Read Tobelo O KORINTUS MADODIHIRAKA 11 Bible Online

O KORINTUS MADODIHIRAKA 11 - Tobelo bible

O KORINTUS MADODIHIRAKA 11

¹ Nianïki tongohi ahidulada, hokä ngohiö tanïki o Kristus ai dulada.

²Ngohi tinihigiriri ngini, hababu ngini hokogenangika nihihininga ngohi deʼ niamoteke o dodötoko ngohi tinihidöaka nginika.

³Mä ngohi toigo ngini nihiöriki o hali moioli, enagënanga yodadi o häeke o nau-naurika ganga o Kristus; yodadi o häeke o hekatika ganga o rokata, deʼ idadi o häeke o Kristusika ganga ma Jou Madutu.

⁴Nako o nauru womatëngo maöraha womaniata ekola maöraha wohingahu o abari ma Jou Madutuino o nyawa yowöe-wöe manga himangoka, aihäeke wakokuduku, o nyawa gënanga wihi kauku o Kristus.

⁵Deʼ nako o ngoheka momatëngo maöraha moma niata ekola maöraha mohi ngahu o abari ma Jou Madutuino o nyawa yowöe-wöe manga himangoka, dema päkeua amihäeke makokudu, o ngoheka gënanga mihikauku amirokata wodadi o häeke amidirika. Gënanga kaimadäene matero-tero o ngoheka gënanga amihäeke makorioka.

⁶Hababu nako o ngoheka momatëngo moluku mapäke amihäeke makokudu iholoi yaoa amitadauru igutioka. Mä nako o ngoheka momatëngo yakori amihäeke ekola yaguti amitadauru, munangika gënanga o hikauku moi. Hababu gënanga iholoiyaoa münanga mapäke o häeke mokokudu.

⁷ O nau-nauru paraluua yapäke o häeke makokudu, hababu ünanga o kahinä ma Jou Madutu aidulada deʼ Ai mulia. Mä o ngoheka dadi kahinä o nau-nauru manga mulia,

⁸ hababu o nau-nauru yahidadiua o ngohekaino, mä o ngoheka yahidadi o naurino.

⁹O nau-nauru koyahidadiua mangale o ngoheka manga paralu, ma o ngoheka yahidadi mangale o nau-nauru manga paralu.

¹⁰Hababu gënanga, mangale yahisanangi o malaekat-malaekat, o ngoheka momatëngo kiani mapäke amihäeke makokudu hokä o nonako münanga amirokata aikuaha matimioka.

¹¹Ngaro hokogënanga ngone nanga wowango magoronaka hokä o Haranioka manyawa, o ngoheka momaoko mahireteua, moma tingaka de o nauru, deʼ o nau-nauruö womaoko mahireteua, womatingaka de o ngoheka.

¹²Karana ngaroka o ngoheka madodihiraka imihidadi o naurino, mä ipaha de gënanga o nau-nauru ima kil̄au o ngohekaino; deʼ hagala moi-moi ma Jou Madutuino ma ahali.

¹³Abeika Roriadodoto mahirete niatibanga o hali nënanga: Boteka yaoa o ngoheka momatëngo momaniata ma Jou Madutuika o nyawa yowöe-wöe manga himangoka, de mapäkeua amihäeke makokudu?

¹⁴O nyawa yowöe-wöeino manga ganäko, ngini ini dotokoka nako o nau-nauru manga tadauru ikurutu, gënanga okia naga moi ikuranga ipatutu.

¹⁵Mä mangale o ngoheka, o tadauru imihi döakoka munangika mangale mohikokudu ami häeke deʼ ami tadauru ikurutu ganga amimulia.

¹⁶Aa, nako naga yomau imateke ributu mangale o hali nënanga, kamoidika ngohi yakunu totemo genangala yaoa ngone, yaoa ma Jou Madutu aijemaat-jemaat mahomoahi, mangöe-ngöe gënanga duga-duga kamoi toönanga manga biaha o jemaat magoronaka gënanga; mahomoa de gënanga koiwa.

¹⁷Mangale nenangohi, ngohi tini higiririua ngini. Nia puji madoomu mahasili maoa-oaua, mä kaitotorou.

