Read Tobelo O ROMA 11 Bible Online

O ROMA 11 - Tobelo bible

O ROMA 11

¹ Ngohi toleha: Boteka ma Jou Madutu wäumoka Ai umati mahirete? Marai kowali! Ngohi mahirete o Israel manyawa moi o Abraham aidifauku o Benyamin aiahalino.

²Kowali! Ma Jou Madutu wäumoua Ai umati kamahirahi de womangiri-ngirikoka. Roriadodoto nihiöriki okia yatulihi Ma Jou Ai Demo ma Buku magoronaka mangale o Elia, maöraha ünanga wohingahu o Israeloka manga hali ma Jou Madutuika. Ma Nabi Elia wotemo,

³ ”Jou, o nyawa manga ngöe yätomäka aninabi-nabi deʼ yawede-wederuku mangöe o ngï ihihuba-huba o huba Ngonaika. Mahou ngohi tomatëngokahi deʼ önanga yomau ihitoma ngohi.”

⁴ Okia ma Jou Madutu aibobaluhu o Eliaika? Ma Jou Madutu wïbaluhu, ”Ngohi tätingakikaka yaribuhu tumidi mangale Ahi dirimahirete. Onanga komaiwahi yahuba o Gomanga o Baal.”

⁵Hoko genangoli o örahanënanga: Naga o hidoku mahuhutulu o nyawa ma Jou Madutu wäiri-irikoka karana Ai hayanga de Ai dora.

⁶Unanga wäiriki önanga matiti Ai hayanga de Ai dora de matiti o nyawaua manga manarama. Hababu nako ma Jou Madutu aingongiriki gënanga matiti de o nyawa manga manarama, done ma Jou Madutu Ai hayanga de Ai dora gënanga o hayanga de o dora madutuokaua.

⁷Hoʼ, sarakia? O Israel manyawa yamäkeua okia önanga yalingi-lingiri. Yamömäke-mäke duga-duga o nyawa o doomu moi mai teteke wäiri-irikoka ma Jou Madutu. Mahomoa mata-mata idadioka manga häeke itogowini ma Jou Madutu aigogahokika.

⁸ Hababu Ma Jou Ai Demo ma Buku magoronaka yatulihi hoko nënanga, ”Ma Jou Madutu wadiai idadi to önanga manga hininga deʼ manga dibanga ihuha imangarati; deʼ hiädono o örahanënanga to önanga manga lako yakunua imahimäke, deʼ toönanga manga ngauku yakunua imahi ihene.”

⁹ Ma Koano Daud wotemoli, ”Mal̄aikala to ona manga rame-rame idadi o modoi onangika mahirete, deʼ idadi o baiti, o ngï önanga yäotaka deʼ yowedere!

¹⁰Mal̄aikala to ona manga lolega idadi i huhutu hupaya önanga imahimäkeua; deʼ mal̄aikala önanga idadi yohugu kahiado-adonika.”

¹¹Ngohi tolehali: Maöraha o Yahudi manyawa yäotaka, bote gënanga idadi hupaya önanga yowedere? Hakali-kali kowali! Mä karana önanga yobaradoha, ho o hoana de o berera mahomoa manyawa iholoioli yahihalamati, hiädono idadi o hababu o Yahudi manyawa yäsanangiua o hoana de o berera mahomoa manyawa gënanga.

¹²Karana o Yahudioka yahowono deʼ yamotekua ma Jou Madutu aimau, ho o hoana de o berera mahomoa manyawa ma Jou Madutu wahibarakati. Yomoholoioli nako o Yahudioka de ma Jou Madutu manga rimoi yaoaokali; marai iholoioli ilamoko mabarakati aha ma Jou Madutu wohidöaka!

¹³Maöraha nanga kayaoa de ngohi totemo-temo o roriadodotika o Yahudi manyawaua! Madëkana nanga, hokä o Yahudi manyawaua manga rasul, ngohi duru ahimumukoka tatamil̄e tongohi ahimanarama.

¹⁴Ngohi tonganono ngohi takunu ahinyawa mahirete, manga hininga tasanangiua, hupaya de o ngëkomo gënanga ngohi takunu tahi halamati önanga o hidoku moi.

¹⁵Karana önanga ma Jou Madutu wätila, ho o dunia de ma Jou Madutu marimoi yaoaokali; okia hongoli nako ma Jou Madutu wätarima! Marai gënanga kaimatero dika hokä o nyawa yohonengoka de yowangoli!

¹⁶Nako o roti o dobiki moi madodihiraka ihidöakoka ma Jou Madutuika, gënanga mamangarati maroti magahumu ihidöakoli ma Jou Madutuika. Deʼ nako magota mangutuku ganga toma Jou Madutu, gënanga mamangarati majaga-jagaö ganga kato Unanga.

¹⁷O hidoku moi o zaitun magota majaga-jaga — enagënanga o Yahudi manyawa — yaoto yatobikoka. Deʼ yaoto-oto marioika gënanga ihitataulika o zaitun magota o honganino majaga, enagenangala o Roriadodoto o Yahudi manyawaua. Riadodoto inihi tataulika genangika hupaya Riadodoto niamäo hagala maoa-oa o Yahudi manyawa mangawowango cara rohani.

