Read Tobelo O ROMA 10 Bible Online

O ROMA 10 - Tobelo bible

O ROMA 10

¹Roriadodoto! Ngohi duru tönahihu de tönganono ahihoana de ahiberera manyawa yahihalamati. Deʼ ngohi tagou-goungu tomäniata ma Jou Madutuika mangale önanga.

²Ngohi tobarani tahetongo önanga duru yamagawe imahigilaongo ma Jou Madutuika. Mä manga magawe gënanga ihihol̄eua de o sawaro ma Jou Madutuino.

³Onanga ihiorikua madodagi sarakia ma Jou Madutu wodiai o nyawa de de Unanga manga rimoi yaoakali. Deʼ karana önanga yomau yanïki toönanga manga hidailako mahirete, ho önanga yodomotekua o hidailako ma Jou Madutu wohi dumu-dumutu.

⁴O agama matita o Kristus itotomoka wadiai. Hoʼ moi-moi o nyawa iwingaku o Kristusika, manga rimoi de ma Jou Madutu yaoakali.

⁵ O Musa watulihi o nyawa imateke oa-oa de ma Jou Madutu ihihol̄e de o agama matita, o nyawa gënanga aha yowango karana yamoteke o agama matitaika.

⁶ Mä o nyawa imateke oa-oa de ma Jou Madutu mangale de madodagi ihihol̄e wingaku ma Jou Madutuika, Ma Jou Ai Demo ma Buku yahetongo hokonënanga, ”Ngarouha ngona notemo anihininga magoronaka, ’O nagona aha yodöa o horogail̄e?ʼ (ma mangarati o Kristus iwiao iwihi guti),

⁷ekola ’O nagona aha youti o nyawa yohone-honenge manga duniauku?ʼ (ma mangarati o Kristus iwi göraka o honenge mahi goronaka de iwihidöa).”

⁸Ganga madungutu hokonënanga, ”O abari ma Jou Madutuino gënanga duru imahi tigi-tigika ngonaika; ani uruoka deʼ anihininga magoronaka.” Gënanga doka o abari ngomi mihi ngahu-ngahu; o abari kokiani o nyawa yangaku.

⁹Hababu nako Riadodoto nomangaku de aniuru ”O Yesus gënanga ma Jou”, deʼ Riadodoto nongaku anihininga magoronaka ma Jou Madutu wihiwangoka o Yesus o honenge mahigoronaka, done Riadodoto aha nohalamati.

¹⁰Karana de aihininga ünanga wongaku, hiädono ma Jou Madutu witarima ünanga hokä o nyawa imateke oa-oa de ma Jou Madutu. Deʼ aiuru ünanga womangaku, hiädono ünanga iwihihalamati.

¹¹ Ma Jou Ai Demo ma Buku magoronaka i tulihi, ”O nyawa yongaku-ngaku aha manga nganono ihihangua.”

¹²Gënanga idadi o nyawa mata-mataika, hababu o Yahudioka manyawa de o hoana de o berera mahomoa manyawa koiwa imako howono. Ma Jou Madutu womatëngo-tëngo gënanga ganga mangale o nyawa mata-mata manga Jou. Unanga wahidöaka Ai barakati de maboboloi o nyawa mata-mataika yogögaho-gahoko o roriwo Unangika.

¹³ Ma Jou Ai Demo ma Buku magoronaka itulihi, ”O nyawa mata-mata imahiböaka ma Jouika, aha yohalamati.”

¹⁴Mä sarakia o nyawa yakunu imahiböaka ma Jouika nako önanga iwingakuowahi? Deʼ sarakia önanga yakunu iwingaku ma Jouika nako önanga yoihenowahi mangale Unanga? Inoli, sarakia önanga yakunu yoihene mangale ma Jou, nako moiua naga ihingahu?

¹⁵ Deʼ sarakia yakunu o nyawa yoao o abari gënanga nako moiua yähuloko? Ma Jou Ai Demo ma Buku magoronaka itulihi hokonënanga, ”Hokokia mahailoa manga böa o nyawa yoao-ao o Abari ma Oa ma Jou Madutuino!”

¹⁶ Mä o nyawa mata-mataua yatarima o Abari ma Oa gënanga. Hababu ma Nabi Yesaya wotemo, ”Jou, o nagona yongaku tongomi mia abari?”

¹⁷Mahababu gënanga o nyawa idadi yongaku karana önanga yoihene o abari, deʼ o abari yoihene karana naga o nyawa ihingahu mangale o Kristus.

¹⁸ Mä ngohi toleha: Boteka igoungu önanga yoihenowahi o abari gënanga? Maraioka iböto! Hababu Ma Jou Ai Demo ma Buku magoronaka yatulihi hokonënanga, ”Manga ilingi igiloanga yodogiliangoka o dunia mata-mataika, manga demo-demo yadonoka o dunia mabahaika.”

¹⁹ Ngohi tolehali: Boteka o Israel manyawa ihiorikowahi? Mal̄aikala o loleha nënanga madodihiraka o Musa wöbaluhu. O Musa wotemo, ”Hoko nënanga ma Jou Madutu wotemo, ’Moi o hoana de o berera manyawa Ahi umatua Ngohi aha tadiai niasanangiua onangika deʼ o hoana de o berera manyawa yobodo-bodo Ngohi aha tadiai niängamo onangika.’ ”

²⁰ Ma Nabi Yesaya iholoioli wobarani. Unanga wotemo, ”Hoko nënanga ma Jou Madutu wato, ’O nyawa ihilingi-lingirua Ngohi, ihi mäkeoka Ngohi; deʼ o nyawa ihi leha-lehaua Ngohi, ngohi tohimatoko Ahi diri onangika.’ ”

²¹ Mä mangale o Israeloka ma Nabi Yesaya wotemo, ”Hokonënanga ma Jou Madutu wato, ’Moi o hoana de o berera manyawa manga häeke i totogowini deʼ yototomotekua onangika o wange magurutu Ahi giama i toakika.’ ”