Read Tobelo O KORINTUS MADODIHIRAKA 15 Bible Online

O KORINTUS MADODIHIRAKA 15 - Tobelo bible

O KORINTUS MADODIHIRAKA 15

¹Deʼ orahanënanga, Roriadodoto, ngohi tomau ngini niohiningaoli o Abari ma Oa ma Jou Madutuino ngohi tinihingahuoka nginika kahuruonika. Ngini niatarima, deʼ niwi ngaku o Kristusika karana o Abari ma Oa gënanga.

²Nako ngini niasosö ibitumu okia ngohi tohi ngahuoka gënanga, done o Abari ma Oa gënanga ini hihalamati ngini; sowaliua nako riadodoto ningaku de koiwa mamangarati.

³ Okia ngohi tinihingahu o Roriadodotika nagala ngohiö tatarimaka. Duruhe mal̄okuoka, hokä itulihi Ma Jou Ai Demo ma Buku magoronaka, ngohi tinihingahu nginika o Kristus wohonenge karana tongone nanga baradoha;

⁴ de Unanga iwilungunoka, mä o wange hange ipaha iwihiwangokali. Genangö itulihi Ma Jou Ai Demo ma Buku magoronaka.

⁵ Ngohiö tinihingahu nginika o Kristus iwihi wango okali gënanga womahi matoko ö Ai diri o Petrusika, dahaino o rasul yangimoi de yahinotoika.

⁶Ipaha gënanga Unanga womahi matokoli Ai diri kamamoi iwininïka yaratuhu motoa iholoika. Yowöe-wöe o nyawa gënanga kayowangohi örahanënanga, duga-duga o nyawa yamuruononaga yohonengoka.

⁷Ipaha gënanga, o Kristus womahi matokoli Ai diri o Yakobusika deʼ aha o rasulika mata-mata.

⁸ Duru mabobobahaka, Unanga womahi matoko Ai diri ngohino ö — ngohi hokä o ngohaka imakil̄au ma örahauahi!

⁹ Ngohi nagala ma Jou airasul duru topoluluku. Ngohi ipatutua ihi hetongo o rasul, hababu ngohi taaniayaka ma Jou Madutu aijemaat.

¹⁰Mä karana Ai dora ma Jou Madutu ngohi todadi hokä öraha nënanga naga. Deʼ kaparahajaua ma Jou Madutu wohïhi apongo ngohi. De kangohila tomanarama iholoi tohauku de ngaro o rasul mata-mata mahomoa. Mä genanga tongohiua ahimanarama; gënanga ma Jou Madutu Ai dora mamanarama deʼ imakinïki womanarama de ngohi.

¹¹Hoʼ, o nagonaino ö ngini niatarima o Abari ma Oa gënanga — bote gënanga ngohino, ekola o rasul-rasul mahomoaino — gënanga idadiua o hababu. Duruhe mal̄okuoka ganga, ngomi mihi ngahu o Abari ma Oa gënanga, deʼ Riadodoto niangaku.

¹²Nako ngomi mihingahu gënanga o Kristus ganga wohonengoka de womomikoli, yadodoa naga niahidogoronaka yotemo o nyawa yohone-honenge aha yowango okauaoli?

¹³Nako itiai o nyawa yohone-honenge aha yowango okauaoli, gënanga mamangarati o Kristusö wohonengoka de womomikokaua.

¹⁴Deʼ nako hohiade o Kristus wohonenge de wowangokaua, okia-kiaua naga mabaraguna okia naga ngomi mihingahu, deʼ koiwali naga mabaraguna tingini niangongaku, hababu niangongaku gënanga okia-kiaua toënanga mahohol̄e.

¹⁵I holoi de gënanga inyata ngomi mielu-eluku mangale ma Jou Madutu, hababu ngomi mihingahu o Kristus wohonengoka ma ma Jou Madutu wihi momikokali, enahioko ma Jou Madutu wihi wangokaua Unanga — nako igoungu itiai o nyawa yohonengoka de yowangokaua!

¹⁶Hababu nako o nyawa yohone-honenge yahi wango okaua, o Kristusö wohonengoka de iwihi wangokaua.

¹⁷Deʼ nako o Kristus iwihi wangokaua done niangongaku duga-duga o hayali märërë; gënanga mamangarati ngini kao baradoha magoronakahi deʼ kautuö de koiwa nianganono.

¹⁸Gënanga mamangaratioli o Haranioka manyawa yohone-honengoka, toönangö koiwa manga ngonganono.

¹⁹Nako tongone nanga nganono o Kristusika mabatingi katongone nanga wowango o duniaka nënanga dika, done o umati o nyawa o duniaka nënanga mata-mata, ngonela duru hobodito!

