Read Tobelo O KORINTUS MADODIHIRAKA 14 Bible Online

O KORINTUS MADODIHIRAKA 14 - Tobelo bible

O KORINTUS MADODIHIRAKA 14

¹Kokiani ngini nihidailako mangale niädora o nyawa mahomoa. Deʼ nihidailakoli, mangale niatarima o ngongike-ngongike inihidöaka ma Jou Madutu ai Womaha, iholoi-hongoli o dagakunu mangale nihingahu ma Jou Madutu aidato-datoro o nyawaika.

²O nyawa yotemo-temo o demo ihëra-hëranga magoronaka, o nyawa gënanga yotemoua o nyawaika; ünanga wotemo ma Jou Madutuika. Komoiua naga o nyawa imangarati okia ünanga wotemoka, hababu ma Jou Madutu ai Womaha idadi hababu ünanga wohidemo o hali-o hali duga-duga ma Jou Madutu wohi öriki.

³Ikilioro yaino o nyawa ihi ngahu-ngahu o abari ma Jou Madutuino, ihingahuokali o nyawaika; mangale yahikuata önanga, mangale yahidöaka yahanauru onangika, deʼ mangale yalaru önanga.

⁴O nyawa yotemo-temo o demo ihëra-hëranga magoronaka duga-duga ihi kuata manga diri mahirete dika, ma onyawa ihi ngahu-ngahu o abari ma Jou Madutuino yariwo o jemaat yodadi yotagi manga himangoka.

⁵Hokokia marahai nako Riadodoto mata-mata niakunu nitemo-temo de irupa-rupa o demo ihëra-hëranga. Mä duruhe irahai ganga nako Riadodoto niakunu nihingahu ma Jou Madutu okianagamoi aha wadiai. Hababu o nyawa ihi ngahu-ngahu o abari ma Jou Madutuino, iholoi yoamoko ngaro de o nyawa yotemo-temo de o demo ihëra-hëranga; mahomoa de o hali gënanga nako o nyawa yotemo-temo irupa-rupa o demo ihëra-hëranga magoronaka gënanga, yakunu ihitararono okia ihidemoka gënanga, hupaya o jemaat mata-mata yamäke mafaidä.

⁶Hohiade nako ngohi taika nginika deʼ ngohi totemo-temo irupa-rupa o demo ihëra-hëranga magoronaka, okia mautumu gënanga mangale ngini? Kamahuhutulö de koiwa mautumu! Mahomoa o hali de gënanga, nako ngohi tohimatoko o demo moi ma Jou Madutuino, ekola ngohi tohitararono okia naga moi mangale ma Jou Madutu, ekola ngohi tohingahu o abari ma Jou Madutuino, ekola ngohi todotoko.

⁷O musik mapakakaha kamahuhutulö de koiwa majiwa, hokä o sulingi deʼ o hitar, nako manot-not hodubukua hohigogule de madiai, sarakia o nyawa ihi öriki malugo okia ihigogule?

⁸Moiohi manonako mahomoa: Nako o trompet yawuwu yohabaranga, o nagona aha ima hidiai mangale parangi?

⁹Hoko genangoli de nia dagakunu mangale nitemo-temo de o demo i rupa-rupa ihö hëra-hëranga. Nako Riadodoto niakunu nihidemo o demo-demo gënanga de komadiaiua, komoiua ö o nyawa yakunu imangarati okia Riadodoto notemoka. Ani demo-demo gënanga aha ihihanga koiwa madödogumu.

¹⁰O duniaka nënanga naga hokogënanga mangöe o bahasa, mä kamoiö de koiwa o demo-demo gënanga yongohamua o mangarati.

¹¹Mä nako ngohi tomamangaratiua bahasa o nyawa womatëngo wohidemo, o nyawa wohidemo-demo bahasa gënanga marupa o nyawa maporetino ngohino; hoko genangö ngohi unangika.

