Read Tobelo O KORINTUS MADODIHIRAKA 10 Bible Online

O KORINTUS MADODIHIRAKA 10 - Tobelo bible

O KORINTUS MADODIHIRAKA 10

¹ O Roriadodoto! Riadodoto kiani niohininga okia idadi tongone nangaete de nangatohoraika maöraha önanga iwinïki o Musa. Onanga mata-mata yähohongino o lobi, deʼ de manga halamati yatoaka o Ngöto ma Doka-dokara.

²Mangale yodadi o Musa iwininïki, önanga mata-mata yäohiki o lobi magoronaka deʼ o ngöto magoronaka gënanga.

³ Onanga mata-mata yol̄omo de o rohani mainomo kaima ketero,

⁴ deʼ yokere deʼ o rohani ma akere kaima ketero. Onanga mata-mata yaokere o rohani o l̄oku mahelewoino yätotomoteke önanga; o l̄oku o helewo gënanga Unanga o Kristus mahirete.

⁵ Ngaroka hokogënanga mangangöe ma Jou Madutu wosanangiua onangika de hababu gënanga manga mayeti kailüluluika o tonaka makokakahaka.

⁶ Mata-mata gënanga idadi o dulada ngoneino mangale o hohininga ngoneino, hupaya uha honahihu o hali-o hali itotorou hokä önanga.

⁷ Genangö hupaya ngone uha hahuba o gomanga, hokä onangino utu yododiai. Ma Jou Ai Demo ma Buku magoronaka itulihi, ”O hoana manyawa gënanga yomuläenge yol̄omo deʼ yokere, yohol̄a deʼ yoselo mangale yahuba o gomanga.”

⁸ Ngone yakunua hadiai o hali-o hali isosafarune hokä önanga yadodiai utu. Hababu, önanga yaribuhu monaoko de yaruange yohonenge o wange moi magoronaka, karana yodiai gënanga.

⁹ Ngone yakunua hitai-taili ma Jou hokä önanga yadiaioka utu kahuruono, hiädono önanga yohonenge yätuduku o dodiha ibiha-biha.

¹⁰ Ngone yakunuaö homa liwolu; hokä önanga utu yadiaioka kahuruono, hiädono önanga o Honenge ma Malaekat yatoma.

¹¹O hali gënanga mata-mata idadi onangika mangale idadi o dulada o nyawa mahomoaika. Deʼ mata-mata gënanga itulihö mangale idadi o hohininga ngoneino. Hababu ngone örahanënanga howango öraha mabobobahaka.

¹²O nyawa wamäo wato aidiri imaoko ibitumoka, kiani womahi dodiai; uha hiädono ünanga wotifa.

¹³O cocoba mahigetongo riadodoto niaohana, ganga o cocoba biaha yaoha-ohanoka o nyawa. Mä ma Jou Madutu wosetia Ai jajika. Unanga aha winimal̄aikaua Riadodoto inicoba iholoi de niakuata. Maöraha Riadodoto initapal̄u o cocoba, Unanga aha winihi döaka o ngëkomo nginika mangale idadi nikuata hupaya Riadodoto yakunu nitäna.

¹⁴Mahababu gënanga, Roriadodoto ngohi tinihohininga kiani ngini niodohata o gomangika mahuba.

¹⁵Ngohi tinitemo nginika hokä o nyawa yososawaroika. Kiani ngini niatibanga mahirete tongohi ahi demo nënanga.

¹⁶ Maöraha hokere o angguru de hotemo tarima kasi ma Jou Madutuika, koigoungua gënanga ihi matoko ngone kamoi de o Kristus aihonenge magoronaka? De maöraha ngone homa kokeregu o roti mangale haol̄omo mata-mata, koigoungua gënanga ihimatoko ngone kamoi de o Kristus ai röehe?

¹⁷Karana duga-duga naga moi o roti, deʼ ngone mata-mata haol̄omo ka gënanga moi maroti, ho ngone ho wöe-wöe nënanga imahirupa o röehe moi.

