Read Tobelo O KISAH RASUL-RASUL 26 Bible Online

O KISAH RASUL-RASUL 26 - Tobelo bible

O KISAH RASUL-RASUL 26

¹O Agripa wotemo o Paulusika, ”Ngona minihigumal̄a noade-ade nomademo mangale anidiri.” O Paulus wagoraka aigiama daha wohiädono womademo hokä hokonënanga,

²”No Mo Mulia Jou Koano Agripa! Ngohi tomamäo duru toutumu takunu tohidöaka tomademo ahidiri ngohi ngaro ma Jou Koano anihimangoka imakorona mata-mata manga galaki o Yahudioka manyawa ngohino;

³duru mal̄okuoka hababu Jou Koano nohiöriki de madiai ada-adati de manga hali-hali o Yahudioka manyawa. Mahababu gënanga, ngohi togahoko tanu Jou Koano noihene ahihitararono ngohi de anisabari.

⁴O Yahudioka manyawa mata-mata ihiöriki sarakia ngohi towango katomagöikahi. Onanga ihiöriki ngohi kato dadiohi o nyawa magö, ngohi towangoka ahinyawa tongohi mahirete manga hidogoronaka o Yerusalemoka.

⁵ Madekanoka önanga ihiöriki mangale ngohi. De nako önanga yömodeke, önanga yakunu ihidöaka o hakihi mahirahi ngohi towangoka hokä o Farisioka manyawa tamoteke hagala o datoro duru ikekete tongomi miaagama magoronaka.

⁶Deʼ orahanënanga ngohi tomaoko nenangoka mangale nihitailako karana ngohi tongaku o jaji kama Jou Madutu wadodiaioka tongomi miaete de miatohoraika.

⁷O jaji gënanga doka yongano-nganono o Israeloka o hoana ngimoi de hinoto, hiädono önanga yopuji ma Jou Madutuika o hutu de o wange. Deʼ ngaro karana ngohi tongaku aha o jaji gënanga, Jou Koano nomomulia, ngohi ihihihowono o Yahudioka manyawa.

⁸Yadodoa o roriadodoto o Yahudioka manyawa yakunua yongaku ma Jou Madutu wahi wangokali o nyawa yohone-honengoka?

⁹ Kahuruono ngohi mahireteö ahigamäke ngohi kiani tadiai hagala okia honanga mangale tïlawani o Yesus o Nazaretino gënanga.

¹⁰Deʼ igoungu ngohi tadiaioka gënanga o Yerusalemoka. De o kuaha mahurata o imam-imam manga häekino, ngohi tahi ngohamoka o buiika mangangöe o nyawa yososetia ma Jou Madutuika. Deʼ ngohiö matorimoi nako yagelenga o hukumanga yohonenge.

¹¹Hara mangöe ngohi tahangihara önanga o puji matau-tauoka, hupaya tapakisa önanga yöporete okia önanga yangakuoka. Hoko gënanga mahauku ahihininga ngohi onangika, hiädono o kota-kota mahomoaikaö ngohi toiki mangale taginïki önanga dokengoka.”

¹²”De ahidungutu gënangö ngohi tomagao o kuaha mahurata o imam-imam manga häekoka deʼ toiki o Damsyikika.

¹³Deʼ maöraha ngohi o ngëkomo mahidogoronaka, maöraha o wange ikorona, Jou Koano nomomulia, ngohi tamäke o dararono moi o dihanguku iholoi itararono de o wange. O dararono gënanga itararono ihihigilolitino ngohi deʼ yahigiloliti o nyawa mimateke dodagi moi dede ngohi. Ngomi mata-mata miruba o tonakuku.

¹⁴Daha ngohi toihene o ilingi itemo ngohino de o Ibranioka manga demo magoronaka, ’Saulus, Saulus! Yadodoa ngona hokogenangika dika nohi aniaya Ngohi? Ngona mahirete aha namäo mahiri, nako ngona hoko genangika dika nalawani toünanga Ai tutuda wodadi anituanga.’

¹⁵Ngohi toleha, ’O nagona Ngona, Tuanga?ʼ Deʼ ma Jou wohaluhu, ’Ngohi o Yesus ngona nohiöaniaya.

¹⁶Nomomiki de nomaoko! Ngohi tomahimatoko Ahi diri ngonaika de madungutu mangale Toni goraka ngona nodadi nohilöleleani. Ngona kiani nohingahu o nyawa mahomoaika, okia ngona namäke o wange nënanga mangale Ngohi deʼ mangale okia ngohi aha tonihi dumutu ngonaika aha maöraha aha iböa.