¹²Mangale ngini mahirete, ngohi tohiöriki ngini nionahihu duru niamäke o ngongike-ngongike ma Jou Madutu ai Womahino. Mä duru mal̄okuoka, kiani ngini nimahiaha mangale niapäke o kuata niä riwo o jemaat yodadi yotagi manga himangika.

¹³Hababu gënanga o nyawa yotemo-temo o demo ihëra-hëranga magoronaka, kiani yogahoko ma Jou Madutuika hupaya unangino ö wahi döaka mangale yakunu ihitararono okia ihidemoka gënanga.

¹⁴Hababu nako ngohi tomaniata de o demo ihëra-hëranga, tongohi ahi womaha igoungu imaniata, mä ahi dibanga ngohi imanaramua.

¹⁵Hoʼ, ngohi kokiani okia todiai? Nënanga ngohi aha tadiai: Ngohi aha tomaniata de tongohi ahiwomaha, mä ngohi aha tomaniatö de tongohi ahidibanga. Ngohi aha tonyanyi de tongohi ahiwomaha, mä ngohi tomau tonyanyi ö de tongohi ahidibanga.

¹⁶Hababu nako Riadodoto nitemo tarima kasi ma Jou Madutuika de niawomaha dika, deʼ naga o nyawa mahomoa imangaratiua o demo i hëra-hëranga ma Jou Madutu ai Womahino gënanga, o nyawa gënanga wakunua wotemo, ”Ngohi tohigoungu” aniniata sukur gënanga; karana ünanga wohi örikua okia Riadodoto notemoka.

¹⁷Ngaroka nia niata tarima kasi ma Jouika gënanga duru koharahai, mä o niata gënanga kautuö de koiwa mabaraguna o nyawa mahomoaika.

¹⁸Ngohi totarimakasi ma Jou Madutuika, hababu ngohi mahirete takunu totemo-temo irupa-rupa o demo ihëra-hëranga magoronaka, toholoi ngaro de Riadodoto mata-mata.

¹⁹Mä, o doomu-doomu mahidogoronaka mangale iwihuba ma Jou, ngohi iholoi toigo tapäke o demo motoa yakunu o nyawa imangarati, de tapäke o demo iribu-ribuhu ihëra-hëranga magoronaka de o nyawa i mangaratiua. Ngohi i holoi toigo hokogënanga hupaya ngohi takunu tädotoko o nyawa.

²⁰Roriadodoto! Uha niatibanga hokä o ngoha-ngohaka. O hali madorou magoronaka, kiani ngini tatapu hokä o ngohaka maiteteke. Mä nia dibanga magoronaka, kiani ngini nidadi o nyawa yobaluhoka.

²¹ Ma Jou Ai Demo ma Buku magoronaka itulihi hoko nënanga, ”O Jou wotemo, ’De o dodohanga o nyawa yotemo de o bahasa mahomoaino, Ngohi aha tatemo Ahi umatika nënanga. I goungu de o dodohanga o nyawa mahomoaino, Ngohi aha ta temo Ahi umatika; ngaro hokogënanga, önanga yoluku yoihene Ahi demo.’ ”

²²Hoʼ o ngongike mangale yotemo-temo de irupa-rupa o demo ihëra-hëranga ganga hokä o nonako mangale o nyawa yongaku-ngakua, igoungua o nyawa yongaku-ngaku. Deʼ o ngongike mangale ihi ngahu ma Jou Madutu aidatoro o nyawaika ganga o nonako mangale o nyawa yongaku-ngaku, koigoungua o nyawa yongaku-ngakuua.

²³Karana gënanga, nako hohiade o jemaat manga doomu magoronaka, o jemaat mata-mata yotemo-temo irupa-rupa o demo ihëra-hëranga magoronaka, daha yoböa o nyawa yamuruono naga maporetino, ekola o Haraniokaua manyawa, done o nyawa gënanga aha yatobote ngini initogohangoka mata-mata!

²⁴Mä nako Riadodoto mata-mata nihingahu o abari ma Jou Madutuino, daha woböa o nyawa womatëngo o Haraniokaua ekola o nyawa womatëngo maporetino, done o hali-o hali nihingahu Riadodoto mata-mata aha ihimatoko manga baradoha o nyawa gënanga deʼ yadiai ünanga aha wamäo aibaradoha.