²⁰Mä inyata o Kristus wohonenge de wowangokali. Nenangala idadi o roriwo o nyawa yohone-honengoka aha yahiwangokali.

²¹Hababu o honenge iwohama o dunia magoronaka wadiai o nyawa womatëngo, hoko genangö yohonengoka de yowangokali yahidöaka o nyawaika de wadiai o nyawa womatëngoli.

²²Hokä sarakia o nyawa mata-mata yohonenge karana o rimoi de o Adam, hoko genangö mata-mata aha yahi wango karana o rimoi de o Kristus.

²³Mä moi-moi aha yahiwango imoteke o hidoku: madodihiraka o Kristus; damä maduruino maöraha Unanga woböali, yanïki o hidoku o nyawa iwohama toma Kristus ainyawa madutu.

²⁴Ipaha gënanga idadi o kiamati. Maöraha gënanga o Kristus wapareta hagala o popareta, hagala o kuaha deʼ hagala o kuata; daha Unanga ahao wohilapahi Ai kuaha hokä o koano, ma Jou Madutuika, tongone nanga Ama.

²⁵ O Kristus kiani gila-gila wopareta hiädono ma Jou Madutu wadiai o Kristus aihaturu mata-mata iwihigihene o Kristusika.

²⁶O haturu duru mabobaha aha wautumu ganga o honenge.

²⁷ Ma Jou Ai Demo ma Buku magoronaka itulihi hoko nënanga, ”Ma Jou Madutu wadiaioka hagala moi-moi iwihi gihene Unangika.” De madiai madungutu de ”hagala moi-moi” gënanga yongohamua ma Jou Madutu mahirete, wadiai hagala moi-moi gënanga iwihigihene o Kristusika.

²⁸Mä ipaha mata-mata wautumoka o Kristus ai pareta matimioka, ma Unanga mahirete enagënanga ma Jou Madutu ai Ngohaka, aha womahikauku Ai diri ma Jou Madutuika, wadiaioka hagala mata-mata iwihigihene Unangika. Ma Jou Madutu mahireteö aha wapareta mata-mata.

²⁹Nako o nyawa yohone-honenge yahi wangookauaoli, yadodoa naga o nyawa yäohiki mangale o nyawa yohone-honenge? Okia mangale önanga yodiai o hali gënanga? Nako igoungu o nyawa yohone-honenge kautuö de koiwa aha yahiwangokali, mangale okia önanga yodiai o hali gënanga?

³⁰Deʼ midodoali ngomi mimau mio himanga o huha öraha mahigetongo?

³¹O Roriadodoto! O wange mahi getongo ngohi tatäna o hangihara karana ngohi ahi hininga i lamoko mangale niawowango hababu ngini ningakuoka o Kristus Yesusika, tongone nanga Jou.

³² Nako gënanga duga-duga o nyawaka de yaino dika, okia mautumu ngohino mangale tomanarama mahauku matero-tero talawani o aiwani ihohatera, o Efesus mabereraka nënanga? Nako igoungu o nyawa yohonengoka yomomikokaua, aa, iholoi yaoa ngone hanïki o demo hiade nënanga: ”Niaino ngone hol̄omo de hokere deʼ homahi sosanangi, hababu yarehe ngone ahaö hohonenge.”

³³Uha initipu! O dodiawo itotorou yadadidorou, o hininga mabiaha maoa-oa.

³⁴Nimamäo öraha nënanga, deʼ uhali nidiai o baradoha. Duru de madiai ngini kiani inimal̄eke, hababu niahidogoronaka naga iwinäkouahi ma Jou Madutu.

³⁵Marai naga yoleha, ”Sarakiaë, o nyawa yohone-honenge yahi wangookali? O röehe sarakiaë yahidöaka onangika, yahiwangokali önanga ipahaino?”

³⁶Duru kania bodo! Nako Riadodoto nidatomo o gihihi o tonaka magoronaka, o gihihi gënanga aha iwangoua, nako o gihihi gënanga ihira ihonengua.

³⁷Deʼ o gihihi Riadodoto nadatomo o tonaka magoronaka gënanga — marai o gandum magihihi ekola o gihihi mahomoa — gënanga ganga o gihihi mamuidika, idodato-datomo komata-mataua damä aha iwango.

³⁸Ma Jou Madutu mahirete aha wohidöaka o gihihi kagënanga marupa, imoteke Ai lolegaka yaoa mangale idato-datomo gënanga. Mangale moi-moi marupa o gihihi, ma Jou Madutu wohidöaka marupa idato-datomo moi-moi.

