Read Tobelo O KISAH RASUL-RASUL 8 Bible Online

O KISAH RASUL-RASUL 8 - Tobelo bible

O KISAH RASUL-RASUL 8

¹Deʼ o Saulusö wosanangi mangale o doma gënanga. O wange genangö o jemaat o Yerusalemoka muläenge yaginïki, hiädono mata-mata o nyawa yongaku-ngaku, sowaliua o rasul-rasul, hahibari-barihi mata-mata o Yudea deʼ o Samaria madaeraika.

²Hagala o nyawa iwïmodo-modongo ma Jou Madutuika iwilungunu o Stefanus deʼ iwigari ünanga de duru manga hininga ihuha.

³ Mä o Saulus wohigila-gila dika walingiri wabinaha o jemaat. Unanga woiki o tau-tauika deʼ watauru wahihupu o nyawa yongaku-ngaku, daha wahi ngohama önanga o bui magoronaika.

⁴O nyawa yongaku-ngaku imahikokabarihika gënanga ihingahu o Abari ma Oa ma Jou Madutuino gënanga okiaika honanga.

⁵O Filipus woiki o Samaria makotaika deʼ wohingahu hagala o nyawaika dokengoka, mangale o Koano Wohihohalamati wihijajioka ma Jou Madutu.

⁶Maöraha hagala o nyawa yoihene o Filipus wotemo deʼ onanga yamäke ihëra-hëranga wadiai, manga ngöe onangino ihigihene okia o Filipus wotemo.

⁷Hababu o womaha madorou ihupuoka de imapöa-pöaka o nyawa manga ngöeino yangoha-ngohama o hetanga. O nyawa yolugu-lugu deʼ yosuga-suga ö manga ngöe wahitogumu.

⁸Hagala o nyawa o Samaria makotaka gënanga duru yomörene.

⁹O kotaka gënanga naga o nauru womatëngo airomanga o Simon, öraha muruono naga iböto madekana wadiai o Samaria manyawa yohëranga mangale toünanga aigumaterika. Unanga watemo hagala o nyawaika, ünanga o nyawa kabiahaua.

¹⁰O nyawa mata-mata o kotaka gënanga, mata-mata o kawaha duru manga hininga unangika. Onanga yato, ”O nyawa nënanga naga ma Jou Madutu aikuata o nyawa yakokinako hokä ’O Kuata i Amo-amoko’ gënanga.”

¹¹Duru kohadekanoka ünanga wahëranga hagala o nyawa de aigumatere makuata, hiädono önanga duru manga hininga unangika.

¹²Mä o Filipus wohiabari onangika mangale o Abari ma Oa de mangale sarakia ma Jou Madutu aha wopareta hokä o koano deʼ mangale o Yesus Kristus, o Koano Wohihohalamati gënanga. Onanga yongaku o abari o Filipus wohiado-adonoka, daha önanga yaohiki — yaoa o nyawa o nauru yaoa o nyawa o ngoheka.

¹³O Simon mahireteö wongaku. Deʼ iwiohiki iböto, ünanga gila-gila winïki o Filipus. Ihohëra-hëranga idadi o Simon iwi diai duru wohëranga.

¹⁴O rasul-rasul o Yerusalemoka yoihene o Samaria manyawa yatarimaka ma Jou Madutu aidemo. Mahababu gënanga önanga yähuloko o Petrus deʼ o Yohanis dokengika.

¹⁵Maöraha o Petrus deʼ o Yohanis imahiädono, önanga imaniata mangale o Samaria manyawa gënanga hupaya önanga yamäke ma Jou Madutu ai Womaha,

¹⁶hababu ma Jou Madutu ai Womaha iböauahi yakuaha o nyawa moiö onangino; önanga yaohiki dahao dema Jou Yesus airomanga dika.

¹⁷Daha o Petrus deʼ o Yohanis yakelenga to önanga manga giama o Samaria manyawa manga l̄okuoka gënanga; önanga yatarima ma Jou Madutu ai Womaha.

¹⁸O Simon wamäke hababu o rasul-rasul yakelenga manga giama hagala o nyawa manga l̄okuoka gënanga, ma Jou Madutu ai Womaha wahidöaka onangika gënanga. Karana gënanga o Simon wao o tiwi o Petrusika deʼ o Yohanisika,

¹⁹daha wotemo, ”Nihihidöaka ngohino o kuaha genangö hupaya nako tongohi ahigiama takelenga o nagonaika dika, o nyawa gënanga aha yatarima ma Jou Madutu ai Womaha.”

²⁰Mä o Petrus wohaluhu, ”Nobodito ngona deʼ anitiwi! Ngona natobote ma Jou Madutu aingongike yakunu naija de o tiwi?

²¹Ngona koiwa anihaku mangale nominïki tongomi miamanarama magoronaka, hababu anihininga itiaiua ma Jou Madutuika.

