Read Tobelo O ROMA 2 Bible Online

O ROMA 2 - Tobelo bible

O ROMA 2

¹ Mangale karana gënanga, o Roriadodoto, o nagona ngona Riadodoto hiädono nomau nahihowono o nyawa mahomoa? Ngona Riadodoto koanikia-kiaua la nöriwo anidiri! Hababu nako ngona Riadodoto nahihowono o nyawa mahomoa, enahioko ngona mahirete nadiai o manarama imatero hokä önanga, ho Riadodoto nögelenga o hukumanga anidiri mahirete ukuö.

²Ngone hohi öriki nako ma Jou Madutu wägelenga o hukumanga o nyawauku yadödodiai o manarama-manarama hokä hokogënanga, ma Jou Madutu aiputuhu gënanga itiai.

³Mä ngini, Roriadodoto, nginiö mahirete niadiai o hali-o hali kiaka ngini niahidumutu mahowono o nyawa mahomoaika! Deʼ ngini niapikiri ngini yakunu nilapahi o hukumanga ma Jou Madutuino?

⁴Ekola ngini nihitubuhoua ma Jou Madutu aihininga maoa deʼ Ai hininga masanangi inoli Ai sabari hokogënanga ma amoko? Maraioka ngini nihiöriki ma Jou Madutu wohi dumutu Ai hininga maoa karana Unanga womau hupaya ngini nitoba nidiaiokaua o baradoha.

⁵Mä ngini niahäeke itogowini deʼ nioluku nimägali. Mangale hababu gënanga ngini mahirete niadiai niahukumanga iholoi itubuho o Kiamati ma Wangeoka, maöraha ma Jou Madutu wohinyata Ai dohata deʼ wögelenga o hukumanga iadi-adili.

⁶ Hababu ma Jou Madutu aha wabalahi o nyawa moi-moi imadäene de manga manarama.

⁷Manga hininga de magoungu yododiai o oa-oa la yamäke imomulia, de mahoromati deʼ ikokakali, onangika ma Jou Madutu wahi döaka o ngango madutu deʼ ikakali.

⁸Mä o nyawa ihiaku-akunu manga diri mahirete deʼ yoluku iwihingounu ma Jou Madutu, duga-duga yanïki itotorou, o nyawa ge önanga aha ma Jou Madutu duru wädohata.

⁹O nyawa moi-moi yöigo yodiai o dorou aha yohangihara deʼ yatagongo o huha; madodihiraka o Yahudi manyawa, deʼ o hoana de o berera mahomoaö manyawa.

¹⁰Mä mata-mata o nyawa yöigo yadodiai o oa ma Jou Madutu aha wahidöaka o mulia deʼ o horomati inoli o lolä; madodihiraka o Yahudi manyawaika, kogenangoli o hoana de o berera mahomoa manyawa.

¹¹ Hababu ma Jou Madutu wahidiai o nyawa mata-mata imaketero.

¹²O hoana de o berera mahomoa manyawa yobaradoha mahiorikua o agama Yahudi matita. Hoʼ onanga yähukumu imotekua de o tita gënanga. Mä o Yahudi manyawa yobaradoha ihiorikoka o tita gënanga; hababu gënanga önanga ahaö yähukumu ima moteke de o tita gënanga.

¹³Hababu o nyawa imateke oa-oaoli de ma Jou Madutu, koigoungua karana o nyawa gënanga ihiorikoka o agama Yahudi matita, duga-duga karana ünanga wadiaiokia ituli-tulihoka o tita gënanga magoronaka.

¹⁴O hoana de o berera mahomoa manyawa yanäkoua o agama Yahudi matita. Mä nako önanga de manga mau mahirete yadiai okianaga ihipopareta o tita gënanga, manga hininga mahirete idadi o tita mangale önanga, ngarokö önanga yanäkoua o agama Yahudi matita.

¹⁵To önanga manga kalakuanga ihidumutu okianaga ihipopareta o tita gënanga itulihi to önanga manga hiningaka. To onangö manga hininga madol̄a ihinyata igoungu o hali gënanga, hababu önanga mahirete toönanga manga dibanga mamoi-mamoi yahihowono deʼ mamoi-mamoi ihigoungu.

