Read Tobelo O KORINTUS MADODIHIRAKA 9 Bible Online

O KORINTUS MADODIHIRAKA 9 - Tobelo bible

O KORINTUS MADODIHIRAKA 9

¹Koigoungua ngohi o nyawa yololapahi? Koigoungua ngohi o rasul? Bote ngohi komaiwahi timäke o Yesus, tongone nanga Jou? Bote ngini koigoungua tongohi ahi manarama mahasili mangale ma Jou?

²Nako o nyawa mahomoa ö yoluku yongaku ngohi hokä o rasul, duru keihutulu ngini nimangaku gënanga! Hababu niawowango hokä o Haranioka manyawa ganga manyonyata ngohi o rasul moi.

³Nako o nyawa ihingelo ngohi, ngohi aha tohaluhu hoko nënanga:

⁴Bote ngohi ahihakuua tatarima o ngol̄omo deʼ o ngokere karana tongohi ahimanarama?

⁵Bote ngohi ahihakuua tomagao o hekata momatëngo o Haranioka mima nïki de ngohi ahidodagi magoronaka, hokä yadiaioka ma Jou Yesus airoriadodoto deʼ o rasul-rasul mahomoa, iwohama o Petrus?

⁶Ekola duga-duga o Barnabas deʼ ngohi dika mahirete imihi patutu mimahi lingiri mia inomo o wange mahigetongo?

⁷Koiwa o tentara manyawa yabalajanga manga diri mahirete poparangi manga hidogoronaka! Koiwa yototumule yodatomo o angguru manga dumuleoka daha yaol̄omua o angguru mahasili o dumuleino gënanga. Koiwa o gogöana yopö paliara o duba, daha yaokerua mahuhu mateongo o duba-dubaino gënanga!

⁸Ngohi tohingahu gënanga igoungua duga-duga imoteke biaha idä dadioka, imäke-mäke o wange mahigetongo, mä hababu Buku i Tebi-tebini ihingahuoka o hali genangö.

⁹ O Musa ai Buku magoronaka itulihi, ”O hapi magogiria yadoko-doko o gandum mangale yarero o gandum mamui magobeoka, uha yarawiti mauru.” O hapi iholoi wohininga ma Jou Madutu?

¹⁰Ekola gënanga madungutu mangale ngone? Igoungu gënanga itulihi mangale ngone. Hababu o nyawa yomomanarama o dumule deʼ o nyawa yatebi-tebini manga gandum yakunoka yomanarama de manga nganono mangale yatarima o hidoku moi manga manarama, mahasilino.

¹¹ Ngomi midatomoka o rohani magihihi niangango magoronaka. Manako ngomi miautuku o barakati-barakati mahasili o duniaka nginino, boteka gënanga mamangarati ngomi minidotagahoko iwöeholi nginino?

¹²Nako o nyawa mahomoa manga haku yonganono nënanga nginino, koigoungua ngomi iholoioli miahaku ngaro de önanga? Mä ngohi tapäkeuahi o haku gënanga. Iidulu yaino nako ipuda o hali moi yatatoko ohingahu o Abari ma Oa mangale o Kristus, iholoi ngohi toigo tatagongo hagala mata-mata.

¹³ Riadodoto marai nihiöriki o nyawa yomanarama ma Jou Madutu ai Tau magoronaka, toönanga manga inomo yatarima ma Jou Madutu ai Tauino. De o nyawa yalöleleani o huhuba ihihöhuba-huba mangïoka, yamäke o hidoku moi o huhubaino ihi ho huba-huba genangoka.

¹⁴ Hoko gënangoli ma Jou wohi tantuoka o nyawa ihio abari o Abari ma Oa gënanga kiani yamäke manga ngol̄omo o wange higetongo o abarino gënanga.

¹⁵Mä o haku-haku gënanga kamoiö de komaiwahi ngohi tapäke. Deʼ ngohi totulihi o hurata nënanga ahidungutuaö hupaya o hali-hali gënanga niadiai o öraha nënanga ngohino. Nako ihihanga o hali kiaka ngohi tohiamo-amoko iholoi yaoa ngohi tohonenge.

