Read Tobelo O KISAH RASUL-RASUL 15 Bible Online

O KISAH RASUL-RASUL 15 - Tobelo bible

O KISAH RASUL-RASUL 15

¹ O nyawa yamuruono naga o Yudeaino yoiki o Antiokhiaika deʼ yadotoko o nyawa yongaku-ngaku o Antiokhiaoka gënanga nako önanga yahunaua imoteke o Musa ai Tita, önanga yakunua yahihalamati.

²O Paulus deʼ o Barnabas yalawani de mabuturungoka manga damäke o nyawa gënanga. Mabaha ihitatapu hupaya o Paulus deʼ o Barnabas de yamuruono naga o nyawa mahomoa o Antiokhiaino, yoiki o Yerusalemika mangale ihiade-ade o hali nënanga de o rasul-rasul de o tutuda-tutuda dokengoka.

³O jemaat o Antiokhiaoka yangotaka önanga hiädono o kota maporetika, ahao önanga yoiki yatilakuru o Fenisia deʼ o Samaria. Dokengoka önanga ihiade-ade sarakia o nyawa mahomoa o Yahudiokaua imahilapahioka manga diri ma Jou Madutuika. O abari gënanga duru yamörene o nyawa yongaku-ngaku genangoka.

⁴Maöraha önanga imahiädono o Yerusalemoka, o jemaat yatarima önanga koharahai, deʼ o rasul-rasul de o tutuda-tutuda. Daha önanga ihiade-ade o nyawaika gënanga mangale mata-mata ma Jou Madutu wodiaioka dede önanga.

⁵Mä o nyawa yamuruono naga o Farisiokaino yongaku-ngakuoka, imaoko deʼ yotemo, ”O nyawa mahomoa yongaku-ngaku gënanga kiani yahuna deʼ yahipatutu yanïki o Musa ai tita.”

⁶Daha o rasul-rasul deʼ o tutuda-tutuda imatoomu mangale ihiade-ade o hali gënanga.

⁷ Madekana duru önanga imahikodöaka o dibanga. Mabahaka o Petrus womaoko deʼ wotemo, ”Riadodoto! Ngini mahirete nihiöriki öraha muruono naga ipahaika ma Jou Madutu wohi iriki ngohi nia hidogoronaka ngini mangale tohi abari o Abari ma Oa gënanga o nyawa mahomoaika o Yahudiokaua, hupaya onangö yoihene deʼ yongaku.

⁸ Deʼ ma Jou Madutu wanako o nyawa manga hininga wohimatokoka Unanga watarima önanga; Unanga wohimatoko o hali gënanga de wahidöaka onangika ma Jou Madutu ai Womaha kaimatero dika wonahi döa-döakoka ngoneino.

⁹Ma Jou Madutu watingaka de wafaraua ngone de önanga. Unanga wohitebini manga hininga önanga, karana önanga yongaku.

¹⁰Aa ma hababu okia ngini nimau niwilawani ma Jou Madutu örahanënanga niahidöaka o kokiani moi itubuho yoninïkika nënanga, enahioko nangaete de nangatohora deʼ ngone mahirete dika mahakunua hadiai?

¹¹Magiliorino, ngone hongaku deʼ hohalamati karana ma Jou Yesus aidora de Ai hayangi; hokogenangö önanga.”

¹²Mata-mata o nyawa imatotoomu gënanga kayokokirirïdoka. Dahaino önanga yoihene o Barnabas deʼ o Paulus yoade-ade ihigalioli mata-mata ihëra-hëranga deʼ o hali-o hali kabiahaua, ma Jou Madutu wodiaioka dede önanga o nyawa mahomoa manga hidogoronaka o Yahudiokaua manyawa.

¹³Onanga yotemo-temo iböto, o Yakobus wotemo, ”Roriadodoto! Beika ni ihenohi ngohino.

¹⁴O Simon aha ipahaino wohitararono sarakia ma Jou Madutu kamadodihirakahi wohimatokoka wahininga o nyawa mahomoa, ngarokö o Yahudiokaua manyawa de Ai dungutu wairiki onangino o nyawa mahomoa aha yodadi Ai umati.

¹⁵Gënanga imadäene de o nabi-nabi ihidodemoka, ngaro idadiuahi. Hababu naga itulihi hokonënanga,

¹⁶ ’I paha gënanga Ngohi aha töboali,’ ma Jou wato, ’Ngohi aha tohimomikokali o Daud aitau iruba-rubaka, deʼ To hidiai ikokiliangoka, daha tohigokokali;

¹⁷hupaya o nyawa mata-mata mahou-houohi gënanga iwilingiri ma Jou, imakinïki de mata-mata o nyawa mahomoa o Yahudiokaua Ta ahokoka, la yodadi kato Ngohi.’ Hoko gënanga ma Jou wotemo,

¹⁸kahuruonikahi wohingahuoka o hali gënanga.”

¹⁹”Hoʼ imoteke ahidamäke ngohi,” o Yakobus wato, ”ngone iyakunua hahihuha o nyawa mahomoa o Yahudiokaua gënanga imahilapahioka manga diri ma Jou Madutuika.

