Read Tobelo O KORINTUS MADODIHIRAKA 2 Bible Online

O KORINTUS MADODIHIRAKA 2 - Tobelo bible

O KORINTUS MADODIHIRAKA 2

¹O Roriadodoto! Maöraha ngohi toböa nginika deʼ tinihi ngahu nginika mangale ma Jou Madutu ai datoro o dunia yanäko-näko owahi, ngohi tapäkeua o dunia nënanga mabarija ekola totemo-temo de o demo i kokurutil̄e.

²Hababu ngohi tomauoka hokokia madekana naga ngohi dede ngini, ngohi aha okia-kiaua tohihimanga, sowaliua imakorona o Yesus Kristus; maboboloi Unanga wohonengoka o saliboka.

³ Maöraha ngohi naga dede ngini, ngohi ihi bole deʼ tohawana tohaharoka.

⁴O abari ngohi tohi ado-adono nginika ngohi tohi adonua de o demo-demo nia hininga yadäe-däene imoteke o nyawa mabarija. Ngohi tohi ädono gënanga de madodagi ihi nyata i goungu ma Jou Madutu ai Womaha ikuaha.

⁵Ngohi todiai hoko gënanga, hupaya nia ngongaku o Kristusika nihi hol̄eua o nyawa mabarija, mä nihi hol̄e de ma Jou Madutu ai kuaha.

⁶Ngaro hoko gënanga, o nyawa manga rohani mawowango i oha-ohakoka mahi dogoronaka, igoungu ngohi toade-ade imakorona de o barija. Mä o barija nënanga o duniaua mabarija, ekola yokokuaha manga barija örahanënanga, manga kuaha gënanga aha ihihanga.

⁷O barija ngohi tohingahu-ngahu gënanga ganga o barija ma Jou Madutuino. O barija gënanga o dunia ihiörikua, o dunia nënanga kaidadiö de kowahi ma Jou Madutu wasadiaka mangale ngone nanga utumu.

⁸O nyawa moiuaö yokokuahaino öraha nënanga ihiöriki mangale o barija gënanga. Hababu hohiade önanga ihiorikoka, marai önanga aha iwisalibua ma Jou womomulia gënanga.

⁹ I idulu yaino o hali gënanga nagala hokä itulihoka Ma Jou Ai Demo ma Buku magoronaka, ”Okia komaiwahi yamäke ekola yoihene o nyawa, de komaiwahiö ipuda o nyawa manga hininga magoronaka, genangala wasadia ma Jou Madutu mangale o nyawa iwihohininga.”

¹⁰Mä ma Jou Madutu wohimatokoka ngoneino de madodohanga ai Womaha. Ma Jou Madutu ai Womaha gënanga yatailako hagala moi-moi, hiädono ma Jou Madutu aidatorika ngaro duruhe iö iu-iunu.

¹¹Hababu ihiöriki o nyawa moi-moi manga hininga madol̄a ganga o nyawa gënanga manga womaha mahirete, mode koigoungua? Hoko genangoli mangale ma Jou Madutu. Hanäko ma Jou Madutu aihininga madol̄a duga-duga ma Jou Madutu ai Womaha mahirete!

¹²Deʼ ngone inahi döakua o dunia nënanga mawomaha, ma o Womaha ma Jou Madutuino, hupaya ngone hohi öriki mata-mata ma Jou Madutu wonahi döakoka ngoneino.

¹³Hababu gënanga, nako ngomi mihitararono o hali-o hali yakorona ma Jou Madutu hagala o nyawaika onangoka ma Jou Madutu ai Womaha, ngomi mihingahua imoteke o nyawa mabarija, mä imoteke ma Jou Madutu ai Womaha madodötoko.

¹⁴O nyawa onangoka koiwa ma Jou Madutu ai Womaha, yakunua yatarima okia ihimatoko o Womaha gënanga. Hababu o nyawaka gënanga o hali-o hali iheto-hetongo hokä bodo moi dika. O nyawa gënanga yakunua imangarati, hababu o hali-o hali gënanga duga-duga yakunu yatakihiri hokä o rohani maparakara.

¹⁵O nyawa onangoka naga ma Jou Madutu ai Womaha yakunu yatakihiri hagala moi-moi, mä o nyawa moiö de koiwa manga haku iwi takihiri Unanga.

¹⁶ Ma Jou Ai Demo ma Buku magoronaka i tulihi, ”O nagona i hi öriki ma Jou ai dibanga? Deʼ o nagona iwihidaaere?” Ngonela nanga dibanga kaima däene de o Kristus.