Read Tobelo O KISAH RASUL-RASUL 27 Bible Online

O KISAH RASUL-RASUL 27 - Tobelo bible

O KISAH RASUL-RASUL 27

¹I putuhoka ngomi kiani mihidete o Italiaika, o Paulus deʼ yamuruono naga o nyawa mahomoa yätumu-tumunguku yahilapahi o Yuliusika, o tentara Roma manga baluhu ihiromanga ”Ma Kaisar ai tentara yowöe-wöe manga baluhu”.

²Ngomi midoa o kapail̄e o Adramitium de yaino, ahao mimagoraka de o kapa gënanga imahidiaioka ihidete o hohana-o hohana o Asia maprovinsioka. O Aristarkhus, o nyawa womatëngo o Makedoniaino o Tesalonika de waino mihidete mimakinïki dede ngomi.

³Yarehino ngomi mimahiädono o Sidonoka. O Yulius wiao duru irahai o Paulus. Unanga wihigumal̄a wälega aidodiawo hupaya önanga yakunu iwihidöaka unangika okia woparalu.

⁴Genangino ngomi mihidete migila-gila. Hababu o hidal̄oko yatomoika o kapa madihira, ngomi mihidete gila-gila mimahigoro o Siprus manühu madowongino laʼ mima hidutuluku de o hidal̄oko.

⁵Ahao ngomi miatoaka o ngöto imarihimanga de o Kilikia deʼ o Pamfilia daha mimahiädono o Miraka o Likia mabereraka.

⁶Genangoka o tentara manga baluhu gënanga wamäke o kapa moi o Aleksandriaino imau ihidete o Italiaika. Unanga womitururu o kapaika gënanga.

⁷O wange muruono naga madekana ngomi mihidete komia dekana duru, deʼ mahuha de makangela mabaha ngomi mimahiädono mahoana ho o Knidus maberera magurutika. Ahao mahidal̄oko kaitorouohi, ngomi miakunua mihidete migila-gila miameta madodihiraka. Ma ngomi mihidete mia korehara o Kreta manühika mia tilakuru o Salmone ma Doto hupaya dokengoka ngomi mima hidutuluku de o hidal̄oko.

⁸De mahuha de makangela ngomi mihidete mimahigoro o nühu mahohanino gënanga, hiädono mabaha ngomi mimahiädono o ngï moi maromanga o Leleoto ma Hailoa, hoko kiaua magurutika de o Lasea makota.

⁹Oraha gënanga o Yahudioka manyawa manga Wange ma Ago-agomo o Lolä ipahaka. Ngomi mihihangoka o öraha koha amoko, hiädono maörahokauaoli mangale mihidete de iogo-ogoro. Hababu gënanga o Paulus wahidöaka o nasihati nënanga onangika,

¹⁰”O Roriadodoto, imoteke ahigamäke ngohi, naga duru kohahuha nako ngone hohidete hohigila-gila. Ngone aha hamäke o rugi koha amoko katongone nanga ginaua deʼ nanga kapaua, mä tongone nanga jiwaö yakunu ihihanga.”

¹¹Mä o tentaraoka manga baluhu gënanga i holoi wingaku wohijöjurumudika deʼ o kapa makaputenika ngaro o Paulus wotemokama.

¹²O leleoto genangoka igoungu i yaoaua o kapa-o kapa igogere nako maöraha o dumamata. Hababu gënanga o kapa mangoha-ngohaka yowöe yorimoi mangale yohidetoli yamal̄a o leleoto gënanga karana önanga yomau yaributu hiädono yadono o Feniks deʼ yogogere dokengoka hiädono ipaha o dumamata. O Feniks nagala o leleoto o Kretaka yohimangiha o wange madumunu ihi koreharail̄e de o wange madumunu ihikoremieuku.

¹³Oraha gënanga o hidal̄oko o korehara iwuwu yabole-bole. O kapa mangoha-ngohaka önanga yatobote yakunoka mihidetoli. Hoʼ onanga yatauru matapu daha mihidete o Kreta manühu mahohanino mimahigo-igoro.

¹⁴Mä i tedekanua ahaino o hidal̄oko irato — enagënanga o hidal̄oko yahetongo o Ngöto o wange ma Hiwariha mahidal̄oko — malulu o dudungoko,

¹⁵deʼ yodobotoka mia kapaino. Hababu o kapa yakunua ihidete igila-gila yatomo o hidal̄oko, ngomi kamima hilapahi dika de miamal̄aika o kapa il̄ahini yao o hidal̄oko.

¹⁶Ngomi mima hidutuluku utu, maöraha ngomi miatilakuru o Kauda manühu maiteteke gënanga o koreharauku iböaka. Genangoka de mahuha de makangela ngomi miyakunu mihidiai tongomi miakapa masikusi.

¹⁷O sikusi gënanga mihi doa i böto o kapail̄e, o kapa gënanga mahirete mia kuata de mio l̄ë o gumini mihiliko mihideho-dehorino o kapa gënanga. Karana miö modongo ihipaka o Sirtis madowongi magogowahiha, ma hidete ihiguti daha makapa yamal̄aika yanïki o hidal̄oko.

¹⁸O hidal̄oko itogumua irato, hiädono yarehino mawange o kapa magina muläenge yaumo o ngöto magoronauku.

¹⁹O wange yainoli o kapa mangoha-ngohaka gënanga de manga giama mahirete yaumoli o kapa mapakakaha-pakakaha o ngötuku.

²⁰Kademawange madekana ngomi miamäkeua o wange de o murumu, deʼ o hidal̄okö itogu-togumua irato. Mabaha miangonganono ihihangoka mangale ngomi mihalamati.