¹⁸ Abeika nimahininga o Yahudioka manyawa. Onanga yol̄omo o inomo ihihubaka o huhuba mangï mal̄okuoka, naga o nyawa kamoi de o ngï gënanga.

¹⁹Okia ahi dungutu ngohi de gënanga? O gomanga ekola o inomo ihiniatoka o gomangika gënanga kautuö de koiwa toëna mamangarati.

²⁰ Okia ihi niatoka o huhuba mangïoka o gomangika yakunua ihihuba ma Jou Madutuika, duga-duga o womaha madorouika. Deʼ ngohi toluku ngini nirimoi de o womaha madorou.

²¹Ngini i yakunua nia okere ma Jou ai angguru magalahi, deʼ kamamoi o womaha madorouö ma angguru magalahi. Ngini i yakunua niol̄omo ma Jou ai mejaka, deʼ o womaha madorouö mamejaka.

²² Ekola ngone homau hadiai ma Jou ai hininga yatohata? Bote ngone i holoi hokuata de ma Jou?

²³ O nyawa yato, ”Okia dika ngone homau ngone iyakunu hodiai.” Itiai! Mä mata-mataua ngone homau gënanga ibaraguna. ”Ngone iyakunu hodiai okia dika ngone homau” — mä mata-mataua ngone homau gënanga, yamomiki tongone nanga wowango.

²⁴O nyawa moiö de uha yomanarama mangale manga diri mahirete mautumu. O nyawa moi-moi kiani yomanarama mangale o nyawa mahomoa manga utumu.

²⁵Ngini iyakunu niaol̄omo okiadika yahuku-hukunu o hiode ma akeme mapaharoka. Borotaua nia tailako ihira, ngaro naga yodubuho niahininga madobote magoronaka.

²⁶ Hababu Ma Jou Ai Demo ma Buku magoronaka itulihi, ”O dunia nënanga de madol̄a mata-mata ganga toma Jou.”

²⁷Nako ngini iniahoko niol̄omo o nyawa moi o Haraniokaua, deʼ ngini niatarima manga gogahoko gënanga, niol̄omo okia inihi döaka nginika. Borotaua niatailako okiaino iböa o inomo gënanga, hupaya borotaua naga iyodubuho niahininga madobote magoronaka.

²⁸Mä nako naga initemo nginika, ”O inomo nënanga ihinia-niatoka o gomangika,” uha niaol̄omo o inomo gënanga, karana niohininga manga paralu o nyawa gënanga deʼ karana manga hininga madobote.

²⁹Ahi dungutu ngohi tinginiua niahininga madobote, mä o nyawa gënanga manga hininga madobote. Maraioka naga yoleha, ”Uwee, yadodoa ngohi tolapahi kiani tohi batingi o nyawa mahomoa manga hininga madobote?

³⁰Nako ngohi tol̄omo o inomo de ahitarima kasi ma Jou Madutuika, yadodoa o nyawa kiani ihi hohedu ngohi de o inomo gënanga, enaganga ngohi totarima kasioka mangale o inomo gënanga ma Jou Madutuika?”

³¹Okia dika Riadodoto niadiai — Riadodoto niol̄omo ekola Riadodoto niokere — niadiai mata-mata gënanga mangale niwihimulia ma Jou Madutu.

³²Niwango hokogënanga marupa hiädono Riadodoto nidiaiua o hababu o nyawa mahomoa yodiai o baradoha; boteka önanga o Yahudioka manyawa ekola o Yahudiokaua manyawa, ekola ma Jou Madutu aijemaat.

³³Niwango hokä ngohi. Ngohi tohidailako tasanangi o nyawa mata-mata manga hininga hagala moi-moi magoronaka, koiwa madungutu ahidiri maparalu mahirete. Ahi dungutu ngohi ganga duga-duga hupaya önanga mata-mata yakunu yohalamati.