Read Tobelo O ROMA 8 Bible Online

O ROMA 8 - Tobelo bible

O ROMA 8

¹Onanga yowöwango-wango yorimoi de o Kristus Yesus örahananga koiwaka o hukumanga onangika.

²Hababu ma Jou Madutu ai Womaha matita yadodiai ngone howango horimoi de o Kristus Yesus ihihilapahioka ngohi de o datoro idädadi o hababu o baradoha deʼ o honenge.

³Okia naga o agama matita yakunua yadiai, karana ngone o nyawa hobole, gënanga ma Jou Madutu wadiaioka. O nyawa nangabiaha magoronaka ma Jou Madutu wahohihanga o baradoha makuaha de ai Ngohaka mahirete wihidingoto woböa-böa Ai rupa de Ai biaha hokä o nyawa yoböbaradoha la mangale waehe o baradoha.

⁴Ma Jou Madutu wodiai gënanga hupaya Ai mau inyata o agama Yahudi matita magoronaka gënanga yakunu hadiai nanga diri magoronaka iwöwango-wango imoteke ma Jou Madutu ai Womaha deʼ hamotekua o nyawa nangabiaha.

⁵O nyawa yowöwango-wango imoteke o nyawa nangabiaha, hoko genangika yapikiri okia yoigo-igo o nyawa mangabiaha. Mä hagala o nyawa yowango imoteke ma Jou Madutu ai Womaha, gila-gila yapikiri okia yoigo-igo ma Jou Madutu ai Womaha.

⁶Nako o nyawa nanga biaha yakuaha anidibanga, done mabaha o honenge. Mä nako ma Jou Madutu ai Womaha yakuaha anidibanga, done mabaha o ngango deʼ o dame de ma Jou Madutu.

⁷O nyawa manga dibanga yakokuaha o nyawa nangabiaha o nyawa geönanga imateke haturü de ma Jou Madutu; karana o nyawa geönanga imahimotekua ma Jou Madutu aititaika; deʼ i goungu ünanga wakunua wamoteke ma Jou Madutu aitita.

⁸O nyawa yowö wango-wango imoteke o nyawa nangabiaha, yakunua iwi hisanangi ma Jou Madutu.

⁹Mä ngini niwangoua imoteke o nyawa nangabiaha. Ngini niwango imoteke ma Jou Madutu ai Womaha — nako, maraioka, ma Jou Madutu ai Womaha igou-goungu inihitotitila niadiri magoronaka. O nagona onangoka koiwa o Kristus ai Womaha, önanga gënanga to Kristusua.

¹⁰Mä nako o Kristus wowango niadiri magoronaka, done ngarokö niaröehe ihonenge karana o baradoha, mä ma Jou Madutu ai Womaha ihidöaka o ngango nginika hababu niarimoi de ma Jou Madutu irahaioka.

¹¹ Nako ma Jou Madutu ai Womaha, wihiwango-wango o Kristus o honenge mahi goronaka, iwango niadiri magoronaka, Unanga wihiwango-wango o Kristus o honenge mahi goronaka gënanga, done ahao ihiwango niaröehe yakunu ihone-honenge gënanga. Unanga wadiai gënanga de ai Womaha iwango-wango nginioka.

¹²Mahababu gënanga, Roriadodoto tongone naga de nanga momoku; mä nanga momoku gënanga o nyawa nanga biahaikaua; ngone iparaluua howango hamoteke toëna manahihu.

¹³Karana nako ngini niwango imoteke o nyawa nangabiaha, done ngini aha nihonenge; mä nako de ma Jou Madutu ai Womaha makuaha, ngini kahoko genangika dika niahohonenge niamanarama ibö baradoha, done ngini aha niwango.

¹⁴O nyawa yätuda-tuda ma Jou Madutu ai Womaha ganga ma Jou Madutu aingoha-ngohaka.

¹⁵ Hababu o Womaha, ma Jou Madutu winihidöa-döaka nginika, inïdiaiua ngini nidadi o gilaongo hiädono ngini niwango o modongo magoronaka. I idulu yaino ma Jou Madutu ai Womaha gënanga inihidadi ngini ma Jou Madutu aingoha-ngohaka. Deʼ de ma Jou Madutu ai Womaha makuaha gënanga ngone hïahoko ma Jou Madutu gënanga ”Ama, ya ahi Ama!”

¹⁶Ma Jou Madutu ai Womaha imakomoteke de nanga womaha ihinyata ngone ganga ma Jou Madutu aingoha-ngohaka.

¹⁷Aa, nako ngone ganga Ai ngoha-ngohaka, done ngoneö ganga de nanga haku hatarima Ai puhaka kiaka aha hatarima o barakati wasösadiaka ma Jou Madutu mangale Ai ngoha-ngohaka. Ngone aha hatarima homako moteke de o Kristus okia ma Jou Madutu wasösadiaka mangale Unanga; hababu nako ngone hatagongo o hangihara de o Kristus, ngoneö aha inahimulia de o Kristus.

¹⁸Mata-mata o hangihara hatago-tagongo örahananga, imoteke ngohi ahidamäke, yakunua hakali-kali hohitero de o mulia aha ihinyata-nyata ngoneino.

¹⁹O alami mata-mataika yönahihu de yönganono itamä maöraha ma Jou Madutu wahinyata Ai ngoha-ngohaka.

