Read Tobelo O ROMA 14 Bible Online

O ROMA 14 - Tobelo bible

O ROMA 14

¹ O nyawa womö mangarati itiaiua mangale okia wangöngaku-ngaku kokiani niwitarima nihidodiai Roriadodoto niahidogoronaka. Uha nimatekeributu dede ünanga mangale touna aidamäke.

²Naga o nyawa mangadamäke okia dika ünanga yakunu waol̄omo. Mä naga mahomoa o nyawa aingongaku ibole; ünanga wamäo ünanga duga-duga wakunu wol̄omo o gau-gauku dika.

³O nyawa okia dika makawaol̄omo uha wïpulono okiaua iwidäene o nyawawol̄omo o inomo woiri-iriki; deʼ o nyawa wol̄omo o inomo woiri-iriki, uhali wihihowono o nyawa kawaol̄omo mata-mata, hababu ma Jou Madutu wïtarimaka ünanga.

⁴O nagona ngona Riadodoto hiädono Riadodoto kokiani nahidero o adili o nyawa mahomoa manga gilaongo? Mudukua o gilaongo worubaiha ekola womaokoino ganga genangö aituanga aihidailako. Dë maraioka o gilaongo gënanga aha woma oko itotiail̄e karana ma Jou wakunu wadiai womaoko itotiail̄e.

⁵Naga o nyawa yamäo moi o wange yairi-iriki iholoi iamoko de o wange mahomoa, inoli mahomoali o nyawa yamäo mata-mata o wange kaimaketero dika. Mal̄aikala o nyawa moi-moi imängiriki manga damäke mahirete.

⁶O nyawa wohiamo-amoko o wange wairi-iriki, o nyawa gënanga wodiai hokogënanga mangale wïhoromati ma Jou. O nyawa waol̄o-ol̄omo hagala mata-mata, wodiai hokogënanga mangale wïhoromati ma Jou, karana ünanga wosukur ma Jou Madutuika de o inomo gënanga. Hokogenangoli de o nyawa wol̄o-ol̄omo o inomo wairi-irikoka dika; o nyawa genangö wïhoromati ma Jou deʼ wosukur ma Jou Madutuika.

⁷O nyawa moiua ngoneoka wowango mangale aidiri mahirete; deʼ o nyawa moiua ngoneoka wohonenge mangale aidiri mahirete.

⁸Nako ngone howango, ngone howango mangale ma Jou. Dë nako ngone hohonenge hohonengö de ma Jou. Hoʼ howango ekola hohonenge, ngone ganga toma Jou.

⁹O Kristus wohonengoka deʼ wowango okali. Ma hababu gënanga Unanga wodadi o nyawa yowango-wangohi deʼ o nyawa yohone-honengokaö manga Jou.

¹⁰ Hoʼ, Roriadodoto! Mangale okia nihihowono aniriadodoto o ngongaku moi? Dë mangale okia Riadodoto nïpulono ünanga okiaua iwidäene? Ngone mata-mata aha hïhimanga ma Jou Madutu la wonahidero o adili.

¹¹ Ma Jou Ai Demo ma Buku magoronaka yatulihi, ”Igoungu,” ma Jou wato, ö nyawa moi-o nyawa moi aha yohuba ima rukuku Ahi himangoka; deʼ o nyawa moi-o nyawa moi aha ima ngaku Ngohi nanga ma Jou Madutu.”

¹²Hö ngone moi-moi kokiani homahitagongo hohaluhu ma Jou Madutuika, hagala tongone nanga manarama.

¹³Mangale karana gënanga uha ngone homateke hikohowono. Iidulu yaino hohidailako hupaya ngone okianaga moiö de hodiaiua idadi o hababu nanga riadodoto womatëngo waohana o bobaja deʼ wobaradoha.

¹⁴Karana ngohi torimoi de ma Jou Yesus, done ngohi duru tongaku, kamoiö de koiwa naga matitioka ipeseke; mä o hali gënanga ipeseke o nyawa moika, nako o nyawa gënanga wato ipeseke.

¹⁵Mä nako de okia ngini Riadodoto niaol̄omo, de womatëngo nanga riadodoto o ngongaku moi aihininga yöhiri, done ngini Riadodoto nidiai gënanga imahihol̄eokaua o dora. Nako o Kristus wohonengoka mangale o nyawa moika, uha niwimal̄aika o nyawa gënanga iwibodito mangale okia ngona Riadodoto naol̄omo.

¹⁶Mahababu gënanga uha niamal̄aika okianaga maoa-oa mangale ngini, de o nyawa mahomoa yato ganga itorou.

¹⁷Hababu nako ma Jou Madutu wapareta o nyawa womatëngo aiwowango, okia ünanga yakunu waol̄omo ekola waokere, hohi amokokaua. Hohi amoko genangala o nyawa gënanga wamoteke ma Jou Madutu aimau, wamäo o hininga marïdi deʼ watarima o mörene ihidöa-döaka ma Jou Madutu ai Womaha.

¹⁸O nyawa iwilöleleani o Kristus madodagi hoko gënanga, o nyawa gënanga ihisanangi ma Jou Madutu aihininga de o nyawa mahomoa yäetongo.

¹⁹Hababu gënanga tongone nanga dumutu kokiani salalu mangale o hali-o hali yadiai homakao yaoa de homahikomomiki.

²⁰Uha karana mangale o inomo Riadodoto nakilianga okia naga ma Jou Madutu wakökarajangoka. Hagala o inomo maraioka ihalali mangale haol̄omo; mä nako okia naga Riadodoto naol̄omo de idadi o hababu o nyawa mahomoa yobaradoha, done Riadodoto nahowono.

²¹Iholoi yaoa ngarouha niaol̄omo o hiode ekola o angguru niokere ekola nidiai okia dika nako o hali gënanga idadi o hababu o riadodoto womatëngo homateke ngongaku moi idadi wobaradoha.

²²Mal̄aikala okia Riadodoto nongaku-ngaku gënanga Riadodoto, nadiai ma Jou Madutu aihimangoka dika la mangale ngona Riadodoto mahirete. O nyawa onangoka koiwa idadi o titi mangale yamäo yahowono okia önanga yamäo gënanga itiai, o nyawa geönanga youtumu.

²³Mä o nyawa yamäo yotaka-taka mangale yaol̄omo okianaga moi, ipaha de kayaol̄omo o inomo gënanga, o nyawa geönanga ma Jou Madutu wahihowono; hababu o nyawa geönanga yodiaiua imoteke toona manga mangarati magoungu mangale okia madiai deʼ ihowo-howono. Dë okia dika yodiai de o mangarati magoungua ganga o baradoha.