²²Hababu gënanga namal̄a anihiningaka itotorou gënanga, deʼ nogahoko ma Jouika hupaya ünanga wohiapongo anidibanga itotorou gënanga!

²³Hababu ngohi tohiöriki ngona iniömanga de o hininga mahiri deʼ o dorou imagilaongo.”

²⁴Daha o Simon wotemo o Petrus deʼ o Yohanisika, ”Nihiriwo nigahoko ma Jouika hupaya kamoiö de koiwa idadi ngohino, roriadodoto nihidemo-demoka gënanga.”

²⁵Ipaha önanga ihidöaka o hakihi deʼ ihingahu ma Jou aidemo, o Petrus deʼ o Yohanis imaidulu o Yerusalemika. Deʼ manga dodagi magoronaka, önanga ihingahu o Abari ma Oa gënanga o kapongo mangöe-ngöe o Samariaka.

²⁶Ma Jou aimalaekat womatëngo iwitemo o Filipusika, ”Ika nomagoraka! Noiki nameta o koreharail̄e o ngëkomo imadohanga o Yerusalem de o Gaza.” O ngëkomo gënanga irïdi.

²⁷O Filipusö kawomagoraka. Orahagënanga naga o nyawa womatëngo o Etiopiaino aipangkati kohagurutil̄e aidodagi magoronaka magogiriaka wolio aibereraika. O nyawa gënanga o nyawa womatëngo aipangkati kohagurutil̄e wogöana mata-mata amidagakunu o ngo Kandake, o koano o ngoheka o Etiopia makotaka. O nyawa gënanga woikoka o Yerusalemika mangale wopuji ma Jou Madutuika deʼ orahanënanga wolio magogiria de aikereta. Oraha wogogeruku aikereta magoronaka gënanga ünanga wabasa o Nabi Yesaya ai Buku.

²⁹Ma Jou Madutu ai Womaha iwitemo o Filipusika, ”Noiki nomahitigi-tigika o keretaika gënanga.”

³⁰O Filipus woiki womahi tigi-tigika o keretaika gënanga, daha ünanga woihene o nyawa gënanga wabasa o Yesaya ai Buku. O Filipus wileha unangika, ”Bote Tuanga nomangarati Tuanga nabobasa-basa gënanga?”

³¹O nyawa gënanga wohaluhu, ”Sarakia ngohi tomangarati, nako komoiua ihihi tararono ngohino?” Daha ünanga wiahoko o Filipus wodoa aikeretail̄e deʼ wogogere dede ünanga.

³² O ayat-ayat nenangala waböbasa-basa gënanga, ”Unanga hokä o duba yatuda mangale yatoaka, hokä o duba mangohaka ipoakua nako yaguti magogo, hokogënanga Unanga kao demo o döaka moiö de koiwa wotemo.

³³Unanga iwihikauku deʼ iwihidiai de madiaiua. Ai jiwa yarahuku o dunia mahimangoka, hiädono o nyawa moiö de koiwa yakunu ihiade-ade mangale aidifauku.”

³⁴O Etiopiaino aipangkati magögurutil̄e gënanga wotemo o Filipusika, ”Abeika nohihingahu ngohino, o nagona aidumutu o nabi nënanga? Aidiri mahirete, ekola o nyawa mahomoa?”

³⁵De o Filipusö womuläenge woade-ade; ünanga wapäke o ayat-ayat gënanga hokä madodihiraka mangale wohingahu o Abari ma Oa mangale o Yesus, aipangkati magögurutil̄eika gënanga.

³⁶O dodagi mahidogoronaka, önanga imahiädono o ngï moika naga o akere. Wopopangka-pangkati gënanga wotemo, ”Nolega gënanga naga o akere! Okiahi makuranga mangale ngohi tomaohiki?” [

³⁷O Filipus wotemo, ”Nako Tuanga nongaku de anihininga magahumu, Tuanga yakunu nomaohiki.” ”Ngohi tongaku o Yesus Kristus ganga ma Jou Madutu ai Ngohaka,” wotemo o pangkati magö gurutil̄e o Etiopiaino gënanga.]

³⁸Daha ünanga wahuloko aikereta imatogumu; ahao önanga yahinoto, o Filipus deʼ wopopangka-pangkati gënanga, youti o akere magoronauku deʼ o Filipus wiohiki ünanga.

³⁹Maöraha önanga yohupu o akeril̄e, ma Jou Madutu ai Womaha iwil̄ë o Filipus genangino. Aipangkati magögurutil̄e o Etiopiaino gënanga kowimäke okauali ünanga gënanga. De aimörene o pangkati magögurutil̄e gënanga aidodagi wohigila-gila.

⁴⁰Ima todokana o Filipus naga o Asdodoka. Deʼ maöraha ünanga wohigila-gila aidodagi, ünanga wohiabari o Abari ma Oa mangale o Yesus o kota-kotaka mata-mata, hiädono ünanga wadono o Kaisariaika.