²⁰ Hababu o alami wamal̄aikäka la ibabiti, karana toënaua mamau mahirete, mä karana ma Jou Madutu wamal̄aika hokogënanga. Ngarokö hokogënanga kanagahi o ngonganono nënanga:

²¹öraha moiuku aha o kuaha ihiwede-wedere yaparetaokaua o alami deʼ aha o alami imaoko mahirete deʼ ihimulia ihikutuono de ma Jou Madutu aingoha-ngohaka.

²²Ngone hohiöriki hiädono o örahanënanga o alami mata-mataika itaiana karana yatagongo o huha de o hangihara hokä o ayo momatëngo mohangihara maöraha amingohaka imakil̄au.

²³ Deʼ kao alami mata-mataikaua dika itaiana; ngone mahirete mahotaiana nanga hininga madol̄aka. Ngone hatarimaka ma Jou Madutu ai Womaha hokä ma Jou Madutu aingongike madodihiraka, mä ngone kaho tamäohioli ma Jou Madutu wohilapahi nangadiri mata-mataika deʼ wonahidadi ngone Ai ngoha-ngohaka.

²⁴Karana de hönganono ngone aha inahihalamati. Mä nako okia ngone höngano-nganono gënanga ngone hamäkeoka, done gënanga o ngonganonokaua. Hababu o nagona kayönganonohi okianaga moi yamömäke-mäkeoka?

²⁵Mä nako ngone hönganono okia naga moi hamömäke-mäke owahi, done gënanga hodamä de nanga sabari.

²⁶Hoko genangoli ma Jou Madutu ai Womaha yaino inäriwo ngone nako ngone hobole. Hababu ngone hohiorikua sarakia kokiani ngone homäniata; o Womaha gënanga mahirete wïhimanga ma Jou Madutu la igahoko mangale ngone de manahihu de manganono duru iluku hiädono yakunua ihidemo.

²⁷Done ma Jou Madutu, wohiori-oriki o nyawa nanga hininga madol̄a, womangarati o Womaha gënanga mamau; hababu o Womaha gënanga igahoko ma Jou Madutuika la ma Jou Madutu Ai umati, deʼ imadäene de ma Jou Madutu aimau.

²⁸Ngone hohiöriki ma Jou Madutu watatoro hagala o hali, hiädono mahasili maoa-oa la o nyawa iwïdora-dora Unanga deʼ wä aho-ahoko imadäene de to una Ai datoro.

²⁹Onanga ma Jou Madutu wäiri-irikoka, kade mahirahiöwahi tantuoka la yodadi kao rupa moi de Ai Ngohaka enagënanga o Yesus Kristus. De hoko gënanga o Ngohaka gënanga wodadi madodihiraka o roriadodoto yowöe-wöe manga hidogoronaka.

³⁰Hokogënanga ma Jou Madutu wä aho-ahoko önanga kade mahirahiwohitantuoka; deʼ onanga wä aho-ahoko gënanga, wahigumal̄a imateke oa-oaoli dede Unanga. Deʼ onanga wahi gumal̄a imateke oa-oaoli de ma Jou Madutu, yal̄ë o hidoku ma Jou Madutu aiwowango mahirete magoronaka.

³¹Okia yakunu hotemo örahananga mangale mata-mata gënanga? Nako ma Jou Madutu wonahiböa ngone, o nagona yakunu inalawani ngone?

³²Ai ngohaka mahirete kowïhayangua, duga-duga wohidöaka mangale tongone mata-mata nanga paralu; de o nagona yato Unanga aha wonahidöakua ngoneino hagala moi-moi mahomoaohi?

³³O nagona yakunu inäkalaki ngone o umati ma Jou Madutu wonairi-irikoka, nako ma Jou Madutu mahirete wohinyata ngone hahowonua?

³⁴Boteka naga o nyawa yomau inahi howono ngone? O Kristus Yesus ahao wonahiböa ngone! Ge Unanga wohonengoka, ekola ge Unangala iwihiwangokali o honenge mahigoronaka deʼ Una naga ma Jou Madutuoka o ngï i kokuahaoka.

³⁵Boteka naga yakunu iwitatoko o Kristus wonädora ngone? Yakunu o huha iwitatoko, ekola o hukaranga, ekola o aniaya, ekola o habirokata, ekola o mihikini, ekola o bahaya, ekola o honenge?

³⁶ Ma Jou Ai Demo ma Buku magoronaka itulihoka hoko nënanga, ”O wange magurutu ngomi miwango o honenge mabahaya magoronaka karana Ngona. Ngomi imidiai hokä o duba imau yatöaka.”

³⁷Kowali! Mata-mata gënanga magoronaka iholoi ngone hamäke o utumu i tötotomo mangale Unanga wonädora ngone!

³⁸Hababu ngohi duru tongaku o duniaka mata-mataika, kayaoa o honenge ikali o wowango, kayaoa o malaekatikaoli o popareta, kayaoa okia naga inahi bobodito örahanënanga de o öraha aha iböa-böa, ekola o kuata mahomoohi,

³⁹kayaoa o hali okianaga o dihangoka, ikaoli o hali okianaga o dunia magoronaka ekola okia dika mahomoa, mata-mata ganga yakunua iwitatoko ma Jou Madutu wonä dora ngone, hokä wohidumutoka mangëkomo de madodagi de o Kristus Yesus tongone nanga Jou.