Read Tobelo O ROMA 9 Bible Online

O ROMA 9 - Tobelo bible

O ROMA 9

¹Okia aha ngohi tahetongo nënanga ganga itiai karana ngohi Kristus madutu. Ngohi koto elukua. Tongohi ahihininga madol̄a yatö tuda-tuda ma Jou Madutu ai Womaha, ihihigoungu ngohiö ahidemo nënanga itiai.

²Ngohi duru ahihininga ihuha deʼ tongohi ahihininga ihangihara

³karana tongohi ahi roriadodoto o hoana de o berera moi dede ngohi. Hababu mangale önanga, ngohi mahirete tömodeke ma Jou Madutu wohilolai, deʼ ihihitingaka de o Kristus.

⁴ Onanga ganga o umati yäiri-irikoka deʼ ma Jou Madutu wahidadi önanga Ai ngoha-ngohaka mahirete, de wohinyata Ai kuaha onangika. Unanga wodiai o jaji dede önanga deʼ wohi döaka onangika o agama matita. Ma Jou Madutu wahingahu onangika sarakia kokiani önanga yopuji deʼ onanga yatarima okali Ai jaji.

⁵Onanga ganga nangaete de nangatohora manga difauku, madodagi o nyawa o Kristus aiahali toönanga manga hoana de manga bereraino. Mata-mata Unanga iholoi wokurutil̄e. Ma Jou Madutu iwipuji kahi ado-adonika! Amin.

⁶Ngohi ahidungutua tahetongo ma Jou Madutu aijaji idadi gila-gilaokaua; mä mata-mataua o Israel manyawa ganga o umati ma Jou Madutu wäiri-irikoka.

⁷ Mata-mataua o Abraham aidifauku ganga ma Jou Madutu aingoha-ngohaka. Hababu ma Jou Madutu wïtemo o Abrahamika, ”Duga-duga o Ishak dika aidifauku aha yähetongo anidifauku.”

⁸Gënanga mamangarati o Abraham aidifauku yodadi ma Jou Madutu aingoha-ngohaka, ganga duga-duga aidifauku yodädadi karana ma Jou Madutu aijaji; deʼ mata-mataua aidifauku.

⁹ Hababu ma Jou Madutu aijaji ganga hokä hokonënanga, ”O öraha hitatapuoka, ngohi aha tainoli, deʼ o ngo Sarah aha de ami ngohaka o nauru womatëngo.”

¹⁰Deʼ nenangoli: o ngo Ribka amingohaka o nauru yähinoto manga ama kawomatëngo enagënanga o Ishak nangaete de nangatohora.

¹¹Ihira de o ngohaka yähinoto gënanga imakil̄au, ma Jou Madutu wohi tantuoka Ai ngongiriki öraha nanga de hikaika. Ma Jou Madutu aingongiriki gënanga wohigagaoua de okia o nyawa yakunu yadodiai, mä wohigagao de ma Jou Madutu aigogahoko mahirete. Hababu maöraha o ngo Ribka amingohaka o nauru yähinoto gënanga yakunuahi yodiai okianaga moi maoa-oa ekola madodorou,

¹² ma Jou Madutu wahetongoka o ngo Ribkaika, ”Mariaka aha wïleleani madödoto.”

¹³ Ma Jou Ai Demo ma Buku magoronaka i tulihi ma Jou Madutu wotemo hokonënanga, ”O Yakub Ngohi tïdora, mä o Esau Ngohi tïdohata.”

¹⁴Oraha nanga okia nanga demo mahohonenge? Ma Jou Madutu gënanga woadilua? Maraioka ma Jou Madutu woadili!

¹⁵ Hababu ma Jou Madutu wïtemo o Musaika, ”Ngohi aha tohidumutu ahihininga maoa o nyawaika Ngohi tomau tohidumutu ahihininga maoa, de Ngohi aha tohidumutu o hayanga de o dora o nyawaika Ngohi tomau tohi dumutu o hayanga de o dora.”

¹⁶Hoʼ, ma Jou Madutu aiputuhu gënanga imahigagaoua de o nyawa manga hininga maoa ekola o nyawa manga hidailako, duga-duga imahigagao ma Jou Madutu aihininga maoa-oaika dika, geonangika o nyawa wäiri-iriki gënanga.

