Read Tobelo O KISAH RASUL-RASUL 2 Bible Online

O KISAH RASUL-RASUL 2 - Tobelo bible

O KISAH RASUL-RASUL 2

¹ Maöraha o Pentakosta mawange yadonoka, mata-mata o nyawa yongaku-ngaku imatoomu o ngï moioka.

²I todokanino yoihene o ilingi o dihanguku hokä o rato iwuwu. O tau kiaka o nyawa yowöe-wöe gënanga yogogerika, mata-mata iömanga de o ilingi gënanga.

³Daha önanga yamäke o äkiri-o äkiri matero o uku itahe okiaika dika deʼ itangi onangika moi-moi.

⁴Onanga mata-mata yakuaha ma Jou Madutu ai Womaha, deʼ yomuläenge yotemo-temo de irupa-rupa o demo mahomoa. Onanga yotemo imoteke okia ihidöaka o Womaha gënanga onangika mangale ihidemo.

⁵Oraha gënanga o Yahudioka manyawa mangangöe, hagala o berera o dunia magilolitino, yogogere jai-jai o Yerusalemoka. Onanga ganga o nyawa iwihingou-ngounu ma Jou Madutu.

⁶Maöraha yoihene maruruhu gënanga, o nyawa duruhë mangangöe, yoböa imatoomu. Onanga mata-mata yotodokana yoihene o nyawa yongaku-ngaku gënanga yotemo de toönanga moi-moi manga demo.

⁷De yohëranga de mangahininga yadäene önanga yotemo, ”Koigoungua o nyawa yotemo-temo nënanga mata-mata o Galilea manyawa?

⁸Sarakia idadi hiädono ngone hoihene önanga yotemo de tongone nanga berera mademo moi-moi?

⁹Ngone o Partiaino manyawa, o Media, o Elam; o Mesopotamiaino, o Yudea deʼ o Kapadokia; o Pontus deʼ o Asiaino,

¹⁰o Frigia deʼ o Pamfiliaino, o Mesirino deʼ o daera-daera Libia itigi de o Kirene; naga ngoneoka o Roma de yaino,

¹¹naga o Yahudi manyawa deʼ naga o hoana de o berera mahomoa yowoha-wohamoka o Yahudioka manga agamaika; nagaö yoböa o Kreta deʼ o Arabino. Ngone mata-mata hoihene önanga yotemo-temo de tongone nanga demo moi-moi mangale o hali ihëra-hëranga wadiai ma Jou Madutu!”

¹²De yohëranga deʼ manga hininga yadäene önanga mata-mata ima keleha moi de moika, ”Okia mamangarati nënanga?”

¹³Mä nagaö o nyawa yohohedu. Onanga yotemo, ”See, o nyawa gënanga yadaluku dika!”

¹⁴Daha ipaha o Petrus womaoko de o rasul yangimoi de moi mahomoa, de watemo o nyawa yowöe-wöeika gënanga. De toünanga aiilingi makuata wotemo, ”Roriadodoto, o Yahudioka manyawa deʼ mata-mata nigögogogere o Yerusalemoka! Ni ihene nihidodiai, hababu o hali nënanga iparalu ngohi tohitararono nginika.

¹⁵O nyawa nënanga yädalukua, hokä ngini niatakihiri; hababu örahanënanga ahaö o takoro hiwo o ngorumino.

¹⁶Mä nënanga wohi ngahuoka ma Jou Madutu ma Nabi Yoëlika:

¹⁷ Ma Jou Madutu wotemo, ’O öraha mabahaka, Ngohi aha tadogöpoa Ahi Womaha o nyawa mata-matauku. Niangoha-ngohaka o nau-nauru deʼ niangoha-ngohaka o ngongoheka aha inihi ngahu nginika o hali-o hali Ngohi tahingahu onangika. Nia nyawa yogögö aha yamäke o hali-o hali Ngohi tahi matoko onangika. Nia nyawa yatotimo-timono aha yonänere mangale o nänere Ngohi tahidöaka onangika.

¹⁸Ahi gogilaongika ö — yaoa o nau-nauru yaoa o ngoheka — , aha tadogopoa Ahi Womaha mawangeoka gënanga. Onanga aha ihingahu o hali-o hali Ngohi tahingahuoka onangika.

¹⁹Ngohi aha todiai i hëra-hëranga dakengoka o dihanga mal̄okuoka, deʼ o hali-o hali kabiahaua nëngoka o duniaoka nënanga; aha naga o awunu deʼ o uku, o haga deʼ o nofo.

²⁰O wange aha idadi ihühutu, o mede idadi itökara hokä o awunu i hira de ma Jou ai Wange o Wange ilamo-amoko deimo mulia gënanga iböa.

²¹Oraha gënanga, o nyawa imahi böaka ma Jouika aha yahihälamati.’

²²Roriadodoto o Israeloka manyawa! Ni ihene okia ngohi totemo nënanga: o Yesus o Nazaret manyawa gënanga ma Jou Madutu wihidöakoka o manarama mangale ngini riadodoto. Gënanga de madiai duru ihëra-hëranga deʼ o hali-o hali kabiahaua ma Jou Madutu wodiai niahidogoronaka riadodoto de o Yesus gënanga. Mata-mata gënanga riadodoto mahirete nihiorikoka.

²³ Imamoteke wohidatoroka mahirete, ma Jou Madutu waputühoka mangale wihilapahi o Yesus nginika. Deʼ maöraha Unanga iwihilapahi, ngini niwitoma Unanga de niwimal̄aika o nyawa madorou iwisalib Unanga.

²⁴ Mä ma Jou Madutu wihiwangookali Unanga o nyawa yohone-honenge manga hidogoronaka. Unanga iwil̄ahiroka o hönenge, mä ma Jou Madutu wihoheoka de wihihupu, hababu koidadiua Unanga iwikuaha o hönenge hokogenangika.