¹⁶Hababu, nako gënanga duga-duga o hali tohingahu o Abari ma Oa ma Jou Madutuino, done ngohi ahihakuua tomahi amo-amoko, hababu ma Jou Madutu wohihi paretaka ngohi mangale ënanga tadiai. Tobodito ngohi, nako ngohi tohingahua o Abari ma Oa gënanga!

¹⁷Hohiade ngohi tohidagi o manarama gënanga imoteke tongohi ahimau mahirete, done ngohi yakunu tonganono mangale tamäke o hewa. Mä ngohi tohingahu o Abari ma Oa gënanga hababu karana ihihuloko. Ngohi ma Jou Madutu wohihi manarama mangale tadiai gënanga.

¹⁸Nako hokogënanga, tongohi ahihewa okia? Nënanga mahewa: ngohi yakunu tohingahu o Abari ma Oa gënanga tahitubuhoua o nyawa moiö mangale ihihibalajanga ngohi, karana ngohi todotagahokua ahihaku-haku hokä tohi ngahu-ngahu o Abari ma Oa gënanga.

¹⁹Ngohi nënanga moiua manga gilaongo; ngohi tolapahioka. Ngaroka hokogënanga, ngohi tohidadioka ahidiri ngohi nënanga o gilaongo o nyawa mata-mataika. Ngohi tadiai gënanga hupaya ngohi iyakunu tautumu hokokia yakunu mangangöe o nyawa mangale o Kristus.

²⁰O Yahudi manyawaika, ngohi tomadiai hokä o Yahudioka manyawa hupaya ngohi iyakunu tautumu o Yahudioka mangale o Kristus. O nyawa yowango yamote-moteke o Musa ai titaika, ngohi tomadiai matero-tero ngohi ihiliko de o titaika gënanga, ngaro ngohi de madiai ihilikoua enangika. Ngohi todiai gënanga hupaya ngohi iyakunu tätauru önanga yodadi o Kristus iwininïki.

²¹O Yahudi manyawaikaua, ngohi tomadiai hokä o nyawa moi o Yahudiokaua, yowango o Musa aitita maporetoka. Ngohi todiai gënanga hupaya ngohi yakunu tätauru önanga yodadi o Kristus iwininïki. Mä genanga koiwa mangarati ngohi tohingounua ma Jou Madutu aipareta-paretaika; ma ngohi igoungu ihikuaha aipareta-pareta o Kristus.

²²O nyawa manga ngongaku ikuat-kuatua manga hidogoronaka, ngohiö tomadiai hokä o nyawa moi manga ngongaku ikuat-kuatua hupaya ngohi yakunu tätauru önanga yodadi o Kristus iwi ninïki. De madipoko, ngohi todadi hagala okiadika mangale mata-mata o nyawa hupaya de mangëkomo sarakiaö dika, ngohi yakunu tahihalamati o hidoku moi onangino.

²³Mata-mata gënanga ngohi tadiai mangale o Abari ma Oa ma Jou Madutuino gënanga, hupaya ngohiö ihihi barakati.

²⁴Riadodoto marai nihiöriki o rorebe magoronaka mata-mata yononinïki, ima kokipopäta, mä duga-duga o nyawa moi yatarima o hadia. Mahababu gënanga nimapopäta hokogënanga marupa, hiädono Riadodoto niatarima niahadia.

²⁵O nyawa moi-moi magogiria imahibiaha magoronaka, yatumungu manga diri hagala o hali magoronaka. Unanga wadiai gënanga karana ünanga woigo iwihigule de o bunga ipoporomuoka hababu wohihira, enagënanga o bunga de madataitoka aha imaai. Mä ngone nënanga hatumungu nanga diri hagala o hali magoronaka, karana ngone honahihu inahigule de o bunga ipoporomu aha imaaiua.

²⁶Hababu gënanga ngohi tomapopäta de ahimeta madodiaika. Hokä o rorebe imakokudubu magoronaka, ngohi totidingi tohabarangua.

²⁷Ngohi tohigumal̄aika ahiröehe ihihi biaha de makuata, hiädono ngohi takunu takuaha. Ngohi todiai gënanga, hababu ngohi toluku hiädono idadi ngohi tä ahokoka o nyawa mahomoa yonïki o rorebe gënanga magoronaka, ngohi mahirete ihi tila.