöraha o Barnabas deʼ o Paulus yoihene okia yomau yadiai o nyawa gënanga, önanga yakakakihi manga pakeanga de imapopäta o nyawa yowöe-wöe manga hidogoronaika gënanga, de yopöaka,

¹⁵ ”Hei, yadodoa ngini nidiai hokonënanga? Ngomi nënanga ka o nyawa dika hokä Riadodotoli! Ngomi naga nenangoka mangale mihingahu o Abari ma Oa nginika, hupaya ngini niamal̄a o hali-o hali ifofaidäua nënanga deʼ nioiki ma Jou Madutu wowango-wangoika, wohidadadi o dihanga deʼ o dunia deʼ o ngöto deʼ madol̄a mata-mata.

¹⁶Maöraha ipopahaika ma Jou Madutu wamal̄aika o nyawa yowango imoteke toönanga manga mau moi-moi.

¹⁷Mä Unanga wawöhangua wohidöaka manyonyata mangale Ai diri, enagënanga wodiai o oa-oa. Unanga winihidöaka nginika o awana o dihanguku deʼ o tonaka mahasili toënanga maörahoka. Unanga winihidöaka o inomo nginika deʼ niahininga yadäene.”

¹⁸Mä de aidemo-demo gënangaö ma, kaihuhahi dika, o rasul-rasul gënanga yataaere o nyawa gënanga yahihuba o huhuba gënanga onangika.

¹⁹O Yahudioka manyawa yamuruono naga yoböa o Listraika o Antiokhia o Pisidia de yaino deʼ o Ikoniumino yabaja o nyawa yowöe-wöe gënanga hiädono o nyawa yowöe-wöe gënanga yahiböa onangika. Onanga iwikaweli o Paulus de o helewo, ahao iwitauru ünanga o kota maporetika. Onanga yatobote ünanga wohonengoka,

²⁰mä maöraha o nyawa yongaku-ngaku genangoka ima oko iwi higilolitino, ünanga womomiki deʼ wowohamokali o kotaika. Yarehino ünanga woiki o Derbeika imanïki de o Barnabas.

²¹O Derbeoka, o Paulus deʼ o Barnabas ihingahu o Abari ma Oa gënanga deʼ o nyawa mangangöe idadi iwingaku o Yesusika. Ipaha gënanga önanga imaidulu o Listraika, ahao o Ikoniumika daha o Antiokhiaika o Pisidiaka.

²²De o kota-kota gënanga önanga yahikuata manga hininga iwinöninïki o Yesus, deʼ yahibobehehongo yononinïkika gënanga hupaya yotatapu iwingaku o Yesusika. ”Ngone kiani iwöe hatagongo o hangihara ihira, dahao ngone hakunu hamäo o utumu ma Jou Madutu ai Dunia ma Hungioka,” hokogënanga o rasul-rasul yadotoko o Yesus iwininïkika o kota-kotaka gënanga.

²³Deʼ o jemaat moi-jemaat moi, o Paulus deʼ o Barnabas yagoraka manga tutuda-tutuda mangale o jemaat-jemaat gënanga. Daha imaniata deʼ yopuaha, önanga yahilapahi o tutuda-tutuda gënanga ma Jouika önanga iwingaku gënanga.

²⁴Iböto de gënanga o Paulus deʼ o Barnabas ihigila-gila manga dodagi önanga yatilakuru o Pisidia madaera deʼ hiädono o Pamfiliaika.

²⁵Deʼ onanga ihingahu iböto ma Jou Madutu aidemo o Pergaoka, önanga yoiki o Ataliaika.

²⁶Genangino önanga imaiduli yohidete o Antiokhiaika. Ma kota gënanga toönanga mangï mahira yahilapahi ma Jou Madutu aidoraika, hupaya önanga yomanarama o manarama örahanënanga önanga yaböbötoka.

²⁷Maöraha imahiädono o Antiokhiaika, önanga yatoomu o nyawa o jemaatoka gënanga, daha yaade-ade mata-mata ma Jou Madutu wodiaioka dede önanga. Onangö yoade-ade mangale sarakia ma Jou Madutu wähelengaka o ngëkomo hupaya o nyawa mahomoaino o Yahudiokaua yongaku o Yesusika.

²⁸O kotaka gënanga o Paulus deʼ o Barnabas yogogere manga dekana de o nyawa yongaku-ngaku.