Read Tobelo O KORINTUS MADODIHIRAKA 6 Bible Online

O KORINTUS MADODIHIRAKA 6 - Tobelo bible

O KORINTUS MADODIHIRAKA 6

¹Yadodoa naga niahidogoronaka ngini yobarani yoiki o hakimika iwinäko-näkoua ma Jou Madutu, mangale yakalaki manga riadodoto o ngongaku moi, nako ünanga imateke ributu de airiadodoto gënanga? Yadodoa ho ünanga wogahokua ma Jou Madutu aiumati yatiai o parakara gënanga?

²Okia hongini nihiorikua ma Jou Madutu aiumati aha yatailako o dunia nënanga? Hoʼ, nako igoungu ngini aha niatailako o dunia nënanga, boteka ngini niakunua niatiai o doomu yototailako maparakara-parakara okiaua yadäe-däene?

³Boteka ngini nihiorikua ngone aha hatailako malaekat-malaekat? Iholoioli o parakara-parakara o wowango o wange higeto-getongo!

⁴Manako ipuda o parakara-parakara hokogënanga, boteka ngini nia aoka o nyawaika kautuö de koiwa manga pangkati o jemaat magoronaka?

⁵Igoungu inahi mal̄eke! Marai naga niahidogoronaka o nyawa amomoi iyaoaka manga barija mangale yatiai o ributu o roriadodoto nia hidogoronaka nimahiteke ho Harani!

⁶Mä i idulu yaino, o Haranioka manyawa moi yoiki o Harani manyawaikaua mangale yakalaki manga riadodotika yoho Harani!

⁷Uha nioiki nimateke kalaki o nyawa yoho Harani okaikaua; de naga o ributu-ributu niahidogoronakaö marupa o rugi moi nginika. Iholoi yaoa ngini inidiai iadilua ekola inihirugi!

⁸Mä ngini mahirete kanio dogo niadiai iadilua o nyawa mahomoaika. Nginiö mahirete niahirugi o nyawa mahomoa. Deʼ genanga ngini nidiai karana kao roriadodotika o ngongaku moi!

⁹Nihiorikoka ngini, o nyawa yamote-motekua ma Jou Madutu aimau aha yodadiua ma Jou Madutu aiumati? Uha initipu! O nyawa yododiai o safarune, o nyawa yahuba-huba o gomanga, yohowo-howono, yodiai o manarama imal̄e-mal̄eke imahiteke ngongoheka de imahi kokanauru,

¹⁰yotohi-tohiki, yokokal̄il̄u, yotoba daluku, yoigo yadiai o romanga madorou o nyawa mahomoaika, yahïhihihi o nyawa mahomoa — mata-mata o nyawa hokogënanga aha yakunua yodadi ma Jou Madutu aiumati.

¹¹Kahuruono yamuruono naga niahidogoronaka manga manarama hoko gënanga. Mä orahanënanga ngini ihimatoko nitebini o baradohaka. Ngini nidadioka toma Jou Madutu woma dinga-dingakoka. Ngini nimateke oa-oakali de ma Jou Madutu, karana ngini niwi ngaku ma Jou Yesus Kristusika deʼ karana o Womaha makuaha tongone nanga Jou Madutuino.

¹² Naga yotemo o nyawa moi-moi yakunu yodiai hagala moi-moi. Mä mangale ngohi mata-mataua ibaraguna. Hoʼ ngaroka ngohi yakunu tadiai okiadika, mä ngohi toluku tamal̄aika ahi diri yakuaha okia dika.

¹³Nagaö yotemo o inomo ganga mangale o mämata, deʼ o mämata yasadiaka mangale o inomo. Mahinoto ma Jou Madutu aha wahohihanga. O nyawa maröehe yakunua yapäke mangale yadiai o rimoi de isosafarune, mä duga-duga mangale iwileleani ma Jou. Deʼ ma Jou aha wapaliara o röehe gënanga.

¹⁴Ma Jou Madutu wihi wangoka ma Jou Yesus o honengino, hokogenangö ma Jou Madutu aha wonahi wango ngone de Ai kuaha.

¹⁵O Roriadodoto nihiöriki niaröehe ganga o Kristus ai röehe mahidoku-hidoku. Hoʼ boteka yakunu ngohi tal̄ë o Kristus ai l̄ou de Ai giama de tadiai yososafarune manga l̄ou de manga giama? Hakali-kali kowali!

¹⁶ Ekola mudukua ngini nihi orikuahi o nyawa imakaganu de o nyawa moi yohohabäräka, yodadi moi de yohohabäräka gënanga! Hababu Ma Jou Ai Demo ma Buku magoronaka itulihi, ”Hinoto idadi kamoi.”

¹⁷Mä o nyawa ihi rimoioka manga diri de ma Jou, ma Jou ai Womaha de o nyawa gënanga manga womaha idadi moi.

¹⁸Nimahi kurutika o manarama-o manarama isosafarune. Hababu mata-mata o baradoha mahomoa yododiai o nyawa, i dadi o nyawa gënanga manga röehe maporetoka. Mä o nyawa yododiai i sosafarune, mamangarati yodiai o baradoha manga röeheika mahirete.

¹⁹ Ngini kiani nihiöriki niaröehe ganga ma Jou Madutu ai Womaha mangï igogere. O Womaha gënanga i gogere ngini niadol̄aka. De ma Jou Madutu mahirete winihi döaka Ai Womaha gënanga nginika. Niadiri Roriadodoto kotinginiua. Gënanga katoma Jou Madutu.

²⁰Ma Jou Madutu wini ijaka ngini de wofanguoka wamata-mataka. Hababu gënanga, niapäke niaröehe hokogënanga marupa hiädono iwihimulia ma Jou Madutu.