Read Tobelo O KISAH RASUL-RASUL 23 Bible Online

O KISAH RASUL-RASUL 23 - Tobelo bible

O KISAH RASUL-RASUL 23

¹O Paulus wapulo-pulono o juru hakimi manyawa gënanga daha wotemo, ”O Roriadodoto! Hiädono o wange nënanga ngohi tomamäo tahowonua ma Jou Madutuika ahihininga doka magoronaka imakorona de tongohi ahiwowango.”

²Maöraha o Paulus wotemo hokogënanga, ma Imam womo Mulia o Ananias wihuloko o nyawa womaoko o Paulus aihonongaka wapoka o Paulus aiuru.

³ O Paulus wotemo ma imam womomuliaika gënanga, ”Ma Jou Madutu maraioka wonipoka ngona, o nyawa notota lawani, de noelu-eluku notebini! Ngona nogogeruku genangoka nohi tailako ngohi imoteke o Musa aitita, enahioko ngona mahirete natilakuru o tita gënanga de nahuloko o nyawa ihipoka ngohi!”

⁴O nyawa aihonongaka o Paulus wotemo o Paulusika, ”Ngona nihikauku ma Jou Madutu ai imam womomulia!”

⁵ O Paulus wohaluhu, ”Eë, ngohi tohiorikua o Roriadodoto, ünanga ma imam womomulia. Igoungu Ma Jou Ai Demo ma Buku magoronaka naga i tulihoka, ’Uha ngona nahikauku anihoana matutuda.’ ”

⁶ O Paulus wamäke utu o juru hakimino gënanga, o Saduki manyawaino deʼ utuoli o Farisi manyawaino. Karana gënanga ünanga watemo o juru hakimika gënanga, ”O Roriadodoto! Ngohi o Farisioka manyawa moi, o Farisioka manga difauku. Ngohi nihi tailako nenangoka mahababu ngohi tongaku o nyawa yohone-honengoka aha yowangokali.”

⁷Maöraha ünanga wotemo hokogënanga, o Farisioka manyawa deʼ o Saduki manyawa gënanga muläenge imatekeributu, hiädono o doomu gënanga idadi iregu o doomu hinoto. (

⁸ Hababu o Saduki manyawa manga gamäke o nyawa yohonengoka aha yowangokaua, o malaekat koiwa, deʼ o womaha-o womahaö koiwa; mä o Farisi manyawa yongaku aha naga mata-mata gënanga.)

⁹Ipuda o gigoro kohagiria. O Farisioka manyawa yamuruono naga yodadi guru agama imaoko deʼ yalawani yagou-goungu. Onanga yato, ”Imoteke ngomi o nyawa nënanga kama huhutulö de koiwa aihowono! Mudukua igoungu naga o womaha ekola o malaekat iwitemo unangika!”

¹⁰Ima teke ributu gënanga idadi hokogënanga mahiri hiädono o tentara duru manga baluhu gënanga wohawana uha-uha o Paulus aha iwiguruhe önanga. Hoʼ unanga wahuloko o tentara de manga duduonoka yoiki iwil̄ë o Paulus o nyawa gënanga manga hidogoronaka deʼ iwiao ünanga manga ngï ika.

¹¹Ma hutu yaino ma Jou Yesus womaoko o Paulus aidatekoka deʼ wotemo, ”Ani hininga naputurungu! Ngona nohidoakoka anihakihi yakorona Ngohi o Yerusalemoka. Ngona aha kiani nohi döaka o hakihi gënanga o Romakaö.”

¹²Yarehino mawange kao ngoru-ngoruminohi, o Yahudioka manyawa muläenge yodiai o doomu madorou. Onanga yokoboto aha yol̄omua ekola yokere nako önanga iwitomauahi o Paulus.

¹³Naga o nyawa yamoruata iholoi yodiai o doomu madorou gënanga.

¹⁴Onanga yoiki o imam-imam manga häekika, deʼ o Yahudioka manga tutuda de yotemo, ”Ngomi mikokikobotoka, aha miol̄omua ekola miokerua okia naga nako ngomi miwitomauahi o Paulus.

¹⁵Aa, öraha nënanga o Roriadodoto de o Agama ma Juru Hakimi kiani nihidingoto o hurata o tentara duru manga baluhika o Romaino gënanga mangale nigahoko ünanga wiaoli o Paulus wini himanga ngini, tanu hokä ngini nimau niwitailakoli aiparakara de iholoi madiai. Deʼ ngomi aha mimahidiaioka mangale miwi toma ünanga womahi adonuahi ünanga nenangino.”

¹⁶Mä o Paulus ngoi hiranga amingohaka wohigihe-gihene imakatatoro yodiai gënanga. Unanga woiki o tentara manga ngï ika deʼ wohingahu o hali gënanga o Paulusika.

