Read Tobelo O KISAH RASUL-RASUL 25 Bible Online

O KISAH RASUL-RASUL 25 - Tobelo bible

O KISAH RASUL-RASUL 25

¹O wange hange ipaha o Festus womahiädono o daeraka gënanga, ünanga woiki o Kaisaria de waino o Yerusalemika.

²Dokengoka o imam-imam manga häeke deʼ o Yahudioka manga tutuda-tutuda yao unangika toönanga manga galaki madungutu o Paulusika. Onanga kahoko genangika dika iwibaja o Festus,

³hupaya de aihininga maoa onangika, ünanga womodeke wähuloko o nyawa iwiao o Paulus o Yerusalemika; hababu önanga ima ketemoka mangale iwitoma ünanga o ngëkomo mahi dogoronaka.

⁴Mä o Festus wohaluhu, ”O Paulus iwitumunguku o Kaisariaoka; deʼ ngohi mahireteö totedekanokauali aha tomaiduli dokengika.

⁵Hoʼ, koaho o nyawa inihibalu-baluhu ngini niahidogoronaka yoiki mimakinïki de ngohi o Kaisariaika deʼ iwikalaki dokengoka, nako igoungu ünanga wadiaioka okia naga moi i howono.”

⁶Wogogere o Yerusalemoka ipaha doneho o wange tufange ekola o wange ngimoiohi, o Festus womaiduli o Kaisariaika. Yarehino ünanga wodiai o parakara madoomu deʼ wapareta hupaya o Paulus iwiao wohimanga.

⁷Maöraha o Paulus woböa, o Yahudioka manyawa yoböa-böainoka o Yerusalemino imaoko iwihigilolitino, deʼ yomuläenge ihingahu manga galaki-galaki itotubuho unangika. Mä onanga yakunua ihingahu manga galaki-galaki gënanga manyonyata.

⁸Womademo mahidogoronaka, o Paulus wotemo, ”Ngohi tadiaiua okia naga moiö ihowono madungutu o Musa aititaika ekola ma Jou ai Tauika ekola ma Kaisar Romaika.”

⁹Mä o Festus womau o hininga wol̄ë o Yahudi manyawaika. Ho ünanga wileha o Paulusika, ”Kano modeke ngona noiki o Yerusalemika mangale initailako dokengoka tongohi ahi himangoka o galaki-galaki gënanga?”

¹⁰O Paulus wohaluhu, ”Ngohi tomaokoino ma Kaisar Roma ai juru hakimi mahimangoka; de o ngï genangala ngohi kiani ihitailako. Tuanga mahirete nohiöriki ngohi tahowonua o Yahudi manyawaika.

¹¹Nako ngohi tatilakuroka o tita deʼ tadiai okia naga moi kokiani ihihukumu de o hukumanga o honenge, ngohi toigo tohonenge. Mä nako manga galaki-galaki önanga itiaiua, o nyawa kaimatëngö yakunua ihihilapahi ngohi onangika. Ngohi togahoko nihi tailako ma Kaisar aipengadilanoka!”

¹²Ima hikidibanga iböto de yononasihati, o Festus wotemo, ”Ngona nogahoko ini tailako ma Kaisar aipengadilanoka, hoʼ ngona kiani noiki nihimanga ma Kaisar.”

¹³Hokokiaua madekana ipahaino ma Koano Agripa deʼ o ngo Bernike yoböa o Kaisariaino mangale yotemo halamati o Festusika.

¹⁴Onanga o wange muruono naga ipaha genangoka, o Festus wohitararono o Paulus aiparakara ma Koano Agripaika. O Festus wato, ”Naga nenangoka o nyawa womatëngo iwitumunguku wimal̄aika o Feliks.

¹⁵Maöraha ngohi naga o Yerusalemoka, o imam-imam manga häeke deʼ o Yahudioka manga tutuda-tutuda yaoka önanga manga galaki o nyawa gëunangika gënanga, deʼ yogahoko ngohi tihidero o hukumanga unangika.

¹⁶Mä ngohi tohaluhu o Roma manyawa yakunua yahilapahi kahoko gënanga dika womatëngo iwikokalaki mangale iwihukumu, nako iwikokalaki gënanga imateke rihimanguahi de yokokokalaki de iwihidoakuahi aidiri wodemo.

¹⁷Hoʼ, maöraha önanga yoböa nengino, ngohi todamäua madeka-dekana. Yarehino ngohi gila-gila todiai o pengadilan madoomu deʼ tahipareta hupaya o nyawa gënanga iwi ao wohimanga.

¹⁸Maöraha iwikokokalaki imaoko de ihingahu toönanga manga galaki, önanga ihingahua o howono moiö ma, hokä ngohi tatobote önanga aha ihingahu.

¹⁹Onanga duga-duga imaka däenua manga gamäke dede ünanga imakorona to önanga manga agama mahirete de imakorona womatëngo airomanga o Yesus. O nyawa gënanga wohonengoka, mä o Paulus woributu wagou-goungu o nyawa gënanga wowango.

²⁰Karana ngohi tomahi orikokaua imadäene sarakia ngohi yakunu tamäke o hitararono imakorona o parakara gënanga, ngohi tileha o Paulusika boteka ünanga womau woiki o Yerusalemika deʼ iwitailako dokengoka mangale o parakara gënanga.

²¹Mä o Paulus wogahoko iwitailako wohidoa holoi ikurutil̄e; ünanga wogahoko hupaya ünanga wotatapu wogogere iwi tumungu hiädono aiparakara ma Kaisar waputuhu. Mahababu gënanga ngohi täpareta hupaya ünanga iwitumungu gila-gila, hiädono ngohi tamäke o öraha mangale tihidingoto ünanga ma Kaisarika.”

²²Daha o Agripa wotemo o Festusika, ”Ngohi mahireteö matoigo tigihene o nyawa gënanga aidemo.” ”Yarehino Tuanga, yakunu nogihene,” o Festus wohaluhu.

²³Yarehino o Agripa deʼ o ngo Bernike yoböa imahi deroika o kokoano manga nonako. Onanga yowohama o doomu mangïika imakinïki de o tentara yopoparangi manga baluhu yolago-agomo de o nyawa yobalu-baluhu o kotaka gënanga. Imoteke o Festus aipareta o Paulus iwiao iwihingohama.

²⁴Daha o Festus wotemo, ”Jou Koano Agripa deʼ mata-mata niböa-böaino! O nyawa nënanga iwikalakioka ngohino o Yahudioka manyawa mata-mata, yaoa o Yerusalemoka yaoa nenangoka. Onanga yogahoko ima pöa-pöaka ünanga ipatutua niwimal̄aika wowango.

²⁵Mä ngohi tamäkeua moiö wadiaioka yakunu hihukumu de o hukumanga o honenge. Deʼ hababu ünanga mahirete wogahokoka aiparakara yatailako ma Kaisar aipengadilanoka, ngohi taputuhoka mangale tihidingoto ünanga ma Kaisarika.

²⁶Mä ngohioka koiwa okia naga moi o hitararono de madiai imakorona aidiri mangale tatulihi tongohi ahihurata magoronaka ma Kaisarika. Hababu gënanga ngohi tihihimanga ünanga nginika Tua-tuanga mata-mata, ma l̄okuoka duru ngonaika No Mo Mulia Jou Koano Agripa! Ahi dungutu ngohi ganga hupaya niwitailako ipaha nënanga, naga o hohol̄e ngohioka mangale totulihi.

²⁷Hababu imoteke ahimamäo ngohi, mangïua hahidingoto o nyawa hatumunguku de hohimatokua manga howo-howono yakalakioka onangika.”