Read Tobelo O KISAH RASUL-RASUL 5 Bible Online

O KISAH RASUL-RASUL 5 - Tobelo bible

O KISAH RASUL-RASUL 5

¹Mä naga o nauru womatëngo airomanga o Ananias. Unanga de ngoi hekata amiromanga o ngo Safira, onangö yahukunoka manga tonaka utu.

²Matiwi maijaino gënanga mahononga ünanga watumungu mangale aidiri mahirete deʼ mahomoa ünanga wohilapahi o rasul-rasulika. Unanga wodiai gënanga imahiöriki de ngoihekata.

³O Petrus witemo unangika, ”Ananias, yadodoa ngona nomahigumal̄aika o Ibilihi yakuaha anihininga, hiädono ngona naeluku ma Jou Madutu ai Womaha, de noma hibongonika natumungu matiwi mahononga maijaino ani tonaka gënanga mangale ani diri mahirete?

⁴O tonaka gënanga ngona nahukunuahi ma kato ngonamadutu. Deʼ o tonaka gënanga nahukunokaö, matiwiö katongonahi dika madutu. Hoʼ yadodoa naga anihininga magoronaka o dibanga mangale nodiai hokogënanga? O nyawaikaua ngona näeluku mä ma Jou Madutuika!”

⁵Hokogënanga woihene o Ananias o demo gënanga, ünanga woruba, gila-gila wohonenge. O nyawa mata-mata yoihene okia idadioka gënanga dadi yohawana duru.

⁶O gogoduru yoböa yahawo o Ananias aimayeti, daha yao ihihupu yoiki yalungunu.

⁷Done ho jam hange ipahaika ngoihekata mowohama. Münanga mohiorikua okia ipahaino idadi.

⁸O Petrus womitemo munangika, ”Abeika nohihingahu ngohino: O tonaka ngona deʼ anirokata niahuku-hukunoka gënanga, nenangö ma amoko maija?” O Ananias ngoihekata mohaluhu, ”Igoungu, genangö maija.”

⁹Daha o Petrus womitemo munangika, ”Yadodoa ngona de anirokata nimahininga moi mangale niataili ma Jou ai Womaha? Noihene! O nyawa iwilolungu-lungunu anirokata yoböa inoka. Onanga aha iniao ngona inihihupuoli.”

¹⁰Oraha gënanga dika o Ananias ngoihekata gënanga moruba deʼ mohonenge o Petrus aihimangoka. Deʼ oraha o gogoduru gënanga yowohama, önanga imimäke münanga mohonengoka. Daha önanga yao amimayeti ihihupu deʼ imilungunu amirokata aidatekuku.

¹¹O nyawa yongaku-ngaku mata-mata gënanga deʼ o nyawa mahomoahi, yoihene mangale okia idadi gënanga, yodadi yohawana.

¹²Karana o rasul-rasul manga leleani, mangöe ihëra-hëranga deʼ o hali kabiahaua idadi o kawaha manga hidogoronaka. O nyawa yongaku-ngaku mata-mata de o hininga moi imatöomu o Löa Salomo ma Jou ai Tauoka.

¹³Deʼ o nyawa maporetino koiwa yobarani yoböa imatöomu de o nyawa yongaku-ngaku gënanga. Mä o nyawa yongaku-ngaku gënanga duru yahoromati o kawahaino.

¹⁴Deʼ iholoi itedekana iholoi idogo manga ngöe o nyawa yongaku-ngaku ma Jouika — yaoa o nauru yaoa o ngoheka.

¹⁵De mangale imadadi hokogënanga marupa, hiädono o nyawa yopopanyake yakelenga manga ngidu-ngidu mangï mal̄okuoka ekola o tikara, daha yaao o ngekomika, hupaya önanga mangale mahuhutulu yakunu yadäene o Petrus aigurumini, nako o Petrus wakaino genangino.

¹⁶O nyawa mangangöe, kayotuo-tuono yoböa o kota-kotaino o Yerusalem magilolitino. Onanga yaao manga nyawa yopopanyake deʼ yapopootekika o womaha madorou. Deʼ o nyawa yowöe-wöe gënanga wahitogumu mata-mata.

¹⁷Mabaha o imam womomulia deʼ mata-mata iwinöninïki, enagënanga o Sadukioka manyawa mangadöomu, yomuläenge yä aniaya, hababu önanga manga hininga yohiri.

¹⁸O rasul-rasul gënanga yätagoko daha yahingohama o nyawa yowöe-wöe manga bui magoronaika.

¹⁹Mä yohutuku, ma Jou aimalaekat womatëngo wahelenga o bui mangora-ngorana, daha o rasul-rasul gënanga waao wahihupu. O malaekat gënanga yatemo o rasul-rasulika gënanga,

²⁰”Nioiki nimaoko ma Jou ai Tauoka deʼ niahingahu o nyawa yowöe-wöeika mangale o ngango mahungi nënanga.”

²¹O rasul-rasulö gënanga yamoteke o malaekat mabehehongo gënanga. Kao ngoru-ngoruminohi duru, önanga yoiki ma Jou ai Tauika deʼ muläenge yodotoko genangoka. Itedekanua gënanga maimam womomulia deʼ iwinöninïki yoböa, daha yodiai o doomu juruhakimi de o Yahudioka manga tutuda-tutuda. Ahao önanga yähuloko o nyawa yoiki yal̄ë o rasul-rasul gënanga o buino yaao yahimanga önanga.

²²Mä oraha o nyawa yahulo-huloko gënanga imahiädono o buika, önanga yamäkeua o rasul-rasul gënanga dokengoka. Hoʼ onanga yolio, daha ihingahu o hali gënanga o juruhakimika.