¹⁷Daha o Paulus wiahoko womatëngo o tentara mangabaluhu deʼ wotemo unangika, ”Niao o ngohaka o goduru nënanga o tentara niabaluhika; ünanga womau wohingahu okia naga utu unangika.”

¹⁸O tentara manga baluhu gënanga wiao o ngohaka o goduru gënanga o tentara duru manga baluhika deʼ wotemo, ”O Paulus, hitumu-tumunguku gënanga, wohiahoko ngohi deʼ wogahoko ngohi tiao o ngohaka o goduru nënanga ngonaika Bapa; ünanga womau wohingahu okia naga utu.”

¹⁹O tentara duru manga baluhu gënanga wasö aigiama o ngohaka o goduru gënanga, daha wiao ünanga womatëngo dika madatekika deʼ wileha, ”Ngona nomau nohihingahu okia ngohino?”

²⁰O ngohaka o goduru gënanga wohaluhu, ”O Yahudioka manyawa imakatatoro mangale yogahoko Tuanga niao o Paulus wahimanga o Agama ma Juru Hakimi yarehino, hokä tanu önanga yomau iwitailakoli aiparakara de iholoi madiai.

²¹Mä uha Tuanga namoteke önanga manga gogahoko gënanga, hababu naga o nyawa yamoruata yoholoi imangiunika mangale iwitatoko ünanga o ngekomoka. Onanga mata-mata yokobotoka aha yol̄omua deʼ yokerua nako önanga iwitomauahi o Paulus. Oraha nënangaö önanga imahidiaioka; mahou yodamä dika anibobaluhu Tuanga.”

²²O tentara duru manga baluhu gënanga wotemo, ”Uha nohi ngahu kamoi ikaö de okia ngona nohingahuoka nënanga ngohino.” Daha ünanga wihuloko o ngohaka o goduru gënanga wolio.

²³Ahaino o tentara duru manga baluhu wa ahoko o nyawa yahinoto ihibalu-baluhu, daha ünanga watemo onangika, ”Niasadia o tentara yäratuhu hinoto imakinïki de yamori tumidi o tentara yokuda deʼ yaratuhu hinoto o tentara de manga tuba mangale ima goraka o takoro hiwo o hutu nënanga dika o Kaisariaika.

²⁴De nia sadiaö o kuda mangale o Paulus wodoa deʼ niwi ao ünanga de mahalamati hiädono ma Gubernur Feliksika.”

²⁵Daha o tentara duru manga baluhu gënanga wotulihi o hurata mademo hokonënanga,

²⁶”No Mo Mulia Gubernur Feliks. Ani tabea o Klaudius Lisiasino!

²⁷O nyawa neünanga iwitagokoka o Yahudioka manyawa deʼ ngadekohi önanga iwitoma, nako ngohi toböaua de ahingoha-ngohaka de manga duduono miwihihalamati ünanga; hababu ngohi toihene ünanga o Roma mapareta mabä.

²⁸Karana ngohi toigo tohiöriki imoteke madiai okia aihowono ho önanga iwihi howono unangika, mangohi tiao to önanga manga Agama ma Juru Hakimika.

²⁹Ma inyata ünanga wadiaiua okia naga moiö i patutu wamäke o hukumanga de o hukumanga wohonenge ekola wobui. To önanga manga galaki unangika duga-duga imadohanga de manga tita-tita agama önanga mahirete.

³⁰Ahaino ihingahu ngohi okia naga moi yadiai itotorou o Yahudi manyawaino ihihimanga unangika. Hoʼ, gila-gila ngohi tihidingoto ünanga Tuanga Gubernurika. Deʼ ngohi tähulokoka iwilolawa-lawani ünanga yoao o galaki ngonaika Tuanga.”

³¹O tentara-tentara gënanga yadiai manga manarama önanga. Onanga iwi l̄ë o Paulus daha iwiao ünanga o hutu gënanga hiädono o Antipatrisika.

³²Yarehino önanga yamal̄aika manga duono yoko kuda-kuda manga dodagi ihigila-gila de o Paulus, deʼ onanga mahirete imaidulu manga ngïika.

³³Maöraha manga duono yokokuda-kuda gënanga imahi ädono o Kaisariaka, önanga ihi döaka o hurata gënanga magubernurika, daha o Paulus wihi lapahi unangika.

³⁴Ma gubernur wabasa i böto o hurata gënanga, ünanga wileha o Paulusika okiaino aiahali. Maöraha ünanga wohi öriki o Paulus ai ahali o Kilikiaino,

³⁵ünanga wato, ”Kayaoa! Ngohi aha tatailako ani parakara, maöraha okia o nyawa ini kökalaki ngona yoböaka nenangino.” Daha ünanga wapareta hupaya o Paulus iwitumungu o Herodes aikadato magoronaka.