²⁵O hali-o hali iiu-iunu aihininga magoronaka aha ihimatoko, hiädono ünanga aha wohitipokouku ai diri daha wihuba ma Jou Madutu. Unanga aha wongaku, i gou-goungu ma Jou Madutu naga ngini niahidogoronaka.

²⁶Hoʼ, o Roriadodoto, okia mamangarati gënanga? Nako ngini nima toomu mangale niwihuba ma Jou, naga yonyanyi, naga yodotoko, naga ihingahu okianaga moi ma Jou Madutuino, naga yotemo-temo de o demo ihëra-hëranga magoronaka, deʼ naga ihitararono okia ihidemo-demoka gënanga. Mä mata-mata gënanga kiani niadiai mangale yadotoko deʼ mangale o oa mata-mata.

²⁷Nako naga yomau yotemo-temo o demo i hëra-hëranga magoronaka, kiani yahinoto ekola duruke yowöe o nyawa yaruange dika imaka walimi. Deʼ kiani naga ihitararono okia ihidemoka o nyawa ihi o ade-adeoka gënanga.

²⁸Nako moiua yakunu ihitararono, o nyawa yotemo-temo o demo ihëra-hëranga magoronaka gënanga, kiani imarirïdi o doomu magoronaka gënanga. Mal̄aika önanga yotemo-temo manga hininga magoronaka dika ma Jou Madutuika.

²⁹O nyawa yahinoto ekola yaruange de manga abarioka ma Jou Madutuino kiani ihingahu o abari gënanga mahomoa kayatiba-tibangohi okia yotemo gënanga.

³⁰Mä nako hohiade o abari ma Jou Madutuino iböa o nyawa mahomoaika womatëngo wogogeruku o doomuoka gënanga, o nyawa magogiriaka yotemo-temo, kiani imatogumu.

³¹De madodagi hokogënanga, o Roriadodoto mata-mata, moi ipaha moi yakunu nihingahu o abari ma Jou Madutuino; hupaya mata-mata yakunu niatarima o dodötoko deʼ idadi iholoi ningaku.

³²O ngongike o Womahino mangale ihingahu o abari ma Jou Madutuino, yakunu yogöana ihidodiai o nyawa ihingahu-ngahu o abari gënanga.

³³Ma Jou Madutu ganga ma Jou Madutu aha woigo madatoro i rahai; Unanga ma Jou Madutu i goungua woigo i roruaeika. Hokä idadi ma Jou Madutu aijemaat magoronaka mata-mata,

³⁴o ngoheka kiani imarirïdi maöraha o jemaat imatoomu. Onanga yakunua yotemo-temo. Onanga yakunua yasö o tutuda; gënanga imamoteke de o agama matita.

³⁵Nako önanga yomau ihi öriki okia naga moi, önanga kiani yoleha gënanga manga rokatika o tauoka. Duru o mal̄eke nako o ngoheka momatëngo motemo-temo o jemaat madoomu magoronaka.

³⁶Boteka ma Jou Madutu aidemo iböa nginino? Ekola duga-duga nginika dika o demo gënanga ihingahu?

³⁷Nako naga o nyawa imäo to önanga manga ngongike mangale ihingahu o abari ma Jou Madutuino, ekola ünanga ai ngongike mahomoa ma Jou Madutu ai Womahino o nyawa gënanga kiani wohi öriki okia ngohi totulihi nënanga ganga o pareta ma Jouino.

³⁸Mä nako naga yatarimaua nënanga, uha nialegaika önanga.

³⁹Hababu gënanga, o Roriadodoto, nimahiaha mangale nihingahu o abari ma Jou Madutuino, mä uha niaduhunu o nyawa yomau yotemo-temo irupa-rupa o demo ihohëra-hëranga magoronaka.

⁴⁰Mä mata-mata kiani niadiai deʼ madatoro, de yaoa.