¹⁸Mangale karana gënanga uha ngini niahiuwini önanga yätobi-tobikoka hokä o jaga gënanga. Ngini kokiani nimahininga ngini duga-duga kamajaga. Deʼ koigoungua majaga ihiol̄omo mangutukika, duga-duga mangutuku ihiol̄omo majaga.

¹⁹Mä Riadodoto aha notemo, ”Ia, mä o jaga-jaga gënanga yatobiki hupaya ngohi yakunu ihihitataulu maröehika!”

²⁰Gënanga igoungu itiai. Mä onanga yäumo karana önanga yongakuua, enahioko Riadodoto initarima karana Riadodoto nongaku. Hö Riadodoto uha noma edenge karana ganga; i idulu yaino Riadodoto kokiani namäo nohawana.

²¹Hababu nako ma Jou Madutu wädoraua wäumo o Yahudi manyawa hokä o jaga-jaga madutu gënanga, uha natobote Unanga aha wonïdora mangale woniumo ngona Riadodoto!

²²Hö nenangoka ngone hamäke hokokia ma Jou Madutu aioa-oa deʼ hokokia aidogowini Unanga. Unanga wodiai wakaigoungu yoböbaradohaika, mä Unanga aihininga yaoa ngonaika Riadodoto — iti yakunu Riadodoto notatapu nowango de Ai oa. Nako kowali, done Riadodoto ngonaö aha woniumo.

²³Deʼ mangale o Yahudi manyawa gënanga, nako önanga yamal̄a manga manarama de manga damäke yongakua, done önanga aha watarimali; hababu ma Jou Madutu wokuaha mangale watarimali önanga.

²⁴Riadodoto nia ahali o Yahudi manyawaokaua ganga hokä o zaitun magota o honganika majaga-jaga. Aa, Riadodoto nako imalawani de anibiaha, yakunu inihitataulu o zaitun magota madutuika, okiaoli hagala o Yahudi manyawa yahitotero de o zaitun magota madutu gënanga majaga-jaga. Marai mangale ma Jou Madutu iholoioli igapanga mangale wahigilioli önanga to önanga manga zaitun magota madutuika.

²⁵O Roriadodoto! Ngohi tonganono uha ngini niamäo hagala mata-mata nihiorikoka. Hababu naga o hali moi ma Jou Madutu womau, mä o nyawa ihiorikowahi. Deʼ ngohi tomau ngini nihiöriki ganga; enagena nënanga: O Yahudi manyawa o hidoku moi manga häeke yatogowini, mä manga manarama de manga damäke gënanga aha igila-gila duga-duga hiädono o Yahudiokaua manyawa yongodumoka yoböa ma Jou Madutuika.

²⁶ Hokogënanga o Yahudi manyawa aha yohalamati. Hababu Ma Jou Ai Demo ma Buku yatulihi hokonënanga, ”Ma Koano Wahihohalamati aha woböa o Sion de waino; Unanga aha waëhe o Yakub aidifauku manga dorou mata-mata.

²⁷ Ngohi aha tadiai Ahi jaji nënanga dede önanga maöraha Ngohi tahi apongo to önanga manga baradoha mata-mata.”

²⁸Karana o Yahudi manyawa yoluku yatarima o Abari ma Oa ma Jou Madutuino, önanga yodadi ma Jou Madutu aihaturü; deʼ genanga imateke korona idadi manga utumu o Roriadodoto o Yahudi manyawaua. Mä karana ma Jou Madutu aingongiriki, ho o Yahudi manyawa gënanga itatapu ma Jou Madutu wädora matiti mangaete de mangatohora.

²⁹Hababu nako ma Jou Madutu wäiriki o nyawa deʼ wahibarakati o nyawa geönanga, ma Jou Madutu komaiwa watauru wakilio okia wadodiaioka.

³⁰Mahira ngini nitomotekua ma Jou Madutuika. Mä orahananga ma Jou Madutu wohinyataoka ngini nilapahi de o howono, karana o Yahudi manyawa yotomotekua.

³¹Hoko genangoli de o Yahudi manyawa gënanga. O örahanënanga önanga yotomotekua ma Jou Madutuika, hupaya ngini ihinyata nilapahi de o howono. Mä ahao onangö aha ihinyata yolapahi de o howono.

³²Hababu ma Jou Madutu wamal̄aika o nyawa mata-mata o tomotekua yäkuaha, hupaya Unanga yakunu wohimatoko Ai dora de Ai hayanga onangika mata-mata.

³³ Igoungu duru kahagiria ma Jou Madutu aikaya! Igoungu iamoko aisawaro de Ai ganako! O nagona yakunu yatailako de madiai waputu-putuhoka? O nagona yakunu imangarati madodagi Unanga wokarajanga?

³⁴ Ma Jou Ai Demo ma Buku yatulihi hokonënanga, ”O nagona ihiöriki ma Jou ai dibanga? O nagona yakunu ihidöaka o dodaaere Unangika?

³⁵ O nagona iwihidöaka okia naga ma Jouika hiädono yakunu yogahoko mabalahi?”

³⁶ Ma Jou Madutu wohidödädadioka hagala moi-moi. Mata-mata maahali ma Jou Madutuino deʼ ganga mangale ma Jou Madutu. Ma Jou Madutu iwihigiriri kahiado-adonika! Amin.