Read Tobelo O KISAH RASUL-RASUL 19 Bible Online

O KISAH RASUL-RASUL 19 - Tobelo bible

O KISAH RASUL-RASUL 19

¹O Apolos kanagahi o Korintusoka, o Paulus wodagi magogiria dina o daera gënanga magoronaino, daha womahiädono o Efesusoka. Dokengoka ünanga imakamäke de o nyawa yamuruono naga yongaku-ngakuoka o Yesusika.

²Unanga waleha onangika, ”Roriadodoto niatarimaka ma Jou Madutu ai Womaha maöraha ngini niwingaku o Yesusika?” Onanga yohaluhu, ”Kowahi. Komaiwahi ngomi mi ihene naga ma Jou Madutu naga ai Womaha.”

³O Paulus waleha, ”Nako hokogënanga, de o gohiki okia ngini iniohiki?” Onanga yohaluhu, ”De o Yohanis aigohiki.”

⁴ O Paulus wotemo, ”O Yohanis waohiki o nyawa mangale ihimatoko o nyawa gënanga imatobaka manga baradohaka. Maöraha gënanga dika o Yohanis gila-gila wohingahu o Israel manyawaika önanga kiani iwingaku manyawa aha woböa-böaika wihiduruino ünanga, enagënanga o Yesus.”

⁵Maöraha önanga yoihene gënanga, önanga yäohiki de ma Jou Yesus airomanga.

⁶Deʼ maöraha o Paulus wakelenga aigiama manga l̄okuku önanga, ma Jou Madutu ai Womaha yakuaha önanga, daha önanga yomuläenge yotemo-temo de o demo hoihe-ihenuahi magoronaka, de ihingahu o abari ma Jou Madutuino.

⁷Mangangöe önanga mata-mata naga doneho yangimoi de hinoto manyawa.

⁸O mede hange madekana o Paulus womatogu-togumua wotemo-temo de aibaranioka o nyawaika o puji matauoka, deʼ imatekeributu dede önanga mangale wahigoungu önanga mangale sarakia ma Jou Madutu wopareta hokä o Koano.

⁹Mä o nyawa yamuruono naga manga hidogoronaka gënanga manga häeke itogowini, deʼ yoluku yongaku. O nyawa mata-mata imatotoomuino genangoka manga himangoka, önanga yahohedu o dodötoko imakorona de ma Jou Madutu aidatoro, mangale wohihalamati o nyawa de o Yesus aimanarama. Ma hababu gënanga o Paulus wämal̄a önanga, daha woiki de iwininïki o Yesus o dodötoko mangï Tiranusika. Genangoka o wange mahigetongo ünanga de o nyawa imakokeleha.

¹⁰Unanga wodiai o hali gënanga womatogu-togumua o taongo moi madekana hiädono o nyawa mata-mata yogogogere o Asia maprovinsioka, yaoa o Yahudi manyawa, yaoa o nyawa mahomoa, mata-mata yoihene ma Jou aidemo.

¹¹Ma Jou Madutu wodiai ihëra-hëranga kabiahaua o Paulus aimanaramoka.

¹²Nako ailenso ekola o ngöere aigorona maninikutu wapäke-päkeoka o Paulus yao o nyawa yopopanyakeika, toönanga manga panyake ihihanga de o hetanga mawomahö ma ihupu onangoka.

¹³Naga yamuruono naga ihiori-oriki o houru o Yahudioka yoiki okiaika honanga, yaduhu o womaha madorou o nyawaka. O houru yanäko-näko gënanga ihitailö yapäke ma Jou Yesus airomanga mangale yaduhu o hetanga mawoma-womahika gënanga. Onanga yotemo o hetanga mawoma-womahika gënanga, ”De o Yesus airomanga wohingahu-ngahu o Paulus gënanga, ngohi tiniduhu ngini!”

¹⁴Naga o imam manga häeke womatëngo, airomanga o Skewa aingohaka o nauru yatumidi, yodiai o hali hokogënanga.

¹⁵Mä o hetanga mawomaha gënanga itemo onangika, ”Ngohi tinako o Yesus, deʼ o Paulusö ngohitinako, mä ngini nënanga o nagona?”

¹⁶Daha o nyawa iwingoha-ngohamika o hetanga gënanga womatotuboil̄e, de wakaboto de waropu-roputu önanga de duru ka aihatera, hiädono önanga yoara o tauino gënanga yäl̄abo-l̄abo de kamanga hekonoka, karana manga pakeanga önanga manga röehoka yakäkakihi.

¹⁷Mata-mata o Yahudioka manyawa deʼ o nyawa mahomoaino yogogogere o Efesusoka yoihene mangale idodadi gënanga, daha önanga idadi yohawana. Ho ma Jou Yesus airomanga iholoi ihigiriri.

¹⁸O nyawa mangangöe yongaku-ngakuoka o Yesusika, yoböa imangaku o nyawa yowöe-wöe manga himangoka manga manarama-manarama toönanga, maöraha ipaha-pahaika.

¹⁹Deʼ onanga manga biaha ihidagi manga dodötoko o hou-houru, önanga yatoomu manga buku-buku deʼ yatuhuku o nyawa yowöe-wöe mangahimangoka. Maija o buku-buku gënanga nako haetongo mata-mata naga doneho ribuhu moritoa o tiwi haäka.

²⁰De madodagi hokogënanga magiria, ma Jou aidemo iholoi yodogerewoto deʼ iholoi ikuata yäutumu.

