Read Tobelo O KISAH RASUL-RASUL 7 Bible Online

O KISAH RASUL-RASUL 7 - Tobelo bible

O KISAH RASUL-RASUL 7

¹O imam womomulia wileha o Stefanusika, ”Bote mata-mata ihiade-ade o nyawa gënanga itiai?”

² O Stefanus wohaluhu, ”Roriadodoto deʼ Bapa-bapa! Abeika nihihigihenohi ngohi! O Abraham nangaete de nangatohora ngone womatururuuahi o Haranika, maöraha ünanga kawogogerohi o Mesopotamiaoka, ma Jou Madutu womomulia woböa unangika

³deʼ witemo, ’Namal̄a aniberera de aniroriadodoto. Noiki o bereraika aha Ngohi tonihimatoko ngonaika.’

⁴ O Abraham wamal̄a o Kasdim maberera, daha womatururu o Haranika. O Abraham aiama wohonengoka, ma Jou Madutu wadiai o Abraham womatururu o bereraino nënanga Roriadodoto deʼ Bapa-bapa mata-mata niogogogere örahanënanga.

⁵ Oraha gënanga kaohidoku moiö de koiwa o berera nënanga ma Jou Madutu wihidöaka o Abrahamika mangale idadi o Abraham aipuhäka; höl̄oumario moiö de koiwa iwihidöaka unangika. Mä ma Jou Madutu wojaji ünanga aha wihidöaka o Abrahamika mangale idadi aipuhäka o Abraham de aidifauku. Oraha gënanga o Abraham koiwa aingohaka.

⁶ Mä hoko nënanga ma Jou Madutu witemo unangika, ’Anidifauku aha yogogere hokä o nyawa imahidodogumika o nyawa mahomoa manga bereraka. Ma berera manyawa gënanga aha imagilaongo önanga deʼ ya aniaya o taongo o ratuhu iata madekana.

⁷ Mä Ngohi aha tahukumu o nyawa imagogilaongo önanga, deʼ önanga aha yohupu o bereraino gënanga deʼ aha ihihuba Ngohi o ngïoka nënanga.’

⁸ Hokogënanga wotemo iböto aijaji maninikutu wohi kuata mangale Ma Jou Madutu de o huna madatoro. O Abraham aingohaka, o Ishak womakil̄auino, o Abraham wihuna ünanga maöraha ünanga aiumuru o wange tufange. Maduruino o Ishakö wihuna aingohaka o Yakub. Deʼ o Yakubö wahunali aingohaka yangimoi de yahinoto, enagënanga yodadi o Yahudioka manyawa mangaete de mangatohora.

⁹ Nangaete de nangatohora gënanga iwidohata o Yusufika, hiädono önanga iwihukunu ünanga wodadi o gilaongo o Mesiroka. Mä ma Jou Madutu witomoteke ünanga,

¹⁰ deʼ wihipidiloka ünanga hagala huha. Ma Jou Madutu wihidöaka unangika o hininga maoa-oa deʼ o sawaro maöraha ünanga wihimanga o Firaun o Mesir ma koano, hiädono o Firaun wigöraka ünanga wogubernur o Mesir mabereraka deʼ wakuaha o Firaun aikadato.

¹¹ Maduruino idadi maöraha o habirokata koha amoko yakiloliti o Mesir maberera deʼ o Kanaan, hiädono o nyawa duru yohangihara. Tongone nangaete de nangatohora imamäkeokaua o inomo.

¹²Maöraha o Yakub woihene naga o gandum o Mesiroka ünanga wähuloko aingoha-ngohaka, nangaete de nangatohora, duru madodihiraka yoiki dokengika.

¹³ Maöraha önanga yoiki mahinotoka, o Yusuf womahi ngahu airoriadodotika ünanga gënanga o Yusuf. Oraha gënanga daha ma koano Mesir wohiöriki mangale o Yusuf airoriadodoto.

¹⁴ Maduruino o Yusuf wohidingoto o abari aiamaika, enagënanga o Yakub, mangale wogähoko ünanga imakao mata-mata airiadodoto imatururu o Mesirika — mata-mata naga manyawa yamori tumidi de yamotoa.

¹⁵ O Yakub womatururu o Mesirika, deʼ genangoka ünanga de nangaete de nangatohora yohönenge.

¹⁶ Maduruino mangamayeti yao ihigilio o Sikhemika deʼ yalungunu o lungunoka o Abraham waija-ijaka de o tiwi, o hoana iamo-amoko o Hemor o Sikhemoka.

¹⁷ Maöraha itigioka ma Jou Madutu wohitotomo aijaji o Abrahamika, nangahöana o Mesiroka yodogo kayowöe.

¹⁸Maduruino womatëngo o koano mahomoa winäkoua o Yusuf, wopareta o Mesiroka.

¹⁹ O koano gënanga womahigogule nangahoana deʼ wa aniaya nangaete de nangatohoraika. Unanga wapakisa önanga yaumo toönanga manga ngoha-ngohaka daha imakil̄auino, hupaya yodogumal̄aika laʼ ihonenge.