²¹Oraha muruono naga madekana o nyawa gënanga yol̄omua. O Paulus woiki womaokoil̄e önanga manga hidogoronaka daha wotemo, ”O Roriadodoto! Nako ngini nihimoteke tongohi ahi dodaaere deʼ hohidetua o Kreta de haino, ngone hamäkeua mata-mata o gilianga deʼ o rugi nënanga.

²²Mä oraha nenangö ngohi togahoko duruhe hupaya ngini niahininga iamoko. O nyawa moiuaö Riadodotino aha nihonenge; ngone aha ihihanga duga-duga o kapa nënanga dika.

²³Hababu kahutu o malaekat ma Jou Madutuino tihuba-huba, enagënanga ma Jou Madutu ngohi toünanga madutu, iböa ngohino.

²⁴O malaekat gënanga itemo, ’Uha nohawana Paulus! Hababu ngona aha nihimanga ma Kaisar. De ma Jou Madutu aihininga maoa ngonaika, o nyawa mata-mata nihidete dede ngona aha yohalamati karana ngona.’

²⁵Hababu gënanga, o Roriadodoto, kokiani o Roriadodoto nia amoko niahininga! Hababu ngohi tingaku ma Jou Madutuika mata-mata aha idadi hokä wotemoka ngohino.

²⁶Mä damä ngone aha inahipaka o nühu moi mahohanoka.”

²⁷Mahutu ngimoi de iatoka ngomi kami puda-puda o Adria ma Ngötoka. Done hohutu gorona o kapa mangoha-ngohaka yamäo o kapa ë yatigi o dudungu.

²⁸Hoʼ, önanga yawora o gumini de o helewo mangale yatuga o ngöto maluku. De inyata o ngï gënanga maluku ngadeke o metere moruata. I tedekanua aha önanga yatugali, daha yamäke o ngï gënanga o ngöto maluku ngadeke yadono o metere moruange.

²⁹Onanga yomodongo o kapa aha i tiri o helewoil̄e, hoʼ onanga ihiguti o tapu o gahumu iata o kapa maduruku, de yonganono nako iyakunu tai-taiti itebini.

³⁰Imahi bongonika o kapa mangoha-ngohaka ihitaili yo oara o kapaka gënanga. Onanga ihiguti o sikusi o gahiuku de yodiai hokä yomau ihiguti o tapu o kapa madihirauku.

³¹Mä o Paulus witemo o tentara manga baluhika deʼ o tentaraoka o kapaka gënanga, ”Nako o kapa mangoha-ngohaka gënanga yogogogerua o kapaka nënanga, o Roriadodoto mata-mata niamäkeua o halamati.”

³²Mahababu gënanga o tentara-tentara gënanga yaoto o sikusi maliliko gënanga, hiädono o sikusi gënanga il̄ahini.

³³Maöraha ibatinguahi, o Paulus wahuloko hupaya önanga mata-mata yol̄omo. O Paulus watemo, ”O wange ngimoi de iata iböto madekana o Riadodoto mata-mata duga-duga hododamä de kahoma teke ributu de okia-kiaua hol̄omo.

³⁴Ngohi tinihuloko, niol̄omo mahuhutulu. Gënanga iyaoa mangale ngini, hupaya ngini nikuatoli. Hababu o Riadodoto mata-mata aha nihalamati de okia-kiaua niakuranga.”

³⁵Wotemo iböto hokogënanga o Paulus wal̄ë o roti daha wotemo tarima kasi ma Jouika manga himangoka önanga mata-mata. Ahao ünanga wahikodoku o roti gënanga, daha yol̄omo.

³⁶Onanga mata-mata yokuatokali deʼ kayol̄omohi dika.

³⁷Mata-mata o kapaka gënanga naga o nyawa yaratuhu hinoto de yamori tumidi de yabutanga.

³⁸Mata-mata yol̄omoka yakoki punuhoka, önanga yaumo manga gina o gandum o ngötuku hupaya o kapa idadi yauwini.

³⁹Maöraha o wange itararonoka, o kapa mangoha-ngohaka yamäke o dudungu, mä onanga ihiorikua o dudungu okia gënanga. Onanga yamäke o jiko moi de mahohanoka. Hoʼ onanga manga dungutu nako yakunu ihitangono o kapa dokengoka.

⁴⁰Matapu magumi-gumini yatoaka daha matapu-tapu gënanga yamal̄aika yalutu o ngötuku. Imamoteke de gënangö önanga yahohe mariririmi maliliko. Ahao önanga ihidoa mahidete o kapa madihiraka hupaya o hidal̄oko yawuwu o kapa gënanga itagi yameta o hohaniha.

⁴¹Mä o kapa gënanga yaohana o dowongika. Madihira itiriil̄e deʼ ikeluokaua, maduru yawederoka yodobotoka o moku-moku de makuata.

⁴²O tentara-tentara o kapaka gënanga manga mau yätoma mata-mata o nyawa yätumu-tumunguku, karana önanga yohawana uha-uha aha naga yotiboko o dudungiha deʼ yöara.

⁴³Mä o tentara manga baluhu gënanga wohigumal̄aua toönanga manga mau gënanga karana ünanga aimau wihihalamati o Paulus. Unanga wähuloko mata-mata o nyawa yaku-akunu yotiboko imangumo yohira deʼ yotiboko o dudungiha;

⁴⁴mahomoa kiani yoturuiha de imahijojö o ao-aotika ekola o kapa mabëla-bëlakika gënanga. De mangëkomo hokogënanga ngomi mata-mata mihalamati mima hiädono o dudungiha.