Read Tobelo O ROMA 3 Bible Online

O ROMA 3 - Tobelo bible

O ROMA 3

¹Nako hokogënanga, okia mautumu hodadi o Yahudi manyawa? Deʼ okia mafaidä hamoteke o huna madatoro?

²Maraioka mafaidä iwöe! Madodihiraka, karana o Yahudi manyawaika ma Jou Madutu wohidöakoka mata-mata ma Jou Madutu aidemo.

³Mä sarakia nako o Yahudi manyawa o hidoku moi yosetiaua? Boteka karana gënanga ma Jou Madutu idadi wosetiaua?

⁴ Marai kowali! Hababu itararono itiai ma Jou Madutu salalu wotiai, ngarokö o nyawa moi-moi yoeluku. Ma Jou Ai Demo ma Buku magoronaka yatulihi, ”Kokiani inyata igoungu ngona notiai okia anidemo magoronaka, deʼ ngona noutumu maöraha ngona inihihakimi.”

⁵Mä nako ma Jou Madutu aiadili idadi idogo-dogo inyata, mangale karana ngone hodiai ihowo-howono, okia kokiani ngone hotemo? Ma Jou Madutu woadilua nako Unanga wonähukumu ngone? (I goungu o loleha nënanga madiai cara o nyawa.)

⁶Ha kali-kali kowali! Hababu nako ma Jou Madutu woadilua, sarakia Unanga wakunu wohihakimi o dunia nënanga?

⁷Mä nako karana o manarama madiaiua, okianaga madiai mangale ma Jou Madutu idogo-dogo imahi matoko hiädono Unanga iwihigiriri, yadodoa ho o nyawa o dorou yododiai gënanga kayahi howonohi hokä o baradoha manyawa?

⁸Deʼ yadodoa hohakunua ngone hotemo, ”Kayaoa de ngone hodiai o dorou hupaya o oa-oa ipuda?” I goungu naga o nyawa ihihikauku ngohi deʼ yahetongo bari ngohi totemoka hoko gënanga. O nyawa hokä önanga gënanga ipatutu ma Jou Madutu wähukumu.

⁹Aa, boteka nanga gogere hokä o Yahudi manyawa iholoi yaoa de o hoana de o berera mahomoa manyawa manga gogere? Ha kali-kali kowali! Tohingahuoka niahimangika kayaoa o Yahudi manyawa, kayaoa o hoana de o berera mahomoa manyawa, mata-mata o baradoha yäkuahaoka.

¹⁰ Hokä yatulihi Ma Jou Ai Demo ma Buku magoronaka, ”O nyawa moiö de koiwa yotiai,

¹¹o nyawa moiö de koiwa imangarati, deʼ o nyawa moi ö de koiwa iwi huba ma Jou Madutu.

¹²O nyawa mata-mata manga diri imahi kurutikaoka de ma Jou Madutu; mata-mata yahongohuoka o diai. O nyawa moiö de koiwa yadiai i totiai; koiwa o nyawa moi ö de!

¹³ To önanga manga goodongo hokä o lungunu i helengaika. O tengeluku mademo ihahuru manga akiriha, deʼ to ona manga uru makai ihiopuru o fitana, hokä o dodiha mabiha.

¹⁴ To önanga manga uru i ömanga de o lolai deʼ o ngongelo.

¹⁵ To önanga manga aguru itaiti nako yomau yähangihara deʼ yätoma o nyawa.

¹⁶O binaha deʼ o huha, önanga ihibarihi kiaka dika.

¹⁷Onanga yopiloko o dame mangekomika,

¹⁸ deʼ ma Jou Madutu iwihoromatiua.”

¹⁹Orahanënanga ngone hohiöriki mata-mata ituli-tulihi o agama Yahudi matita magoronaka, ganga manga hidoku o nyawa yogögogere o tita gënanga mapareta matimiuku. De hokogënanga moiua o nyawa yakunu ihidöaka o hababu nënanga de gënanga, deʼ o dunia mata-mataika ma Jou Madutu yakunu wädotagahoko.

²⁰ Hababu moiua o nyawa yakunu yadadi imateke oa-oa de ma Jou Madutu, mangale karana o nyawa gënanga yodiai o hali-o hali yamäke-mäke o agama matita magoronaka. I idulu yaino o agama matita gënanga duga-duga kahimatoko o nyawaika i goungu o nyawa yobaradoha.

²¹Mä o örahanënanga ma Jou Madutu wohimatokoka o ngëkomo sarakia o nyawa imateke oa-oa de Unanga; deʼ madodagi gënanga koiwa naga imako ngohama de o agama Yahudi matita. O Musa aibuku-buku deʼ o nabi-nabi manga buku ihinyata o hali gënanga,

²² ma Jou Madutu idadi wohigumal̄a o nyawa imateke oa-oa de Unanga, duga-duga nako o nyawa iwingaku o Yesus Kristusika; hababu koiwa naga imahowono:

²³O nyawa mata-mata yobaradohaka deʼ yokurutika de ma Jou Madutu kiaka womau wahihalamati önanga.

²⁴Duga-duga karana ma Jou Madutu aihayanga de Aidora dika wohidöakoka kapöparahaja, o nyawa de ma Jou Madutu manga hidohanga idadi yaoa okali; madodagi gangala: o Yesus Kristus wahilapahi o nyawa.

²⁵Ma Jou Madutu wihihuba o Yesus Kristus hupaya de o Yesus aihonenge gënanga ihinyata o nyawa yolapahi de toona manga howono nako önanga iwingaku Unangika. Ma Jou Madutu wodiai hokogënanga mangale wohimatoko Ai adili. Hababu o öraha ipaha-pahaika ma Jou Madutu wosabari o nyawa manga baradoha-baradohaika, hiädono Unanga wähukumua önanga.

²⁶Maöraha nënanga Unanga okia naga wodiai o baradohaika la wohidumutu igoungu Ai adili. De madodagi gënanga Unanga wohimatoko Ai diri itiai; deʼ moi-moi o nyawa iwingaku o Yesus Kristusika, wohinyata hokä o nyawa imateke oa-oaokali de ma Jou Madutu.

²⁷Mangale hababu gënanga koiwa nagali idadi matiti ngoneoka la homahi amo-amoko. Yadodoa hohoko gënanga? Boteka karana ngone hodiai itötuli-tulihi o agama Yahudi matita magoronaka? Kowali. Mä karana ngone hongaku.

²⁸Hababu hatipokoino ganga hoko nënanga: O nyawa ihinyata imateke oa-oaokali de ma Jou Madutu, karana Unanga wodiaiua itötuli-tulihi o agama Yahudi matita magoronaka, duga-duga karana ünanga wïngaku o Yesus Kristusika.

²⁹Ekola ma Jou Madutu gënanga kato Yahudi manyawa manga Jou Madutu? Mode koigoungua Unanga o hoana de o berera mahomoa manyawaö manga Jou Madutu? Igoungu, itiai Unanga o hoana de o berera manyawaö manga Jou Madutu!

³⁰ Hababu ma Jou Madutu duga-duga womatëngo. Unanga ganga wohigumal̄a o Yahudioka manyawa imateke oa-oaoli de ma Jou Madutu karana önanga yongaku. Deʼ unangoli wohigumal̄a o hoana de o berera mahomoa manyawa imateke oa-oaoli de ma Jou Madutu; genangö karana önanga yongaku.

³¹Boteka nënanga mamangarati karana ngone hingaku o Kristusika, hongone haumo o agama Yahudi matita? Hakali-kali kowali! Duga-duga yadäene de tongone nanga ngongaku gënanga, ngone hohilamoko o tita gënanga.