Read Tobelo O KORINTUS MADODIHIRAKA 7 Bible Online

O KORINTUS MADODIHIRAKA 7 - Tobelo bible

O KORINTUS MADODIHIRAKA 7

¹Oraha nënanga ngohi tomau toade-ade imakorona o hali ngini niahetongo niahurata magoronaka. Nako o nauru womatëngo wokawingua, gënanga yaoa.

²Mä hupaya inidäenua o cocoba mangale nidiai o hali-o hali ipatu-patutua, iholoi yaoa o nau-nauru moi-moi de manga hekata mahirete deʼ o ngongoheka moi-moi de manga rokata mahirete.

³O rokata kiani wohiganapu aileleani hokä o rokata ngoi hekatika, deʼ o hekata kiani mohiganapu amileleani hokä o hekata ami rokatika; moi-moi ihiganapu manga leleani moi de moika.

⁴O hekata momakuahaua amiröehe mahirete; mawakuaha amiröehe ganga amirokata. Hoko genangoli o rokata womakuahaua airöehe mahirete; makuaha airöehe ganga ngoihekata.

⁵Hokä o hekata de o rokata moi de moi uha imaki tingaka ikurutika. Iti o öraha mahuhutulu kai yakunu, iti ahali yahohinoto yorimoioka. De hokogënanga moi-moi yakunu imaniata de koiwa madagahanga. Mä maduruino, kiani ngini nimaiduloli de nirimoiokali hokä o hekata de o rokata. Nako hokogenangua, ngini aha yakunu nianïki o womaha madorou mabobaja, karana ngini nikuatua nia tumungu nianahihu.

⁶Ngohi totemo nënanga igoungua hokä o pareta, mä hokä o hitiari.

⁷Imoteke madiai ngohi iholoi toigo, nako mata-mata o nyawa yodadi hokä ngohi. Mä moi-moi hatarimaka o ngongike ma Jou Madutuino yödinga-dingakoka. Womatëngo toünanga aingongike nënanga, mahomoa manga ngongike gënanga.

⁸O nyawa yokawi-kawinguahi deʼ o ngoheka yofäo-fäokaika, nënanga tongohi ahi hitiari: Iholoi yaoa Riadodoto nitatapu niwango nima tëngoka hokä ngohi.

⁹Mä nako o Roriadodoto niyakunua niatumungu nianahihu Roriadodoto koaho nikawingi. Hababu de nianahihu irama, iholoi yaoa o Roriadodoto nikawingi.

¹⁰ Mahimanga önanga yokawi-kawingokaika, nënanga tongohi ahipareta: (Imoteke madiai ngohiua tohidöaka o pareta nënanga, mä ma Jou.) O ngoheka momatëngo mokawingoka uha mimal̄a amirokata.

¹¹Mä nako münanga mimal̄aka, münanga kiani motatapu koiwa amirokata, ekola migilio amirokatika. Deʼ o rokata womatëngo yakunua womi oluku ngoi hekata.

¹²De mahohomoaika, tongohi ahi hitiari enagënanga: — nënanga tongohi mahirete ahihitiari, ma Jouua — nako o Haranioka manyawa moi womahekata o ngoheka momatëngo mingakua o Kristusika, deʼ ngoi hekata gënanga morimoi mangale mowango dede ünanga, o nyawa gënanga yakunua womi oluku ngoi hekata.

¹³Deʼ nako o Haranioka manyawa mangoheka momatëngo moma rokata o nyawa womatëngo wingakua o Kristusika, deʼ amirokata worimoi mangale wowango dede münanga, o hekata gënanga yakunua mioluku amirokata.

¹⁴Hababu o rokata wongaku-ngakua iwihigumal̄a mangale wodadi ma Jou Madutu ai umati manyawa, karana wokawingi de o hekata modadioka toma Jou Madutu aiumati. Hokogenangö o hekata mongaku-ngakua imi higumal̄a mangale modadi ma Jou Madutu aiumati, karana mokawi-kawingi de o rokata wodadioka ma Jou Madutu aiumati. Nako hokogenangua, maraioka toönanga manga ngoha-ngohaka hokä o kafiroka mangoha-ngohaka, enahioko o ngoha-ngohaka gënanga yaetongo hokä ma Jou Madutu aiumati.