¹⁶Hoko genangala aha idadi damä ma wange ihigogeroka gënanga. Ma wangeoka gënanga — i moteke o Abari ma Oa ngohi tohingahu-ngahu — ma Jou Madutu ihiginïki de o Yesus Kristus, aha wodadi o hakimi hagala o hininga marahasia deʼ o nyawa mata-mata manga dibanga.

¹⁷Maöraha nënanga sarakia de Roriadodoto mahirete? Riadodoto nomangaku anidiri o Yahudi manyawa. Riadodoto noma higagao o Yahudioka manga agama matitaika de ngona Riadodoto anihininga iamoko mangale anihidohanga ngona de ma Jou Madutu.

¹⁸O agama matitaino gënanga Riadodoto ngona namäke o hidumutu-hidumutu, hiädono Riadodoto ngona nohiöriki ma Jou Madutu aimau deʼ nohiöriki nohitatapu kiaka maoa.

¹⁹Riadodoto ngona nohiöriki igou-goungu Riadodoto ngona ganga o nyawa yopilo-piloko manga tutuda deʼ o dararono onangika yogögogere o huhutu magoronaka;

²⁰Riadodoto ngona nädotoko o nyawa manga biaha i totorou, deʼ o nyawa yobodo-bodo manga guru, Riadodoto ngona nongaku igou-goungu o agama Yahudi matita magoronaka, Riadodoto ngona nohiöriki hagala o sawaro deʼ o dodötoko madiai.

²¹Riadodoto nädotoko o nyawa mahomoa; aa, yadodoa ho Riadodoto nödotokua anidiri mahirete? Riadodoto nädotoko o nyawa hupaya uhayotohiki, enahioko Riadodoto mahirete notohiki.

²²Riadodoto nädotoko o nyawa hupaya uha yohowono, enahioko Riadodoto ngona mahirete nohowono! Riadodoto ngona nödohata o gomangika, enahioko Riadodoto ngona mahirete nomäl̄ë o bara-baranga, o gomanga matauoka.

²³Riadodoto nomahi amo-amoko o Musa aitita ngonaka, enahioko Riadodoto nihikauku ma Jou Madutu de namotekua Ai tita.

²⁴ Ma Jou Ai Demo ma Buku magoronaka yatulihi hokonënanga, ”Karana ngini, o Yahudi manyawa, homa Jou Madutu airomanga ipeseke o hoana de o berera mahomoa manyawa manga hidogoronaka.”

²⁵Nako Riadodoto ngona nohingounu o agama Yahudi matita, done Riadodoto anihuna naga de mafaidäö. Mä nako Riadodoto ngona nabiahaua namoteke o hali-o hali ihipopareta o tita gënanga magoronaka, done anihuna Riadodoto idadiua hakali-kali.

²⁶Nako womatëngo o Yahudiokaua iwihunaua, ma wamoteke o agama Yahudi matita, mode koigoungua ma Jou Madutu wïpulono hokä o nyawa womahunaka?

²⁷Deʼ o nyawa womahuna-hunaua gënanga aha wonihihowono ngona Riadodoto o Yahudi manyawa, hababu Riadodoto ngonaka de maënanga o agama Yahudi matita deʼ Riadodoto ngona nomahuna, mä Riadodoto ngona natilakuru o tita gënanga. Onanga imahunaua, mä itiai duru önanga ihi ngounu o agama Yahudi matita.

²⁸Karana o Yahudi manyawa madutu uhaua o nyawa duga-duga kamanga romanga dika o Yahudi manyawa; deʼ o nyawa igou-goungu imahuna uhaua o nyawa, imahuna maporetino dika.

²⁹ Iidulu yaino, womatëngo o Yahudioka madutu ganga o nyawa aihininga o Yahudi majiwa; deʼ o huna madutu ganga o huna o hiningaka yamomanarama ma Jou Madutu ai Womaha, ënaua yatuli-tulihi o buku magoronaka. O nyawa marupa hokogënanga yatarima o higiriri ma Jou Madutuino, o nyawainoua.