²⁰ Maöraha gënanga o Musa woma kil̄au; ünanga o ngohaka duru koai hailoa. O mede hange madekana ünanga iwipaliara aiama aitauoka,

²¹ deʼ unanga iwiumoika, o Firaun ngoiora mil̄ë ünanga, daha mipaliara ünanga hokä amingohaka mahirete.

²²Hagala manga dodötoko o Mesir manyawa iwidotoko unangika, deʼ unanga wodadi o nyawa duru wokuaha aidemo deʼ aimanarama magoronaka.

²³ Maöraha o Musa aiumuru o taongo moruata, ipuda o ngigo aihininga magoronaka mangale woiki walega manga wowango de manga manarama sarakia o Israeloka manyawa.

²⁴Daha ünanga wimäke womatëngo onangino iwianiaya o Mesiroka manyawa womatëngo; ünanga wiriwo o nyawa iwi o aniaya gënanga, de witoma o Mesir manyawa gënanga.

²⁵O Musa watobote ainyawa aha imangarati ma Jou Madutu wipäke ünanga mangale wahilapahi önanga. Mä inyata önanga imangaratiua.

²⁶Yarehino ünanga wamäkeoli o Israel manyawa yahinoto imakangamo, daha ünanga wohidailako wahidame önanga. Unanga watemo, ’Ngini nënanga kao riadodoto. Yadodoa ngini nimakangamo?ʼ

²⁷Mä o nyawa wïgoha-gohara aidodiawo gënanga wihitomo o Musa madatekika daha wotemo, ’O nagona inigoraka ngona nodadi mia tutuda deʼ nomitotailako ngomi o nagona yatiai de o nagona yahowono?

²⁸Bote ngona nomau nohitoma ngohioli, hokä ngona nitoma o Mesir manyawa känugono?ʼ

²⁹ Maöraha o Musa woihene okia wotemo o nyawa gënanga, o Musa wöara o Mesiroka daha wogogere o Midian mabereraka. Dokengoka ünanga womamäke o ngohaka yahinoto.

³⁰ O taongo moruata ipaha, womatëngo o malaekat woböa o Musaika o tonaka makokakahaka o Sinai ma L̄oku madatekoka. O malaekat gënanga iböa o uku magoronaka o höngana youku magogiria itokara.

³¹O Musa wohëranga wamäke o hali gënanga, hiädono ünanga wöiki womahi tigi-tigika laʼ wohiöriki okia gënanga. Daha ünanga woihene ma Jou ai ilingi wotemo,

³²’Ngohi aniete de anitohora manga Jou Madutu; Ngohi ma Jou Madutu o Abrahamino, o Ishakino, deʼ o Yakubino.’ O Musa wohawana wohaharoka hiädono womoroënokaua wamäke o höngana gënanga.

³³Dahaino ma Jou wotemoli, ’Naikokahi anisandal nomahi noa-noa il̄e gënanga, hababu o tonaka o ngï ngona nomaokoino gënanga gänga o tonaka madebi-debini.

³⁴Ngohi tamäkeoka deʼ Tohohininga manga hangihara madubuho Ahi umati o Mesiroka. Ngohi toihenoka toönanga manga daiana deʼ Ngohi touti mangale Tahi lapahi önanga. Orahanënanga, naino! Ngohi aha toni hulokoli ngona o Mesirika.’

³⁵ O Musa nenangala o Musa iwingaku-ngakua o Israeloka manyawa deʼ iwitila de o demo nënanga, ’O nagona inigorakoka ngona nodadi miatutuda deʼ nomitotailako miahali ngomi?ʼ Mä ngaro hokogënanga manyawa ünanga ma Jou Madutu wihuloko mangale wodadi o tutuda deʼ wahihalamati, de o roriwo o malaekatino iböa unangika o höngana itotoka-tokara gënanga.

³⁶ O Musa gënanga watuda o Israeloka manyawa yohupu o Mesiroka deʼ wodiai ihëra-hëranga deʼ o hali kabiahaua o Mesiroka, o Ngöto ma Doka-dokaroka deʼ o tonaka makokakahaka o taongo moruatino madekana.

³⁷ Ma Musa neunangö watemo o Israel manyawaika, ’Ma Jou Madutu aha winihidöaka nginika womatëngo o nabi wi iriki niahidogoronaino mahirete, imatero hokä ünanga wohi iriki ngohi.’

³⁸ O Musa o Israeloka manyawa manga hidogoronaka o tonaka makokakahaka, wodadi o dodohanga mangale o malaekat iwitemo unangika o Sinai ma L̄okuoka de tongone nangaete de nangatohora. Unanga watarima ma Jou Madutuino o abari mangango mangale wohiädono ngoneino.

³⁹Ngaro hokogënanga tongone nangaete de nangatohora iwihi ngounua unangika. Onanga iwitila ünanga de yoigo imaidulu o Mesirika.

⁴⁰ Onanga yotemo o Harunika, ’Nomidiai o gikiri mangale ngomi, hupaya o gikiri gënanga imituda ngomi. Hababu ngomi miwihiorikokaua okia idadi de o Musa gënanga, womi ao-ao ngomi mihupu o Mesirino!ʼ

⁴¹ Daha örahagënanga önanga yodiai o dulada moi o hapi mangohaka, dahao önanga ihihuba de o huhuba o duladaika gënanga deʼ yodiai o rameanga mangale yapuji okia naga yadodiai önanga mahirete.