¹⁷Ngohi aha tonihi pidili ngona o Israel manyawaino deʼ o nyawa mahomoaino o Yahudioka manyawaua. Ngohi aha tonihuloko ngona noiki onangika,

¹⁸mangale nahelenga önanga manga lako, hupaya önanga yohupu o huhutuino deʼ yowohama o dararono magoronaika; hupaya önanga yapidili o Ibilihi makuahaino, daha ma Jou Madutu wakuaha. De yongaku Ngohino, manga baradoha önanga aha iapongo deʼ onanga aha yodadi ma Jou Madutu aiumati wäiri-irikoka.’ ”

¹⁹”Karana gënanga, Jou Koano Agripa, ngohi hokogenangika tomahiaha tamoteke ahilolegaika ngohi tatotarimaka ma Jou Madutuino gënanga.

²⁰ De tohitotararonuku ngohi tahingahu o nyawaika önanga kiani imatoba manga baradohaka önanga deʼ ima hilapahi manga diri ma Jou Madutuika de ihidumutu önanga manga wowango magoronaka önanga imatobaka toönanga manga baradohaka. Ngohi tohingahu o hali gënanga madodihiraka o Damsyikoka, ahaino o Yerusalemoka deʼ o Yudea ingodumu deʼ o Yahudiokaua manyawa manga hidogoronaka.

²¹Ma hababu genangala o Yahudioka manyawa ihitagoko ngohi ma Jou ai Tauoka deʼ ihidailako ihitoma ngohi.

²²Mä hiädono öraha nënanga ma Jou Madutu wohihohongino, hiädono ngohi takunu tomaoko nenangoka mangale tohidöaka tongohi ahihakihi o nyawa mata-mataika — yopako ekola yoeteke. Okia ngohi to hi demoka nënanga mahomoaua de okia ihibobita o nabi-nabi deʼ o Musa;

²³ enagënanga o Koano Wohihohalamati wihi jajioka ma Jou Madutu gënanga kiani wohangihara, deʼ wodadi o nyawa madodihiraka womomikokali o honengino; hupaya de gënanga ünanga wakunu wohingahu o dararono — enagënanga o halamati — yaoa o Yahudi manyawaika yaoa o Yahudi manyawaikaua.”

²⁴O Paulus kawotemo-temohi wohihimanga mangale womademo gënanga, o Festus womapöaka, ”Ngona ini togohangoka Paulus! Ani dodötoko mangöe gënanga ngona inidiaioka ini togohanga!”

²⁵Mä o Paulus wohaluhu, ”Ngohi ihitogohangua, No Mo Mulia. O demo-demo ngohi tohidemoka gënanga itiai de i hupu ahidibanga itotumuloaino.

²⁶Jou Koano Agripa mahirete nohiöriki igoungu aha o hali-hali gënanga. Hababu gënanga ngohi tobarani totemo anihimangoka Jou Koano de tohitotararonika. Ngohi tongaku koiwa moi ö o hali-hali gënanga konohiorikuahi Jou Koano, hababu mata-mata gënanga idadiua o ngï-o ngï iiu-iunoka.

²⁷No Mo Mulia Jou Koano Agripa, bote Jou Koano nongaku aha okia yotemo-temoka o nabi-nabi? Ngohi tamäo Jou Koano nongaku!”

²⁸Daha o Agripa wotemo o Paulusika, ”Ngona natobote igapanga nohidiai ngohi todadi o Haranioka manyawa öraha madipoko magoronaka nënanga?”

²⁹”Maöraha madipoko magoronaka ekola maöraha magurutu magoronaka,” o Paulus wohaluhu, ”ngohi tomaniata ma Jou Madutuika hupaya Jou Koano deʼ Tua-tuanga mata-mata niöihe-ihene ngohi totemo o wange nënanga yakunu nidadi hokä ngohi — sowaliua o rante nënanga i tantu oka!”

³⁰Ma bahaka ma jou koano, magubernur deʼ o ngo Bernike, de mata-mata mahomoahi imaoko.

³¹Ma poretoka yaikaka, önanga imaketemo moi de moika, ”O nyawa nënanga wodiaiua okia naga moi ö kiani hihukumu de o hukumanga o honenge ekola hibui.”

³²Daha o Agripa witemo o Festusika, ”O nyawa nënanga yakunu hihilapahi, hohiade ünanga walingirua aiparakara yatailako ma Kaisar aipengadilanoka.”