Read Tobelo O KISAH RASUL-RASUL 24 Bible Online

O KISAH RASUL-RASUL 24 - Tobelo bible

O KISAH RASUL-RASUL 24

¹O wange motoa ipaha, ma Imam womo Mulia o Ananias deʼ o Yahudioka manga tutuda-tutuda yoiki o Kaisariaika ima kinïki womatëngo o juru kuaha airomanga o Tertulus. Onanga iwihimanga ma Gubernur Feliks deʼ ihingahu to önanga manga galaki mameta o Paulusika.

²Maöraha o Tertulus iwiahoko mahimangika, ünanga wikalaki o Paulus hokä hokonënanga, ”Tuanga Gubernur No Mo Mulia! Ani tutuda matimioka Tuanga tongomi miaberera irïdi. Deʼ anibarijaö Tuanga mangöe yahungi okali yadiai miahoana ngomi.

³Mata-mata gënanga ngomi miö dahongo de itogu-togumua miatarima kasi deʼ mini horomati kohagurutil̄e kiakaö dika.

⁴Mä hupaya Tuanga uha naumo ani öraha ilamoka, ngohi togahoko tanu nomodeke Tuanga nohi gihene tongomi miagalaki madodipoko nënanga.

⁵Ngomi miwi mäke o nyawa nënanga woruae kohadorou. Kiaka honanga ünanga wohi puda o gigoro o Yahudioka manyawa manga hidogoronaka de ünanga wodadi wohibaluhu o Nazaret manyawa manga manaramoka.

⁶Ma ünanga wohi tailoka wadiai wapesekoka ma Jou ai Tau mä ngomi miwitagokoka ünanga. [Ngomi miadungutu miwi tailako imoteke tongomi mia agama matita mahirete.

⁷Mä o tentara duru manga baluhu o Lisias wiora ünanga ngomioka,

⁸deʼ wapareta hupaya iwikokokalaki inihimanga Tuanga.] Nako Tuanga nitailako o nyawa nënanga, Tuanga mahirete aha noihene unangino madiai ngomino mata-mata miwilawani nënanga unangika.”

⁹O Yahudioka manyawa genangokaö imahimoteke iwikalaki o Paulus deʼ ihigoungu mata-mata wotemo o Tertulus.

¹⁰Daha magubernur gënanga wihidöaka o nonako o Paulusika la ünanga wotemo. O Paulus wotemo, ”Ngohi tohiöriki Tuanga nodadioka o hakimi o berera nënanga de matao-taongo madekana. Hababu gënanga ngohi tamäo tosanangi taao ngohi tomademo nënanga anihimangoka Tuanga.

¹¹Tuanga mahirete yakunu nohitailako de madiai o wange ngimoi de hinoto iholoiuahi ipahaika, ngohi toiki o Yerusalemika mangale tohubayanga.

¹²Deʼ komaiwahi o Yahudioka manyawa gënanga ihimäke ngohi mima tekeributu o nyawa moiö ma, ekola tatoomu o nyawa mangale todiai o huru-hara yaoa ma Jou ai Tauoka yaoa o puji matau-tauoka ekola okiaka dika o kota magoronauku.

¹³Onangö yamäkeua manyonyata manga galaki-galaki önanga yaoka ngonaika Tuanga madungutu ngohi.

¹⁴Igoungu ngohi kiani tomangaku ngonaika Tuanga ngohi tihuba miaete de miatohora manga Jou Madutu imoteke o Yesus aidodötoko ngaro önanga yato ihowono. Mä ngohi kato ngakuohi mata-mata itotuli-tulihi o Musa ai Buku magoronaka deʼ o Nabi-nabi manga Bukuoka.

¹⁵Hokä mimakadäene de önanga, ngohiö de ma ënanga ahi ngonganono ma Jou Madutuika mata-mata o nyawa yohonengoka ma aha yowangokali — o nyawa maoa-oa, yaoa o nyawa madorou!

¹⁶Mahababu gënanga ngohi hoko genangika tohidailako tohidodiai, hupaya tongohi ahihininga madobote de itebini ma Jou Madutuika deʼ itebini madungutu o nyawaika.

¹⁷ O taongo muruono naga koihiwa o Yerusalemoka, ngohi toma idulu dokengika mangale tao ahiroriwo o tiwi tongohi ahihoanika deʼ mangale tohihuba ahihuhuba ma Jou Madutuika.

¹⁸Maöraha ngohi magogiriaka tadiai gënanga, önanga ihimäke ngohi ma Jou ai Tauoka, ipahaino ngohi tadiai madodagi tatebini ahi diri. Koiwa naga o nyawa yowöe-wöe mimakinïki de ngohi, deʼ koiwa nagaö o gigoro genangoka öraha gënanga.

¹⁹Duga-duga naga o Yahudioka manyawa yamuruono naga dokengoka o Asia maprovinsino. Onanga kokiani naga nenangoka mangale önanga yoao o galaki ngonaika Tuanga, nako önanga naga okia naga manga galaki madungutu ngohino.

²⁰Ekola hamal̄aika o nyawa nënanga mahirete ihingahu o dorou okia önanga yamäke ngohioka maöraha ngohi ihihihimanga o Agama ma Juru Hakimika.

²¹ Onanga yamäke duga-duga o demo moi nënanga dika ngohi totemoka önanga manga himangoka, enagënanga o demo nënanga: Ngohi nihi tailako o wange nënanga hababu ngohi tongaku o nyawa yohonengoka aha yowangokali.”

²²Daha o Feliks wohiorikoka mangöe o Yesus aidodötoko, wohi bobaha o parakara madoomu gënanga. ”Ngohi aha taputuhu o parakara nënanga,” wato, ”nako o tentara duru manga baluhu o Lisias woböainoka.”

²³Daha ünanga wipareta o tentara manga baluhu wigöa-göana o Paulus gënanga hupaya tatapu witumungu o Paulus, mä wihidöaka mahuhutulu iuwini unangika de yahigumal̄a aidodiawo iwihidöaka unangika okia woparalu.

²⁴O wange muruono naga ipahaika, o Feliks woböa ngoi hekata midodiawo amiromanga o ngo Drusila; münanga o Yahudioka manyawa moi. Daha o Feliks wähuloko o nyawa iwil̄ë o Paulus aha o Feliks wohigihe-gihene o Paulus wotemo-temo mangale o ngongaku o Kristus Yesusika.

²⁵Mä maöraha o Paulus wohi gila-gila aidemo-demo mangale o diai deʼ hatumungu nanga nahihu deʼ mangale o hukumanga o Kiamati ma Wangeoka, o Feliks idadi wohawana daha wotemo, ”Ngona iyakunu noiki örahanënanga. Ngohi aha toni ahokoli nako naga öraha.”

²⁶Oraha gënanga o Feliks wönganono aha wamäke o tiwi o Paulusino. Hababu gënanga wohigali-gali wähuloko o nyawa iwingoho o Paulus mangale ima ade-ade dede ünanga.

²⁷O taongo hinoto ipaha, o Perkius Festus witagali o Feliks hokä o gubernur. Deʼ karana o Feliks womau wol̄ë o hininga o Yahudi manyawaika, ünanga iwimal̄aika o Paulus o bui magoronaka.