Read Tobelo O KISAH RASUL-RASUL 21 Bible Online

O KISAH RASUL-RASUL 21 - Tobelo bible

O KISAH RASUL-RASUL 21

¹Ngomi mimakitingaka de o jemaat matutuda-tutuda o Efesusino gënanga ahao miamal̄a önanga. Daha ngomi mihidete kamihigila o Kos manühika; deʼ iyarehino ngomi mimahiädono o Rodos manühoka. Genangino ngomi mihidete gila-gila o Patara maleleotika.

²O Pataraka, ngomi miamäke o kapa imau o Fenisiaika. Ngomi miharene o kapa gënanga daha mima jobo

³deʼ mihidete hiädono ngomi miamäke o Siprus manühu miahigiloka; mä ngomi mihidete migila-gila miameta o Siria. Ngomi miuti o Tirusoka, hababu genangoka o kapa ngomi mio bare-barene gënanga aha ihiguti magina.

⁴O ngï genangoka ngomi mioiki mia tailako o nyawa yongaku-ngaku o Yesusika, daha migogere dede önanga o minggu moi madekana. Imoteke ma Jou Madutu ai Womaha mahimatoko önanga iwitemo o Paulusika hupaya uha woiki o Yerusalemika.

⁵Mä imataka maöraha mangale ngomi migogere genangoka, ngomi miä mal̄a önanga deʼ ngomi mihigila-gila miadodagi. Onanga mata-mata mimakinïki de mangahekata de önanga mangangohaka imingotaka ngomi hiädono o kota maporetika. Dokengoka o dowongi madatekoka, ngomi mata-mata miatilabukuku deʼ mimaniata.

⁶Ipaha gënanga ngomi mimakadahi, daha ngomi midoa o kapail̄e deʼ onangö yolio manga tauika.

⁷Ngomi mihidete migila-gila o Tirusino hiädono o Ptolemais. Dokengoka ngomi mioiki mialega o roriadodoto yongaku-ngaku, mangale mihidöaka miatabea onangika, daha migogere o wange moi dede önanga.

⁸ Yarehino ngomi mimagorakoli daha mimahiädono o Kaisariaika. Genangoka ngomi mioiki mapenginjilika airomanga o Filipus, daha migogere aitauoka. Unanga ganga womatëngo o nyawa yaoiri-iriki yatumidi o Yerusalemoka.

⁹Ai ngohaka yaruata o moholehe, ma Jou Madutu wahidoakoka o kuata mangale ihingahu o abari ma Jou Madutuino.

¹⁰ Ipaha o wange muruono naga madekana ngomi dokengoka, woböa o Yudeaino womatëngo o nabi airomanga o Agabus.

¹¹Unanga woböa ngomino daha wal̄ë o Paulus aigorona maninikutu. De o gorona maninikutu gënanga ünanga womahinikutu ail̄ou deʼ aigiama mahirete daha wotemo, ”Nënanga ma Jou Madutu ai Womaha itemoka: O gorona maninikutu nënanga madutu aha iwinikutu hoko nënanga o Yerusalemoka o Yahudioka manyawa, deʼ iwi hilapahi o Yahudi manyawa okaikaua.”

¹²Maöraha ngomi miihene gënanga, ngomi deʼ mata-mata o riadodoto yogogogere o Kaisariaka gënanga duruhe migahoko o Paulusika hupaya ünanga uha woiki o Yerusalemika.

¹³Mä unanga wohaluhu, ”Okia mabaraguna o Riadodoto niari hokonënanga, hiädono niadiai ngohi ahihininga iwedere? Ngohi tomabötoka duga-duga mangale kaihitagokua dokengoka, mä mangale ngaroka tohonenge dika karana ma Jou Yesus.”

¹⁴O Paulus woluku womihigihene ngomi, ho ngomi kamima togumu miwiduhunu ünanga. Ngomi miato, ”Mal̄aika, ma Jou aimau idadi dika.”

¹⁵Migogere genangoka o wange muruono naga madekana, ngomi mimahidiai tongomi miakiahonanga, daha mimagoraka o Yerusalemika.

¹⁶O riadodoto yamuruono naga o Kaisariaino yoikö mimakinïki de ngomi, mangale imingotaka ngomi o Manason aitauika, karana aitauoka ngomi aha mimahidodogumu. (O Manason ganga o Siprus manyawa moi madekanoka wodadi wininïki o Yesus.)

¹⁷Maöraha ngomi mimahiädono o Yerusalemika, o roriadodoto genangoka imitarima ngomi de manga hininga imore-morene.

¹⁸Yarehino o Paulus woiki mimakinïki de ngomi miwilega o Yakobus; o jemaat matutuda mata-mata genangokaö naga.

¹⁹Watabea iböto onangika, o Paulus waade-ade onangika hagala moi-moi ma Jou Madutu wodiaioka toünanga aimanaramoka o Yahudiokaua manyawa manga hidogoronaka.

²⁰Yoihene iböto o Paulus aiade-ade gënanga, önanga mata-mata iwipuji ma Jou Madutu. Ahao önanga yotemo o Paulusika, ”O Riadodoto Paulus! O Riadodoto kiani nohiöriki o Yahudioka manyawa de manga ribu-ribuhu iwingakuoka o Yesusika. Onanga mata-mata ganga o nyawa yososetia yamoteke o Musa aitita.

²¹Deʼ orahanënanga önanga yoihene o Riadodoto nadotoko mata-mata o Yahudioka manyawa yogogere o nyawa mahomoa manga hidogoronaka, hupaya yapidili o Musa aitita. O Riadodoto nahitiari önanga, hupaya önanga ngarouha yähuna manga ngoha-ngohaka ekola yanïki manga ada-adati o Yahudioka.

