Read Tobelo O ROMA 5 Bible Online

O ROMA 5 - Tobelo bible

O ROMA 5

¹O örahanënanga ngone homateke oa-oaokali de ma Jou Madutu karana ngone hongaku. Deʼ mahababu gënanga nanga Jou Yesus Kristus dede Unanga ngone howango o dame magoronaka de ma Jou Madutu.

²Mahababu ngone hongaku o Yesusika, ho Unanga wonahiakunu ngone hamäo ma Jou Madutu aidora, deʼ de o dora gënanga o örahanënanga ngone howango. Karana gënanga ngone homörene karana ngone de nanga ngonganono ngone aha hamäo mautumu ma Jou Madutu wohidöa-döaka!

³Deʼ iholoi de gënanga, ngone mahomagarago o huha magoronaka, hababu hohiöriki o huha yadiai o nyawa manga hininga ikuata,

⁴deʼ o hininga makuata yadiai o nyawa yotongohono o cocoba; nenangala yapuda o ngonganono.

⁵O ngonganono hokonënanga aha nangahininga yahuhaua, hababu ma Jou Madutu wönoäka nangahininga de Ai dora. Ma Jou Madutu wadiai nënanga de Ai Womaha mamanarama, inahi döa-döakoka ngoneino.

⁶Maöraha ngone homägakunokaua, o Kristus wohonenge mangale ngone maöraha yakokoronauku ma Jou Madutu wödato-datoroka; enahioko ngone o nyawa kananga gurutika de ma Jou Madutu.

⁷Mangale woadi-adili womatëngo ma ihuha o nyawa yo mau yohonenge. Mudukua mangale womatëngo o nyawa maoa, nagaö o nyawa yobarani yohonenge.

⁸Mä ma Jou Madutu aidora wohinyata ngoneino maöraha o Kristus wohonenge mangale ngone, maorahoka ngone ka o nyawa baradohaohi.

⁹O örahanënanga de madodagi o Yesus Kristus aihonenge ngone homateke oa-oaokali de ma Jou Madutu; karana gënanga maraioka mangale o Kristus, ngone aha inahihalamati ma Jou Madutu aidohata inädäenua.

¹⁰Nako ma orahuku ngone homateke haturü de ma Jou Madutu, ngone inahi dame dede Una de Ai Ngohaka aihonenge madodagi, okiahioli öraha nënanga nanga rimoi de ma Jou Madutu yaoaokali, marai ngone aha inahihalamatoli de o Kristus aingango madodagi.

¹¹Deʼ iholoi de gënanga, ngoneö kahomörene mangale de ma Jou Madutu aioa de madodagi nanga Jou Yesus Kristus. Hababu de madodagi o Kristus, örahanënanga ngone hamäo ihailoa nanga rimoi maoa-oa gënanga de ma Jou Madutu.

¹² Mangale madodagi o nyawa womatëngo, o baradoha iwohama o duniaino, deʼ o baradohaino gënanga o honenge ipuda. Mabaha, o honenge itahe ihora o nyawa mata-mataika, hababu o nyawa mata-mata hobaradohaka.

¹³Ihira de o agama Yahudi matita ihidöaka, o baradoha naga iböaka o dunia magoronaka. Mä o baradoha gënanga yatuntutua ibalahi, karana koiwa o tita yakunu yatilakuru.

¹⁴Mä o Adam aiorahoka hiädono o Musa aiorahoka, o honenge yakuaha o nyawa mata-mata. Inoli o nyawa yadodiaiua o dodilakuru hokä o Adam wadodiai, o nyawa geonangö o honenge yäkuaha. O Adam ganga aha woböa-böa maduruino aidulada.

¹⁵Mä yahinoto gënanga imateroua; hababu ma Jou Madutu aingongike iholoi ilamoko nako hohitotero de o dodilakuru o Adam wadodiai. O nyawa womatëngo aidodilakuru idadi hababu o nyawa manga ngöe yohonenge. Hokokia iholoi ilamokoli ma Jou Madutu aihayanga de Ai dora deʼ o ngongike halamati yahidöa-döaka o nyawaika hoko gënanga manga ngöe, mangale madodagi o nyawa womatëngo aihininga maoa, enagënanga o Yesus Kristus.

¹⁶Ma Jou Madutu aihadiaö iholoi ilamoko de o nyawa womatëngo gënanga aibaradoha. Hababu ipaha o nyawa womatëngo wodiaioka o dodilakuru, ihupu o putuhu ”wahowono”. Mä de o nyawa manga ngöe yodiaioka o baradoha, i böa o hadia ma Jou Madutuino kiaka ihinyata ”Yahowonua”.

¹⁷Karana o nyawa womatëngo aidodilakuru, o honenge itahe ihora kiaika honanga mangale de mangëkomo o nyawa womatëngo gënanga. Hokokia iholoioli ma amoko mahasili okianaga womatëngo o nyawa mahomoa wadodiai, enagënanga o Yesus Kristus. Mangale de mangëkomo Unanga, ma Jou Madutu wahidöaka de maboloi Ai hininga maoa o nyawaika duru kamangangöe, deʼ demabobangu koiwa wahigumal̄a önanga ima teke oa-oaoli de ma Jou Madutu; mangale de mangëkomo o Kristus önanga aha yokuaha o duniaka nënanga.

¹⁸Hoʼ, hokasarakia o nyawa womatëngo aidodilakuru de mabaha o nyawa mata-mata kamamoi yähukumu, hokogenangoli o nyawa womatëngo wamote-moteke ma Jou Madutu aimau touna aimanarama, de mabaha o nyawa mata-mata manga howono yaetongokaua deʼ yahidöaka o ngango.

¹⁹Deʼ hokasarakia o nyawa mangangöe yodadi o baradoha manyawa karana o nyawa womatëngo wotomotekua, hoko genangoli o nyawa mangangöe yahiakunu imateke oa-oaoli de ma Jou Madutu karana o nyawa womatëngo wotomoteke ma Jou Madutuika.

²⁰Ihi döa-döaka o agama Yahudi matita ganga ma Jou Madutu mahirete. Mä o nyawa iholoi ihidailako yamoteke o datoro gënanga, önanga iholoioli yatilakuru deʼ yobaradoha ma Jou Madutuika. Mä inoli iholoi o nyawa yodiai o baradoha, ma Jou Madutu iholoioli wädora önanga.

²¹Aa, ngone kokiani hohonenge karana hodiai o baradoha. Mä ma Jou Madutu wonädora ngone deʼ wonahidöaka o ngëkomo ngoneino mangale homateke oa-oaoli dede Una. Deʼ karana nanga rimoi de ma Jou Madutu yaoaokali, Unanga wonahi doakö o ngango madutu deʼ i kakali ngoneino mangale de mangëkomo o Yesus Kristus, tongone nanga Jou.