Read Tobelo O KISAH RASUL-RASUL 3 Bible Online

O KISAH RASUL-RASUL 3 - Tobelo bible

O KISAH RASUL-RASUL 3

¹O wange moiuku o Petrus deʼ o Yohanis yoiki ma Jou ai Tauika o takoro hange o bimaoa, enagënanga o hubayanga maöraha.

²Dokengoka o ngorana ma amo-amokoka ihiromanga ”O Ngorana ma Hohailoa”, naga o nyawa womatëngo o nauru wolugu kawo makil̄auinohi. O wange ihigëtongo o nyawa gënanga iwiao dokengika la wogahoko o hadaka o nyawaika yowöwoha-wohama ma Jou ai Tauika.

³Maöraha o nyawa gënanga wämäke o Petrus deʼ o Yohanis yowohama ma Jou ai Tauika, ünanga wogahoko onangika la iwihi döaka okia naga moi unangika.

⁴Onanga iwitotailako ünanga, aha o Petrus wotemo, ”Nomipulono ngomi!”

⁵Daha o nyawa gënanga aihininga yodekekete onangika de wonganono aha wamäke okianaga moi onangino.

⁶Mä o Petrus witemo unangika, ”Ngohi duruhe ahi tiwiö de koiwa. Mä okia naga ngohioka, gënanga aha ngohi tonihidöaka ngonaika: De o Yesus Kristus aikuaha o Nazaret manyawa gënanga, notagi!”

⁷Daha o Petrus wasö aigiama maniraka o nyawa wolugu-lugu gënanga, deʼ wiriwo ünanga womomiki. Gila-gila ail̄ou o nyawa gënanga deʼ ai pupungu idadi ikuata.

⁸Daha ünanga womatötubo womaokoil̄e, deʼ womuläenge womadagi wakaika wakaino. Ahao ünanga wowohama ma Jou ai Tauika imakinïki o Petrus deʼ o Yohanis woma dagi de womatotötubo deʼ wihigiriri ma Jou Madutu.

⁹Mata-mata o nyawa iwimäke ünanga womadagi deʼ wihigögogiriri ma Jou Madutu.

¹⁰Daha önanga iwinako ünanga wogaho-gahoko o hadaka, biaha wogogeruku ”O Ngorana ma Hohailoa” ma Jou ai Tauoka. Onanga yohëranga duru deʼ yokiriri yamäke okia idadi unangika.

¹¹O nyawa gënanga kahoko genangika dika waninïki o Petrus deʼ o Yohanis. Deʼ maöraha önanga yaruange yadono o löa yahetongo ”O Löa Salomo”, o nyawa mata-mata yoböa imatoomu onangika hababu yokiriri.

¹²Maöraha o Petrus wamäke o nyawa yowöe-wöe gënanga, ünanga watemo onangika, ”Hei, o Israeloka manyawa, yadodoa Roriadodoto nihëranga o hali nënanga? Yadodoa Roriadodoto nimipulono kangomino? Okia ngini niatobote o nyawa nënanga wakunu womadagi hababu naga o kuaha ngomioka ekola hababu ngomi mimote-moteke ma Jou Madutuika?

¹³ Ma Jou Madutu iwihohuba-huba o Abraham, o Ishak, o Yakub tongone nanga ete de nanga tohora manga Jou Madutu, ma Jou Madutu gënanga wihimuliaka Ai Gilaongo, enagënanga o Yesus. O Yesus gënanga niwihilapahioka yokokuahaika, deʼ ngini niwi lawani o Pilatus aihimangoka, maöraha o Pilatus womau wihipidili.

¹⁴ Unanga aidebi-debini deʼ yaoa, mä ngini niwitila Unanga deʼ niwiributu hupaya o Pilatus wihipidili womatëngo o nyawa wotoma-toma mangale ngini.

¹⁵Ngini niwitoma Unanga, enahioko karana Unanga o ngango matiti mangale o nyawa mata-mata. Deʼ ma Jou Madutu wihiwangokali Unanga o honengino. Ngomi miahakihioka mahirete o hali gënanga.

¹⁶Ngini niamäkeoka deʼ niahakihi okia idadi de o nyawa wolugu-lugu nënanga. Unanga wokuatoka deʼ wotogumokali karana ünanga wongaku o Yesusika deʼ Ai kuahaika. Karana wingaku o Yesusika o nyawa nënanga wodadi wotumuloaokali niahimangoka ngini mata-mata.

¹⁷Roriadodoto! Orahanënanga ngohi tohiöriki okia ngini de niatutuda-tutuda niadiaioka o Yesusika, gënanga ngini niadiai karana ngini nihiorikua okia ngini niadiaioka.

¹⁸Deʼ karana gënanga idadioka okia ma Jou Madutu kahuruoninohi wohingahuoka i tilakuru Ai nabi-nabi mata-mata, o Koano Wohihohalamati wohijajioka gënanga kiani wohangihara.

¹⁹Hababu gënanga Roriadodoto, nitoba ibötohi nidiai o baradoha deʼ nimakilioro ma Jou Madutuika, hupaya Unanga waëhe niabaradoha.

²⁰Ma Jou aha woböa nginika deʼ ngini aha niamäo o rohani maparakara masanangi. Deʼ ma Jou aha wihuloko o Yesus woböa nginika, karana Unanga wihitatapuoka ma Jou Madutu wodadi o Koano Wohihohalamati mangale ngini.

²¹Unanga kiani wogogere o horogaka hiädono ma Jou Madutu wohidadi mata-mata mahungi hokä ma Jou Madutu wotemoka Ai nabi-nabika mahiraino.

²² O Musa wotemoka, ’Ma Jou Madutu nia Jou aha wihuloko nginika womatëngo o nabi niahoanino mahirete, hokä Unanga wohihuloko ngohi. Ngini kiani ni ihene mata-mata okia o nabi wahetongo nginika gënanga.

²³ O nyawa yagogonua manga hiningaka okia ma nabi wotemoka gënanga, o nyawa gënanga aha yahitingaka ma Jou Madutu aiumatoka deʼ yahibinaha.’

²⁴O nabi-nabi nagaö ihiadonoka o abari ma Jou Madutuino, muläenge ma Nabi Samueloka deʼ o nabi-nabi mahomoa yoböa maduruino, mata-mata ihingahu mangale örahanënanga.

²⁵ O jaji-o jaji ma Jou Madutuino inihiädono o nabi-nabi gënanga mangale ngini o Roriadodoto. O jaji ma Jou Madutu wadodiai de niaete de niatohora, ma Jou Madutu witemo o Abrahamika hokonënanga, ’Ani difauku Ngohi aha tahi barakati hagala o nyawa o duniaka.’ O jaji gënanga naga mangale nginiö.

²⁶Hababu gënanga ma Jou Madutu wi iriki Ai Gilaongo, daha wihuloko Unanga woböa nginika iholoi ihira, hupaya Unanga winihibarakati ngini. Madodagi Unanga winihibarakati enagënanga wadiai Roriadodoto mata-mata nitoba niawowango madodagi i totorouino.”