²²Orahanënanga o Yahudioka manyawa yongaku-ngakuoka gënanga igoungu aha inigihene o Riadodoto naga nenangoka. Hoʼ, sarakia öraha nënanga?

²³ Kayaoa de namoteke tongomi miahitiari. Naga o nyawa yaruata nenangoka yodiaioka o jaji ma Jouika.

²⁴Aa, koaho o Riadodoto nöiki nadiai madodagi nomahitebini anidiri nima kinïki dede önanga, deʼ natagongo to önanga manga baajanga hupaya önanga manga tadauru yakunu yakori. De hokogënanga aha inyata o nyawa mata-mataika okia önanga yoihene mangale ngona o Riadodoto itiaiua karana o Riadodoto mahireteö namoteke o Musa aitita.

²⁵ Mä mangale o Yahudiokaua manyawa iwingakuoka o Yesusika, ngomi miahidingotoka o hurata onangika mangale tongomi miaputuhu iyakunua önanga yaol̄omo o inomo ihihubaka o gomangika, iyakunua yaol̄omo o awunu, ekola yaol̄omo o aiwani ihonenge yahirikiti deʼ i yakunua yadiai o manarama-manarama isosafarune.”

²⁶O Paulus woiki de o nyawa yaruata gënanga daha yadiai madodagi imahi tebini manga diri imakinïki de önanga yarehino ma wange. Ahao önanga yowohama ma Jou ai Tauika mangale ihingahu o wange muruono nagahi aha iböto madatoro imadebini gënanga deʼ manga huba mangale önanga moi-moi ihihuba.

²⁷Maöraha mahoana o wange tumidi ngade ipaha, o Yahudioka manyawa yamuruono naga o Asiaino iwimäke o Paulus ma Jou ai Tau magoronaka. Daha önanga yängohama o nyawa yowöe-wöeika, ahao o Paulus iwisö

²⁸de imapöa-pöaka, ”Hei o Israeloka manyawa, nimiriwo! Ne ünanga manyawa woiki okiaika honanga wadotoko o nyawa mata-mataika ai dodötoko-dodötoko yalawani o Israeloka manyawa, yalawani o Musa aitita de yalawani ma Jou ai Tau nënanga. Deʼ orahanënanga ünanga waao o Yahudiokaua manyawa yowohama ma Jou ai Tau magoronaika deʼ yadiai yapeseke o ngï madebi-debini nënanga!” (

²⁹ Onanga yotemo hokogënanga hababu önanga iwimäkeoka o Trofimus o Efesus manyawa o kotaka imakokinïki o Paulus; deʼ onanga yato bote o Paulus wiaoka ünanga ma Jou ai Tau magoronaika.)

³⁰O kota mata-mataika idadi iruae, deʼ mata-mata o nyawa kayododooara imatoomu. Onanga iwitagoko o Paulus deʼ iwitatauru ünanga iwihihupu ma Jou ai Tau magoronaino. Oraha gënanga dika ma Jou ai Tau mangorana yabeno.

³¹Maöraha yorororuae gënanga ihidailako iwitoma o Paulus, o nyawa ihingahu o Roma matentara manga baluhika o Yerusalem mata-mataika magogiria ihuru-hara.

³²Gila-gila o tentara manga baluhu gënanga wal̄ë o tentara deʼ yamuruono naga manga baluhu daha imatai-taiti yoiki de önanga, o ngï ihohuru-haraika gënanga. Maöraha o nyawa yowöe-wöe gënanga iwimäke o tentara manga baluhu de manga duduono aingoha-ngohaka, önanga imatogumu iwigohara o Paulus.

³³O tentara manga baluhu gënanga woiki o Paulusika daha wïtagoko, deʼ wahuloko o nyawa iwirante ünanga. Ahao o tentara manga baluhu gënanga wileha mangale o nagona o Paulus gënanga deʼ okia wadiaioka.

³⁴Mahononga o nyawa yowöe-wöeino gënanga yohaluhu hokonënanga deʼ mahonongali yohaluhu hoko gënanga. Mangale hokogënanga o gigoro hiädono o tentara manga baluhu gënanga wakunua wohiöriki de madiai okia idadioka. Hababu gënanga ünanga wopareta hupaya o Paulus iwiao manga gogöana mangï ika.

³⁵Maöraha önanga iwiao ünanga hiädono o nguteika, yogö gigigoro gënanga imakutuhaka hokogënanga magiria hiädono o Paulus kiani imatekeligoraka o tentaraoka.

³⁶Onanga yanïki manga poretino o doomu yogogigigoro gënanga yopöa-pöaka, ”Niwitoma ünanga!”

³⁷Hoko gënanga yomau yowohama o gogöana mangï magoronaika, o Paulus wotemo o tentara manga baluhika gënanga, ”Iyakunu ngohi totemo utu de Tuanga?” ”Okia ngona nakunu de o Yunanioka manga demo?” woleha o tentaraoka manga baluhu gënanga.

³⁸”Nako hokogënanga, ngonaua o Mesir manyawa gënanga kahuruono mawange yodiai o lolawani daha waao yoara o nyawa yaribuhu iata yohöhuru-hara de manga daëoka yowohama o tonaka makokakaha?”

³⁹O Paulus wohaluhu, ”Ngohi o Yahudioka manyawa; ngohi o Tarsus makota makawaha, o kota ilamo-lamoko o Kilikiaka. Togahoko nohihi gumal̄a ngohi totemo o nyawaika gënanga.”

⁴⁰O Paulus iwihigumal̄a iböto wotemo, o Paulus womaoko o nguteoka, daha wohidöaka o nonako de aigiama. Mata-mata o nyawa yokokirïdoka. Ahao o Paulus wotemo onangika de o Ibranioka manyawa manga demo. O Paulus wato,