²¹Idadadi gënanga ipahaino, o Paulus waputuhu mangale woiki o Makedoniaika deʼ o Akhaya, daha wogila-gila o Yerusalemika. ”Dokengoka taikaka,” o Paulus wato, ”ngohi kiani toiki o Romaikaö.”

²²Unanga wahuloko o nyawa yahinoto iwiroriwo-riwo, enagënanga o Timotius deʼ o Erastus mangale yoiki o Makedoniaika, maöraha ünanga wogogerohi öraha muruono naga madekanohi o Asia maprovinsika.

²³Mudukua maöraha gënanga idadi o gigoro maamo-amoko o Efesusoka, karana o dodötoko imakorona mangale o Yesus.

²⁴Hababu o kotaka gënanga naga womatëngo wododiai o haäka airomanga o Demetrius, wododiai o gomanga matau-tau mangale o Gomanga Artemis. Ai manarama gënanga yagao mahasili koha amoko, ainyawa yomomanaramika.

²⁵Ma hababu gënanga ünanga watoomu ainyawa yomomanarama imakinïki de yomomanarama yodiai o haäka mahomoa, daha wotemo, ”Roriadodoto! Riadodoto nihiöriki ngone hamäke o hasili o manaramino nënanga.

²⁶Orahanënanga Riadodoto niamäkeoka deʼ niihene mahirete okia wadiai o Paulus gënanga. Unanga wotemo o goma-gomanga o nyawa yadodiai, o gomangua mata-mata. Deʼ unanga wängakunoka wadiai o nyawa yowöe-wöe aha yangaku aidodotokika, kanenangoka daua o Efesusoka, mä hiädono o Asia madaera mata-mataikaö.

²⁷Mahuha moi enagënanga, nanga lolingiri tongone nënanga aha yamäke o romanga madorou. De kagënangua, mä o Gomanga Artemis amitauö aha yolegaikaua de makaramata yadoko-doko; enahioko münanga o gomanga imipuji o Asia manyawa mata-mata deʼ o dunia ingodumu!”

²⁸Hokogënanga o nyawa gënanga yoihene önanga manga hininga idadi ihauku, daha önanga imapöa-pöaka, ”Artemis iwango, o Efesus manyawa manga gomanga!”

²⁹O ruae gënanga iholoi ilamokika hiädono o kota mata-mataika. Ahao o doomu madorou yororuae gënanga yatagoko o Gayus deʼ o Aristarkhus, enagënanga o Makedonia manyawa iwidodiawo o Paulus aidodagi magoronaka, daha yatatauru önanga o dodogumu mangïika o kotaka gënanga.

³⁰O Paulus wowohama wanïki önanga, mä o nyawa iwingaku-ngaku o Yesusika genangoka iwiduhunu ünanga.

³¹O popareta yolago-agomo yamuruono naga o Asia maprovinsiokaö, imateke dodiawo de o Paulus, wähuloko o nyawa iwihingahu o Paulusika hupaya ünanga uha womahimatoko aidiri o dodogumu mangïoka gënanga.

³²Oraha gënanga o nyawa imatotoomuino o dodogumoka gënanga idadioka iruae. Naga yopöaka hokonënanga, naga yopöaka hokogënanga, hababu yowöe-wöe onangino ihiorikua hababu okia önanga imatoömu genangoka.

³³O nyawa o hidoku moiino yatobote o Aleksander wohikuata hababu ünanga iwihitomo mahimangoka o Yahudioka manyawa. O Aleksander wohidoakil̄e aigiama mangale wogahoko iwihidöaka öraha wodemo aidiri o nyawa gënanga mangahimangoka.

³⁴Mä hokogënanga önanga iwimäke ünanga o Yahudioka manyawa, kamamoil̄e önanga yopöaka yakua-kuatil̄e, ”Artemis iwango, o Efesus manyawa manga gomanga!”

³⁵Mabaha o kota majurutulis wakunu warïdi o nyawa yowöe-wöe gënanga. Unanga wotemo, ”O Efesusoka nigogogere! O nyawa moi-moi ihiöriki o Efesus o kota yapopaliara o Gomanga Artemis matau deʼ o helewo itebi-tebini itifa o dihanguku.

³⁶O nyawa moiuaö yakunu yöngelo o hali gënanga. Karana gënanga nimarïdi deʼ uha nidiai okianaga moi de madataitoka.

³⁷O nyawa nënanga, ngini niaao nenangino koigoungua karana önanga yaoraka o gomanga matau ekola karana önanga ihikauku tongone nanga gomanga.

³⁸Nako o Demetrius de iwikokarajanga gënanga toönanga manga galaki okianaga moi mahimanga o nyawa moika, mal̄aikala önanga yao manga parakara gënanga yototailakoika. Yototailako ihelengaika mangale gënanga deʼ o popareta yopangka-pangkatiö hokogenangika naga.

³⁹Mä nako kanagahioli ngini niöigo, gënanga kiani nihitiai o doomu madiai magoronaka o nyawa yowöe-wöe manga himangoka.

⁴⁰Hababu okia idadi o wange nënanga yakunu inabodito ngone. Ngone iyakunu inakalaki hodiai o huru-hara, karana ngone koiwa moiö de, nanga hohol̄e mangale hatiai o huru-hara nënanga.”

⁴¹Iböto wotemo mata-mata gënanga, majurutulis o kota gënanga wähuloko o nyawa yowöe-wöe gënanga yokokilio.