Read Tobelo O KISAH RASUL-RASUL 18 Bible Online

O KISAH RASUL-RASUL 18 - Tobelo bible

O KISAH RASUL-RASUL 18

¹Ipaha de gënanga o Paulus wamal̄a o Atena de woiki o Korintusika.

²Genangoka ünanga imakamäke o Yahudioka manyawa womatëngo airomanga o Akwila, aiahali o Pontus mabereraino. O Akwila dahao woböa o Italiaino, de ngoihekata o ngo Priskila. Onanga yaino o Korintusino hababu ma Kaisar Klaudius wahulokoka mata-mata o Yahudioka manyawa yohupu o Romaka. O Paulus woiki walega önanga yahinoto,

³daha wogogere genangoka dede önanga deʼ womanarama dede önanga, karana manga lolingiri matiti önanga imadäene de o Paulus ailolingiri matiti, enagënanga yododiai o tau-tau.

⁴Mä o Yahudioka manga Puji mawange mahigetongo, o Paulus woiki imäteke ade-ade o puji matauoka, mangale wodiai o Yahudioka manyawa yaoa o Yunanioka manyawa iwingaku o Yesusika.

⁵O Silas deʼ o Timotius imahiadonoka o Makedonia de yaino, o Paulus wapäke ingodu-ngodumu aiöraha mangale wohiabari o abari ma Jou Madutuino, o Yahudi manyawaika o Yesus genangala o Koano Wohihohalamati ma Jou Madutu wohijäjajioka.

⁶Mä karana o nyawa kahokogenangika iwilawani de iwitemo itorou, o Paulus wahurero o kafo aipakeangika hokä o nonako mangale o hohininga önanga, mangale manga howono. Unanga wotemo, ”Nako ngini nibodito, niahowono mahirete! Ngohi ahigiama tahohe! Muläenge örahanënanga ngohi aha toiki o Yahudi manyawa okaikaua.”

⁷Daha o Paulus wämal̄a önanga deʼ woiki de wogogere manga puji matau madatekoka. O tau gënanga womatëngo o Yahudiokaua aitau, mä unanga wihuba ma Jou Madutu. O nyawa gënanga airomanga o Titius Yustus.

⁸Mä o Krispus, o puji matau mabaluhu gënanga de aitau madol̄a iwingaku ma Jou Yesusika. Deʼ kamanga ngöeö o Korintus manyawa mahomoa yoihene o abari o Paulus wohingahu-ngahu, deʼ onanga iwingaku o Yesusika daha yäohiki.

⁹O hutu moiuku o lolega moi mahidogoronaka, ma Jou wotemo o Paulusika, ”Uha nohawana! Notemo gila-gila uha nomarïdi.

¹⁰Hababu Ngohi tonitomoteke ngona. O nyawa moiuaö yakunu yodiai itotorou ngonaika, hababu o nyawa mangangöe o kota nënanga nagala Ahi nyawa.”

¹¹Hababu gënanga o Paulus wogogere o Korintusoka, o taongo moi de mahononga madekana, deʼ wadotoko ma Jou Madutu aidemo onangika.

¹²Maöraha o Galio wodadi gubernur Akhayaka, o Yahudioka manyawa imateke rimoi iwilawani o Paulus, deʼ iwiao ünanga o juru hakimika.

¹³Onanga yoao o galaki hokonënanga, ”O nyawa nënanga wangohama o nyawa yowöe-wöe hupaya iwihuba ma Jou Madutu, de madodagi imahowono de o Musa aitita!”

¹⁴De hokogënanga o Paulus womau wohaluhu, o Galio wotemoka o Yahudioka manyawaika, ”Hei Yahudioka manyawa! Nako nikalaki nënanga yatilakuru ilara-laranga moi ekola itotorou moi, kokiani ngohi totamähi toihene niagalaki nënanga.

¹⁵Mä nenanga naga nimateke ributu imakorona kao demo-demo deʼ o roma-romanga imanïki niatita mahirete! Hoʼ ngini kiani niatiai. Ngohi tokabaratanga tatailako o hali marupa nënanga!”

¹⁶Daha o Galio waduhu önanga yohupu.

¹⁷Ma önanga iwitagoko o Sostenes, o puji matau mabaluhu gënanga, deʼ iwigohara ünanga o meja yototailako mahimangoka. Mä o Galio mata-mata wohaduliua o hali gënanga.

¹⁸ Ipaha gënanga o Paulus kawogogerohi wotedekana o Korintusoka. Ahao ünanga wotemo halamati nigogogere o nyawa yongaku-ngakuika genangoka, daha yohidete de o ngo Priskila deʼ o Akwila o Siriaika. O Kengkreaka, o Paulus wakori aitadauru wamal̄aika hoidadioka ikurutu karana aijaji ma Jouika.

¹⁹Maöraha imahiädono o Efesusoka, o Paulus wämal̄aka o ngo Priskila deʼ o Akwila, daha wowohama o puji matauika de imahikodöaka o dibanga de o Yahudioka manyawa genangoka.

²⁰Onanga yogahoko hupaya ünanga wogogere iholoi wotedekana dede önanga, mä unanga woluku.

²¹Ngaro hokogënanga maöraha aha womajobo, ünanga wotemo, ”Nako ma Jou Madutu wohihigumal̄a, ngohi aha toma kilioroli nengino.” Ipaha wotemo hokogënanga, ünanga woma hihitomo o Efesusino.

²²Youtioka o Kaisariaka, ünanga woiki o Yerusalemika watabea o jemaatika genangoka, daha wogila-gila o Antiokhiaika.

²³Wogogere genangoka ho muruono naga madekana, ünanga woma gorakoli watailako o Galatia de o Frigia madaera, mangale wohikuata manga ngongaku o nyawa yongaku-ngakuoka.

²⁴Oraha gënanga, o Efesusika woböa o Yahudioka manyawa womatëngo woma kil̄au o Aleksandria, airomanga o Apolos. Unanga wosawaro wotemo-temo deʼ duruhe wanako de womangarati mangale Ma Jou Ai Demo ma Buku madol̄a,

²⁵daha iwidotokoka mangale wanako o dodötoko mangale o Yesus. De aisamangat ihiru-hiru ünanga wadotoko wohidodiai imakorona o Yesus, ngaroka daha o Yohanis aigohiki dika wanako.

²⁶De aibarani o Apolos womuläenge wotemo-temo o puji matauoka, deʼ maöraha o ngo Priskila deʼ o Akwila ihigihe-gihene aidodötoko, önanga iwi ao manga tauika. Dokengoka önanga iwihitararono unangika, de iholoi itiaioli imakorona de ma Jou Madutu aidatoro mangale wohihalamati o nyawa de o Yesus aimanarama.

²⁷Maduruino o Apolos aihiningaka woiki o Akhayaika. O nyawa yongaku-ngaku o Yesusika o Efesusoka yotulihi o hurata o roriadodotika o Akhayaka hupaya önanga yömodeke iwitarima o Apolos. Deʼ maöraha o Apolos womahiädono o Akhayaka, airoriwo inyata duru de mabaraguna o nyawaika, karana ma Jou Madutu aihininga maoa iwingakuoka o Yesusika.

²⁸Hababu de duruhe aikumati, o Apolos wautumu o Yahudioka manyawa manga ributu-ributu mahidogoronaka o nyawa yowöe-wöe manga himangoka. Deʼ unanga wohimatoko manyonyata de o ayat-ayat o Buku i Tebi-tebinino o Yesus ganga o Koano Wohi hohalamati iwihijäjajioka.