Read Tobelo O KORINTUS MAHINOTOKA 1 Bible Online

O KORINTUS MAHINOTOKA 1 - Tobelo bible

O KORINTUS MAHINOTOKA 1

¹ Roriadodoto ma Jou Madutu aijemaat o Korintusoka deʼ mata-mata ma Jou Madutu aiumati o Akhaya madaera mata-mataika. Ngohi, o Paulus, o Yesus Kristus airasul wohigoraka imoteke aimau ma Jou Madutu, mimanïki de tongone nanga riadodoto o Timotius,

²tonganono tanu ma Jou Madutu tongone nanga Ama de o Jou Yesus Kristus winihidöaka o barakati deʼ o lolä nginika.

³O puji ma Jou Madutu, o Ama tongone nanga Jou Yesus Kristusino. Unanga o Ama aihininga duru maoa-oa deʼ Unanga ma Jou Madutu wohidöa-döaka o hininga makuata o nyawaika.

⁴Unanga wohikuata tongomi miahininga o huha mahigeto-getongo magoronaka ngomi miaohana, la de o kuata ngomi miatarima ma Jou Madutuino gënanga, ngomiö yakunu miahikuata manga hininga o nyawa mata-mata o huha magoronaka.

⁵O hangihara-o hangihara waoha-ohana o Kristus mangöeoka ngomiö miaohana. Deʼ mangale o Kristusoli, tongomi miahininga duru ihikuata.

⁶Nako ngomi miaohana o huha, ganga gënanga mangale yakuata niahininga, karana niahalamati. Nako tongomi miahininga ikuatoka, tinginiö maimoteke ikuata hiädono ngini nidadi nibarani o huha magoronaka hokä ngomiö miatagongoka.

⁷Ngomi mingaku hokogenangika deʼ midodatoua mangale Riadodoto, hababu ngomi mihiöriki nginiö niatagongo o hangihara dede ngomi. Deʼ karana gënanga nginiö inihikuata homakinïki dede ngomi.

⁸ Roriadodoto! Ngomi mimau ngini nihiöriki mangale o huha ngomi miaöhana o Asia madaeraka. O hangihara ngomi miatagongo gënanga, itubuhoholi ngomi imibänga, hiädono koiwaka miangonganono ngomi aha miwangoli;

⁹miamäo matero-tero imihukumanga o honenge iputuhoka. Mä o hali gënanga idadi hupaya uha ngomi mimahitangono miadiri makuatika mahirete, mä kiani ma Jou Madutuika o nyawa yohonengoka de wahiwö wango-wango.

¹⁰Unanga womihihalamatoka ngomi o huha o honenge i lamo-amokoino gënanga. Deʼ Unangö aha womihihalamati ngomi damä, o wange nanga hima-himangika, hababu ka Unangika dika ngomi mimahinganono.

¹¹Ngomi mingaku de nianiata mangale ngomi, ma Jou Madutu aha womihihalamatoli ngomi o huhaino. Ma Jou Madutu wöigo womihibarakati ngomi hokä mabobaluhu mangale nianiata mangöe mangale ngomi, deʼ karana gënanga o nyawa mangangöe aha yotemo tarimakasi ma Jou Madutuika.

¹²Ngomi miahininga ilamoko, hababu de miahininga iboberehi ngomi miangaku mahirete mangale tongomi miangango o duniaka nënanga — duru mal̄okuoka nangadodohanga ngomi dede ngini Riadodoto — ngomi mihidagioka de miahininga rikoto deʼ itebini. Ngomi miadiai gënanga, koigoungua de nyawa mabarija, mä de o kuata ma Jou Madutu womihidöaka.

¹³Ngomi mitulihi nginika ganga duga-duga mangale o hali-o hali ngini yakunu niabasa deʼ nimamangarati. Orahanënanga ngini nimangaratiua de madiai mangale ngomi, mä ngohi tonganono damä ngini aha igou-goungu nimangarati mangale ngomi. De hokogënanga, damä maöraha ma Jou Yesus woböa, ngini aha niahininga ilamoko mangale ngomi, hokä sarakia de ngomiö miahininga ilamoko mangale ngini.

¹⁵Karana o ngongaku gënanga ngohi kamahirahi tatatoroka mangale tinilega ngini la ngini niamäke o barakati o lape hinoto.

¹⁶ Ngohi ahidungutu tinilega ngini ahidodagi magoronaka o Makedoniaika, deʼ tomakilioro ahidodagi magoronaka, ngohi tiniduluoli nginika, hupaya ngini yakunu nihiriwo tongohi ahidodagi tohigila-gila o Yudeaika.

¹⁷Mä ngohi tatagalioka ahidungutu gënanga; aa, boteka gënanga ihimatoko tongohi ahihininga itatapua? Maöraha todiai o datoro, boteka ngohi todiai o datoro imoteke tongohi ahimau mahirete, botino totemo, ”Ia”, deʼ botino ”Kowali”?

¹⁸De ma Jou Madutu yakunu hingaku, tongohi ahi jaji Riadodotika koigoungua ”Ia” deʼ ”Kowali”.

¹⁹ Hababu o Yesus Kristus, ma Jou Madutu ai Ngohaka, inihingahuoka nginika o Silas, o Timotius, deʼ ngohi mahirete igoungua o nyawa ”Ia” deʼ ”Kowali”. Idulu yaino Unanga marupa ma bobaluhu ”Ia” ma Jou Madutuino.

²⁰Hababu de madodagi ma Jou Madutu wotemoka ”Ia” Ai jajika mata-mata. De matiti gënanga, ngone hotemo ”Amin” ma Jou Madutuika karana o Yesus Kristus. Ngomi midiai hokogënanga hupaya ma Jou Madutu iwihimulia.

²¹Ma Jou Madutu mahirete wadiai ngomi de Riadodoto hobitumu horimoi de o Kristus; Unangö wonairikoka ngone mangale Toünanga aidiri woma dingakoka.

²²Mangale gënanga ma Jou Madutu wohigoungoka, ngone nënanga Toünanga madutu, deʼ wonahidöaka ai Womaha tongone nangahininga magoronaka, hokä o roriwo ënanga aha inahi döaka ngoneino mata-mata inahijäjajioka.

²³Ma Jou Madutu tongohi ahihakihi — hababu Unanga wohiöriki tongohi ahihininga madol̄a — ngohi tadadiua toiki o Korintusika, karana ngohi töluku tadiai niahininga tahuha.

²⁴Ngohi tiniributua ngini mangale okia kiani ngini niangaku, hababu ngini duru niwingakuoka o Kristusika. Ngohi duga-duga homateke manarama moi la ngini iholoi niutumu.