Read Tobelo O KORINTUS MADODIHIRAKA 16 Bible Online

O KORINTUS MADODIHIRAKA 16 - Tobelo bible

O KORINTUS MADODIHIRAKA 16

¹ Orahanënanga mangale o tiwi ngini nimau niahiriwo nimahi koka Haraniokaika, ngohi tinihibehehongo hupaya ngini niadiai imamoteke ohidumutu ngohi tohi döakoka o jemaat-jemaatika o Galatia madaeraoka.

²O wange mahira o minggu mahi getongo, kiani Riadodoto mata-mata niatingaka o tiwi, moi-moi imoteke de niamamäke. Niagogono o tiwi gënanga hiädono ngohi toböa, hupaya maöraha gënanga iparaluokaua niatoomu.

³Damä nako ngohi toböa, ngohi aha tahuloko o nyawa ngini nirimoioka. Ngohi aha tahidöaka onangika o hurata mangongotaka, hupaya önanga yao o roriwo matiwi gënanga o Yerusalemika.

⁴Deʼ nako niapulono kayaoa ngohiö toiki dede önanga, de ngohi aha toiki mimakinïki dede önanga.

⁵ Ngohi aha tinitailako ngini nako tatilakuroka o Makedonia, hababu ngohi ahimau tatilakuru dokengika.

⁶Iyakunu idadi ngohi aha togogerohi jai-jai dede ngini, done hodumamäta maöraha madekana. Ipaha gënanga ngini yakunu nihiriwo ngohi tohigila-gila ahidodagi o ngï moiikali.

⁷Ngohi toluku tinitailako ngini iti totuluika dika. Nako ma Jou wohihigumal̄a, ngohi toigo togogere utu i tedekana dede ngini.

⁸ Orahagënanga ngohi aha togogere nenangoka o Efesus mabereraka, hiädono o Pentakosta mawange.

⁹Oraha mangöe nenangokadau mangale o manarama-manarama ifofaidä, ngaroka o nyawa manga ngöe ö yalawani.

¹⁰ Nako o Timotius waika, niwitarima ünanga nihidodiai hupaya ünanga wamäo wosanangi niahidogoronaka, hababu ünanga hokä ngohioli womanarama mangale ma Jou.

¹¹Uha hiädono naga iwihikauku ünanga. Niwiriwo ünanga hupaya ünanga wakunu wohigila-gila aidodagi womakilioro ngohino de aihalamati, hababu ngohi tidamä aiböa de o roriadodoto mahomoa.

¹²Mangale tongone nanga riadodoto o Apolos, mamuruono naga iböto ngohi titemoka ünanga, hupaya ünanga imakinïki de o roriadodoto mahomoa yoiki initailako ngini. Mä unanga wamäo wongakuuahi ünanga kiani woiki örahanënanga. Mä damä nako naga o öraha, marai ünanga aha waika.

¹³Kiani ngini nimahi dodiai de nibitumu niangango magoronaka, hokä o Haranioka manyawa. Nidiai okianaga nibarani deʼ idadi nikuata.

¹⁴Mata-mata ngini niadiai, niadiai de o dora.

¹⁵ Riadodoto marai niwinäko o Stefanus de aitau madol̄a; önanga madodihiraka yodadi Harani o Akhaya mabereraka. Onanga de manga hininga magahumu yomanarama ihilamoko mangale yaleleani ma Jou Madutu aiumati.

¹⁶Ngohi tinihititila de tagou-goungu hupaya ngini nianïki o nyawa hokä hokogënanga manga tutuda, de ika o nyawa mahomoahi imateke manarama moi de yoleleani ima kinïki önanga.

¹⁷Ngohi tosanangi mangale manga böa o Stefanus, o Fortunatus deʼ o Akhaikus. Onanga matero-tero ngini niadagali ngohino.

¹⁸Onanga yadiaioka tongohi ahihininga idadi imörene, hoko genangö önanga yamörene niahininga. O nyawa hokogënanga kiani nia horomati.

¹⁹ O jemaat-jemaat o Asia madaeraoka ihidingoto toönanga manga tabea nginika. O Akwila deʼ o ngo Priskila de o jemaat imatotoomu toönanga manga tauoka onangö ihidingoto o Haranioka matabea kohagiria.

²⁰Mata-mata riadodoto nenangoka ihidingoto manga tabea nginika. Nima teke tabea hokä o riadodoto o Haranioka.

²¹Nenangoka ngohi todogo ahitabea ngohi mahirete tatulihi: Ahi tabea ngohioka, o Paulus.

²²O nyawa iwi hiningaua ma Jou, mal̄aika ünanga wamäke o lolai! Maranatha — tongomi mia Jou, woböa!

²³Tanu ma Jou Yesus winihi barakati Riadodoto.

²⁴O dora ini tomoteke Riadodotika mata-mataika nirorimoi de o Kristus Yesus. Tongomi mia horomati, o Paulus