Read Tobelo O KISAH RASUL-RASUL 22 Bible Online

O KISAH RASUL-RASUL 22 - Tobelo bible

O KISAH RASUL-RASUL 22

¹”Bapa-bapa de o Roriadodoto mata-mata! Ngohi aha tohihimanga tomademo ngohi nginika. Abeika niihene!”

²Maöraha önanga yoihene o Paulus wotemo de o Ibranioka manga demo, önanga idadi iholoi yorïdoli. O Paulus wohigila-gila aihitararono.

³ ”Ngohi o Yahudioka manyawa,” o Paulus wato, ”ngohi tomakil̄au o Tarsusoka o Kilikia mabereraka, mä ngohi todogilamoka nenangoka o Yerusalemoka deʼ ihidotoko de madiai maguru wolamo-amoko o Gamaliel o tita magoronaka o Musa wohidöa-döakoka tongone nangaete de nangatohoraika. Hokä imadäene o Roriadodoto mata-mata nenangoka o wange nënanga, ngohiö duru tomagawe mangale ma Jou Madutu.

⁴ Ngohi taaniaya hiädono yohonenge yaninïki o dodötoko mahungi gënanga. Onanga mata-mata yaoa o nauru yaoa o ngoheka, ngohi tatagoko deʼ tahingohama o buiika.

⁵Ma imam womomulia mahirete de mata-mata o Agama ma Juru Hakimi yakunu ihidöaka o hakihi igoungu ngohi toelukua. Hababu önanga gënanga ihihidoakoka ngohino o hurata mahidongotaka mameta o Yahudi manyawaika o Damsyikoka. De o hurata gënanga ngohi takunu tatagoko dokengoka o nyawa yongaku-ngaku o dodotokika gënanga deʼ taao önanga o Yerusalemika mangale yahukumu.”

⁶”Maöraha ngohi o dodagi mahi dogoronakahi deʼ ngade tomahiädono o Damsyikika, maöraha o wange ikorona, o cahaya moi duru kohadararono itodokanino itararono o dihanguku ihikilolitino ngohi.

⁷Ngohi toruba o tonakuku daha ngohitoihene o ilingi moi itemo ngohino, ’Saulus, Saulus! Yadodoa ngona nohi aniaya Ngohi?ʼ

⁸Daha ngohi toleha, ’O nagona Ngona, Tuanga?’ Ihaluhu, ’Ngohila o Yesus o Nazaret manyawa gënanga ngona nohiö aniaya Ngohi.’

⁹O nyawa naga genangoka mima kokinïki de ngohi yamäke o cahaya gënanga, mä onanga yoihenua o ilingi itemo ngohino.

¹⁰Daha ngohi tolehali, ’Ngohi kiani tadiai okia Jou?ʼ Ma Jou wohaluhu, ’Nomomiki deʼ nowohama o Damsyikika. Dokengoka ngona aha inihi ngahu mangale mata-mata ma Jou Madutu womau ngona nadiai.’

¹¹Ngohi todadi topiloko karana o cahaya yodoleletongo gënanga. Hoʼ, ahi dodiawo ihituda ngohi ihihingohama o Damsyikika.

¹²Genangoka naga o nyawa womatëngo airomanga o Ananias. Unanga o nyawa moi wohininga aiagama de wamoteke de madiai o Musa aitita. O Yahudioka manyawa mata-mata yogogogere o Damsyikoka duruhe iwihoromati ünanga.

¹³Unanga woböa wohilega ngohi, daha womaoko ngohi ahihonongaka deʼ wotemo, ’O, Riadodoto Saulus, tanu ngona nomahimäkeokali!ʼ Oraha gënanga dika ngohi tagoraka tongohi ahibiono daha timäke ünanga.

¹⁴Ahao ünanga wotemo ngohino, ’Nangaete de nangatohora manga Jou Madutu woni irikoka ngona hupaya ngona nohiöriki Ai mau, deʼ nimäke o Yesus, ma Jou Madutu ai Gilaongo wadiaioka ma Jou Madutu aimau de noihene o Yesus aiilingi mahirete.