¹⁸Madodihiraka ngohi toihene, niadoomu-doomu magoronaka naga niregu-reguoka daha nimateke ributu. Deʼ ngohi tatakihiri ihutulu de ilamoko o abari gënanga itiai.

¹⁹Igoungu kiani hokogënanga ipuda o gitingaka niahidogoronaka, hupaya aha hamäke o nagona o Haranioka madutu.

²⁰Mä maöraha ngini nimatoomu, ngini niadiai gënanga ma Jouua ai Ngol̄omo ma Debi-debini.

²¹Hababu maöraha niol̄omo, ngini moi-moi nimateke jai-jai nima l̄ë niainomo mahirete, hiädono utu naga okia-kiaua imamäke, mä mahomoa yädaluku.

²²Yadodoa hoko gënanga? Tatobote Riadodoto de niatau? Riadodoto yakunu niol̄omo deʼ niokere genangoka! Ekola Riadodoto nimau nihikauku ma Jou Madutu aijemaat deʼ niahimal̄eke o nyawa yomomihikini? Okia ngohi kiani totemo nginika? Kiani ngohi tinihigiriri ngini? Kowali! Hakali-kali ngohi aha tinihigiririua ngini.

²³Hababu ngohi tinidotokoka nginika, gënanga ngohi tatarima ma Jouino mahirete: mahutu gënanga maöraha o Yesus, tongone nanga Jou iwidiai o dorou, Unanga wal̄ë o roti,

²⁴deʼ Unanga wotemo wotarima kasi iböto ma Jou Madutuika mangale o roti gënanga, Unanga wabëla-bëlaka o roti gënanga de Ai giama, daha wotemo, ”Nënanga Ahi röehe ihilapahioka mangale ngini. Niadiai nënanga mangale nihihininga Ngohi.”

²⁵ Hoko gënangoli yol̄omo kadeiböto, Unanga wal̄ë o angguru magalahi daha wotemo, ”O angguru nënanga ganga ma Jou Madutu ai jaji mahungi, ihitatapuoka de Ahi awunu. Nihigeto-getongo ngini niaokere nënanga, niadiai nënanga mangale nihihininga Ngohi.”

²⁶Igoungu nihi geto-getongo ngini niaol̄omo o roti deʼ niaokere o angguru nënanga, ngini nihi abari ma Jou aihonenge, hiädono Unanga woböa.

²⁷Karana gënanga, o nyawa yaol̄omo ma Jou airoti ekola yaokere ma Jou aiangguru de madodagi ipatutua, o nyawa gënanga yobaradoha ma Jouika wohihubaoka Ai röehe deʼ Ai awunu.

²⁸Hoʼ, o nyawa moi-moi kiani ihira yatailako okahi manga diri, daha önanga yakunu yol̄omo o roti deʼ yokere o angguru gënanga.

²⁹Hababu nako o nyawa yol̄omo o roti deʼ yokere o angguru de koihi baragunaikaua o ngol̄omo itebi-tebini gënanga madulada de ma Jou ai röehe, o nyawa gënanga yaol̄omo de yaokere mangale yatarima ma Jou Madutu aihukumanga manga diriuku mahirete.

³⁰Hababu gënanga manga ngöe niahidogoronaka ngini yopanyake deʼ koimasikaua, deʼ nagaö yohonenge.

³¹Mä nako ngone iholoi ihira hatailako tongone nangadiri, ma Jou Madutu aha wonahukumua ngone.

³²Mä nako ma Jou Madutu wonahukumu ngone, Unanga aha wonagohara ngone, hupaya ngone uha inadäene hukumanga homa kinïki de o dunia nënanga.

³³Mahababu gënanga, ahi Roriadodoto nako ngini nimatoomu mangale niol̄omo ma Jou aingol̄omo madebi-debinoka, ngini kiani nimatekedamä.

³⁴Nako naga yahahini, ünanga kiani wol̄omo ihira aitauoka. Nako ngini nihibaraguna ohali nënanga, niapuji madoomu-madoomu aha ini gaoua o hukumanga ma Jou Madutuino niadirika mahirete. Imakorona ohali-ohali mahomoa, ngohi aha tohitararono nginika, nako damä ngohi toböa.