Read Tobelo O ROMA 15 Bible Online

O ROMA 15 - Tobelo bible

O ROMA 15

¹Ngone igou-goungu hohigoungu mangale okia ngone hangaku-ngaku, kokiani ngone hosabari o nyawa manga ngongaku iböbole-bole manga kabaratanga. Uha ngone homau hasanangi nanga diri mahirete dika.

²Iidulu yaino ngone moi-moi kokiani hasanangi tongone nanga roriadodoto manga hininga mangale toona manga oa, hupaya manga hininga ihigoungu iholoi ikuata.

³ Hababu o Kristusö wapikirua Ai dirimahirete masanangi. Ma Jou Ai Demo ma Buku magoronaka yatulihi hokonënanga, ”Hagala o hohedu madumutu Ngonaika iotakoka ngohiuku.”

⁴Mata-mata itötuli-tulihi Ma Jou Ai Demo ma Buku magoronaka ganga mangale inä dotoko ngone. Hababu o dodötoko ngone hatotarima o Buku i Tebi-tebinino yadiai ngone hotongohono deʼ hokuata hiädono ngone yakunu homahi nganono ma Jou Madutuika.

⁵Tanu ma Jou Madutu wohidöa-döaka o dongohono deʼ o lolaru o nyawaika, wonä riwo ngone la howango o hininga moi, hamoteke o Kristus Yesus aidulada.

⁶De o hininga moi Riadodoto mata-mata nirorimoi yakunu niwihigiriri ma Jou Madutu, o Yesus Kristus tongone nanga Jou ai Ama.

⁷Hababu gënanga o Roriadodoto kokiani nimateke tarima moi de moi de niahininga isosanangi, hokä o Kristusö winïtarima ngini la niwihimulia ma Jou Madutu.

⁸Hababu, niohohininga, o Kristus wäleleanioka o Yahudi manyawa la ihidumutu ma Jou Madutu wosetia wohiganapu Touna aijaji nangaete de nangatohoraika.

⁹ O Yesusö wadiai o hoana de o berera manyawa mahomoa iwihimulia ma Jou Madutu karana Ai hininga maoa onangika. Ma Jou Ai Demo ma Buku magoronaka yatulihi hokonënanga, ”Hababu gënanga aha ngohi tonihigiriri Ngona o hoana de o berera manyawa manga higoronaka, ngohi aha tohinyanyi o higiriri mangale Ani romanga.”

¹⁰ Naga yatuliholi hokonënanga, ”Nimörene nima komoteke de ma Jou Madutu aiumati wä iri-irikika, hei hagala o hoana de o berera manyawa!”

¹¹ Deʼ nenangö, ”Niwi higiriri ma Jou Madutu, hei mata-mata o hoana de o berera manyawa, kokiani o nyawa mata-mata iwihigiriri Unanga!”

¹² Deʼ nenangoli ma Nabi Yesaya wahëto-hëtongo, ”O Isai aidifauku, aha woböa womatëngo-tëngo aha wäpareta mata-mata o hoana de o berera manyawa; Unangika o hoana de o berera manyawa gënanga aha imahinganono.”

¹³Ma Jou Madutu ganga mangï ngini nimahi nganono. Tanu Unanga wadol̄a niahininga de hagala o mörene deʼ o dame karana ngini niwingaku Unangika, hupaya de ma Jou Madutu ai Womaha makuaha ngini idogo-dogo nimahi nganono ma Jou Madutuika.

¹⁴Ahi Roriadodoto! Ngohi tohigoungu naga duru kahangöe maoa-oa nginioka. Nginiö manihiöriki hagala mata-mata deʼ yakunu nimäkodotoko moi de mahomoaikaö.

¹⁵Mä mangale o hali-o hali yatä tatoroka magogere, ngohi tohidöaka o hohininga nginika tohi totiaika o hurata nënanga magoronaka, karana ma Jou Madutu wohihidöakoka ngohino o manarama gënanga.

¹⁶Unanga wohigorakoka ngohi tilöleleani o Kristus Yesus la ihihuloko o hoana de o berera manyawaika o Yahudiokaua. Dë ngohi tomadiai hokä ma imam, tohiabari o Abari ma Oa ma Jou Madutuino, hupaya o nyawa o Yahudiokaua yodadi o huhuba moi ma Jou Madutuika de yakunu Unanga wätarima. Tanu ma Jou Madutu ai Womaha wädiai önanga imadadi o huhuba moi yatinga-tingakoka mangale ma Jou Madutu.