²⁰ Mä ngone kiani hotulihi o hurata onangika deʼ hahitiari önanga hupaya önanga uha yaol̄omo o inomo ipese-peseke ihiniatoka o gomangika, ekola yaol̄omo o aiwani ma akeme ihonenge kayahirikiti, ekola o awunu yaol̄omo. Deʼ hokogënangoli hupaya önanga imahikurutika mangadiri de o manarama isosafarune.

²¹Hababu o Musa aitita kahuruonikahi yada basa o Puji mawange ihigetongo o puji matau-tauoka, deʼ ihingahu o kota mata-mataika.”

²²O rasul-rasul deʼ o tutuda-tutuda, de o jemaat manyawa mata-mata gënanga yaputuhu mangale yairiki yamuruono naga onangino aha yahuloko o Antiokhiaika imakinïki o Paulus deʼ o Barnabas. Onanga yairiki o Silas deʼ o Yudas iwihetongö o Barsabas. O nyawa yahinoto nënanga yodadi ihibaluhu o nyawa yongaku-ngaku manga hidogoronaka o Yerusalemoka.

²³Onanga ihidingoto o hurata moi yao yahulo-huloko gënanga mademo hokonënanga, ”Roriadodoto mata-mataika nia ahali o nyawa mahomoaino o Yahudiokaua, nigogere o Antiokhiaka, o Siriaka deʼ o Kilikiaka. Miatabea ngomioka, o rasul-rasul de o tutuda-tutuda, enagënanga niaroriadodoto.

²⁴Ngomi miihene, naga yamuruono naga o nyawa ngomino yoikoka nginika, inikapusaka nima hidodogumokaua de mangadodötoko-mangadodötoko önanga. Enahïoko ngomi miahulokua önanga yodiai hokogënanga.

²⁵Hababu gënanga ngomi mimahikidibangoka de mata-mata mirimoi mangale miairiki o nyawa yamuruono naga de miahuloko önanga nginika. Onanga aha yoiki imakinïki de o Riadodoto o Barnabas de o Paulus ngomi miahohininga.

²⁶O nyawa yahinoto nënanga ganga o nyawa ihitaioka toönanga manga nyawa, karana tongone nanga Jou Yesus Kristus.

²⁷Hoʼ, ngomi miähuloko o Yudas deʼ o Silas Roriadodotika. Onanga mahirete aha inihingahu youruika nginika, o abari itotuli-tulihokaö o hurata nënanga magoronaka.

²⁸Ma Jou Madutu ai Womaha ihigoungu — de ngomiö, mihigoungu — hupaya ngini uha inihidöaka o manarama iholoi itubuho mai paralu o manarama-o manarama nënanga dika:

²⁹uha niaol̄omo o inomo ihiniatoka o gomangika; uha niaol̄omo o awunu, uha nia ol̄omo o aiwani ma akeme ihonenge kaya hirikiti, deʼ nimahikurutika de o manarama isosafarune. Nako ngini nimahikurutika niadiri o hali-hali gënanga, ngini niadiaioka maoa-oa. Gënanga dika, halamati!”

³⁰Imahilooa iböto, önanga yähulo-huloko gënanga imagoraka o Antiokhiaika. Dokengoka önanga yäahoko o jemaat manyawa mata-mata imatoomu daha ihingahu o hurata gënanga.

³¹Maöraha o jemaat gënanga yabasa o hurata gënanga, önanga duru yomörene mangale o hurata madol̄a gënanga yalaru toönanga manga hininga.

³²O Yudas deʼ o Silas, nagala onangö naga o nabi, madekana yatemo-temo de o roriadodoto yongaku-ngaku o Antiokhiaka gënanga mangale yahidöaka o kuata de o barani onangika.

³³O Yudas deʼ o Silas yogogere dokengoka öraha muruono naga madekana ipaha, o nyawa yongaku-ngaku o Antiokhiaka gënanga yahidingoto önanga yolio deʼ ihibehehongo onangika ihingahu manga tabea o nyawa yahulo-hulokika önanga. [

³⁴Mä o Silas waputuhoka wotatapu wogogere o Antiokhiaka.]

³⁵O Paulus deʼ o Barnabasö yögogere öraha muruono naga madekana o Antiokhiaka. Dokengoka önanga yadotoko deʼ ihiabari ma Jou aidemo imakinïki de o nyawa yowöe-wöe mahomoa.

³⁶Itedekanua ipahaika o Paulus witemo o Barnabasika, ”Niaino ngone homaidulu hälega o roriadodoto yongaku-ngakuoka o Yesusika o kota mata-mataika kiaka ngone hohohi abarioka ma Jou aidemo; hupaya ngone hamäke sarakia toönanga manga hali.”

³⁷O Barnabas woigo wiao o Yohanis Markus,

³⁸ mä o Paulus wamäo itorou iwiao o Markus, woluku yomanarama imakinïki dede önanga de önanga wamal̄a o Pamfiliaka.

³⁹O Paulus deʼ o Barnabas imaributu kohagiria hiädono mabaha önanga imätingaka: o Barnabas wiao o Markus de yohidete dede ünanga o Siprusika.

⁴⁰O Paulus wi iriki o Silas daha imagoraka dede ünanga kiaka ipahaino o roriadodoto o Antiokhiaka gënanga yahilapahi önanga ma Jou aidoraika.

⁴¹Onangö yakiloliti o Siria deʼ o Kilikia; dokengoka önanga yahikuata o jemaat-jemaat.