³⁹O dodadi-dodadi maröehe de majiwaka mata-mataua imakadäene. O nyawa toënanga maröehe haramoi, o aiwani-aiwani to enangö maröehe haramoioli; o totaleo-o totaleo maröehe haramoiokali, deʼ o nawoko-o nawoko haramoiokali maröehe.

⁴⁰Hoko gënangoli de o dodadi-dodadi o dihangoka deʼ o dodadi o duniaka. O dodadi-dodadi o dihangoka moi-moi toënanga makaramata mahirete, deʼ o dodadi-dodadi o duniakaö hokogënangoli.

⁴¹O wange mahailoa imahowono de o mede mahailoa. O murumu-o murumö toënanga mamulia mahirete. O murumu dika gënanga moi-moi ö ima kokohowono mamulia.

⁴²Damä hokogënanga mahali de o nyawa yohone-honengoka yahiwango okaoli. O röehe o lungunoka gënanga ganga o röehe yakunu imel̄a, mä o röehe ihiwangookaoli, ganga o röehe iyakunua iwedere.

⁴³Maöraha o röehe gënanga yalungunoka, o röehe gënanga itorou de ibole; mä maöraha ënanga ihiwangookaoli, ënanga ganga o röehe irahai deʼ ikuata.

⁴⁴Maöraha yalungunoka, o röehe gënanga o röehe o duniaino; mä i paha iwango okali, o röehe gënanga o röehe ma Jou Madutu ai Womaha ihidöaka. Naga o röehe o duniaino, naga ö o röehe ma Jou Madutuino.

⁴⁵ Ma Jou Ai Demo ma Buku magoronaka i tulihi hoko nënanga, ”O nyawa madodihiraka, enagënanga o Adam, wodadi o dodadi iwango-wango,” mä o Adam mabobahaka ganga o Womaha ihidöaka o ngango.

⁴⁶Iböa iholoi ihira ganga o röehe, o rohaniua. O rohani iböa ituruino.

⁴⁷O Adam wohira-hira iwihidadi o tonakino, mä o Adam mahinotoka Ai ahali o horogauku.

⁴⁸O nyawa o duniaino nënanga ganga hokä o Adam wohira-hira, iwihidadi o tonakino, mä o horoga manyawa ganga hokä Unanga woböa-böa o horogauku.

⁴⁹Hokä sarakia ngone öraha nënanga ganga hokä o Adam iwihidadadi o tonakino, ma damä ngone aha hodadi hokä Unanga o horogauku gënanga.

⁵⁰Ahi dungutu ngohi, o Roriadodoto, enagënanga: o röehe ihi dadi o awunu deʼ o akemino, yakunua iwohama ma Jou Madutu ai Dunia ma Hungika; deʼ o röehe yakunu ihonenge iyakunua idadi ikakali.

⁵¹ Niohohininga o rahasia nënanga: Mata-mataua ngone aha hohonenge, mä ngone mata-mata aha inangali.

⁵²O hali gënanga aha itodokanino idadi holako dadawi, maöraha o trompet yawuwu duruhe mabobahaka. Hababu maöraha yoihene o trompet mailingi gënanga, o nyawa yohonengoka aha yahiwangookaoli de o röehe i kokakali, deʼ ngone mata-mata aha inangali.

⁵³Tongone nanga röehe yakunu ihonenge nënanga, kiani itagali de o röehe iyakunua ihonenge, deʼ o röehe o duniaino kiani yatagali de o röehe o horogauku.

⁵⁴ Nako o röehe yakunu ihonenge yatagalioka de o röehe yakunua ihonenge, deʼ o röehe o duniaino yatagalioka de o röehe o horogauku, örahagënanga dahao idadi okia itulihoka Ma Jou Ai Demo ma Buku magoronaka, ”O honenge ihohihangoka; o utumu yadonoka!”

⁵⁵ ”Hei, honenge, kiaka ani utumu? Hei honenge, kiaka ani biha?”

⁵⁶O honenge mabiha enagënanga o baradoha, deʼ o baradoha ma kuaha ihidagi yanïki o agama matita.

⁵⁷Mä sukur ma Jou Madutuika; Unanga wonahidöakoka ngoneino o utumu itilakuru o Yesus Kristus tongone nanga Jou!

⁵⁸Hababu gënanga, o Roriadodoto tinihohininga, kiani ngini nikuata deʼ nibitumu. Nimanarama hoko genangika mangale ma Jou de nia gou-goungu, hababu ngini nihi öriki mata-mata ngini nia momanaramoka mangale ma Jou, aha kaparahajaua.