¹⁵Mä nako o nyawa yongaku-ngakuua gënanga yamal̄a manga hekata ekola manga rokata yoho Harani, uha niatumungu önanga. O hali nënanga magoronaka Roriadodoto o ngoheka ekola o Roriadodoto o nauru gënanga nilapahioka, hababu ma Jou Madutu womau hupaya o Roriadodoto niwango de nidame-dame.

¹⁶Karana o Roriadodoto hokä o hekata — nongakuoka ma Jouika — sarakia o Roriadodoto yakunu nohi öriki de madiai o Roriadodoto nakunua nihihalamati ani rokata? Hoko gënangoli o Roriadodoto hokä o rokata o Haranioka, sarakia o Roriadodoto yakunu nohi öriki de madiai o Roriadodoto nakunua nomi hihalamati ngoni hekata?

¹⁷Kokiani moi-moi yatatoro manga wowango imamoteke ma Jou aitutuda hokä wohitantuoka ma Jou Madutu onangika maöraha ma Jou Madutu wä ahoko mangale iwingaku Unangika. Gënanga o datoro ngohi todotokoka o jemaat yogetongo.

¹⁸Hohiade, nako o nyawa moi imahunaka maöraha ünanga watarima ma Jou Madutu aigogahoko, mauhali o nyawa gënanga wohidailako waehe o huna gënanga manonako-nonako. Hoko genangö nako o nyawa moi iwihunauahi maöraha ünanga watarima ma Jou Madutu aigogahoko, uhali o nyawa gënanga wogahoko la iwihuna.

¹⁹Hababu inïki o huna madatoro ekola inïkikua, hinoto ima tero okia-kiaua mamangarati. Ka duruhe iholoi enagënanga hamoteke ma Jou Madutu aipareta.

²⁰Kokiani o nyawa moi-moi yotatapu yowango imoteke hokä maöraha ünanga watarima ma Jou Madutu aigogahoko.

²¹Nako maöraha o Roriadodoto ini ahoko, o Roriadodoto ganga o nyawa o gilaongo moi, ngarouha o Roriadodoto nima huha-huha niatibanga o hali gënanga. Mä damä nako o Roriadodoto niamäke öraha mangale idadi nilapahi, niapäke öraha gënanga.

²²Hababu o gilaongo moi wongakuoka ma Jouika, ganga ma Jou ainyawa yololapahioka. Deʼ o nyawa moi wololapahioka wongakuoka ma Jouika, ganga o Kristus aigilaongo.

²³Ma Jou Madutu woni ijaka Riadodoto deʼ wohida fanguoka kamamoi. Karana gënanga uha Riadodoto nohilapahi anidiri mangale idadi o nyawa imagilaongo.

²⁴Hoʼ, o Roriadodoto, sarakia ö niarupa maöraha iniahoko, kokiani Riadodoto nitatapu niwango hoko gënanga kamoi de ma Jou Madutu.

²⁵Oraha nënanga imakorona o nyawa yokawi-kawinguahi. I makorona o hali gënanga, okia-kiaua ngohi totarima o pareta ma Jouino. Mä hokä o nyawa karana ma Jou aidora i oma-omanga i patutu niangaku, ngohi tomau tinihi döaka tongohi ahihitiari.

²⁶Homahininga hagala o huha yatapal̄u örahanënanga, ngohi tamäo iholoi yaoa nako o nyawa yotatapu yanonu o ngango, hokä madodagi örahanënanga.

²⁷Nako Riadodoto de ngonihekatoka, uha nohidailako nomahipipidili de ngonihekatoka gënanga. Nako Riadodoto koiwahi ngonihekata, ngarouha nolingiri o hekata.

