Read Tobelo O KORINTUS MAHINOTOKA 10 Bible Online

O KORINTUS MAHINOTOKA 10 - Tobelo bible

O KORINTUS MAHINOTOKA 10

¹Orahanënanga ngohi, o Paulus, tomau tohihimanga kianaga utu nginika. Ngohi nënanga, imoteke o nyawa manga demo, tokeöko nako homateke rihimangino de ngini, mä tonauru nako homaki tingaka ikurutika. Aa, karana o Kristus aihininga mabole-bole deʼ aihininga maoa,

²ngohi togahoko de magoungu, uha nihidiai ngohi hiädono todiai iputurungu nginika damä nako ngohi toböa. Hababu ngohi ahidungutu mangale totemo tohitotiaika o nyawaika yotemo ngomi mimanarama de miadumutu idodunia.

³Igoungu ngomi kamiwangohi o dunia magoronaka, mä ngomi mikuparangiua mihihol̄e o dunia madumutu.

⁴O daë-o daë ngomi miapäke tongomi mia parangi magoronaka o dunia inoua nënanga madaë, mä ma Jou Madutu aidaë makuaha. De o daë-o daë gënanga ngomi miawederoka manga dadatoko-da datoko; ngomi mimäbarihi o ributu-ributu,

⁵deʼ miakilianga o bebeno o mehele o hininga magurutil̄e ihigoko mangale yalawani okianaga yanäko-näko mangale ma Jou Madutu. Ngomi miautumu o nyawa manga dibanga de miadiai önanga imaponu o Kristusika.

⁶Deʼ nako ngini niahingounoka mata-mata, ngomi mima hidiaioka mangale miahukumu o nyawa mata-mata manga hingounu koiwa-iwa.

⁷Kokiani ngini niamäo niawowango de madiaioka. Nako o nyawa moi-moi imangaku önanga to Kristus, kokiani ünanga wohidaaere aidiri mahirete deʼ wamäo ngomiö to Kristus hokä ünanga.

⁸Ngohi ihimal̄ekua nako ngohi kiani iholoi iwöe ahihininga ilamoko o kuaha ma Jou wohidöa-döakoka ngomino, hababu imihidöaka o kuaha gënanga mangale inihimomiki ngini, igoungua mangale miakilianga.

⁹Ngohi toluku ngini niamäo ngohi tinihikoka modongo ngini de tongohi ahihura-hurata.

¹⁰O nyawa yato, ”O Paulus aihura-hurata gënanga wohitotararonino deʼ makumati, mä nako ünanga mahirete naga nangahidogoronaka womaboleuku, deʼ aidemo-demo okia-kiaua mamangarati!”

¹¹O nyawa hoko gënanga kokiani imamäo nako ngomi naga niahidogoronaka, ngomi midiai itiai hokä okia ngomi mitulihi miahura-hurata magoronaka.

¹²Maraioka dika ngomi mibaraniua mihitotero ekola mihigogere miadiri mimaketero de o nyawa imapulono manga diri ikurutil̄e. Hokokia önanga manga bodo! Onanga imadiai o duduga mahirete deʼ yatakihiri manga diri mahirete de o duduga gënanga.

¹³Ngomi hokogenangua. Nako ngomi miahininga mihilamoko, ngomi miatilakurua mabatingi. Ngomi migogere miamanarama madaera mabati-batingi magoronaka ma Jou Madutu wohitotatapuoka mangale ngomi. Deʼ ngini iwohama o daera gënanga magoronaka.

¹⁴Hoʼ, maöraha ngomi minilega ngini deʼ miao o Abari ma Oa mangale o Kristus nginika, igoungu ngomi mihupua de tongomi miamanarama madaera mabati-batingino.

¹⁵Ngomi mihigiririua miadiri mangale o nyawa mahomoa manga manarama naga o batingi maporetoka wohitotatapuoka ma Jou Madutu mangale ngomi. Ikiliorino ngomi mitatapu mabatingi-batingi magoronaka ma Jou Madutu wohitatapuoka mangale ngomi deʼ minganono ngini iholoi niwingaku o Kristusika, hupaya ngomi yakunu miadiai o manarama iholoi ilamoko niahidogoronaka.

¹⁶De hokogënanga ngomiö yakunu mihiabari o Abari ma Oa gënanga o berera-berera mahomoaika, de koiwa kiani mimahi lamoko mia diri mangale o manarama miadodiaioka o nyawa mahomoa manga leleani madaeraoka.

¹⁷ Ma Jou Ai Demo ma Buku magoronaka itulihi, ”O nyawa yomau manga hininga ihilamoko okianaga moi, kokiani manga hininga ihilamoko, okia ma Jou Madutu wadodiaioka.”

¹⁸Hababu o nyawa duru yähigiriri o nyawa ganga ma Jou wahi giriri, igoungua o nyawa ihigogiriri manga diri mahirete.