²³”Maöraha ngomi mimahiädono o buika,” önanga yato o juruhakimika, ”ngomi mia mäke o bui mangorana gënanga ikusi ihidodiaino, deʼ yogo göa-göana mangagogiria yogöana o ngoranoka. Mä maöraha ngomi miahelenga o ngorana gënanga, o nyawa moiö de miamäkeua magoronaka.”

²⁴Maöraha ma Jou ai Tau magogöana manga baluhu deʼ o imam-imam manga häeke yoihene manga hingahu gënanga, önanga imahiorikokaua mangale o rasul-rasul gënanga deʼ yohawana aha okia yakunu idadi.

²⁵Ahaino woböa womatëngo o nauru woao o abari nënanga, ”Niihene! O nyawa Tua-tuanga niatumu-tumunguku o buioka gënanga, öraha nënanga magogiria yadotoko o nyawa yowöe-wöeika ma Jou ai Tauoka!”

²⁶Ma Jou ai Tau magogöana manga baluhu gënanga imakinïki de yogogöa-göana, yoiki yal̄ë o rasul-rasul gënanga ihigalioli. Mä onanga yal̄ë kayahidodiai, hababu önanga yamodongo o nyawa yowöe-wöeika; uha-uha o nyawa yowöe-wöe gënanga done yakaweli önanga de o helewo.

²⁷O rasul-rasul gënanga yaao yahingohama yahimanga o juruhakimi. Daha ma imam womomulia watailako önanga.

²⁸ Unanga watemo, ”Ngomi miniduhunoka ngini miagou-goungu, hupaya uha nidotoko mangale o nyawa gënanga. Mä orahanënanga abeika niamäke okia ngini niadiaioka! Ngini nihibarihoko niadodötoko gënanga o Yerusalem niamodeke, deʼ ngini iholoi nimau nimikalaki, ngomi midadi o hababu wohonenge o nyawa gënanga.”

²⁹O Petrus deʼ o rasul-rasul mahomoa yohaluhu, ”Ngomi kiani miwihimoteke ma Jou Madutu deʼ miahimotekua o nyawa.

³⁰O Yesus ngini niwisaliboka, nangaete de nangatohora manga Jou Madutu wihiwangokali o honengino.

³¹Deʼ ma Jou Madutu wihidoakoka Unangika aigogere irorete-rete deʼ aikuaha ikokurutil̄e hokä o Tutuda deʼ Wohihöhohalamati; hupaya o Israeloka yahidöaka öraha mangale imatoba manga baradoha deʼ yamäke o apongo.

³²Ngomilä o hakihi-hakihi mangale mata-mata gënanga — ngomi deʼ ma Jou Madutu ai Womahö ma Jou Madutu wohidöaka hagala o nyawaika yamö mote-moteke Ai pareta.”

³³Maöraha o Agama ma Juru Hakimi yoihene gënanga, önanga yongamo duru, hiädono önanga imakaturu mangale yätoma o rasul-rasul gënanga.

³⁴Mä o juruhakimi manga hidogoronaka gënanga naga o Farisioka manyawa womatëngo ai romanga o Gamaliel. Unanga wodoto-dotoko o agama, de duru iwihoromati o nyawa mata-mata. Unanga womaoko daha wähuloko o nyawa ya ao yahihupu o rasul-rasul gënanga öraha mahuhutulu.

³⁵Ahao ünanga wätemo o Agama ma Juru Hakimika gënanga, ”Roriadodoto o Israeloka manyawa! Niatibanga nihidodiai mangale okia aha Roriadodoto niadiai o nyawaika nënanga.

³⁶Hababu mahira idadioka o Teudas, womamäo aidiri o nyawa yolago-agomo, hiädono ngadeke done ho yaratuhu iata o nyawa iwinïki ünanga. Mä unanga iwitoma deʼ mata-mata iwinöninïki imakitingaka hohahi bari-barihi, de toünangö aihigaro ma ihihangoka.

³⁷Iböto de gënanga, maöraha naga o gegetongo o nyawa, ipudali enagënanga o Yudas, o Galileaino manyawa. Hababu aibobaja, o nyawa manga ngöe iwinïki ünanga. Mä unangö iwitomaka deʼ mata-mata iwinöninïki imakitingaka hohahi bari-barihi.

³⁸Hoʼ orahanënanga de okia idadi nënanga, ahihidaaere ëna hokonënanga: uha nidiai okia naga o nyawaika nënanga, hamal̄aika dika önanga. Hababu nako manga dodötoko deʼ manga manarama önanga nënanga naga o nyawaino, done mangadodötoko deʼ mangamanarama gënanga aha ihihanga.

³⁹Mä nako gënanga ma Jou Madutuino iböa, done Roriadodoto aha niakunua niautumu önanga. Ma mudukua inyata aha Roriadodoto niwilawani ma Jou Madutu.” Ai hidaaere o Gamaliel gënanga o juruhakimi yatarima.

⁴⁰O rasul-rasul gënanga yä ahoko, daha yägohara, aha ino yäduhunu yodotokoli mangale o Yesus. Iböto de gënanga, daha önanga yapidili.

⁴¹O rasul-rasul gënanga kade yaporete o Agamaka ma Juru Hakimi gënanga de manga mörene, hababu ma Jou Madutu wo hitatapu iböto önanga kiani yamäke o hangihara mangale hababu o Yesus.

⁴²Deʼ o wange higetongo ma Jou ai Tauoka deʼ o nyawa manga tau-tauika, önanga imatogu-togumua yodotoko deʼ ihiade-ade o Abari ma Oa mangale o Yesus, Unanga o Koano Wohihohalamati ihijajioka gënanga.