¹⁷ Hababu Ma Jou Ai Demo ma Buku magoronaka itulihi, ”Ma Jou Madutu wïtemo o Mesir ma Koanoika, ’Ngohi tonihi dadi ngona nokoano mangale madungutu nënanga moi dika, enagënanga hupaya dede ngona, Ngohi tohidumutu Ahi kuaha deʼ Tadiai ahiromanga yodogilianga o dunia mata-mataika.’ ”

¹⁸Hoʼ, ma Jou Madutu wädora de wähayangi o nyawa imatëngo-tëngoika, nako ma Jou Madutu womau hokogënanga. Deʼ ma Jou Madutu wodadi o hababu womatëngo idadi aihäeke itogowini, nako ma Jou Madutu womau hoko genangoli.

¹⁹Aa, o Riadodoto aha nitemo ngohino, ”Nako hokogënanga yadodoa ho ma Jou Madutu kawomauohi wonahi howono o nyawa? Koigoungua kao nyawa moiö de yakunua yatatoko ma Jou Madutu aimau?”

²⁰ Mä Riadodoto! Riadodoto duga-duga kao nyawa dika. Deʼ Riadodoto yakunua de niabarani niwipaluhu ma Jou Madutuika! Kai yakunu o bunga-bunga mangï ileha o nyawa yadodiaiika, ”Yadodoa hongohi nohidiai hokonënanga?”

²¹Koigoungua o nyawa wododiai o bunga mangï gënanga de aihaku wakarajanga o tonaka matau-taulu gënanga aihininga mahuka? O tonaka matau-taulu o bolulu moi o nyawa gënanga de ai haku wodiai o bunga mangï o rupa hinoto: moi irahai, deʼ moi mahomoa ikuranga irahai.

²²Hokogenangoli de okia ma Jou Madutu wadodiai. Unanga de Ai dungutu la Ai dohata wohiaiki deʼ wohimatoko Ai kuaha. Ma önanga kokiani yähukumu karana yadodiai Unanga iwitohata, mawahisabari önanga.

²³Ma Jou Madutuö Ai dungutu la wohidumutu ngoneino o utumu dema boboloioka wonädoburaraha ngoneino wonädö dora-dora. Ngone inasadiaka la hatarima o utumu gënanga.

²⁴Ngoneö wona ahokoka kao Yahudi manyawainoua, mä de o hoana de o berera mahomoaino ö.

²⁵ Hababu ma Nabi Hosea aibuku magoronaka ma Jou Madutu wotemo, ”O nyawa Ahi umatua, aha Tä hetongo ’Ahi Umati’. O hoana de o berera Tä dora-doraua, aha Tä hetongo ’Tä haya-hayangia’.

²⁶ Deʼ o ngï kiaka yahi ngahu o nyawaika, ’Ngini Ahi umatua,’ genangoka o nyawa ge önanga aha yähetongo ma Jou Madutu aingoha-ngohaka yowango-wango.”

²⁷ Ma Nabi Yesaya wotemo wohitotiaika mangale o Israel manyawa, ”Igoungu ngaro o Israel manyawa manga ngöe hokä o dowongi o ngötoka, maduga-duga manga huhutulu dika aha yohalamati;

²⁸hababu ma Jou aha de madataitoka wögelenga o hukumanga o dunia madol̄a mata-mataika.”

²⁹ O Yesaya wotemoli hokonënanga, ”O demo maade ma Jou Madutu woko Kuaha wonagumal̄aua o difauku, marai ngone mata-mata hodadioka hokä o Sodom deʼ o Gomora.”

³⁰Hoʼ, mademo madipoko ganga hokonënanga: O hoana de o berera mahomoa o Yahudiokaua önanga imahidailakoua hupaya manga rimoi de ma Jou Madutu idadi yaoaoli. Mä karana önanga iwingaku ho ma Jou Madutu wadiai manga rimoi dede Unanga idadi yaoaoli.

³¹I idulu yaino, o Yahudi manyawa salalu imahidailako yamoteke o tita hupaya manga rimoi de ma Jou Madutu idadi yaoaoli. Mä itiai önanga yohasilua.

³²Yadodoa ho önanga yohasilua? Hababu önanga yodiai gënanga mangëkomo de madodagiua iwingaku ma Jou Madutuika, duga-duga mangëkomo de madodagi manga hidailako mahirete. Onanga yoruba yopeleke ”O Helewo i Bobebelekika”.

³³ Mangale o helewo gënanga Ma Jou Ai Demo ma Buku magoronaka i tulihi hokonënanga, ”Nio hohininga nënanga: O Sion ma Doporonoka Takelenga ukuoka o helewo gahumu moi aha hiädono o nyawa yopeleke; enagënanga o helewo moi mapako-pako aha hiädono o nyawa yäruba. Mä o nyawa yangaku enangika aha manga hininga ihuhaua.”