²⁵ Mangale o Yesus nënanga o Daud wotemoka, ’Ngohi timäke ma Jou hokogenangika ahihimangoka; Unanga wohidatekuku ngohi, hupaya de okia dika ngohi togiwiua.

²⁶Hababu gënanga ahihininga imore-morene, ahiuru ihidemo o higiriri: deʼ ahi röehe nënanga aha itamä irïrïdi o lungunu magoronaka.

²⁷Hababu Ngona namal̄aikaua Ahi jiwa igögogere o nyawa yohone-honenge manga dunia magoronaka. Ngona nimal̄aikaua anigilaongo wososetia gënanga wowedere womata-mataka.

²⁸Ngona nohihi matokoka ngohino o ngëkomo mameta o ngango madutuika. Ahi mörene duru kohagiria hababu Ngona naga dede ngohi.’

²⁹Roriadodoto, nihihigumal̄a ngohi totemo tohi totararonika mangale o Daud, tongone nanga tohora gënanga. Unanga wohonengoka deʼ iwi lungunoka; de ai lungunu ka ëna nagahi ngone nanga hidogoronaka hiädono öraha nënanga.

³⁰ Ma Jou Madutu wojajioka o Daudika, de makoboto, womatëngo o nyawa o Daud aidifauku aha wigoraka ma Jou Madutu wodadi o koano. Karana o Daud wohiöriki mangale o jaji gënanga deʼ hababu unangö o nabi moi,

³¹ünanga wohiörikoli okia aha wadiai ma Jou Madutu. Hoʼ unanga wohidödemoka ngaro idadiuahi o Koano Wohihohalamati ma Jou Madutu wohijajioka, aha wowangokali o honengino. O Daud wotemo, ’Unanga iwimal̄aikaua wogogogere o nyawa yohone-honenge manga dunia magoronaka; Ai röehe aha i dadiua iwedere womata-mataka.’

³²O Yesus nenangala ma Jou Madutu wihiwangokali o honengoka. Ngomi mahirete mata-mata miahakihioka o hali gënanga.

³³Unanga iwigoraka wogogere o pangkati ikokurutil̄eoka deʼ wihi döaka o kuaha ma Jou Madutuoka, daha watarima ma Jou Madutu Ai Womaha wohijäjajioka o Ama. Deʼ ngini örahanënanga ni ihene deʼ niamäke, ganga o Womaha gënanga Unanga womi dogopoaka ngomino.

³⁴ O Daud mahirete wodoaua o horogail̄e, mä o Daud wotemo, ’Ma Jou wotemo ahi Jouika: Nogogeruku Ahi nirakoka,

³⁵hiädono Ngohi tadiai Ani haturu imaponu Ngonaika!ʼ

³⁶Hababu gënanga o Israeloka manyawa mata-mata kiani nihiöriki de magoungu o Yesus ngini niwisaliboka gënanga, o Yesus genangala iwihidadioka ma Jou Madutu wodadi o Jou deʼ o Koano Wohihohalamati!”

³⁷Maöraha o nyawa yowöe-wöe yoihene o hali gënanga, manga hininga duruhe iruae. Daha önanga yoleha o Petrusika deʼ o rasul-rasul mahomoaika, ”Roriadodoto, ngomi kiani midiai okia?”

³⁸O Petrus wohaluhu, ”Nimatoba bötohi nidiai o baradoha. Deʼ kiani ngini moi-moi iniohiki de o Yesus Kristus airomanga, hupaya niabaradoha ihiapongo. Roriadodoto aha niatarima o ngongike ma Jou Madutu ai Womaha, ma Jou Madutuino.

³⁹Hababu ma Jou Madutu wohijajioka gënanga ganga mangale ngini deʼ niadifauku de mangale o nyawa naga manga ngï magogurutika — enagënanga o nyawa mata-mata manga Jou Madutu tongone nanga Jou wa ahoko mangale yoböa Unangika.”

⁴⁰Hokogënanga o Petrus wahingahu onangika. Deʼ kahangöeohi aidemo mahomoa ünanga wohihimanga onangika laʼ onanga imahitingaka o nyawa madorouino nënanga, kiaka ma Jou Madutu aha wahukumu.

⁴¹O nyawa manga ngöe yongaku okia o Petrus wotemo daha önanga yäohiki. Magegetongo o nyawa yongaku-ngaku o wange gënanga idogoli yaribuhu hange.

⁴²O nyawa gënanga de manga hininga magoungu imädotoko hokogenangika o rasul-rasulino, deʼ hokogenangika imatotoömu. Onanga yol̄omo kä imatotoömu de yohubayanga kä imatotoömu.

⁴³Duru mangöe ihëra-hëranga yadiai o rasul-rasul gënanga hiädono o nyawa mata-mata yohëranga deʼ yohawana.

⁴⁴ O nyawa yongaku-ngaku gënanga yorimoi deʼ okia tö önanga, mata-mata önanga yapäke.

⁴⁵Manga baranga deʼ manga arata to önanga, önanga yahukunu, daha önanga imahikodoku matiwi önanga mata-mata, manga hidogoronaka imoteke manga paralu moi-moi.

⁴⁶O wange higëtongo önanga hokogenangika imatoömu ma Jou ai Tauoka; önanga yol̄omo kaimatotoömu, manga tau-tauika önanga de manga mörene deʼ manga hininga itipokouku.

⁴⁷Deʼ onanga hokogenangika iwihigiriri ma Jou Madutu deʼ yaigo o nyawa mata-mata. O wange mahigëtongo manga gegëtongo önanga idogo-dogo, hababu ma Jou wohidöaka onangika hagala o nyawa yahihohalamati.