¹⁷Hoʼ, karana ngohi torimoioka de o Kristus Yesus, ho ngohi yakunu tomamäo toamoko ahimanaramoka mangale ma Jou Madutu.

¹⁸Ngohi tobarani totemo hokogënanga duga-duga yakokorona okia o Kristus wodiaioka de mangëkomo ngohi la o nyawa o Yahudiokaua tadiai önanga iwihimoteke ma Jou Madutuika. Ngohi todiai gënanga de ahidemo-demo de mamanarama

¹⁹ihikinïki de o nonako ihëra-hëranga deʼ o hali-o hali biaha-biahaua; mata-mata gënanga mangale ma Jou Madutu ai Womaha makuaha. O Abari ma Oa mangale o Kristus ngohi tohingahuoka o nyawaika mata-mata, muläenge o Yerusalem mabereraka hiädono o Ilirikumika.

²⁰Tongohi ahi mau de ahinganono genangala tohingahu o Abari ma Oa ma Jou Madutuino o ngï-o ngï kiaka o nyawa yoihenowahi mangale o Kristus. Hababu ngohi toluku tohi goko o manarama de tögelenga o nyawa mahomoa manga pondasi mal̄okuoka.

²¹ Ma Jou Ai Demo ma Buku magoronaka yatulihi, ”Hagala o nyawa komaiwahi yoihene o abari mangale Unanga aha iwimäke; deʼ onanga komaiwahi yoihene, aha imangarati.”

²² Mahababu gënanga kahamanaroka ngohi tamäke o dudukoro mangale tinïädono ngini.

²³Maöraha nanga tongohi ahimanarama daera-daeraoka gënanga ibötoka. Madekana de matao-taongo ngohi tomau tinïädono ngini.

²⁴Damä nako ngohi ahidodagi magoronaka o Spanyolika de tatio niaberera, ngohi tönganono yakunu homakamäke dede ngini deʼ homahiko mörene jai-jai de de ngini. I böto de gënanga ngohi tönganono ngini yakunu nihïriwo ngohi mangale tongohi ahidodagi o Spanyolika.

²⁵ Mä o örahanënanga ngohi tomau toiki o Yerusalemika la tao o roriwo mangale ma Jou Madutu aiumati dokenangoka.

²⁶Hababu o jemaat-jemaat o Makedonia deʼ Akhaya mabereraka yömodekoka mangale ihidöaka mangaroriwo nanga roriadodoto yohuhuhaika ma Jou Madutu aiumati mahigoronaka o Yerusalem mabereraoka.

²⁷ De manga hininga isosanangi önanga yaputuhu la yodiai gënanga. I goungu imoteke madiai ipatutu önanga yäriwo manga roriadodoto yomomihikini o Yerusalem mabereraka gënanga; hababu o Yahudi manyawaka de yaino hagala o nyawa o Yahudiokaua gënanga yatarimaka hagala o barakati ma Jou Madutuino. Hö, hagala o nyawa o Yahudiokaua gënanga ipatutoli yäriwo hagala o Yahudi manyawa de o barakati marupa o baranga.

²⁸Nako ngohi tabötoka tongohi ahimanarama nënanga, deʼ tohidöaka onangika o Yerusalem mabereraka gënanga o roriwo yatotoomuoka gënanga, done ngohi aha toiki o Spanyol mabereraika tatio niaberera.

²⁹Nako ngohi toböa nginika, marai ngohi toböa de o barakati mangöe o Kristusino mangale ngini.

³⁰De tongone nanga Jou o Yesus Kristus, deʼ deo dora ma Jou Madutu ai Womaha ihidöa-döaka, ngohi togahoko de magiria nginika, tanu ngini nihimoteke nimäniata niagou-goungu hororimoi dede ngohi ma Jou Madutuika mangale ngohi.

³¹Nihubayanga hupaya ma Jou Madutu wohihirehene ngohi hagala o nyawa yongaku-ngakua manga giama mahoatino o Yudea mabereraka, deʼ hupaya ahi manarama mangale tao o roriwo o Yerusalem mabereraika de ma Jou Madutu aiumati dokenangoka yatarima de manga hininga isosanangi.

³²De hokogënanga nako ma Jou Madutu wohimoteke, ngohi yakunu toböa nginika de ahihininga isosanangi. Deʼ ngohi aha tamäo o lolaru niahidogoronaka.

³³Tanu ma Jou Madutu, wahidöa-döaka o dame o nyawaika, naga dede ngini mata-mata. Amin.