⁴² Ma Jou Madutu wämal̄aika önanga deʼ wapidilika önanga yahuba o murumu-murumu o dihangoka. Gënanga imamoteke okia itulihi o nabi-nabi manga buku magoronaka. Hoko nënanga: ’Hei o Israeloka manyawa! Mangale Ngohiua, ngini niatoaka deʼ nihihuba o aiwani o taongo moruata madekana o tonaka makokakahaka.

⁴³O gikiri Molokh matau-tau nihidodotao de niagikiri o murumu madulada, enagënanga o Refan; gënanga madulada ngini niadiai mangale niahuba. Hababu gënanga Ngohi aha tiniumo hiädono kohagurutika o Babel maberera mahononga.’

⁴⁴ O döomu matau-tau o ngï ma Jou Madutu woböa o nyawaika hamäke tongone nangaete de nangatohoraka o tonaka makokakahaka. O tau-tau gënanga yodiai imoteke ma Jou Madutu aipareta o Musaika, deʼ imoteke madüuku ma Jou Madutu wihimatoko o Musaika.

⁴⁵ Maduruino o tau-tau gënanga yao gila-gila ngone nangaete de nangatohora maöraha önanga de o Yosua yoiki yaora tongone nanga berera nënanga o nyawa yokokuahaino ma Jou Madutu waduhuoka toönanga manga himangoka. O tau-tau gënanga naga genangoka hiädono maöraha o Daud.

⁴⁶ O Daud wasanangi ma Jou Madutu aihininga de wogahoko Unangika hupaya Unanga wihigumal̄a wodiai o tau moi mangale ma Jou Madutu o Yakub wihuba-huba gënanga.

⁴⁷ Mä o Salomo wohigoko o tau mangale ma Jou Madutu.

⁴⁸Mä ma Jou Madutu duru wolamo-amoko wogogerua o tau o nyawa yododiai magoronaka; hababu o nabi manga buku magoronaka itulihi hokonënanga,

⁴⁹ ’O dihanga naga Ahi kuruhi imomulia, deʼ o dunia Ahi l̄ou mahohol̄e. O tau okia ngini nimau nihigoko mangale Ngohi? O ngï kiaka mangale Ngohi tomatogumu?

⁵⁰Koigoungua Ngohi mahirete tohidadioka hagala moi-moi?ʼ hokogënanga ma Jou Madutu wotemo.

⁵¹ Kaogoguleua niahäeke madogowini Roriadodoto, deʼ hokogënanga mahuha niwihingounu ma Jou Madutuika! Nia ngauku duru yatopongono ma Jou Madutu aidemoika! Roriadodoto kani maketero de niaete de niatohora; nimatogu-togumua nialawani ma Jou Madutu ai Womaha!

⁵²Bote naga o nabi ya aniayaua niaete de niatohora? Onanga yätoma Ai hühuloko-hühuloko ma Jou Madutuino kahuruonikahi wohingahuoka ma Jou Madutu ai Gilaongo wototiai gënanga aha woböa. Deʼ orahanënanga ngini niwimotekua deʼ niwitoma ma Jou Madutu ai Gilaongo gënanga.

⁵³O malaekat-malaekat ihingahuoka ma Jou Madutu aipareta nginika, mä ngini niamotekua!”

⁵⁴Hokogënanga o Agamaka ma Juru Hakimi yomomanarama gënanga yoihene mata-mata o Stefanus wotemo, önanga manga hininga yohiri deʼ duru yongamo unangika.

⁵⁵Mä o Stefanus iwikuaha ma Jou Madutu ai Womaha, wapulono o dihangil̄e. Unanga wamäke ma Jou Madutu aimulia deʼ o Yesus womaoko o ngï wokokuaha ma Jou Madutu aigiama mahononga manirakoka.

⁵⁶”Niolega,” o Stefanus wato, ”ngohi tamäke o horoga ihelenga deʼ o Nyawa manga Ngohaka womaokoino ma Jou Madutu ainirakoka!”

⁵⁷O juru hakimoka yomomanarama gënanga yatamunu to önanga manga ngauku de imapöa-pöaka, daha kamamoika iwi parangi o Stefanus.

⁵⁸Onanga iwitauru ünanga iwihihupu o kota maporetika, dahao iwikaweli de o helewo. Hagala o nyawa yahohakihi okia idadi gënanga ihidodogumika toönanga manga päkeanga o goduru womatëngoika, airomanga o Saulus.

⁵⁹Onanga magogiriaka iwikaweli o Stefanus, o Stefanus womahiboaka, ”Jou Yesus, natarima tongohi ahiwomaha!”

⁶⁰Daha ünanga watilabuku deʼ womapöaka de aiilingi kohakuatil̄e, ”Jou, uha mangabaradoha nënanga, nahi tapal̄u onanguku!” Wotemo iböto hokogënanga ünanga wohonengoka.