Read Tobelo O KORINTUS MADODIHIRAKA 3 Bible Online

O KORINTUS MADODIHIRAKA 3 - Tobelo bible

O KORINTUS MADODIHIRAKA 3

¹Roriadodoto, de madiai ngohi takunua totemo-temo dede ngini, hokä o nyawa onangoka naga ma Jou Madutu ai Womaha. Ngohi duga-duga takunu totemo-temo dede ngini hokä o nyawa yowangohi imoteke o dunia manahihu; hokä o nyawa o ngoha-ngohakohi manga ngongaku o Kristusika.

² Kahuruonika ngohi takunu tinihi döaka duga-duga o ngohaka manga inomo, o nyawa yobalu-baluhokaua manga inomo; hababu ngini inimukuatuahi mangale o ngongaku. Mä oraha nenangö ngini kanikuatuahi mangale o ngongaku,

³karana ngini kaniwangohi imoteke hokä o nyawahi mabiaha. Hababu nako ngini o hininga nima teke rahaiua de kanima koka ngamohi moi de moika, mode koigoungua gënanga nihimatoko ngini kani wangohi imoteke o nyawa mabiaha, hokä o nyawa iwi näko-näkoua ma Jou Madutu?

⁴ Nako naga yotemo, ”Ngomi miwinïki o Paulus,” deʼ mahomoali yotemo, ”Ngohi tinïki o Apolos,” mode koigoungua gënanga ihi matoko Roriadodoto nia kalakuangoka hokä o dunia manyawa?

⁵Imoteke madiai o naguna gënanga o Apolos? Deʼ o naguna o Paulus? Ngomi duga-duga ma Jou Madutu miwilöleleani, minitudaka ngini mangale niwingaku o Kristus. Ngomi kamihidagi dika o manarama ma Jou womi hulo-hulokoka ngomino moi-moi.

⁶ Ngohi todatomo deʼ o Apolos wototuagi mä ma Jou Madutu mahirete wadiai mawowango idato-datomo.

⁷Hoʼ hohi amo-amoko ganga ma Jou Madutu, hababu Unanga wohiwango. Yodato-datomo deʼ yototuagi hohiamokua;

⁸hinotoö kaima däene. Moi-moi aha yatarima manga hewa imoteke manga kangela.

⁹Ngomi ganga manyawa mima kinïki mimanarama mangale ma Jou Madutu; deʼ ngini ganga hokä ma Jou Madutu aidumule. O Roriadodoto ganga hokä ma Jou Madutu aitau dika.

¹⁰De o sawaro ma Jou Madutu wohidöaka, ngohi hokä o tau yododiai duru yanäko-näko takelengaka mapondasi mangale o tau gënanga, deʼ o nyawa mahomoa ihigoko o tau o pondasi mal̄okuoka gënanga. O nyawa moi-moi kiani yohininga ihidodiai sarakia ünanga wohigoko o pondasi mal̄okuoka gënanga.

¹¹Hababu ma Jou Madutu mahirete wihigogeroka o Yesus Kristus hokä o pondasi genangö moi dika mangale o tau gënanga; koiwa naga o pondasi mahomoa.

¹²Naga ihigoko o pondasi mal̄okuoka gënanga de yapäke o gurasi, naga yapäke o haäka, naga yapäke o helewo i gogarade, nagaoli yapäke o gota, o momo madoolenge ekola o gandum maröehe madoolenge.

¹³O nyawa moi-moi aha yamäke mangamanarama, damä maöraha o Kristus woböa mahinotoka. Hababu o wange gënanga o uku aha yadiai la yamäke manga manarama moi-moi. O uku aha yauji deʼ ihi matoko marupa manga manarama gënanga.

¹⁴Nako o nyawa ihigoko o pondasi itotongohono yatuhuku de o uku mal̄okuoka gënanga, o nyawa gënanga aha yatarima manga hadia.

¹⁵Mä nako ai manarama yöuku, ünanga aha worugi; ünanga mahirete aha wohalamati, mä hokä o nyawa o ukuoka de wohupuino.

¹⁶ Nihi öriki Riadodoto ngini ganga ma Jou Madutu ai Tau? Deʼ ma Jou Madutu ai Womaha i gogere nginioka?

¹⁷Nako naga o nyawa yäkilianga ma Jou Madutu ai Tau, ma Jou Madutuö aha wäkilianga o nyawa gënanga. Hababu ma Jou Madutu ai Tau ganga wohi tingakoka mangale toma Jou Madutu dika, deʼ nginila matau gënanga.

¹⁸Uha o nyawa moiö niatipu niadiri mahirete. Nako naga o nyawa niahidogoronaka imamäo manga diri yobarija imoteke o dunia nënanga maduduga, o nyawa gënanga kokiani womadadi wobodo, hupaya ünanga igou-goungu wodadi wobarija.

¹⁹ Hababu yähetongo yobarija mangale o dunia, ganga yobodo ma Jou Madutu ai lolegaka. Ma Jou Ai Demo ma Buku magoronaka itulihi, ”Ma Jou Madutu wätagoko o nyawa yobobarija to önanga mahirete manga sawaro i totorou magoronaka.”

²⁰ Nagaö itulihi hoko nënanga, ”Ma Jou wohi öriki o nyawa yobobarija manga dibanga ganga o dibanga koiwa mabaraguna.”

²¹Karana gënanga, uha o nyawa moiö niagora-goraka o nyawa, hababu hagala mata-mata nihidöakoka idadi tingini madutu:

²²o Paulus, o Apolos, o Petrus, o dunia nënanga, o wowango deʼ o honenge, öraha nënanga, ekola maöraha aha iböa, hagala mata-mata ganga katingini.

²³Deʼ ngini ganga toma Kristus, deʼ o Kristus toma Jou Madutu.