Read Tobelo O ROMA 13 Bible Online

O ROMA 13 - Tobelo bible

O ROMA 13

¹O nyawa moi-o nyawa moi kokiani niahigihene o poparetaika, hababu koiwa naga o popareta yamäkeua manga kuaha ma Jou Madutuino. Deʼ o popareta o öraha nënanga naga, ihi dagi manga kuaha imoteke o pareta ma Jou Madutuino.

²Mahababu gënanga o nyawa yalawa-lawani o popareta imatero dika de yalawani okianaga ma Jou Madutu wohi tantuoka. Deʼ o nyawa yododiai hokogënanga aha yatarima o hukumanga.

³Hababu o nyawa yododiai o oa ngarouha yämodongo o poparetaika. Duga-duga o nyawa yododiai o dorou dika kokiani yohawana. Nako Riadodoto nöigo hupaya Riadodoto nohawanua o poparetaika, Riadodoto kokiani nodiai maoa-oa, done Riadodoto aha inihigiriri.

⁴Hababu o popareta ganga ma Jou Madutu aigilaongo yomanarama mangale ani oa. Mä nako Riadodoto o dorou nodiai, marai Riadodoto kokiani nämodongo onangika, hababu kaparahajaua dika önanga yokuaha la yähukumu o nyawa. Onanga ganga ma Jou Madutu ai gilaongo, yögogelenga ma Jou Madutu aihukumanga o nyawaika yododiai o dorou.

⁵Mahababu gënanga Riadodoto kokiani nahi gihene o poparetaika — uha duga-duga karana Riadodoto noluku ini hukumu, mä karanaö ani hininga madobote i temo-temo.

⁶ Genangö idadi o titi yadodoa hokokiani o soungu nofangu, hababu o popareta ma Jou Madutu aipegawe ihidagi manga manarama biahaua nënanga.

⁷Hoʼ nofangu o poparetaika okia kokiani Riadodoto nofangu onangika. Nofangu o soungu nako kokiani Riadodoto nofangu o soungu; deʼ nofangu o ngasi nako kokiani Riadodoto nofangu o ngasi. Yädododato kokiani önanga nädodato deʼ yähohoromati kokiani önanga nähoromati.

⁸Kao nagonaika nagaö de uha nimakanagimi okianaga, sowaliua nimakanagimi o dora moi de moika. Hababu o nyawa yädora-dora manga dodiawo o nyawa, yatotomoka o Musa aitita.

⁹ Hababu o agama Yahudi matita enagënanga: Uha nohudali, uha notoma, uha notohiki, uha nönahihu o nyawa mahomoa manga kianaga; mata-mata gënanga kamamoi de o tita mahomoa, yatipokoino idadi o tita moi dika, enagënanga, ”Nädora ani dodiawo o nyawa hokä ngona nödora anidiri mahirete.”

¹⁰O nyawa yädora-dora o nyawa mahomoa, aha yodiaiua o dorou o nyawaika gënanga. Hoʼ o nyawa yädora-dora manga dodiawo o nyawa ganga o nyawa yatötotomoka mata-mata o agama matita madodagi.

¹¹Mahomoa de mata-mata gënanga ngini nihiöriki o öraha nënanga ganga tingini niaöraha la nimomiki nia ngidu magoronaka. Hababu maöraha la ngone inahihalamati o öraha nanga iholoi itigi de maöraha gënanga dahaö ngone homuläenge hongaku.

¹²O hutu ngade-ngade itilakuroka; deʼ mahutuohi aha itebini. Hoʼ, kayaoa de ngone homa togumu hodiai o manarama o huhutu mamanarama. Ngone kokiani homahi dero nanga diri de o dararono madaë.

¹³Ngone kokiani hodiai o hali yahöhoromati hokä biaha o nyawa yadodiai o wange-wange; uha horame-rame maduduga yatilakuru, ekola inädaluku. Uha hodiai okianaga isösafarune, uha nanga kalakuanga itorou. Uha homakangamo ekola homäkodohata.

¹⁴Tanu ma Jou Yesus Kristus wohi tantu okia ngini kokiani nia diai. Deʼ uha niodomoteke o nyawa yoböbaradoha manga biaha la ihi aiki manga nahihu madorou.