¹⁵Ngona aha nodadi o hakihi mangale nohiabari o nyawa mata-mataika, okia ngona namäkeoka deʼ noihene.

¹⁶Oraha nënanga uhali notamä nomatotedekana. Nomomiki, deʼ nohidöaka anidiri yaohiki. Nomahi böaka ma Jouika hupaya ngona nolapahi ani baradoha.’ ”

¹⁷”Ngohi tomakilioro o Yerusalemika, deʼ maöraha ngohi tomaniata magogiriaka ma Jou ai Tauoka, ngohi ihikuaha ma Jou Madutu ai Womaha.

¹⁸Ngohi timäke ma Jou; ünanga wotemo ngohino, ’Taiti namal̄a o Yerusalem, hababu o nyawa nenangoka aha yatarimaua anihakihi mangale Ngohi.’

¹⁹Ngohi totemo, ’Jou, önanga ihiöriki de madiai, ngohi tongohamoka o puji matau-matau mangale tatagoko önanga deʼ tagohara o nyawa iningaku-ngaku Ngona.

²⁰ Hoko genangoli maöraha Anihakihi o Stefanus wohonenge iwitoma, ngohi mahirete naga genangoka deʼ tohigoungu iwitoma gënanga. De ngohi tögöana to önanga manga pakeanga o nyawa iwitoma-toma ünanga.’

²¹Mä ma Jou wotemoli ngohino, ’Noiki dika, hababu Ngohi aha tonihuloko ngona o ngï magogurutika o Yahudiokaua manyawaika.’ ”

²²O nyawa ka ihigihenohi o Paulus wotemo-temo, mä aidemo mabobahaka gënanga önanga imapöaka imakua-kuatil̄e, ”Niwitoma dika o nyawa hokogënanga. Unanga ipatutua wowango!”

²³De imapöaka, önanga yahurero manga juba, deʼ makafo idoa ikokapupu.

²⁴O tentara manga baluhu o Romaino gënanga wahuloko o Paulus iwiao manga ngïika hupaya ünanga iwitailako genangoka de mabuturungoka mangale ihiöriki okia mahababu o Yahudioka manyawa imapöaka hokogënanga yahimanga unangika.

²⁵Mä maöraha o Paulus iwilikoka mangale iwigohara, o Paulus wotemo o tentara manga baluhika woma okoino genangoka, ”Nagaka iyakunu niwigohara o nyawa moi o Roma mapareta mabä, nako ünanga niwi tailakouahi?”

²⁶Woihene gënanga, o tentara manga baluhu gënanga woiki o tentara duru manga baluhika deʼ wotemo, ”Okia nënanga aha Bapa nadiai? O nyawa nënanga o Roma mapareta mabä!”

²⁷Duru manga baluhu gënanga woiki o Paulusika deʼ woleha, ”Abeika nohingahu, naga ngona o Roma mapareta mabä!” O Paulus wohaluhu, ”Igoungu,” ”ngohi o Roma mapareta mabä.”

²⁸O tentara duru manga baluhu gënanga wotemokali, ”Ngohi todadi o Roma mapareta mabä de tofangu duru koha amoko!” O Paulus wohaluhu, ”Mä ngohi toma kil̄au hokä o Roma mapareta mabä.”

²⁹Oraha gënanga dika o tentara manyawa yomau iwitailako o Paulus gënanga, imadohuku deʼ duru manga baluhu genangö idadi wohawana karana ünanga iwiranteoka o Paulus, enahioko o Paulus o Roma mapareta mabä.

³⁰O tentara maduduono mabaluhu o Roma gënanga woigo duru wohiöriki igou-goungu okia idadi hababu o Yahudi manyawa iwihihowono o Paulus. Hababu gënanga yarehino ünanga wä ähoko o imam-imam manga häeke deʼ o Agamaka manga Juru Hakimi hupaya imatoomu. Daha o Paulus iwihohe airante, ahao iwi ao iwihihimanga onangika mata-mata.