Read Tobelo O KORINTUS MADODIHIRAKA 4 Bible Online

O KORINTUS MADODIHIRAKA 4 - Tobelo bible

O KORINTUS MADODIHIRAKA 4

¹Nimipulono ngomi hokä o Kristus ai löleleani, mimahimoku mihi ngahu ma Jou Madutu aidato-datoro o dunia ihiorikuahi.

²Madodihiraka yogahoko yolöleleaniino, enagënanga ünanga wosetia ai tuangika.

³Mangale ngohi, idadiua o loleha okia ngini ekola o nagona dika niatibangö mangale ahidiri. Mä okia ngohi tatibanga imakorona ahidiri mahireteö idadiua o loleha.

⁴Ngohi ta mäoua tahowono o hali okiadika magoronaka, magenanga koigoungua manyonyata ngohi igoungu tahowonua. Ma Jou mahirete wohitantu ngohi tahowono ekola kowali.

⁵Hababu gënanga, karana ma örahauahi, uha ngini tai-taiti nihitantu o nyawa moi yahowono ekola kowali. Niodamä hiädono ma Jou woböa daha. Unanga aha wahelenga mata-mata o rahasia iö iu-iunu o huhutu magoronaka. Unanga aha wakilianga mata-mata o dungutu ihidukumuku o nyawa manga hininga magoronaka. Maöraha gënanga dahao o nyawa moi-moi yatarima ma Jou Madutuino o higiriri ipö patu-patutu.

⁶O Roriadodoto! Mangale tingini niaparalu, ngohi tomihikoronaka mata-mata gënanga o Apolosika de ahidirino mahirete. Madungutu hupaya tongomi mia duladaino gënanga ngini yakunu nima dotoko okia mangarati o demo, ”Nimahi jojö nanga naga madatorika.” De hokogënanga koiwa o nyawa moiö nginino yakunu niwihi amo-amoko womatëngo, daha niahikauku mahomoa.

⁷O nagona inidiai o Roriadodoto noholoi de o nyawa mahomoa? Mode koigoungua hagala moi-moio Roriadodoto niatarima ma Jou Madutuino? Hoʼ, yadodoa hö nimau nimahi lamoko niadiri, matero-tero okianaga Roriadodotoka gënanga koigoungua okianaga moi inihi döakino?

⁸Igoungua ngini okia-kiakaua nioparalu! Ngini nikayaka! Ngini nidadioka o koano! Deʼ ngomi kowali. Hokokia marahai nako igou-goungu ngini nidadioka o koano, hupaya ngomi yakunu mipareta dede ngini.

⁹Karana imoteke ahi damäke, ngomi o rasul-rasul, ma Jou Madutu womihi dadioka hokä yawuni-wuningi o nyawa manga himangoka deʼ o malaekat-malaekat. Ngomi hokä o nyawa mibaragunaua imi gelenga o hukumanga imihohonenge o nyawa yowöe-wöe manga himangoka, deʼ imihi uli-ulili o dunia.

¹⁰Karana o Kristus, ngomi ganga o nyawa bodo, deʼ ngini o Haranioka manyawa yososawaro! Ngomi mibole, ngini nikuata! Ngomi imi hohedu, deʼ ngini inituboil̄e!

¹¹Hi ädono öraha nënanga ngomi miaohana o habirokata deʼ o kiriti madudungu; tongomi miapakeanga igögogere kamia röehokahi dika; o nyawa imi hangihara ngomi; tongomi miangï koiwa mangale mima rïdi;

¹² ngomi mia kobongo idofaeoka, mangale mihi lingiri miawowango o wangeil̄e. Maöraha okia ngomi imihilai, ngomi miabalahi de o barakati; nako ngomi imianiaya, ngomi misabari;

¹³nako o nyawa imidiai o romanga madorou, ngomi mihibalahi de mia demo imuti-mutiti. Ngomi miholoiua de o wal̄e o duniaka nënanga; hiädono öraha nënanga imipulono ngomi hokä o dunia mapeseke.

¹⁴Ngohi totulihi nënanga nginika todiaiua la ngini inimal̄eke, mä mangale tinihitiari ngini hokä, ahi ngoha-ngohaka mahirete.

¹⁵Hababu ngohilä idadi tingini nia ama, ngaroka iyakunu idadi hokä o Haranioka manyawa, tingini nia guru yaribuhu ngimoi iböto. Nia wowango magoronaka hokä o nyawa kamoi de o Kristus, ngohi todadi o ama nginika, karana ngohi toao o Abari ma Oa mangale o Kristus nginika.

¹⁶ Hababu gënanga ngohi togahoko tagoungu, hupaya ngini nianïki tongohi ahi dulada.

¹⁷Mangale gënanga ngohi tihulokoka o Timotius nginika. Hokä o Kristus winïnïki, ünanga kaima däene hokä tongohi ahingohaka mahirete tihohininga. Unanga o ngohaka yakunu hingaku. Damä ünanga aha winihi ngahu mangale o wowango madodagi ngohi tanï nïkoka o Kristus tingaku ipahaino, enagënanga o wowango madodagi ngohi tä dotokoka o jemaat yogetongo kiakaö dika.

¹⁸O nyawa yamuruono naga niahidogoronaka yodadioka manga hininga ikurutil̄e, hababu önanga yatobote ngohi aha toböaua nginika.

¹⁹Mä nako ma Jou wohihigumal̄a ngohi, ahao toböa dika nginika itedekanokaua de. Damä ma örahoka gënanga ngohi ahao ta mäke okia yakunu yodiai o nyawa manga hininga ikokurutil̄e gënanga; koigoungua önanga duga-duga kamanga demo dika.

²⁰Karana nako ma Jou Madutu wapareta o nyawa moi-moi manga wowango, o hali gënanga ihinyata o nyawa gënanga manga wowango makuata, igoungua mangale manga demo-demo.

²¹Hoʼ niairiki dika okia ngini iholoi nioigo! Bote ngini niomau ngohi toböa mangale tinidotoko ngini de mabuturungoka, ekola ngohi toböa tinidotoko de maboleoka de o dora de o hayanga?