Read Tobelo O KORINTUS MADODIHIRAKA 12 Bible Online

O KORINTUS MADODIHIRAKA 12 - Tobelo bible

O KORINTUS MADODIHIRAKA 12

¹Orahanënanga imakorona de o ngongike-o ngongike ma Jou Madutu ai Womaha ihidöaka. Imakorona gënanga, ngohi tomau Riadodoto nihiöriki de madiaioka.

²Niohininga maöraha ngini niwinäkouahi ma Jou, ngini initauru mangale nianïki o gomanga imou-mou.

³Ngini kiani nihiöriki o nyawa yätuda ma Jou Madutu ai Womaha yotemoua, ”O Yesus wamäke o lolai!” Hoko genangö o nyawa moiuaö yakunu yotemo, ”O Yesus o Jou!” nako o nyawa gënanga yätudaua ma Jou Madutu ai Womaha.

⁴ Naga irupa-rupa o ngongike ma Jou Madutu ai Womahino, mä mata-mata inihidöaka o Womaha kamoi.

⁵Naga i rupa-rupa o manarama mangale iwileleani ma Jou, mä o Jou i wilö leleani gënanga, o Jou kawomatëngo dika!

⁶Naga i rupa-rupa madatoro yomanarama ma Jou ai manarama, mä wohi döaka o buturungu mangale gënanga o nyawa moika ganga ma Jou Madutu womatëngo dika.

⁷Mangale nangaoa ngone mata-mata, ma Jou Madutu ai Womaha imanarama o nyawa amo moi ika de madatoro haramoi-haramoi.

⁸O nyawa moiika, o Womaha gënanga yahidöaka yakunu mangale yotemo-temo de makuaha. Mahomoaika o Womaha kaimadäene gënanga yahidöaka yakunu ihitararono mangale ihingahu mangale ma Jou Madutu.

⁹O Womaha kamoi gënanga dika yahidöaka o nyawa moiika yakunu kabiahaua mangale iwingaku o Kristusika; de mahomoaika o Womaha gënanga yahidöaka o kuaha mangale yahitogumu o nyawa.

¹⁰O nyawa womatëngoika iwihidöaka o kuaha mangale wodiai i hëra-hëranga deʼ mahomoaika yahidöaka o ngongike mangale ihingahu ma Jou Madutu aidatoro-aidatoro. Mahomoaikaoli o Womaha gënanga yahidöaka yakunu mangale yatingaka deʼ yafara kiaka o ngongike ma Jou Madutu ai Womahino deʼ kiaka o Womahinoua. Naga yahidöaka yakunu mangale yotemo-temo irupa-rupa o demo ihëra-hëranga, deʼ nagali yahidöaka yakunu mangale ihi tararono o demo mamangarati gënanga.

¹¹Mata-mata gënanga yamanarama o Womaha kamoi dika gënanga; moi-moi o nyawa yahi döaka o ngongike itingaka imoteke o Womaha mahirete mamau gënanga.

¹² O Kristus ganga hokä o nyawa nangaröehe; o röehe gënanga moi, mä mahidoku-hidoku iwöe. Mata-mata o hidoku gënanga, ngaroka iwöe, marupa kaoröehe moi.

¹³Hoko gënangö ngone mata-mata, yaoa o Yahudioka manyawa yaoa o Yahudiokaua manyawa, o gogilaongo yaoa o nyawa yololapahioka; ngone mata-mata ina ohikoka de o Womaha kaimadäene gënanga, hupaya ngone inahidadi moi o Kristus airöehe gënanga. Ngone mata-mataö hamäo inahi omanga o Womaha moi gënanga.

¹⁴Hababu o röehe gënanga mahirete imaokoua o hidoku moioka dika mä iwöe o hidoku-hidoku.

¹⁵Nako o l̄ou itemo, ”Ngohi ko o giamua, karana gënanga ngohi o röehinoua mahidoku,” gënanga koiwa mamangarati o l̄ou gënanga o röehinoua mahidoku.

¹⁶Deʼ nako o ngauku itemo, ”Hababu ngohi o lakoua, hongohi o röehinoua mahidoku,” gënanga koiwa mamangarati o ngauku gënanga o röehinoua mahidoku.

¹⁷Hohiade o röehe ingodumu gënanga idadi o lako dika, sarakia o röehe gënanga yakunu imahihene? Ekola nako o röehe i ngodumu gënanga idadi o ngauku dika, sarakia o röehe gënanga i ame?

¹⁸Ngone hamäke ma Jou Madutu wohigogere o hidoku-hidoku nanga röehika gënanga. Moi-moi ma Jou Madutu wohigogere mangïoka imoteke Ai mau.

¹⁹Nako mata-mata duga-duga o röehe mahidoku moi dika, kiaka yahetongo o röehe?

²⁰Hoʼ igoungu naga o röehe mahidoku mangöe, mä o röehe duga-duga moi.

²¹Mahababu gënanga, o lako yakunua itemo o giamika, ”Ngohi toni paraluua ngona!” ekola o häeke itemo o l̄ouika, ”Ngohi toni paraluua ngona!”

²²Haiduluhaino nanga röehe mahidoku-hidoku hapulono ibole gënanga, ngone duru hoparalu;

²³deʼ nanga röehe mahidoku-hidoku ngone hapulono hokokiaua mabaraguna, gënangadoka o röehe mahidoku-hidoku ngone hohidöaka iholoi ilamoko hohibaraguna. O röehe mahidoku-hidoku hamäke ikaramatua, kokiani ngone iholoi höhohininga.

²⁴O röehe mahidoku-hidoku hamäke irahai iböto, iparaluua ngone höhohininga. Ma Jou Madutu watatoroka tongone nanga röehe hokogënanga marupa hiädono nanga röehe mahidoku-hidoku ikuranga iragane wohidöaka i holoi iwöe hohibaraguna.

²⁵De hoko gënanga o röehe gënanga iregu-regua; moi-moi o röehe mahidoku imateke hininga moi de moi.

²⁶Nako o röehe o hidoku moi ihangihara, mata-mata o röehe mahidoku mahomoa ihangihara dika; nako o röehe o hidoku moi ihigiriri, mata-mata o röehe mahidoku mahomoa imaki nïki imörene.

²⁷Riadodoto mata-mata kamamoi ganga o Kristus airöehe deʼ nginiö moi-moi ganga o röehino mahidoku.

²⁸ Hoko genangoli o jemaat magoronaka, ma Jou Madutu wohigogeroka o ngï mangale irupa-rupa o nyawa: Madodihiraka o rasul-rasul; mahinoto, o nabi-nabi, mahange o guru-guru, daha önanga yododiai ihëra-hëranga, aha ino önanga yahidöaka o ngongike mangale yahitogumu o nyawa, ekola mangale yariwo o nyawa mahomoa, ekola mangale yotuda-tuda, ekola mangale yotemo-temo de rupa-rupa o demo iho hëra-hëranga.

²⁹Onanga mata-mataua o rasul, ekola o nabi ekola o guru. Mata-mataua to önanga manga kuaha mangale yodiai i hëra-hëranga,

³⁰ekola yahitogumu o nyawa, ekola mangale yotemo de irupa-rupa o demo ihëra-hëranga, ekola mangale ihiguti mangale o demo-demo gënanga.

³¹Karana gënanga, kiani ngini nihidailako niagou-goungu mangale niamäke o ngongike-ngongike duru mal̄okuoka. Mä ipaha nënanga ngohi tinihi matoko nginika o ngëkomo duru i rahai.