²⁸Mä nako Riadodoto nokawingi, gënanga o baradohaua. Hoko gënangoli nako o nyawa momatëngo o moholehe mokawingi, koiwa mamangarati münanga mobaradoha. Duga-duga, önanga yokawi-kawingoka gënanga aha yorihimanga o huha mangöe. Deʼ ngohi tomau Riadodoto inihi tingaka o huha-huha gënanga.

²⁹Ahi dungutu ngohi hokonënanga, Roriadodoto: Tongone nanga öraha iwöeokauaoli. Muläenge de örahanënanga, o nyawa moi-moi de manga heka-hekatoka kokiani yowango matero-tero ünanga ngoihekata koiwa;

³⁰o nyawa yoari, wowango matero-tero ünanga aihininga ihuhaua; o nyawa yoiete, matero-tero ünanga womorenua; o nyawa imaijainoka, matero-tero okia-kiaua unangoka;

³¹deʼ o nyawa imahi ngerouku o dunia mahali-hali magoronaka, kokiani matero-tero ünanga iwiruaeua o hali-o hali gënanga. Hababu i tedekanokauaoli o dunia nënanga, toënanga madodagi hokä örahanënanga, aha ihihanga!

³²Ngohi toigo hupaya Riadodoto nihuhaua. O nyawa koiwa manga hekata aha yatoömuoka manga dibanga o hali-o hali imakorona ma Jouika, karana ünanga woigo ma Jou wosanangi.

³³Mä o nyawa de mangahekatoka aha mangöe yatibanga o hali-hali o duniaka nënanga, hababu ünanga womau ngoihekata amihininga wasanangi;

³⁴mahasili aihininga iregu-reguoka. O ngoheka momatëngo koiwa amirokata, ekola o nyawa momatëngo o ngohaka o moholehe, aha mangöe matibanga o hali-o hali imakorona o Jou, hababu münanga moigo hupaya amijiwa de amiröehe idadi toma Jou Madutu. Mä o nyawa o ngoheka momatëngo de amirokatoka, ami dibanga matoomuoka o dunia mahali-halika nënanga, hababu münanga moigo amirokata aihininga masanangi.

³⁵Ngohi totulihi mata-mata nënanga mangale ngini mahirete niaoa. Igoungua de ahi dungutu tiniduhunu nënanga deʼ tiniduhunu gënanga. Ke ngohi toigo duga-duga hupaya Riadodoto niadiai madiai de i patutu, deʼ hupaya Riadodoto yakunu niatoomuoka niadibanga ma Jouika.

³⁶Nako o nyawa momoi yamäo yakunua yadiai ipatu-patutu ngoi mamaneika, de nako wakunua watumungu ainahihu, deʼ unanga wamäo kianiwokawingi de o moholehe gënanga, mal̄aika ünanga wodiai okia wamäo yaoa. Unanga wobaradohaua, nako önanga yokawingi.

³⁷Mä nako o nyawa momoi yaputuhoka, manga hininga magoronaka mangale wokawingiua de ngoimamane de aiputuhu gënanga iwipakisaua, wodiai gënanga iyaoa, iti ünanga woputurungu wadiai.

³⁸Madiai, o nyawa yokawi-kawingi manga manarama iyaoa, de o nyawa yokawi-kawingua i holoi yaoaoli manga manarama.

³⁹O ngoheka momatëngo mokawingoka, imal̄ikutu de amirokata maöraha madekana amirokata kawowangohi. Manako amirokata wohonengoka, o ngoheka gënanga koiwaka madagahanga ngaro mokawingoli ma, o nyawa nagona mi igo; iti ahali mokawingi o Haranioka makawingi.

⁴⁰Mä munanga aha iholoi moutumu, nako mokawingokauaoli. Gënanga tongohi ahidamäke mahirete, mä ngohi tamäo ngohi tohidemo gënanga ganga de ma Jou Madutu ai Womaha makuaha.